ಪಾದರಾಯನಪುರದಲ್ಲಿ ನಡೆದದ್ದೇನು? ಏನು ಕಾರಣ? ಸಂಪೂರ್ಣ ವಿವರಗಳು

ಪಾದರಾಯನಪುರದಲ್ಲಿ ನಡೆದ ಘಟನೆಯ ಕುರಿತು ನಾನುಗೌರಿ.ಕಾಂ ಹಲವರಿಂದ ಮಾಹಿತಿ ಸಂಗ್ರಹಿಸಿ ಸಮಸ್ಯೆಯನ್ನು ವಸ್ತುನಿಷ್ಠವಾಗಿ ನೋಡುವ ಪ್ರಯತ್ನ ಮಾಡಿತು

6

ಭಾನುವಾರ ರಾತ್ರಿ ಬೆಂಗಳೂರಿನ ಪಾದರಾಯನಪುರ ದಲ್ಲಿ ನಡೆದ ಘಟನೆಯು ಇಂದು ಬೆಳಿಗ್ಗೆಯಿಂದ ಕನ್ನಡದ ಸುದ್ದಿ ಚಾನೆಲ್‍ಗಳಲ್ಲಿ ದೊಡ್ಡ ಸದ್ದು ಮಾಡುತ್ತಿದೆ. ಘಟನೆಯನ್ನು ಪಕ್ಷಾತೀತವಾಗಿ ಎಲ್ಲರೂ ಖಂಡಿಸಿದ್ದಾರೆ ಮತ್ತು ಆಡಳಿತ ಪಕ್ಷದ ಶಾಸಕರು, ಸಚಿವರು ಮತ್ತು ಬೆಂಬಲಿಗರು ತೀವ್ರ ರೀತಿಯಲ್ಲಿ ಪ್ರತಿಕ್ರಿಯಿಸಿದ್ದಾರೆ. ರಾತ್ರಿಯೇ ಸ್ಥಳಕ್ಕೆ ಬೆಂಗಳೂರು ನಗರದ ಪೊಲೀಸ್ ಕಮೀಷನರ್ ಹೋಗಿದ್ದರು, ಸಂಬಂಧಿಸಿದ ಡಿಸಿಪಿ ಸಂಪೂರ್ಣವಾಗಿ ಅಲ್ಲಿಯೇ ಇದ್ದರು ಮತ್ತು ಬೆಳಿಗ್ಗೆ ಸ್ವತಃ ಗೃಹ ಸಚಿವ ಬಸವರಾಜ ಬೊಮ್ಮಾಯಿ ಭೇಟಿ ಕೊಟ್ಟು ಕಠಿಣ ಕ್ರಮಗಳನ್ನು ತೆಗೆದುಕೊಳ್ಳುವುದಾಗಿ ಹೇಳಿ ಬಂದಿದ್ದಾರೆ.


ಇಂದು ಬೆಳಿಗ್ಗೆಯ ಪತ್ರಿಕೆಗಳಲ್ಲಿ ಸ್ವತಃ ಪೊಲೀಸ್ ಕಮೀಷನರ್ ಭಾಸ್ಕರರಾವ್ ಅವರ ಹೇಳಿಕೆ ಬಂದಿದೆ. ‘ಶಂಕಿತರು ಗಲಾಟೆ ಮಾಡಿದ್ದು ಸರಿಯಲ್ಲ. ಗಲಾಟೆ ಮಾಡಿ ತಪ್ಪು ಮಾಡಿದ್ದಾರೆ. ತಪ್ಪಿತಸ್ಥರ ವಿರುದ್ಧ ಕಾನೂನು ಕ್ರಮ ಜರುಗಿಸಲಾಗುವುದು. ಗಲಾಟೆಯಲ್ಲಿ ಯಾವುದೇ ಅಧಿಕಾರಿಗಳ ಮೇಲೆ ಹಲ್ಲೆ ನಡೆದಿಲ್ಲ. ಸ್ಥಳದಲ್ಲಿ ಹೆಚ್ಚುವರಿ ಪೊಲೀಸರನ್ನು ನಿಯೋಜಿಸಿ, ಅಧಿಕಾರಿಗಳ ಕರ್ತವ್ಯಕ್ಕೆ ಅಡ್ಡಿಯಾಗದಂತೆ ನೋಡಿಕೊಳ್ಳಲಾಗುವುದು. ದಯವಿಟ್ಟು ಯಾರೂ ಈ ವಿಷಯವನ್ನು ರಾಜಕೀಯಗೊಳಿಸಬಾರದು’ ಎಂದು ವಿಜಯ ಕರ್ನಾಟಕದಲ್ಲಿ ವರದಿಯಾಗಿದೆ. ಆದರೆ, ಬೆಳಿಗ್ಗೆ ಸುಮಾರು 10 ಗಂಟೆಯ ಹೊತ್ತಿಗೆ ಘಟನೆಯ ಕುರಿತು ಮಾತನಾಡಿದ ಗೃಹಸಚಿವರು ‘ಪೊಲೀಸ್ ಸಿಬ್ಬಂದಿಯ ಮೇಲೂ ಹಲ್ಲೆ ನಡೆಯಿತು’ ಎಂದು ಹೇಳಿದರು. ಮಧ್ಯಾಹ್ನದ ಹೊತ್ತಿಗೆ ವಿವಿಧ ಕನ್ನಡ ನ್ಯೂಸ್ ಚಾನೆಲ್‍ಗಳಲ್ಲಿ ನರಮೇಧಕ್ಕೇ ತಯಾರಿ ನಡೆದಿತ್ತು ಎಂದು ಸುದ್ದಿ ಮಾಡಲಾಯಿತು.

ಈ ಹಿನ್ನೆಲೆಯಲ್ಲಿ ನಾನುಗೌರಿ.ಕಾಂನ ವತಿಯಿಂದ ಸಂಬಂಧಪಟ್ಟವರನ್ನು ಮಾತನಾಡಿಸಿ ವಿವರಗಳನ್ನು ಸಂಗ್ರಹಿಸಲಾಯಿತು. ಅದರ ಆಧಾರದ ಮೇಲೆ ಈ ವರದಿಯನ್ನು ಸಿದ್ಧಪಡಿಸಲಾಗಿದೆ.

ಬೆಂಗಳೂರಿನ ಕೊರೊನಾ ಹಾಟ್‍ಸ್ಪಾಟ್‍ಗಳಲ್ಲಿ ಪಾದರಾಯನಪುರವೂ ಒಂದು
ಬೆಂಗಳೂರಿನಲ್ಲಿ ರೆಡ್‍ಝೋನ್ ಎಂದು ಗುರುತಿಸಲಾಗಿರುವ ವಾರ್ಡ್‍ಗಳಲ್ಲಿ ಪಾದರಾಯನಪುರ ಒಂದು. ದೆಹಲಿಯ ತಬ್ಲಿಕ್ ಕಾರ್ಯಕ್ರಮಕ್ಕೆ ಹೋಗಿಬಂದ ಇಬ್ಬರು ಸೇರಿದಂತೆ ಒಟ್ಟು 18 ಜನ ಇಲ್ಲಿ ಕೊರೊನಾ ಸೋಂಕಿತರು ಪತ್ತೆಯಾಗಿದ್ದಾರೆ. 11 ಜನರು ಪತ್ತೆಯಾದ ನಂತರ ಏಪ್ರಿಲ್ 10ರಂದು ಪಾದರಾಯನಪುರ ಮತ್ತು ಪಕ್ಕದ ಬಾಪೂಜಿನಗರಗಳನ್ನು ಸಂಪೂರ್ಣ ಸೀಲ್‍ಡೌನ್ ಮಾಡಲಾಗಿತ್ತು. ಅಂದರೆ ಜನರು ಇಲ್ಲಿಂದ ಯಾರೂ ಹೊರಗೆ ಹೋಗುವಂತಿಲ್ಲ ಮತ್ತು ಹೊರಗಿನಿಂದ ಒಳಗೆ ಬರುವಂತಿಲ್ಲ ಆ ರೀತಿಯಲ್ಲಿ ರಸ್ತೆಗೆ ತಗಡಿನ ಉದ್ದದ ಶೀಟುಗಳನ್ನು ಬಿಗಿದು ನಿಲ್ಲಿಸಲಾಗಿತ್ತು. ಅಷ್ಟೇ ಅಲ್ಲದೇ ಪ್ರವೇಶಿಸುವ ಹಾಗೂ ಹೊರಗೆ ಹೋಗುವ ಜಾಗಗಳನ್ನು ಗುರುತಿಸಿ ಅಲ್ಲಿಗೆ ಪೊಲೀಸ್ ಕಾವಲೂ ಹಾಕಲಾಗಿತ್ತು.

