ನಿನ್ನೆ ಶುಕ್ರವಾರದ ಮುಂಜಾನೆವರೆಗೆ, 18-45 ವಯೋಮಾನದ ಸುಮಾರು ಎರಡು ಕೋಟಿ ಯುವಜನರು ಕೋ-ವಿನ್ ಪ್ಲಾಟ್‌ಫಾರ್ಮಿನಲ್ಲಿ ಲಸಿಕೆ ಪಡೆಯಲು ನೋಂದಣಿ ಮಾಡಿಸಲು ಯತ್ನಿಸಿದ್ದಾರೆ. ಆದರೆ ಕರ್ನಾಟಕ ಸೇರಿದಂತೆ ಹತ್ತು ಹಲವು ರಾಜ್ಯಗಳು ಇವತ್ತಿನಿಂದ 3ನೇ ಹಂತದ ಲಸಿಕೆ ಅಭಿಯಾನ ಆರಂಭಿಸಿಲ್ಲ.
ಇದು ದೇಶದ ಲಸಿಕಾ ನೀತಿಯಲ್ಲಿನ ಅಸಂಬದ್ಧತೆ, ದೂರದರ್ಶಿತ್ವದ ಕೊರತೆ ಮತ್ತು ಜನರಿಗಿಂತ ಕಾರ್ಪೋರೇಟ್‌ಗಳು ಮೇಲು ಎನ್ನುವ ಪ್ರಭುತ್ವದ ಸಿದ್ದಾಂತಕ್ಕೆ ಅನುಗುಣವಾಗಿಯೇ ನಡೆದಿದ್ದು, ಭಾರತದಲ್ಲಿ ಮೊದಲ ಸಲ ಒಂದು ಸಾರ್ವತ್ರಿಕ ಲಸಿಕಾ ಕಾರ್ಯಕ್ರಮ ಹಳ್ಳ ಹಿಡಿಯುತ್ತಿರುವ ಸೂಚನೆಗಳನ್ನು ನೀಡುತ್ತಿದೆ. ಕಡೆಗೂ ಇವತ್ತು ಶನಿವಾರ ಮುಂಜಾನೆ ಎಚ್ಚೆತ್ತುಕೊಂಡ ಕೇಂದ್ರ ಆರೋಗ್ಯ ಇಲಾಖೆ ಲಸಿಕೆಗಳ ಬಗ್ಗೆ ಮಾತನಾಡಿದೆ.
ಆರೋಗ್ಯ ಇಲಾಖೆ ಹೇಳಿದ್ದೇನು?
79 ಲಕ್ಷಕ್ಕೂ ಹೆಚ್ಚು ಕೋವಿಡ್ ಲಸಿಕೆ ಡೋಸ್‌ಗಳು ರಾಜ್ಯಗಳು ಮತ್ತು ಕೇಂದ್ರಾಡಳಿತ ಪ್ರದೇಶಗಳಲ್ಲಿ ಉಳಿದಿವೆ. ಮುಂದಿನ ಮೂರು ದಿನಗಳಲ್ಲಿ 17 ಲಕ್ಷಕ್ಕೂ ಹೆಚ್ಚಿನ ಡೋಸ್‌ಗಳನ್ನು ಪೂರೈಸಲಾಗುವುದು ಎಂದು ಕೇಂದ್ರ ಆರೋಗ್ಯ ಸಚಿವಾಲಯ ಶನಿವಾರ ತಿಳಿಸಿದೆ.
