- Advertisement -
- Advertisement -
ಸಾಟಿಯಿಲ್ಲದ ಮಾರ್ದನಿ
————————————-
ಅವಳು ಭಾವದೊಳಡಗಿದ ದನಿ
ಸಪ್ತ ಸ್ವರಗಳ ಮೀರಿ
ಸಪ್ತ ಸಾಗರಗಳನೆ ದಾಟಿ
ಮಾರ್ದನಿಸುವ ತರಂಗಿಣಿ
ಯೋನಿಯೊಳೊಸರಿದ ನೆತ್ತರಿಗೆ
ಮೈಲಿಗೆಯ ಲೇಬಲ್!
ಮುಟ್ಟಿಲ್ಲದೆ ಹುಟ್ಟೆಲ್ಲಿದೆ?
ಹುಟ್ಟಿನ ಗುಟ್ಟೇ ಅವಳ ದನಿ
ಉಸಿರ ಬಸಿರಲಿ ಹೊತ್ತು
ಸಾವಿನ ಕದವ ತಟ್ಟಿ
ಮರುಜನ್ಮ ಪಡೆವ ಅವಳು
ನಿನ್ನುಸಿರ ಅಸ್ಮಿತೆಯ ಧ್ವನಿ
ಅಕ್ಷರದ ಸುತ್ತಣ ವಿಪ್ರರ
ಜಾತಿ ಬೇಲಿಯ ಮುರಿದು
ವಂಚಿತರೆದೆಯಲಿ ಬಿತ್ತಿದ
ಅವಳದು ಅಕ್ಕರದ ದನಿ
ಲೇಖನಿಯ ಕ್ಷಾರಕೆ
ಮೊಗ ಸುಟ್ಟುಕೊಂಡವರು
ಆಡಿದ್ದು ಗುಂಡಿನ ಭಾಷೆ
ಅವಳು ದನಿಯಿಲ್ಲದವರ ಅಮರ ಧ್ವನಿ
ಹೆಪ್ಪುಗಟ್ಟಿಸೊ ಚಳಿಯು ಹುಬ್ಬೇರಿಸಿದೆ
ಗುಂಡುಗಳೂ ಸಿಡಿತ ಮರೆತಂತಿವೆ
ಅವಳ ದನಿಗೆ, ಪ್ರತಿಧ್ವನಿಗೆ
ಐವತ್ತಾರಿಂಚಿನ ಉರವೂ ಕಂಪಿಸಿದೆ
******