ಅತೀ ಜನಸಂದಣಿಯ ಬಡವರ ವಾಸಪ್ರದೇಶದಲ್ಲಿನ ಸೀಲ್‍ಡೌನ್‍ನ ಸ್ವರೂಪ
ಈ ಪ್ರದೇಶದಲ್ಲಿ ಅತ್ಯಂತ ಬಡವರು ವಾಸಿಸುತ್ತಿದ್ದು, ಒಂದೇ ಇಕ್ಕಟ್ಟಾದ ಮನೆಯಲ್ಲಿ 10ರಿಂದ 15ಜನರವರೆಗೆ ವಾಸಿಸುತ್ತಾರೆ. ಹಾಗಾಗಿಯೇ ಏ.14ರ ಹೊತ್ತಿಗೆ ಗುರುತಿಸಲಾಗಿದ್ದ 7 ಕೇಸುಗಳಲ್ಲಿ 5 ಒಂದೇ ಕಟ್ಟಡದಲ್ಲಿ ವಾಸವಾಗಿದ್ದವರದ್ದಿತ್ತು. ಇಲ್ಲಿನ ಜನರಲ್ಲಿ ಆಯಾ ದಿನ ದುಡಿದು ಅಂದು ತಿನ್ನಬೇಕಾದ ಬಹಳ ಜನರಿದ್ದು, ಇಲ್ಲಿನ ಒಟ್ಟು ಜನಸಂಖ್ಯೆ ಸುಮಾರು 45,000 ಆಗಿದೆ. ಬಡವರು, ಕಡುಬಡವರಷ್ಟೇ ಅಲ್ಲದೇ ಅತ್ಯಂತ ಹೆಚ್ಚಿನ ಸಂಖ್ಯೆಯ ಅವಿದ್ಯಾವಂತರು ಇರುವ ಪ್ರದೇಶ ಇದು. ಇಲ್ಲಿನ ಕಾರ್ಪೋರೇಟರ್ ಇಮ್ರಾನ್ ಪಾಷಾ, ಈ ವಾರ್ಡ್ ಚಾಮರಾಜಪೇಟೆ ವಿಧಾನಸಭಾ ಕ್ಷೇತ್ರದ ವ್ಯಾಪ್ತಿಗೆ ಬರಲಿದ್ದು, ಅದರ ಶಾಸಕ ಜಮೀರ್ ಅಹಮದ್ ಖಾನ್ ಮತ್ತು ಬೆಂಗಳೂರು ಕೇಂದ್ರ ಲೋಕಸಭಾ ಕ್ಷೇತ್ರವಾದ ಇದರ ಸಂಸದ ಪಿ.ಸಿ.ಮೋಹನ್.
ಒಬ್ಬರೂ ಹೊರಗೆ ಹೋಗುವಂತಿಲ್ಲ ಮತ್ತು ಒಳಗೆ ಬರುವಂತಿಲ್ಲ ಎಂದಾಗಲೂ ಇಲ್ಲಿಯೇ ಇರುವವರಿಗೆ ಸೋಂಕು ಬರುವ ಸಾಧ್ಯತೆ ಇದ್ದೇ ಇರುತ್ತದೆಯಾಗಿ, ಏಪ್ರಿಲ್ 18ನೇ ತಾರೀಕು ಹೊಸದಾಗಿ 7 ಕೇಸುಗಳು ಪತ್ತೆಯಾಗಿವೆ. ಈ 7 ಜನರು ಹಿಂದೆ ಕೊರೊನಾ ಸೋಂಕು ಖಚಿತವಾಗಿದ್ದವರ ಪ್ರಾಥಮಿಕ ಸಂಪರ್ಕಗಳಾಗಿದ್ದು, ಅವರ ಸಂಪರ್ಕಗಳು ದ್ವಿತೀಯ ಸಂಪರ್ಕಗಳಾಗಿರುತ್ತಾರೆ. ಈಗ ಈ 7 ಜನರು ಸೋಂಕಿತರು ಎಂದಾಗಿದ್ದರಿಂದ ಈ ಹಿಂದೆ ದ್ವಿತೀಯ ಸಂಪರ್ಕಗಳಾಗಿದ್ದವರು ಪ್ರಾಥಮಿಕ ಸಂಪರ್ಕಗಳಾಗಿಬಿಡುತ್ತಾರೆ. ಆದ್ದರಿಂದ ಅವರನ್ನು ಕ್ವಾರಂಟೈನ್‍ನಲ್ಲಿಡಲು (ನಿಯೋಜಿತವಾದ ಆಸ್ಪತ್ರೆ ಅಥವಾ ಕಲ್ಯಾಣಮಂಟಪ ಅಥವಾ ಹೋಟೆಲ್‍ಗಳಲ್ಲಿ) ಕರೆದುಕೊಂಡು ಹೋಗುವುದು ಅಗತ್ಯ ಎಂದು ಸದ್ಯ ಅನುಸರಿಸಲಾಗುತ್ತಿರುವ ನಿಯಮಗಳು ಹೇಳುತ್ತವೆ.
ಸುಸೂತ್ರವಾಗಿಯೇ ಸಾಗುತ್ತಿದ್ದ ಕ್ವಾರಂಟೈನ್ ಮಾರ್ಚ್
ಇದೇ ರೀತಿಯಲ್ಲಿ ಹಿಂದೆಯೂ ಕ್ವಾರಂಟೈನ್‍ಗೆ ಕರೆದುಕೊಂಡು ಹೋಗಲಾಗಿದ್ದು, ಮೊದಲು 35, ನಂತರ 15, ನಂತರ 5 ಮತ್ತು ನಿನ್ನೆ 17 ಜನರನ್ನು ಅದೇ ರೀತಿ ಕರೆದುಕೊಂಡು ಹೋಗಲಾಗಿದೆ. ಆ ಸಂದರ್ಭಗಳಲ್ಲಿ ಸ್ಥಳೀಯ ಕಾರ್ಪೋರೇಟರ್ ಇಮ್ರಾನ್‍ಪಾಷಾ ಸಹಾ ಅಲ್ಲಿ ಇದ್ದು, ಅನುವು ಮಾಡಿಕೊಟ್ಟಿದ್ದಾರೆ. ಇಮ್ರಾನ್‍ಪಾಷಾ ಅವರ ಪ್ರಕಾರ ಭಯ, ಆತಂಕಗಳು ಆಗಲೂ ಜನರಿಗೆ ಇದ್ದವಾದರೂ ಯಾರೂ ಪ್ರತಿರೋಧ ತೋರಿರಲಿಲ್ಲ ಮತ್ತು ವೈದ್ಯಕೀಯ ಹಾಗೂ ಬಿಬಿಎಂಪಿ ಸಿಬ್ಬಂದಿಯ ಜೊತೆಗೆ ಸಹಕರಿಸಿದ್ದಾರೆ.

