ಹರಿಯಾಣದಲ್ಲಿ ಇಂದು ನಡೆಯುತ್ತಿರುವ ವಿಧಾನಸಭಾ ಚುನಾವಣೆಗೆ ಕೆಲವು ದಿನಗಳ ಮೊದಲು, ಡೇರಾ ಸಚ್ಚಾ ಸೌದಾ ಮುಖ್ಯಸ್ಥ ಗುರ್ಮೀತ್ ರಾಮ್ ರಹೀಮ್ ಮತ್ತೊಮ್ಮೆ ರೋಹ್ಟಕ್‌ನ ಸುನಾರಿಯಾ ಜೈಲಿನಿಂದ 20 ದಿನಗಳ ಪೆರೋಲ್ ಮೇಲೆ ಬಿಡುಗಡೆಯಾಗಿದ್ದಾರೆ. ವಿವಾದಿತ ಧಾರ್ಮಿಕ ನಾಯಕ ಪ್ರಸ್ತುತ ಉತ್ತರ ಪ್ರದೇಶದ ಬಾಗ್‌ಪತ್‌ನಲ್ಲಿರುವ ಡೇರಾ ಆಶ್ರಮದಲ್ಲಿ ತಂಗಿದ್ದು, ಪೆರೋಲ್ ಅವಧಿಯಲ್ಲಿ ಹರಿಯಾಣಕ್ಕೆ ಪ್ರವೇಶಿಸಬಾರದು ಎಂಬ ಷರತ್ತಿನ ಅಡಿಯಲ್ಲಿ ಬಿಡುಗಡೆಯಾಗಿದ್ದಾರೆ. ಆದರೆ ಚುನಾವಣೆಗಳ ಸಂದರ್ಭದಲ್ಲಿ ಮಾತ್ರ ಆತ ಪೆರೋಲ್ ಪಡೆಯುತ್ತಿರುವುದು ಹಲವು ಅನುಮಾನಗಳಿಗೆ ಕಾರಣವಾಗಿದೆ.
ಇಬ್ಬರು ಶಿಷ್ಯೆಯರ ಮೇಲೆ ಅತ್ಯಾಚಾರ ಎಸಗಿದ ಆರೋಪದಲ್ಲಿ ಡೇರಾ ಮುಖ್ಯಸ್ಥರು 2017ರಿಂದ 20 ವರ್ಷಗಳ ಶಿಕ್ಷೆ ಅನುಭವಿಸುತ್ತಿದ್ದಾರೆ. ಇದರ ಹೊರತಾಗಿಯೂ ಕಳೆದ ನಾಲ್ಕು ವರ್ಷಗಳಲ್ಲಿ ಅವರಿಗೆ 15 ವಿವಿಧ ಸಂದರ್ಭಗಳಲ್ಲಿ ಪೆರೋಲ್ ನೀಡಲಾಗಿದೆ. ಈ 20 ದಿನಗಳ ಪೆರೋಲ್‌ನ ಅಂತ್ಯದ ವೇಳೆಗೆ, ರಹೀಮ್ ತನ್ನ ಶಿಕ್ಷೆಯ ಅವಧಿಯಲ್ಲಿ ಒಟ್ಟು 275 ದಿನಗಳನ್ನು ಜೈಲಿನ ಹೊರಗೆ ಕಳೆಯುತ್ತಾನೆ. ಇದು ಗಮನಾರ್ಹ ಸಾರ್ವಜನಿಕ ಮತ್ತು ರಾಜಕೀಯ ಚರ್ಚೆಯನ್ನು ಹುಟ್ಟುಹಾಕಿದೆ.
ಆತನ ಪುನರಾವರ್ತಿತ ಪೆರೋಲ್‌ಗಳ ಬಗ್ಗೆ ಹಲವು ಪ್ರಶ್ನೆಗಳು ಎದ್ದಿವೆ. ವಿಶೇಷವಾಗಿ, ಅವುಗಳಲ್ಲಿ ಹಲವು ಚುನಾವಣೆಗಳಂತಹ ಪ್ರಮುಖ ರಾಜಕೀಯ ಘಟನೆಗಳೊಂದಿಗೆ ಹೊಂದಿಕೆಯಾಗುತ್ತವೆ. ಆತನ ಇತ್ತೀಚಿನ ಬಿಡುಗಡೆಯು ಹರಿಯಾಣ ವಿಧಾನಸಭಾ ಚುನಾವಣೆಗೆ ಸ್ವಲ್ಪ ಮುಂಚಿತವಾಗಿ ಬಂದಿದೆ. ಇದು ರಹೀಮ್ ಮತ್ತು ಆತನ ಅನುಯಾಯಿಗಳು ರಾಜಕೀಯದ ಮೇಲೆ ಬೀರಬಹುದಾದ ಪ್ರಭಾವದ ಬಗ್ಗೆ ಕಳವಳವನ್ನು ಹೆಚ್ಚಿಸಿದೆ.