17+79= 96 ಲಕ್ಷ ಡೋಸ್‌ಗಳು ಇನ್ನು ಮೂರು ದಿನದಲ್ಲಿ ದೇಶದ ಎಲ್ಲ ರಾಜ್ಯ ಸರ್ಕಾರಗಳು ಮತು ಕೇಂದ್ರಾಡಳಿತ ಪ್ರದೇಶಗಳ ಬಳಿ ಇರಲಿವೆ. ಅದೇನೋ ಅರೆಕಾಸಿನ ಮಜ್ಜಿಗೆ ಅಂತಾರಲ್ಲ ಆ ಲೆಕ್ಕವಿದು. ಮಾತೆತ್ತಿದರೆ, ‘ಇಂತಹ ದೊಡ್ಡ ಜನಸಂಖ್ಯೆಯ ದೇಶದಲ್ಲಿ ಕೊರೊನಾ ನಿಯಂತ್ರಣ ಕಷ್ಟ ಎನ್ನುವ ಬಿಜೆಪಿ ಬೆಂಬಲಿಗರ ಸೋಗಲಾಡಿತನ ಇಲ್ಲೇ ಬೆತ್ತಲಾಗುವುದು. 96 ಲಕ್ಷ ಲಸಿಕೆ ಡೊಸ್ ಇಟ್ಟುಕೊಂಡು ದೇಶಾದ್ಯಂತ 3ನೆ ಹಂತದ ಲಸಿಕಾ ಅಭಿಯಾನ ಸಾಧ್ಯವೇ? ಅದೂ ಮೂರು ದಿನದ ಬಳಿಕವಂತೆ! ಆರೋಗ್ಯ ಇಲಾಖೆ ಏಪ್ರಿಲ್ 28ರಂದು 18-44 ವಯಸ್ಸಿನವರಿಗೆ ನೋಂದಣಿಗೆ ಕರೆ ನೀಡುವಾಗ ಈ ವಾಸ್ತವ ಅದಕ್ಕೆ ಗೊತ್ತು ಇರಲಿಲ್ಲವೇ? ಎಲ್ಲ ಗೊತ್ತು ಇರುತ್ತದೆ. ಆ ಕ್ಷಣದ, ಆ ದಿನದ ಜನರ ಆಕ್ರೋಶ, ರಾಜ್ಯ ಸರ್ಕಾರಗಳ ಅಸಮಾಧಾನ ಮತ್ತು ಕೋರ್ಟುಗಳ ಚಾಟಿ ಏಟುಗಳನ್ನು ತಪ್ಪಿಸಿಕೊಳ್ಳಲು ಹಾಗೆ ಮಾಡುತ್ತದೆ. ಇಡೀ ಕೋವಿಡ್ ನಿಯಂತ್ರಣದಲ್ಲಿ ಈ ಬೇಜವಾಬ್ದಾರಿಯೇ ಕೋವಿಡ್ ವಿರುದ್ಧದ ಹೋರಾಟದಲ್ಲಿನ ಹಿನ್ನಡೆಗೆ ಕಾರಣವಾಗಿದೆ ಅಲ್ಲವೇ?
ಕೇಂದ್ರವು ಈವರೆಗೆ ಸುಮಾರು 16.37 ಕೋಟಿ ಲಸಿಕೆ ಡೋಸ್‌ಗಳನ್ನು ರಾಜ್ಯಗಳು ಮತ್ತು ಕೇಂದ್ರಾಡಳಿತ ಪ್ರದೇಶಗಳಿಗೆ ನೀಡಿದೆ. ಇದರಲ್ಲಿ, ನಾಶವಾದ ಲಸಿಕೆ ಸೇರಿದಂತೆ ಒಟ್ಟು ಬಳಕೆ 15,58,48,782 ಪ್ರಮಾಣಗಳಾಗಿವೆ ಎಂದು ಸರ್ಕಾರ ಮುಂಜಾನೆ ಹೇಳಿದೆ. (ನಾಶವಾಗಿದ್ದನ್ನು ಒಟ್ಟು ಬಳಕೆಯಾದ ಪ್ರಮಾಣಕ್ಕೆ ಸೇರಿಸಿಕೊಳ್ಳುವ ಕುತಂತ್ರ!)
ಮುಂದಿನ 3 ದಿನಗಳಲ್ಲಿ ದೇಶದ ಎಲ್ಲ ರಾಜ್ಯಗಳು ಮತ್ತು ಕೇಂದ್ರಾಡಳಿತ ಪ್ರದೇಶಗಳಿಗೆ ಸಿಗಲಿರುವುದು ಕೇವಲ 17,31,110 ಲಸಿಕೆಗಳು ಮಾತ್ರ! ಅದೂ ಗ್ಯಾರಂಟಿಯಿಲ್ಲವಂತೆ!
ಲಸಿಕಾ ಅಭಿಯಾನದ ಸುತ್ತ….
ಲಡಾಖ್‌ನ ಕೇಂದ್ರಾಡಳಿತ ಪ್ರದೇಶವು ತನ್ನ ಜನಸಂಖ್ಯೆಗಿಂತಲೂ ಹೆಚ್ಚಿನ ಪ್ರಮಾಣದ ಕನಿಷ್ಠ ಒಂದು ಡೋಸ್ ಕೋವಿಡ್ ಲಸಿಕೆ ನೀಡಿದೆ. ಆದರೆ ಉತ್ತರ ಪ್ರದೇಶವು ಅತಿದೊಡ್ಡ ಪ್ರಮಾಣದಲ್ಲಿ ಕೇಂದ್ರದಿಂದ ಲಸಿಕೆಗಳನ್ನು ಪಡೆದಿದ್ದರೂ ಸಹ ಅದರ ಜನಸಂಖ್ಯೆಯ ಶೇಕಡಾ ಒಂದು ಭಾಗಕ್ಕೂ ಸಂಪೂರ್ಣವಾಗಿ ಲಸಿಕೆ ನೀಡಿಲ್ಲ.