ಇದನ್ನೂ ಓದಿ: ಗಲಭೆಗೆ ಕಾರಣರಾದವರ ಮೇಲೆ ಕ್ರಮ ಕೈಗೊಳ್ಳಿ: ಡಿಕೆಶಿ

ಸೀಲ್‍ಡೌನ್‍ನ ಹತಾಶೆ, ನಮ್ಮ ಏರಿಯಾದ ಮೇಲೆಯೇ ಟಾರ್ಗೆಟ್ ಮಾಡಲಾಗುತ್ತಿದೆ ಮತ್ತು ಮುಸ್ಲಿಮರನ್ನು ಗುರಿ ಮಾಡಲಾಗುತ್ತಿದೆ ಎಂಬ ಭಾವನೆ ಇಲ್ಲಿ ಹಲವರಲ್ಲಿರುವುದು ವಾಸ್ತವ ಎಂದು ಈ ಪ್ರದೇಶದ ವಾಸಿಗಳು ಮತ್ತು ಇದರ ಜೊತೆಗೆ ಸಂಪರ್ಕ ಇರುವ ಕೆಲವು ಸಾಮಾಜಿಕ ಕಾರ್ಯಕರ್ತರು ಬಲವಾಗಿ ಭಾವಿಸುತ್ತಾರೆ. ಹಾಗೆಯೇ ಹೊರಗಿನಿಂದ ಯಾರೋ ಕೊಡುವ (ಬಿಬಿಎಂಪಿ ವತಿಯಿಂದ 3,500 ಮತ್ತು ಇಮ್ರಾನ್‍ಪಾಷಾ ಅವರ ವತಿಯಿಂದ 4000 ಆಹಾರದ ಕಿಟ್‍ಗಳನ್ನು ನೀಡಲಾಗಿದೆ ಎಂದು ಇಮ್ರಾನ್‍ಪಾಷಾ ಅವರು ಹೇಳಿದರು. ಅವರು ನೀಡಿದ ಕಿಟ್‍ಗಳು ತಲಾ 18 ಕೆ.ಜಿ. ದಿನಸಿ ಪದಾರ್ಥವನ್ನು ಹೊಂದಿದ್ದವು) ಆಹಾರದ ಕಿಟ್‍ಗಳ ಮೇಲೆ ಅವಲಂಬಿಸಿ ಬದುಕಬೇಕಾದ ಸ್ಥಿತಿ ಇದ್ದು, ಅದೂ ಸಹಾ ಆ ದೊಡ್ಡ ಕುಟುಂಬಗಳಿಗೆ ಸಾಕಾಗುತ್ತಿಲ್ಲ. ಬಿಬಿಎಂಪಿಯಿಂದ ಇನ್ನೂ ಕಡಿಮೆ ಕಿಟ್‍ಗಳನ್ನಷ್ಟೇ ನೀಡಲಾಗಿದೆ ಎಂದು ಸ್ಥಳೀಯ ಸಾಮಾಜಿಕ ಕಾರ್ಯಕರ್ತರೊಬ್ಬರು ಹೇಳಿದರು.

ದುರದೃಷ್ಟಕರವಾದ ಪಾದರಾಯನಪುರ ದ ನಸೀಬು
ಬಹುಪಾಲು ಮುಸ್ಲಿಂ ಪ್ರದೇಶಗಳಲ್ಲಿ ಶಿಕ್ಷಣದ ಮಟ್ಟ ಹೆಚ್ಚುತ್ತಿದೆ, ಮಧ್ಯಮವರ್ಗವು ಸ್ವಲ್ಪ ಮಟ್ಟಿಗಾದರೂ ಬೆಳೆದುನಿಂತಿದೆ. ಕೆಲವು ಸಾಮಾಜಿಕ ಸಂಘಟನೆಗಳೂ ಕೆಲಸ ಮಾಡುತ್ತವೆ. ಆದರೆ ಇವೆಲ್ಲವೂ ಕಡಿಮೆ ಬೆಳವಣಿಗೆ ಆಗಿರುವ ಪ್ರದೇಶಗಳಲ್ಲಿ ಪಾದರಾಯನಪುರವೂ ಒಂದು. ಜೊತೆಗೆ ಈ ಪ್ರದೇಶದಲ್ಲಿ (ನಿರ್ದಿಷ್ಟವಾಗಿ ನಿನ್ನೆ ಗಲಾಟೆ ನಡೆದ ಜಾಗದಲ್ಲಿ) ಕೆಲವು ಹುಡುಗರು/ಯುವಕರು ಗಾಂಜಾ ಮತ್ತು ಸಲ್ಯೂಷನ್ ಮೂಸುವ ಚಟವನ್ನು ಬೆಳೆಸಿಕೊಂಡಿದ್ದಾರೆ. ಸೀಲ್‍ಡೌನ್‍ನಿಂದ ಇಂಥವರೂ ವಿತ್‍ಡ್ರಾಲ್ ತೊಂದರೆ ಅನುಭವಿಸುತ್ತಿರುವ ಸಾಧ್ಯತೆ ಇದೆ.
ಏಪ್ರಿಲ್ 18ರಂದು ಹೊಸದಾಗಿ 7 ಕೇಸುಗಳು (ಪ್ರಾಥಮಿಕ ಸಂಪರ್ಕಗಳಲ್ಲಿ ಸೋಂಕು ಖಚಿತವಾಗಿ) ಪತ್ತೆಯಾಗಿದ್ದರಿಂದ ಅದುವರೆಗೆ ದ್ವಿತೀಯ ಸಂಪರ್ಕಗಳಾಗಿದ್ದ 58 ಜನರನ್ನು ಈಗ ಪ್ರಾಥಮಿಕ ಸಂಪರ್ಕಗಳೆಂದು ಪರಿಗಣಿಸಿ ಕ್ವಾರಂಟೈನ್ ಮಾಡಲು ಬಿಬಿಎಂಪಿಯ ಅಧಿಕಾರಿಗಳು ಬಂದರು. ಆಗ ಯಾವುದೇ ಪ್ರತಿರೋಧ ಇರಲಿಲ್ಲ. ಜೊತೆಗೆ ಕ್ವಾರಂಟೈನ್‍ಗೆ ಕರೆದುಕೊಂಡು ಹೋಗುವ ಪ್ರಕ್ರಿಯೆ ಆರಂಭಿಸುವ ಹೊತ್ತಿಗೆ ಎಲ್ಲಿಗೆ ಕರೆದುಕೊಂಡು ಹೋಗಬೇಕಿತ್ತೋ ಅಲ್ಲಿ ರೂಮುಗಳು ಸಿದ್ಧವಾಗಿಲ್ಲ ಎಂಬ ಮಾಹಿತಿ ಸಿಕ್ಕಿತು ಮತ್ತು ಸ್ಥಳೀಯರು ಹೇಳುವ ಪ್ರಕಾರ ಸೋಮವಾರದಂದು ಅದನ್ನು ಮಾಡೋಣ ಎಂದು ಅವರು ವಾಪಸ್ಸು ಹೋದರು. ಆದರೆ ನಂತರ ಮತ್ತೆ ಬಂದು ಜನರನ್ನು ಕರೆದರು.
ಈ ಸಂದರ್ಭದಲ್ಲಿ ದ್ವಿತೀಯ ಸಂಪರ್ಕಗಳಾಗಿದ್ದವರು, ಪ್ರಾಥಮಿಕ ಸಂಪರ್ಕಗಳು ಏಕಾದರು, ಅವರೆಲ್ಲರೂ ಏಕೆ ಬರಬೇಕು ಎಂದು ವಿವರಿಸುವ ಕೆಲಸ ಆಗಿಲ್ಲ. ಈ ಸದ್ಯ ಯಾವುದೇ ರೋಗ ಲಕ್ಷಣಗಳಿಲ್ಲದಿದ್ದರೂ ನೀವೆಲ್ಲರೂ ಬರುವ ಅಗತ್ಯ ಇದೆ ಎಂಬುದನ್ನೆಲ್ಲಾ ಮತ್ತೆ ವಿವರಿಸುವುದನ್ನೂ ಯಾರೂ ಮಾಡಿಲ್ಲ. ಈ ಕುರಿತು ಬಿಬಿಎಂಪಿಯ ಆರೋಗ್ಯಾಧಿಕಾರಿ ಬಾಲಸುಂದರ್ ಅವರೊಡನೆ ಮಾತನಾಡಿ ಸ್ಪಷ್ಟೀಕರಣ ಕೇಳಲು ಪದೇ ಪದೇ ಫೋನ್ ಮಾಡಿದರೂ ಅವರು ಸಿಕ್ಕಿರಲಿಲ್ಲ. ನಂತರ ಫೋನ್ ಎತ್ತಿದವರು ಕಮೀಷನರ್ ಜೊತೆ ಸಭೆಯಲ್ಲಿದ್ದೇನೆ ಎಂದು ಹೇಳಿ ಕಟ್ ಮಾಡಿದರು (ಅವರ ಪ್ರತಿಕ್ರಿಯೆ ಸಿಕ್ಕ ನಂತರ ಅದನ್ನು ಅಪ್‍ಡೇಟ್ ಮಾಡಲಾಗುವುದು)

ಕ್ವಾರಂಟೈನ್‍ಗೆ ಹೊರಡಬೇಕಿದ್ದ ಹೊಸ ತಂಡಗಳು
ಈ ಹೊತ್ತಿನಲ್ಲಿ 17 ಜನರನ್ನು ಹೊತ್ತು ಮೊದಲ ವಾಹನ ಹೊರಟಿತು. ಎರಡನೆಯ ವಾಹನಕ್ಕೆ 20 ಜನರನ್ನು ಹತ್ತಿಸುವ ಸಂದರ್ಭದಲ್ಲಿ ಕೆಲವರು ನಮ್ಮನ್ನು ಇಲ್ಲಿಯೇ ಪರೀಕ್ಷಿಸಿ, ಇಲ್ಲಿಯೇ ಇರಿಸುವುದು ಸಾಧ್ಯವಿಲ್ಲವೇ ಎಂದು ಪ್ರಶ್ನಿಸಿದ್ದಾರೆ. ಜೋರಾಗಿಯೇ ಮಾತುಗಳು ನಡೆದಿವೆ. ಊಟ ಮಾಡುತ್ತಿದ್ದ ಒಬ್ಬ ವ್ಯಕ್ತಿಯನ್ನು, ಊಟ ಮುಖ್ಯವಲ್ಲ ಎದ್ದು ಬಾ ಎಂದು ಹೇಳಿದರೆಂದು ಹೇಳಲಾಗುತ್ತಿದೆ. ಅದರ ಸತ್ಯಾಸತ್ಯತೆಯನ್ನು ಪರಿಶೀಲಿಸಬೇಕಿದೆ.