ಆತನ ಪ್ರಸ್ತುತ ಪೆರೋಲ್ ಸಮಯದಲ್ಲಿ, ಡೇರಾ ಮುಖ್ಯಸ್ಥರು ಸಾಮಾಜಿಕ ಮಾಧ್ಯಮ ತೊಡಗಿಸಿಕೊಳ್ಳುವಿಕೆ ಸೇರಿದಂತೆ ಯಾವುದೇ ಚುನಾವಣಾ ಸಂಬಂಧಿತ ಚಟುವಟಿಕೆಗಳಲ್ಲಿ ಭಾಗವಹಿಸದಂತೆ ನಿರ್ಬಂಧಿಸಲಾಗಿದೆ. ಗಮನಾರ್ಹವಾಗಿ, ಆತನ ಏಳು ಪೆರೋಲ್‌ಗಳು ಚುನಾವಣೆಯ ಮೊದಲು ಸಂಭವಿಸಿದವು, ಇದು ಆತನ ಅನುಯಾಯಿಗಳ ಮೂಲಕ ಚುನಾವಣೆ ಮೇಲೆ ಬೀರಬಹುದಾದ ಸಂಭಾವ್ಯ ಪ್ರಭಾವದ ಬಗ್ಗೆ ಊಹಾಪೋಹಗಳಿಗೆ ಕಾರಣವಾಯಿತು.
ಚುನಾವಣೆಗೆ ಮುನ್ನ ರಾಮ್ ರಹೀಮ್ ಪಡೆದ ಪೆರೋಲ್‌ಗಳ ವಿವರ:
ಫೆಬ್ರವರಿ 2022: ಮೊದಲ ಬಾರಿಗೆ, ಆತನಿಗೆ ಪಂಜಾಬ್ ವಿಧಾನಸಭಾ ಚುನಾವಣೆಯ ಮೊದಲು 21 ದಿನಗಳ ಪೆರೋಲ್ ಸಿಕ್ಕಿತ್ತು.
ಜೂನ್ 2022: ಹರಿಯಾಣ ಮುನ್ಸಿಪಲ್ ಕಾರ್ಪೊರೇಷನ್ ಚುನಾವಣೆಗೆ 30 ದಿನಗಳ ಪೆರೋಲ್.
ಅಕ್ಟೋಬರ್ 2022: ಹರಿಯಾಣದ ಆದಂಪುರ ಉಪಚುನಾವಣೆಯ ಮೊದಲು 40 ದಿನಗಳ ಪೆರೋಲ್.
ಜುಲೈ 2023: ಹರಿಯಾಣ ಪಂಚಾಯತ್ ಚುನಾವಣೆಗೆ ಮುನ್ನ 30 ದಿನಗಳ ಪೆರೋಲ್.
ನವೆಂಬರ್ 2023: ರಾಜಸ್ಥಾನ ವಿಧಾನಸಭಾ ಚುನಾವಣೆಯ ಮೊದಲು 29 ದಿನಗಳ ಪೆರೋಲ್.
ಜನವರಿ 2024: ಲೋಕಸಭೆ ಚುನಾವಣೆಗೆ 50 ದಿನಗಳ ಪೆರೋಲ್.
ಆಗಸ್ಟ್ 2024: ಹರಿಯಾಣ ವಿಧಾನಸಭೆ ಚುನಾವಣೆಗೆ 21 ದಿನಗಳ ಪೆರೋಲ್.
ಈ ಹಿಂದೆ, ಶಿರೋಮನು ಗುರುದ್ವಾರ ಪ್ರಬಂಧಕ್ ಸಮಿತಿ ಮತ್ತು ಶಿರೋಮಣಿ ಅಕಾಲಿದಳವು ಡೇರಾ ಮುಖ್ಯಸ್ಥರಿಗೆ “ಪುನರಾವರ್ತಿತ” ಪೆರೋಲ್ ನೀಡುತ್ತಿರುವುದನ್ನು ಪ್ರಶ್ನಿಸಿದ್ದವು. ಶಿಕ್ಷೆಯ ಅವಧಿ ಮುಗಿದ ನಂತರವೂ ಜೈಲುಗಳಲ್ಲಿದ್ದ ‘ಬಂದಿ ಸಿಂಗ್’ (ಸಿಖ್ ಖೈದಿಗಳು) ಅವರಿಗೆ “ನ್ಯಾಯ” ಸಿಗುತ್ತಿಲ್ಲ ಎಂದು ಅವರು ಹೇಳಿದರು.