ಆರೋಗ್ಯ ಸಚಿವಾಲಯದ ಅಂಕಿಅಂಶಗಳ ಪ್ರಕಾರ, ಹೆಚ್ಚು ಜನಸಂಖ್ಯೆ ಹೊಂದಿರುವ ರಾಜ್ಯಗಳಲ್ಲಿ ಒಂದಾದ ಗುಜರಾತ್ ಲಸಿಕೆ ನೀಡುವಲ್ಲಿ ಗಮನಾರ್ಹ ಸಾಧನೆ ಮಾಡಿದೆ. ಲಕ್ಷದ್ವೀಪ ಮತ್ತು ತಮಿಳುನಾಡು ಹೆಚ್ಚಿನ ಪ್ರಮಾಣದಲ್ಲಿ ಲಸಿಕೆಗಳನ್ನು ವ್ಯರ್ಥ ಮಾಡಿವೆ.
ಜನವರಿ 16 ರಂದು ಪ್ರಾರಂಭವಾದ ಲಸಿಕೆ ಚಾಲನೆಯ ಮೊದಲ ಹಂತದಲ್ಲಿ, ಲಸಿಕೆಗಳನ್ನು ಆರೋಗ್ಯ ಮತ್ತು ಮುಂಚೂಣಿ ಕಾರ್ಯಕರ್ತರಿಗೆ ಮಾತ್ರ ಕಾಯ್ದಿರಿಸಲಾಗಿತ್ತು. ಮಾರ್ಚ್ 1 ರಿಂದ, 60 ವರ್ಷಕ್ಕಿಂತ ಮೇಲ್ಪಟ್ಟ ಎಲ್ಲಾ ಜನರು ಮತ್ತು 45 ವರ್ಷಕ್ಕಿಂತ ಮೇಲ್ಪಟ್ಟ ರೋಗಲಕ್ಷಣ ಹೊಂದಿದ ಜನರು ಲಸಿಕೆ ಪಡೆಯಲು ಅರ್ಹರಾದರು. ಏಪ್ರಿಲ್ 1 ರಿಂದ, 45 ವರ್ಷಕ್ಕಿಂತ ಮೇಲ್ಪಟ್ಟ ಎಲ್ಲಾ ನಾಗರಿಕರು ಕೋವಿಡ್ ಲಸಿಕೆಗಳಿಗೆ ಅರ್ಹರಾದರು.
ಈಗ, ಇವತ್ತು ಮೇ 1 ರಿಂದ ಭಾರತವು ತನ್ನ ಕೋವಿಡ್ ವ್ಯಾಕ್ಸಿನೇಷನ್ ಅನ್ನು 18 ದಾಟಿದ ಎಲ್ಲಾ ವಯಸ್ಕರಿಗೆ ಮುಕ್ತಗೊಳಿಸಿದೆ. ಆದರೆ ತಯಾರಿ ಇರದ ಪರಿಣಾಮ ಮತ್ತು ಕೇಂದ್ರವು ಲಸಿಕಾ ಕಂಪನಿಗಳ ಮೇಲೆ ಯಾವುದೇ ನಿಯಂತ್ರಣ ಹೊಂದದ ಪರಿಣಾಮ ಇದು ಮುಗ್ಗರಿಸಿದೆ.
ಭಾರತದಲ್ಲಿ ಈವರೆಗೆ ಒಟ್ಟು 15,22,45,179 ( 15 ಕೋಟಿ 22 ಲಕ್ಷ 45,719) ಡೋಸ್ ಕೋವಿಡ್ ಲಸಿಕೆಗಳನ್ನು ನೀಡಲಾಗಿದೆ. 12,54,86,929 ಜನರಿಗೆ ಲಸಿಕೆಯ ಮೊದಲ ಡೋಸ್ ಸಿಕ್ಕಿದ್ದರೆ, 2,67,58,250 ಜನರು ಎರಡೂ ಡೋಸ್‌ಗಳನ್ನು ಪಡೆದಿದ್ದಾರೆ.