ಅರಾಜಕ ಗುಂಪಿನ ಅಕ್ಷಮ್ಯ ಪುಂಡಾಟಿಕೆ
ಈ ಹೊತ್ತಿಗೆ ಸರಿಯಾಗಿ ಒಂದಷ್ಟು ಜನ ಯುವಕರು ಬಂದು ಜೋರು ದನಿಯಲ್ಲಿ ಪ್ರಶ್ನೆ ಮಾಡುವುದನ್ನು ಶುರು ಮಾಡಿದ್ದಾರೆ. ಜನರು, ಮುಖ್ಯವಾಗಿ ಯುವಕರು (3 ಜನ ಪ್ರತ್ಯಕ್ಷದರ್ಶಿಗಳು ಹೇಳಿದಂತೆ 15ರಿಂದ 25 ವರ್ಷಗಳೊಳಗಿನ ಹುಡುಗರು) ಗುಂಪುಗೂಡಲಾರಂಭಿಸಿದ್ದಾರೆ. ಅಷ್ಟಕ್ಕೆ ನಿಲ್ಲದೇ ಗುಂಪಾಗಿ ಅಲ್ಲಿಂದ ಹೋಗಿ ಸೀಲ್‍ಡೌನ್ ಮಾಡಲು ನಿಲ್ಲಿಸಿದ್ದ ತಗಡಿನ ಷೀಟುಗಳನ್ನು ಬಡಿದು, ಎಳೆದು ಕಿತ್ತುಹಾಕಿದ್ದಾರೆ. ಒಂದು ಕಡೆಯಲ್ಲಿ ಪೊಲೀಸರು ಕೂರಲು ಹಾಕಿಕೊಂಡಿದ್ದ ಶಾಮಿಯಾನವನ್ನು ಎಳೆದು ಬೀಳಿಸಿದ್ದಾರೆ. ಟೇಬಲ್ ಕುರ್ಚಿಗಳನ್ನು ಪಕ್ಕಕ್ಕೆಸೆದಿದ್ದಾರೆ ಮತ್ತು ಕೆಲವು ಬೀದಿ ದೀಪಗಳಿಗೆ ಕಲ್ಲೆಸೆದು ಹಾಳುಮಾಡಿದ್ದಾರೆ. ನೂರರ ಆಸುಪಾಸಿನಲ್ಲಿ ಅವರ ಸಂಖ್ಯೆಯಿತ್ತೆಂಬುದು ಪ್ರತ್ಯಕ್ಷದರ್ಶಿಗಳ ಅಂದಾಜು. ಕೆಲವರು ಅವರನ್ನು ತಡೆಯಲೂ ಯತ್ನಿಸಿದ್ದಾರೆ. ಕಾರ್ಪೋರೇಟರ್ ಸಹಾ ಬಂದಿದ್ದಾರೆ ಮತ್ತು ಪೊಲೀಸರೂ ಬಂದಿದ್ದಾರೆ. ಇಮ್ರಾನ್‍ಪಾಷಾ ಮತ್ತು ಸ್ಥಳೀಯ ಸಾಮಾಜಿಕ ಕಾರ್ಯಕರ್ತರೊಬ್ಬರ ಪ್ರಕಾರ 15ರಿಂದ 20 ನಿಮಿಷಗಳ ಕಾಲ ಇವೆಲ್ಲವೂ ನಡೆದಿದೆ.
ಆ ನಂತರ ಪೊಲೀಸರ ದಂಡು ಅಲ್ಲಿಗೆ ಹೆಚ್ಚಿನ ಸಂಖ್ಯೆಯಲ್ಲಿ ಬಂದಿದೆ. ಹಿರಿಯ ಪೊಲೀಸ್ ಅಧಿಕಾರಿಗಳು ಅಲ್ಲಿಗೆ ಬಂದು ಪರಿಸ್ಥಿತಿಯಲ್ಲಿ ಹೆಚ್ಚೇನೂ ವ್ಯತ್ಯಯವಾಗದಂತೆ ನೋಡಿಕೊಂಡಿದ್ದಾರೆ. ಆಗಿನಿಂದಲೇ ಶುರು ಮಾಡಿ ಬೆಳಿಗ್ಗೆ ಗೃಹಸಚಿವರು ಬರುವ ಹೊತ್ತಿಗೆ 59 ಜನರನ್ನು ಬಂಧಿಸಿದ್ದಾರೆ. ಮೂರು ಜನ ಪ್ರಮುಖರನ್ನು (ಮಾರನೆಯ ದಿನ ಗೃಹ ಸಚಿವರೇ ಹೇಳಿದಂತೆ) ಸೇರಿದಂತೆ ಹಲವರ ಮೇಲೆ ಪೊಲೀಸರಿಗೆ ಗುಮಾನಿ ಬಂದು ಅಥವಾ ಖಚಿತ ಮಾಹಿತಿಯೊಂದಿಗೆ ಬಂಧಿಸಿದ್ದಾರೆ. ಸ್ಥಳೀಯವಾಗಿ ಗಾಂಜಾ ಮಾರುತ್ತಿದ್ದರು ಎಂದು ಹೇಳಲಾದ ಒಬ್ಬಾಕೆಯೂ ಬಂಧಿತರಲ್ಲಿದ್ದಾರೆ. ಯಾರೆಲ್ಲರನ್ನೂ ಕ್ವಾರಂಟೈನ್ ಮಾಡಬೇಕೋ ಆ ಕೆಲಸಕ್ಕೂ ಚಾಲನೆ ಕೊಡಲಾಗಿದೆ ಎಂದೂ ಹೇಳಿದ್ದಾರೆ.
ಬಿಜೆಪಿ, ಜೆಡಿಎಸ್, ಕಾಂಗ್ರೆಸ್, ಕೆಲವು ಎಡಪಕ್ಷಗಳು, ಪಾಪ್ಯುಲರ್ ಫ್ರಂಟ್ ಸೇರಿದಂತೆ ಹಲವು ಪಕ್ಷಗಳು, ಸಂಘಟನೆಗಳು ಘಟನೆಯನ್ನು ಖಂಡಿಸಿವೆ ಮತ್ತು ಬಿಜೆಪಿಯನ್ನು ಹೊರತುಪಡಿಸಿ ಮಿಕ್ಕವರೆಲ್ಲರೂ ಘಟನೆಯನ್ನು ಖಂಡಿಸುತ್ತಾ, ಸರ್ಕಾರದ ಜೊತೆಗೆ ಸಂಪೂರ್ಣ ಬೆಂಬಲವನ್ನು ತಾವೂ ನೀಡುತ್ತೇವೆ; ಇತರರೂ ನೀಡಬೇಕು ಎಂದಿದ್ದಾರೆ. ಅಷ್ಟೇ ಅಲ್ಲದೇ ಇದನ್ನು ಧರ್ಮದ ಜೊತೆಗೆ ತಳುಕುಹಾಕಬಾರದು ಎಂದೂ ಹೇಳಿದ್ದಾರೆ.

ಟಿವಿ ಚಾನೆಲ್‍ಗಳಲ್ಲಿ ಪುಂಡಾಟಿಕೆಯು ಹಲ್ಲೆಯಾಗಿ, ನರಮೇಧದ ತಯಾರಿಯಾಗಿ ವಿಸ್ತಾರವಾದದ್ದು
ಇಲ್ಲಿಂದಾಚೆಗೆ ಹೆಚ್ಚಿನ ಬೆಳವಣಿಗೆಗಳು ಸಾಮಾಜಿಕ ಜಾಲತಾಣಗಳು ಮತ್ತು ಟಿವಿ ಚಾನೆಲ್‍ಗಳಲ್ಲಿ ಸಂಭವಿಸಿವೆ. ವಿವಿಧ ಸೈದ್ಧಾಂತಿಕ ಮತ್ತು ರಾಜಕೀಯ ಹಿನ್ನೆಲೆಯುಳ್ಳವರೆಲ್ಲರೂ ಘಟನೆಯನ್ನು ಖಂಡಿಸಿದ್ದಾರೆ. ಹಲ್ಲೆ ನಡೆದಿದೆ ಎಂಬುದು ಬಹುತೇಕ ಎಲ್ಲರೂ ಒಪ್ಪಿಕೊಂಡಂತೆ ಕಂಡಿದೆ. ಅದರಲ್ಲಿ ಹಲ್ಲೆ ನಡೆದಿರದಿದ್ದರೂ ಈ ರೀತಿಯ ಗಲಭೆ ನಡೆಸಿದ್ದಂತೂ ಖಂಡನೀಯ ಎಂಬುದು ಸರ್ವಸಮ್ಮತಿಯ ಅಭಿಪ್ರಾಯ ಎಲ್ಲರಿಂದ ಬಂದಿದೆ. ಸ್ಥಳೀಯ ಕಾರ್ಪೋರೇಟರ್ ಇಮ್ರಾನ್ ಪಾಷಾ ಮತ್ತು ಜಮೀರ್ ಅಹಮದ್ (ಮಧ್ಯಾಹ್ನದ ನಂತರ ಅವರು ಬೇಸರದಿಂದ ಫೋನ್‍ಗೆ ಸಿಗುತ್ತಿಲ್ಲವೆಂದು ಅವರ ಸಹಾಯಕರು ಹೇಳಿದ್ದರಿಂದ ನೇರವಾಗಿ ಸಂಪರ್ಕ ಸಾಧ್ಯವಾಗಲಿಲ್ಲ) ತಮ್ಮನ್ನೂ ವಿಶ್ವಾಸಕ್ಕೆ ತೆಗೆದುಕೊಂಡು ಹಗಲಿನ ಹೊತ್ತು ಅಲ್ಲಿಗೆ ಹೋಗಿದ್ದರೆ ಇಂಥದ್ದೇನೂ ಆಗುತ್ತಿರಲಿಲ್ಲ ಎಂಬ ಅನಿಸಿಕೆ ವ್ಯಕ್ತಪಡಿಸಿದ್ದಾರೆ. ಇದರ ಬಗ್ಗೆ ಇಮ್ರಾನ್ ಅವರನ್ನು ಪ್ರಶ್ನಿಸಲಾಗಿ, ಮೊದಲ ದಿನದಿಂದ ತಾವು ಮತ್ತು (ರಾಜಕೀಯವಾಗಿ ಭಿನ್ನ ಪಕ್ಷದಲ್ಲಿರುವ) ಜಮೀರ್ ಅಹಮದ್ ಅವರು ಜನರಿಗೆ ವಿಷಯ ತಿಳಿಸುತ್ತಾ ಸರ್ಕಾರದ ಇಲಾಖೆಗಳೊಂದಿಗೆ ಎಲ್ಲವೂ ಸುಸೂತ್ರವಾಗಿ ನಡೆಯುವಂತೆ ಮಾಡಿದ್ದೇವೆ; ಹಾಗಾಗಿ ಇಂತಹ ಕ್ಲಿಷ್ಟ ಸಂದರ್ಭದಲ್ಲಿ ಜನರನ್ನು ವಿಶ್ವಾಸಕ್ಕೆ ತೆಗೆದುಕೊಳ್ಳುವುದು ಮುಖ್ಯ ಎಂದು ಹೇಳಿದರು.
ಟಿವಿ ಚಾನೆಲ್‍ಗಳಿಗೆ ಈ ವಾದವು ಒಪ್ಪಿಗೆಯಿದ್ದಂತೆ ಕಾಣಲಿಲ್ಲ. ಈ ಇಬ್ಬರು ಜನಪ್ರತಿನಿಧಿಗಳು ಇದಕ್ಕೆ ಕಾರಣವೆಂಬುದು ಹಲವರ ಅನಿಸಿಕೆಯಿದ್ದಂತೆ ಬಹುತೇಕ ವರದಿಗಳಲ್ಲಿ ಎದ್ದು ಕಂಡಿತು. ಇದು ‘ರಿಪಬ್ಲಿಕ್ ಆಫ್ ಪಾದರಾಯನಪುರ’ – ಇಲ್ಲಿ ಸರ್ಕಾರ ನಡೆಯುವುದಿಲ್ಲ. ಇಮ್ರಾನ್, ಜಮೀರ್ ಅವರೇ ಬರಬೇಕೆಂದು ಜನರೂ ಹೇಳಿರುವುದು ಅಕ್ಷಮ್ಯ ಎಂದು ಟಿವಿ ಆಂಕರ್‍ಗಳು ಹೇಳಿದರು.

ದುರುದ್ದೇಶಪೂರ್ವಕ ಹೇಳಿಕೆಗಳನ್ನೇಕೆ ತೆಗೆದುಕೊಳ್ಳಲಾಯಿತು?
ಜೊತೆಗೆ ಟಿವಿ ಚಾನೆಲ್‍ಗಳು ಚಿಕ್ಕಮಗಳೂರಿನ ಸಂಸದೆ ಶೋಭಾ ಕರಂದ್ಲಾಜೆ, ಚಿಕ್ಕಮಗಳೂರಿನ ಶಾಸಕ ಮತ್ತು ಪ್ರವಾಸೋದ್ಯಮ ಸಚಿವ ಸಿ.ಟಿ.ರವಿ, ಹೊನ್ನಾಳಿಯ ಶಾಸಕ ರೇಣುಕಾಚಾರ್ಯ, ಗ್ರಾಮೀಣಾಭಿವೃದ್ಧಿ ಸಚಿವ ಕೆ.ಎಸ್.ಈಶ್ವರಪ್ಪ ಅವರುಗಳ ಅಭಿಪ್ರಾಯಗಳನ್ನು ತೆಗೆದುಕೊಂಡರು. ಅಷ್ಟೇ ಅಲ್ಲದೇ, ಶ್ರೀರಾಮಸೇನೆಯ ಪ್ರಮೋದ್ ಮುತಾಲಿಕ್ ಅವರ ವಿಡಿಯೋವನ್ನೂ ಪ್ರಸಾರ ಮಾಡಲಾಯಿತು.
ಸಿ.ಟಿ.ರವಿಯ ಪ್ರಕಾರ, ‘ಅವರಿಗೆ’ ಈ ಭಾಷೆ ಅರ್ಥವಾಗಲ್ಲ. ಅವರ ಭಾಷೆಯಲ್ಲೇ ತಿಳಿಸಬೇಕು. ಮುಖ್ಯಮಂತ್ರಿಯವರ ಸೌಮ್ಯತೆಯನ್ನು ದುರುಪಯೋಗ ಮಾಡಿಕೊಳ್ಳುತ್ತಿದ್ದಾರೆ. ಶೋಭಾ ಕರಂದ್ಲಾಜೆಯವರ ಪ್ರಕಾರ ನಾನು ಅವತ್ತಿಂದ ಹೇಳ್ತಿದ್ದೇನೆ. ಇದು ಕೊರೊನಾ ಜಿಹಾದ್. ಇನ್ನೊಂದು ಘಟನೆ ನಡೆದಾಗಲೇ ನಾನು ಹೇಳಿದ್ದೆ. ಆಗ ಕಠಿಣ ಕ್ರಮ ತೆಗೆದುಕೊಂಡಿದ್ದರೆ ಹೀಗಾಗುತ್ತಿರಲಿಲ್ಲ. ಎಲ್ಲರಿಗೂ ಒಂದು ಕಾನೂನು, ‘ಇವರಿಗೇ’ ಒಂದು ಕಾನೂನಾ?