ಒಟ್ಟಾರೆಯಾಗಿ, ಸಣ್ಣ ರಾಜ್ಯಗಳು ಮತ್ತು ಕೇಂದ್ರಾಡಳಿತ ಪ್ರದೇಶಗಳು ತಮ್ಮ ಲಸಿಕಾ ಅಭಿಯಾನದಲ್ಲ್ಲಿ ಉತ್ತಮ ಸಾಧನೆ ತೋರಿವೆ, ಕಳೆದ ವರ್ಷವಷ್ಟೇ ಕೇಂದ್ರಾಡಳಿತ ಪ್ರದೇಶವಾದ ಲಡಾಖ್ ಉನ್ನತ ಸಾಧನೆ ಮಾಡಿದೆ. ತನ್ನ ಜನಸಂಖ್ಯೆಯ ಶೇಕಡಾ 11 ರಷ್ಟು ಜನರಿಗೆ ಲಸಿಕೆಯನ್ನು ಸಂಪೂರ್ಣವಾಗಿ ನೀಡಿದೆ, ಜನಸಂಖ್ಯೆಯ ಕಾಲು ಭಾಗದಷ್ಟು ಜನರು ಕನಿಷ್ಠ ಒಂದು ಡೋಸ್ ಪಡೆದಿದ್ದಾರೆ.
ಅತಿ ಹೆಚ್ಚು ಜನಸಂಖ್ಯೆ ಹೊಂದಿರುವ ರಾಜ್ಯಗಳಲ್ಲಿ, ಗುಜರಾತ್ ಮತ್ತು ರಾಜಸ್ಥಾನಗಳು ಉನ್ನತ ಪ್ರದರ್ಶನ ನೀಡಿವೆ. ಗುಜರಾತ್ ರಾಜ್ಯವು ಜನಸಂಖ್ಯೆಯ ಶೇಕಡಾ 3.42 ರಷ್ಟು ಜನರಿಗೆ ಸಂಪೂರ್ಣವಾಗಿ ಲಸಿಕೆ ನೀಡುವಲ್ಲಿ ಯಶಸ್ವಿಯಾಗಿದ್ದರೆ, ಶೇಕಡಾ 14.2 ರಷ್ಟು ಜನರು ಲಸಿಕೆಯ ಕನಿಷ್ಠ ಒಂದು ಡೋಸ್ ಪಡೆದಿದ್ದಾರೆ.
ಅಂತೆಯೇ, ರಾಜಸ್ಥಾನದಲ್ಲಿ, ಶೇಕಡಾ 13.6 ರಷ್ಟು ಜನಸಂಖ್ಯೆಯು ಕನಿಷ್ಠ ಮೊದಲ ಡೋಸ್ ಪಡೆದಿದೆ. 2.77 ರಷ್ಟು ಜನಸಂಖ್ಯೆಯು ಎರಡೂ ಡೋಸ್ ಸ್ವೀಕರಿಸಿದೆ.
ಲಡಾಖ್, ಸಿಕ್ಕಿಂ ಮತ್ತು ತ್ರಿಪುರವನ್ನು ಹೊರತುಪಡಿಸಿ, ಇತರ ಎಲ್ಲ ರಾಜ್ಯಗಳು ಜನಸಂಖ್ಯೆಯ ಶೇಕಡಾ 20 ಕ್ಕಿಂತ ಕಡಿಮೆ ಜನಸಂಖ್ಯೆಗೆ ಕನಿಷ್ಠ ಒಂದು ಡೋಸ್‌ನೊಂದಿಗೆ ಲಸಿಕೆ ನೀಡಿದರೆ, ಶೇಕಡಾ 5 ಕ್ಕಿಂತ ಕಡಿಮೆ ಜನರು ಎರಡೂ ಪ್ರಮಾಣಗಳನ್ನು ಪಡೆದಿದ್ದಾರೆ.
ರಾಷ್ಟ್ರ ಮಟ್ಟದಲ್ಲಿ ಶೇಕಡಾ 1.97 ಜನರಿಗೆ ಸಂಪೂರ್ಣ ಲಸಿಕೆ (ಎರಡೂ ಡೋಸ್) ಸಿಕ್ಕಿದ್ದ್ದರೆ, ಶೇ. 9.24 ಜನರು ಕನಿಷ್ಠ ಒಂದು ಡೋಸ್ ಪಡೆದಿದ್ದಾರೆ. ಪರಿಸ್ಥಿತಿ ಹೀಗಿರುವಾಗ ವಿದೇಶಗಳಿಗೆ ಲಸಿಕೆ ರಫ್ತು ಮಾಡಿದ್ದು ಏಕೆ ಎಂದು ಪ್ರಶ್ನೆ ಕೇಳಿಬಂದಿದೆ.