ಈ ರೀತಿಯ ಹಲವು ಮಾತುಗಳು ಕೇಳಿ ಬಂದವು. ಮಧ್ಯಾಹ್ನ ಕಳೆಯುವ ಹೊತ್ತಿಗೆ ಟಿವಿ 9, ‘ಅಲ್ಲೊಂದು ನರಮೇಧದ ಸಂಚೇ ನಡೆದಿತ್ತು’ ಎಂದು ಪ್ರಸಾರ ಮಾಡಿತು. ಮೊದಲು ಜೆಡಿಎಸ್‍ನಲ್ಲಿದ್ದು ನಂತರ ಕಾಂಗ್ರೆಸ್‍ಗೆ ಹೋಗಿದ್ದ ಜಮೀರ್ ಅವರ ಕುರಿತು, ಜೆಡಿಎಸ್ ನಾಯಕರ ಒಡೆತನದ ಕಸ್ತೂರಿ ಚಾನೆಲ್ ‘ಎಲ್ಲಿದ್ದೀಯಪ್ಪಾ ಭಯೋತ್ಪಾದಕ ದೊರೆ ಜಮೀರ್’ ಎಂಬ ಸುದ್ದಿ ಪ್ರಸಾರ ಮಾಡಿತು.
‘ವಿವಾದಾಸ್ಪದ ಹೇಳಿಕೆ’ ನೀಡಲೊಲ್ಲದ ಕಮೀಷನರ್
ಮೇಲಿನ ಸುದ್ದಿಗಳ ಸತ್ಯಾಸತ್ಯತೆಯನ್ನು ಖಚಿತಪಡಿಸಿಕೊಳ್ಳಲು ನಾವು ಅಧಿಕಾರಿಗಳ ಜೊತೆಗೆ ಮಾತನಾಡಿದೆವು. ಪೊಲೀಸ್ ಕಮೀಷನರ್ ಅವರು ಹಿಂದಿನ ದಿನ ನೀಡಿದ ‘ಯಾರ ಮೇಲೂ ಹಲ್ಲೆ ನಡೆದಿಲ್ಲ’ವೆಂಬ ಹೇಳಿಕೆ ಮತ್ತು ನಂತರ ಹಲ್ಲೆ ನಡೆದಿದೆ ಎಂಬ ಗೃಹಮಂತ್ರಿಗಳ ಮರುದಿನದ ಹೇಳಿಕೆಯಲ್ಲಿನ ವ್ಯತ್ಯಾಸದ ಬಗ್ಗೆ ಹಿರಿಯ ಪೊಲೀಸ್ ಅಧಿಕಾರಿಗಳ ಜೊತೆ ಮಾತಾಡಬೇಕಿತ್ತು. ಜೊತೆಗೆ ಟಿವಿಗಳಲ್ಲಿ ಅಲ್ಲೊಂದು ನರಮೇಧದ ಹುನ್ನಾರವೇ ನಡೆದಿತ್ತು ಎಂಬ ಸುದ್ದಿಯ ಕುರಿತು ಪೊಲೀಸರೇನು ಹೇಳುತ್ತಾರೆ ಎಂಬುದನ್ನೂ ತಿಳಿದುಕೊಳ್ಳಬೇಕಿತ್ತು. ಈ ಎರಡೂ ಪ್ರಶ್ನೆಗಳನ್ನು ಸ್ವತಃ ಪೊಲೀಸ್ ಕಮೀಷನರ್ ಭಾಸ್ಕರರಾವ್ ಅವರಿಗೇ ಹಾಕಲಾಯಿತು. ‘ನಾವು ನಮ್ಮ ಕೆಲಸವನ್ನು ಮಾಡುತ್ತಿದ್ದೇವೆ, ಇಂತಹ ಸುದ್ದಿಗಳ ಬಗ್ಗೆ ನಾನು ಪ್ರತಿಕ್ರಿಯಿಸುವುದಿಲ್ಲ. ಮಾಧ್ಯಮಗಳ ಕುರಿತಾಗಿ ಹೇಳಿ ನಾನು ವಿವಾದಕ್ಕೆ ಸಿಕ್ಕಿಕೊಳ್ಳಲು ಬಯಸುವುದಿಲ್ಲ; ಬದಲಿಗೆ ನಾನು ಮತ್ತು ನಮ್ಮ ಟೀಂ ನಮ್ಮ ಕೆಲಸವನ್ನು ಮಾಡಿಕೊಂಡು ಹೋಗುತ್ತೇವೆ’ ಎಂದಷ್ಟೇ ಹೇಳಿದರು. ಹಿಂದಿನ ರಾತ್ರಿ ಕಮೀಷನರ್ ನೀಡಿದ ಹೇಳಿಕೆಗಿಂತ ಒಂದು ಸಣ್ಣ ಬದಲಾವಣೆ ಎಫ್‍ಐಆರ್‍ನಲ್ಲಿ ಕಾಣುತ್ತಿದೆ. ಅದಕ್ಕಿಂತ ಒಂದು ಸಣ್ಣ ಬದಲಾವಣೆ (ಸ್ವಲ್ಪ ಹಿಂಜರಿಕೆಯಿಂದಲೇ ಬಂದ) ಗೃಹ ಸಚಿವರ ಹೇಳಿಕೆಯಲ್ಲಿ ಬಂದಿದೆ. ಅದಕ್ಕಿಂತ ಬೃಹತ್ತಾದ ಬದಲಾವಣೆ ನಂತರ ಟಿವಿ ಚಾನೆಲ್‍ಗಳಲ್ಲಿ ಬಂದಿದೆ.

ಬೆಳಿಗ್ಗೆ ಹಿರಿಯ ಪೊಲೀಸ್ ಅಧಿಕಾರಿಯೊಬ್ಬರು ಪತ್ರಕರ್ತರೊಬ್ಬರ ಬಳಿ ಮಾತನಾಡಿ, ‘ನೂರು ಜನ ಗುಂಪಾಗಿ ಕೂಗಿಕೊಂಡು ಹೋಗಿ ತಗಡಿನ ಷೀಟ್ ಒಡೆದರೆ ಎಷ್ಟು ಭೀಕರವಾಗಿ ಕಾಣಬಹುದೋ, ಅದೆಲ್ಲವನ್ನೂ ನೀವು ವಿಡಿಯೋಗಳಲ್ಲಿ ನೋಡಬಹುದು. ಆದರೆ ಘಟನೆ ಬಹಳ ಬೇಗ ನಿಯಂತ್ರಣಕ್ಕೆ ಬಂದಿದೆ. ಇದು ವ್ಯವಸ್ಥಿತವಾದ ಗಲಭೆ ಅಲ್ಲ. ಆದರೆ ಮುಂದಿನ ದಿನಗಳಲ್ಲಿ ಹತಾಶೆಗಳು ಯಾವ ಸ್ವರೂಪಕ್ಕೆ ತಿರುಗುತ್ತವೋ ಹೇಳಲಾಗದು. ಇದನ್ನು ಕಮ್ಯುನಲ್ ಸ್ವರೂಪಕ್ಕೆ ತಿರುಗಿಸುತ್ತಿರುವ ಪ್ರಯತ್ನಗಳು ನಮಗೆ ಆತಂಕ ತರುತ್ತಿವೆ. ನನ್ನ ಕಾಮನ್‍ಸೆನ್ಸ್ ಬಳಸಿ ಹೇಳುವುದಾದರೆ – ಮಾಧ್ಯಮಗಳಲ್ಲಿ ಸೃಷ್ಟಿಸಲಾಗುತ್ತಿರುವ ಭೀತಿ ಮತ್ತು ಆರ್ಥಿಕ ಒತ್ತಡಗಳು ಜನರನ್ನು ಖಿನ್ನತೆಗೆ ಗುರಿ ಮಾಡಿಸುವ ಸಾಧ್ಯತೆ ಹೆಚ್ಚು; ಆದರೆ ಗುಂಪಾಗಿ ವಾಸಿಸುತ್ತಿರುವ ಸಮುದಾಯಗಳನ್ನು ನೀವು ಟಾರ್ಗೆಟ್ ಮಾಡಿದರೆ ಅದು ಸ್ಫೋಟಕ ಪರಿಸ್ಥಿತಿ ನಿರ್ಮಿಸುವ ಸಾಧ್ಯತೆ ಇದೆ. ಮುಂದಿನ ದಿನಗಳಲ್ಲಿ ಕಾಣಬಹುದಾದ ಸಂಗತಿಗಳ ಅತೀ ಸಣ್ಣ ಮುನ್ಸೂಚನೆಯಷ್ಟೇ ನಿನ್ನೆ ಕಂಡಿದೆ’ ಎಂದಿದ್ದಾರೆ.
ಉಳಿದಂತೆ ಇನ್ನೂ ಹೆಚ್ಚಿನ ಸ್ಪಷ್ಟೀಕರಣಗಳು ಬಂದ ನಂತರ ಇಲ್ಲಿ ಅಪ್‍ಲೋಡ್ ಮಾಡಲಾಗುವುದು. ಮೇಲೆ ನಡೆದ ಎಲ್ಲಾ ಮಾತುಕತೆಗಳ ಆಡಿಯೋ ರೆಕಾರ್ಡಿಂಗ್ ನಾನುಗೌರಿ.ಕಾಂನ ಬಳಿಯಿದೆ. ಆದರೆ ಮಾತನಾಡಿದ ಕೆಲವರು ತಮ್ಮ ಗುರುತನ್ನು ಬಹಿರಂಗಪಡಿಸಿದರೆ ತೊಂದರೆಯಾಗಬಹುದು ಎಂಬ ಆತಂಕ ವ್ಯಕ್ತಪಡಿಸಿದ್ದರಿಂದ ಅದನ್ನು ಇಲ್ಲಿ ಬಹಿರಂಗಪಡಿಸಿಲ್ಲ. ಯೋಜಿತವಾದ ದಾಳಿ ಇದೆಂದು ಸೂಚಿಸಬಹುದಾದ ಯಾವುದೇ ಪುರಾವೆ ಕಂಡುಬಂದಿಲ್ಲ. ತನಿಖೆಯು ಅದನ್ನು ಮುಂದಿನ ದಿನಗಳಲ್ಲಿ ಅದರ ಕುರಿತು ಬೆಳಕು ಚೆಲ್ಲಬಹುದು.

ವ್ಯಕ್ತಿಗಳ ಮೇಲೆ ಕಾನೂನು ಕ್ರಮ, ಸಮುದಾಯಗಳನ್ನು ಮುನ್ನಡೆಸುವ ಜವಾಬ್ದಾರಿ
ಲಾಕ್‍ಡೌನ್, ಸೀಲ್‍ಡೌನ್ ಅಥವಾ ಮುಸ್ಲಿಮರ ಕುರಿತು ನಡೆದ ಅಪಪ್ರಚಾರ ಇತ್ಯಾದಿಗಳಿಂದ ಉಂಟಾಗಬಹುದಾದ ಹತಾಶೆಯನ್ನು ಅರ್ಥ ಮಾಡಿಕೊಳ್ಳಬಹುದಾದರೂ, ವ್ಯಕ್ತಿಗತವಾಗಿ ಗಲಭೆ ನಡೆಸಿದ ಯಾರನ್ನೇ ಆಗಲಿ ಕಾನೂನು ಕ್ರಮಕ್ಕೆ ಒಳಪಡಿಸಲೇಬೇಕು. ಅದಕ್ಕಿಂತ ಹೆಚ್ಚಿನ ಜವಾಬ್ದಾರಿ ಹೊರಿಸಬೇಕಾದ್ದು ಪಾದರಾಯನಪುರದ ರೀತಿಯ ಸನ್ನಿವೇಶದಲ್ಲಿ ಜನರಿಗೆ ತಿಳುವಳಿಕೆ ಹೇಳಿ ಹಗಲೂ ರಾತ್ರಿ ಪರಿಸ್ಥಿತಿಯನ್ನು ನಿಭಾಯಿಸಬೇಕಾದ ಸ್ಥಳೀಯ ಜನಪ್ರತಿನಿಧಿಗಳು ಮತ್ತು ಸಮುದಾಯದ ಸಂಘಟನೆಗಳು. ಪಾದರಾಯನಪುರದಲ್ಲಿ ಹೆಚ್ಚಿನ ಸಾಧ್ಯತೆ ಇದ್ದದ್ದು ಸ್ಥಳೀಯ ಜನಪ್ರತಿನಿಧಿಗಳ ಮೇಲೆ. ಅವರನ್ನು ವಿಶ್ವಾಸಕ್ಕೆ ತೆಗೆದುಕೊಂಡು ಜನರ ಬಳಿ ಹೋಗಬೇಕಾಗಿದ್ದ ಅಧಿಕಾರಿಗಳೂ ಇಲ್ಲಿ ಎಡವಿದ್ದಾರೆ. ಇಂದಿನ ಒತ್ತಡದ ಸಂದರ್ಭದ ಎಡವುವಿಕೆಯನ್ನು ಅರ್ಥ ಮಾಡಿಕೊಳ್ಳಬಹುದಾದರೂ, ದುರುದ್ದೇಶಪೂರ್ವಕವಾದ ಕೋಮುವಾದೀಕರಣವಂತೂ ಅಕ್ಷಮ್ಯವಾದುದು. ಆ ಕೆಲಸವನ್ನು ಅಧಿಕಾರಿಗಳು ಮಾಡಿಲ್ಲ; ಆಡಳಿತ ಪಕ್ಷಕ್ಕೆ ಸೇರಿದವರು ಮಾಡಿದ್ದಾರೆ. ಅಂದರೆ ಮುಸ್ಲಿಂ ಸಮುದಾಯವನ್ನು ಸುಶಿಕ್ಷಿತ ರೀತಿಯಲ್ಲಿ ಮುನ್ನಡೆಸುವ ಜವಾಬ್ದಾರಿ ಸಮುದಾಯದ ಮುಖಂಡರ ಮೇಲಿದ್ದರೆ, ಕೋಮು ಬಣ್ಣವನ್ನು ಕೊಡದೇ ಇರುವ ಹಾಗೆ ತಮ್ಮ ಮುಖಂಡರನ್ನು ತಿದ್ದುವ ಜವಾಬ್ದಾರಿ ಮುಖ್ಯಮಂತ್ರಿಗಳ ಮೇಲಿದೆ.

ಇದೇ ಸಂದರ್ಭದಲ್ಲಿ ಪ್ರಧಾನಿಯವರ ಟ್ವೀಟ್ ಮತ್ತು ಅರ್ಥಶಾಸ್ತ್ರಜ್ಞರ ಲೇಖನ
ಬಿಬಿಎಂಪಿ ಅಧಿಕಾರಿಗಳು ಮೊದಲನೆಯ ಬಾರಿಗೆ ಪಾದರಾಯನಪುರಕ್ಕೆ ಬರುತ್ತಿದ್ದ ವೇಳೆಯಲ್ಲೇ ಪ್ರಧಾನಿ ನರೇಂದ್ರಮೋದಿಯವರು ಕೋವಿಡ್ ವೈರಸ್ ಜಾತಿ, ಧರ್ಮ ನೋಡಿ ಬರುವುದಿಲ್ಲ. ಹಾಗಾಗಿ ಐಕ್ಯತೆ ಮತ್ತು ಭ್ರಾತೃತ್ವಕ್ಕೆ ನಾವು ಹೆಚ್ಚಿನ ಪ್ರಾಧಾನ್ಯ ಕೊಡಬೇಕು ಎಂದು ಟ್ವೀಟ್ (ಸಂಜೆ 5.15ಕ್ಕೆ) ಮಾಡಿದ್ದರು. ಪ್ರಧಾನಿಯವರ ಪಕ್ಷಕ್ಕೆ ಸೇರಿದ ಹಲವಾರು ನಾಯಕರು ಐಕ್ಯತೆ ಮತ್ತು ಭ್ರಾತೃತ್ವಕ್ಕೆ ಪೂರಕವಾದ ಮಾತುಗಳನ್ನು ಮರುದಿನ ಆಡಲಿಲ್ಲ.
ಈ ಘಟನೆಗೆ ಎರಡು ದಿನಗಳ ಕೆಳಗೆ ಭಾರತ ಮೂಲದ ಮತ್ತು ನೊಬೆಲ್ ಪುರಸ್ಕøತರಾದ  ಇಬ್ಬರು ಅರ್ಥಶಾಸ್ತ್ರಜ್ಞರು ಹಾಗೂ ರಿಸರ್ವ್‍ಬ್ಯಾಂಕ್‍ನ ಮಾಜಿ ಗವರ್ನರ್ ಒಬ್ಬರು ತಮ್ಮ ಲೇಖನದಲ್ಲಿ ಹೀಗೆ ಬರೆದಿದ್ದರು. ‘…. ಈ ರೀತಿ (ಆರ್ಥಿಕ ಸಂಕಷ್ಟ) ಏರ್ಪಡುವುದು ತನ್ನಂತಾನೇ ಒಂದು ದುರಂತ ಮತ್ತು ಲಾಕ್‍ಡೌನ್ ಆದೇಶವನ್ನು ಜನರು ದೊಡ್ಡ ಮಟ್ಟದಲ್ಲಿ ಉಲ್ಲಂಘಿಸುವ ಅಪಾಯವನ್ನು ಉಂಟುಮಾಡುತ್ತದೆ. ಏಕೆಂದರೆ ಹಸಿವಿನಿಂದ ಬಳಲುವ ಜನರು ಕಳೆದುಕೊಳ್ಳಲು ಅಂತಹ ಹೆಚ್ಚೇನೂ ಇರುವುದಿಲ್ಲ’.

ಆಡಳಿತ ನಡೆಸುವವರು ಇದನ್ನೂ ಗಮನದಲ್ಲಿಟ್ಟುಕೊಳ್ಳುವ ಅಗತ್ಯ ಲಾಕ್‍ಡೌನ್, ಸೀಲ್‍ಡೌನ್‍ಗಳ ಕಾಲದಲ್ಲಿ ಬಹಳ ಇದೆ ಎಂಬುದನ್ನು ಸೂರತ್, ಬಾಂದ್ರಾ ಮತ್ತು ಇದೀಗ ಪಾದರಾಯನಪುರದ ಘಟನೆಗಳು ಸಾಬೀತುಪಡಿಸುತ್ತಿವೆ. ಅದಕ್ಕಿಂತ ಹೆಚ್ಚಿಗೆ ಇದನ್ನು ಅರ್ಥ ಮಾಡಿಕೊಳ್ಳಬೇಕಾಗಿರುವುದು ಟವಿ ಮತ್ತು ಮುದ್ರಣ ಮಾಧ್ಯಮಗಳಾಗಿವೆ.

Donate

ಜನಪರ ಪತ್ರಿಕೋದ್ಯಮದ ಉಳಿವು ಮತ್ತು ಬೆಳವಣಿಗೆಗಾಗಿ ನಿಮ್ಮ ನಿರಂತರ ಆರ್ಥಿಕ ನೆರವು ಅಗತ್ಯ. ನಿಮ್ಮಿಂದ ಸಾಧ್ಯವಿರುವಷ್ಟು ಹೆಚ್ಚಿನ ವಂತಿಗೆಯನ್ನು ನೀಡಲು ಕೆಳಗಿನ ಲಿಂಕುಗಳನ್ನು ಕ್ಲಿಕ್ಕಿಸಿ.
ಒಂದು ವೇಳೆ ಈ ಲಿಂಕಿನ ಮೂಲಕ ಹಣ ಪಾವತಿ ಮಾಡುವುದಕ್ಕೆ ಅಡಚಣೆ ಇದ್ದರೆ, ಈ ಪುಟದ ಮೇಲೆ ಅಥವಾ ಕೆಳಗೆ ಇರುವ ವಂತಿಗೆ – Donate ಬಟನ್.ಅನ್ನು ಕ್ಲಿಕ್ಕಿಸಿ.
ಧನ್ಯವಾದಗಳು
Independent journalism can’t be independent without your support, contribute by clicking below.

6 COMMENTS

  1. ಟಿ ವಿ ಮಾಧ್ಯಮಗಳು ರೆಕ್ಕೆ ಪುಕ್ಕ ಸೇರಿಸಿನೀಡುವ ಸುದ್ದಿ. ಆ ಸುದ್ದಿಯನ್ನು ಪ್ರಸ್ತುತ ಪಡಿಸುವ ಅವರ ಭಾವ ಭಂಗಿ ಭಾಷೆ ಹಿನ್ನೆಲೆ ಮತ್ತು ಸಂಗೀತ ಎಲ್ಲವೂ ನಾವು ರಣ ರಂಗದಲ್ಲಿ ಇದ್ದೇವೆ ಎಂಬಂತಹ ಭಾವನೆಯನ್ನು ಜನರಲ್ಲಿ ಉಂಟು ಮಾಡುತ್ತಿವೆ. ತಿಳಿವಳಿಕೆ ಇಲ್ಲದವರು, ಅರೆ ತಿಳಿವಳಿಕೆಯವರು ಇವರು ನಂಬುತ್ತಿದ್ದಾರೆ ಮತ್ತು ಪ್ರತಿಕ್ರಿಯಿಸುತ್ತಿದ್ದಾರೆ. ಸರ್ಕಾರ ಇವರ ಮೇಲೆ ಕಡಿವಾಣ ಹಾಕಬೇಕು. ಆದರೆ ಸರ್ಕಾರ ಹೀಗಿದೆ. ಇದಲ್ಲೆರದಿಂದ ಬಿಡುಗಡೆ ಹೇಗೋ? ಎಂತೋ ?ಎಂದೋ?.

  2. The headline is great but the content is devastating.. it’s not a fact check, but picked up favouring the group who did a blunder which we already seen or know. do you work with that no brainer Zameer Ahmed?

  3. ಪಾದರಾಯನಪುರದಲ್ಲಿ ಸೀಲ್ ಡೌನ್‌ ಮಾಡುವುದಕ್ಕೆ ಮೊದಲು, ಅಲ್ಲಿನ ಜನರನ್ನು ವಿಶ್ವಾಸಕ್ಕೆ ತೆಗೆದುಕೊಳ್ಳಬೇಕಿತ್ತು.

  4. ಹೇಗೆ ಅಲ್ಪಸಂಖ್ಯಾತ ಹಿಂದೂಗಳನ್ನು ಪಾಕಿಸ್ತಾವು ಟ್ರೀಟ್ ಮಾಡುತ್ತದೊ ಅದೇ ರೀತಿ ಭಾರತದ ಮುಸ್ಲಿಮರಿಗೆ ಟ್ರೀಟ್ ಮಾಡಬೇಕಾಗುತ್ತದೆ ಎಂಬ ಪಬ್ಲಿಕ್.ಟಿ.ವಿ ಅವರು ಹೇಳಿದ್ದು ಕೇಳಿ ನನಗೆ ಅಸಹ್ಯವೆನಿಸಿತು. ನಮಗೆ ಪಾಕಿಸ್ತಾನ ಮಾದರಿಯೇ? ಮನುಷ್ಯನನ್ನು ಎಲ್ಲದಕ್ಕೂ ಧರ್ಮದ ಆಧಾರದಲ್ಲೇ ಯಾಕೆ ನೋಡಬೇಕು? ಸೌಹಾರ್ದತೆ ಕೆಡಿಸುವ ಮಾಧ್ಯಮದವರಿಗೆ ಸೌಹಾರ್ದತೆಯ ಪಾಠದ ಅಗತ್ಯವಿದೆ.

  5. ಸಾಮಾಜದ ಆಸ್ತಿ ಪಾಸ್ತಿನಾಶ ಮಾಡಿದ್ದು ಹೇಯ ಕೃತ್ಯ ಖಂಡನಾರ್ಹ..!!

    ಅದರೆ

    ಶೋಭಾ ಕರಂದ್ಲಾಜೆ, ಸಿ.ಟಿ.ರವಿ, ರೇಣುಕಾಚಾರ್ಯ, ಕೆ.ಎಸ್.ಈಶ್ವರಪ್ಪ ಮತ್ತು ಪ್ರಮೋದ್ ಮುತಾಲಿಕ್ ಅವರ ಹೇಳಿಕೆಗಳ ಅಗತ್ಯತೆ ಬಗ್ಗೆ ವೈಚಾರಿಕವಾಗಿ ಅರಿತರೆ ಸಾಕು.

    ಈ ಕ್ಲಿಷ್ಟಕರ ಸಂದರ್ಭದಲ್ಲಿ “TV channel” ಗಳ TRPಯ “ದುರುದ್ದೇಶಪೂರ್ವಕ” ಮನೋಭಾವಕ್ಕೆ ದಿಕ್ಕಾರವಿರಲಿ…!!

  6. ನೀವು ಎಲ್ಲಾ. ತಿರುಚಿ ಹಾಕುವ ಯತ್ನ ಮಾಡುತ್ತಿದ್ದೀರಿ. ಮುಖ್ಯ ಮಂತ್ರಿ ಗಳು ಅಲ್ಪಸಂಖ್ಯಾತರ ವಿರುದ್ಧ ಹೇಳಿಕೆ ನೀಡಬಾರದು ಎಂದು ಹೇಳಿದ್ದೆ ದೊಡ್ಡ ತಪ್ಪು. ಅದರಿಂದ ಇವರಿಗೆ ಇಷ್ಟು ಕೊಬ್ಬು. ಒಬ್ಬ ಮನುಷ್ಯನಿಗೆ ದೇಶ ಮುಕ್ಯ ಅಂದ್ರೆ ಎಲ್ಲದಕ್ಕೂ ಸಹಕಾರ ಕೊಡುತ್ತಾನೆ, ಒಬ್ಬ ವ್ಯಕ್ತಿ ಅತ್ವ , ಒಂದು ಪಕ್ಷ ಅಂತ ಟೀಕಿಸುವ ಜನರು ಈ ರೀತಿ ಟಿಪ್ಪಣಿ ಗಾಳನ್ನು ಬರೀತಾರೆ ಬೆಂಕಿ ಹಚ್ಚಿ ಮಜಾ ತಾಗೊಳ್ಳೂ ವಿಕೃತ ಮನಸಿನವರು. ಸ್ವಲ್ಪ ಜವಬ್ದಾರಿ ಯುತ ಪೋಸ್ಟ್ ಮಾಡಿ.

LEAVE A REPLY

Please enter your comment!
Please enter your name here