ಲಸಿಕೆ ಪೋಲು
ಲಕ್ಷದ್ವೀಪ ಮತ್ತು ತಮಿಳುನಾಡು ಹೆಚ್ಚು ಲಸಿಕೆ ಪೋಲು ಮಾಡಿದ ರಾಜ್ಯಗಳಾಗಿವೆ. ಲಕ್ಷದ್ವೀಪ ತನ್ನ ಶೇಕಡಾ 9.76 ಪ್ರಮಾಣವನ್ನು ವ್ಯರ್ಥ ಮಾಡಿದರೆ, ತಮಿಳುನಾಡು ತನ್ನ ಲಸಿಕೆಗಳಲ್ಲಿ ಶೇ. 8.83 ರಷ್ಟನ್ನು ಪೋಲು ಮಾಡಿದೆ. (ಸಮಯಕ್ಕೆ ಸರಿಯಾಗಿ ಲಸಿಕೆ ನೀಡದಿದ್ದಲ್ಲಿ ಅದರ ಅವಧಿ ಮುಗಿದಾಗ ಅದು ವ್ಯರ್ಥವಾಗುತ್ತದೆ.)
ತಮಿಳುನಾಡಿನಲ್ಲಿ ಶೇಕಡಾ 8.83 ರಷ್ಟು ವ್ಯರ್ಥವಾಗುವುದು ಅಂದರೆ 5,16,191 ಡೋಸ್ ವ್ಯರ್ಥವಾದಂತೆ. ಇದು ಲಡಾಖ್‌ನಂತಹ ಸಣ್ಣ ಪ್ರದೇಶದ ಸಂಪೂರ್ಣ ಜನಸಂಖ್ಯೆಯನ್ನು ಸಂಪೂರ್ಣವಾಗಿ ಲಸಿಕೆ ಮಾಡಲು ಸಾಕು.
ಹೆಚ್ಚುವರಿ ಲಸಿಕೆ
ಆರೋಗ್ಯ ಸಚಿವಾಲಯದ ಪ್ರಕಾರ, ಭಾರತವು ಇನ್ನೂ 79 ಲಕ್ಷ ಡೋಸ್‌ಗಳು ರಾಜ್ಯಗಳ ಬಳಿ ಇವೆ. ಉತ್ತರ ಪ್ರದೇಶದಲ್ಲಿ ಅತಿ ಹೆಚ್ಚು 11,80,659 ಲಸಿಕೆಗಳು ಇದ್ದು, ನಂತರದ ಸ್ಥಾನದಲ್ಲಿ ಬಿಹಾರ (8,36,283) ಇದೆ. ಈ ಎರಡೂ ರಾಜ್ಯಗಳು ಲಸಿಕಾ ಅಭಿಯಾನದಲ್ಲಿ ಕಳಪೆ ಸಾಧನೆ ಮಾಡಿವೆ.
ಮೊದಲ ಡೋಸ್ ಮತ್ತು ಎರಡನೇ ಡೋಸ್
ಕೋವಿಡ್ ಲಸಿಕೆಯ ಎರಡನೇ ಡೋಸ್ ಅನ್ನು ಮೊದಲ ಡೋಸ್ ನಂತರ 28-56 ದಿನಗಳ ಅಂತರದಲ್ಲಿ ತೆಗೆದುಕೊಳ್ಳಬೇಕಾಗಿರುವುದರಿಂದ, ಎರಡನೇ ಡೋಸ್‌ನ ಗ್ರಾಫ್ ಮೊದಲನೆಯದಕ್ಕೆ ಸಮಾನಾಂತರವಾಗಿ ಚಲಿಸಬೇಕು. ಆದರೆ ಹಾಗೆ ಆಗುತ್ತಿಲ್ಲ!
ಎರಡು ಪ್ಲಾಟ್‌ಗಳ ನಡುವೆ ಹೆಚ್ಚುತ್ತಿರುವ ಅಂತರವು ಅನೇಕ ಜನರು ತಮ್ಮ ಎರಡನೇ ಡೋಸ್ ಅನ್ನು ವಿಳಂಬಗೊಳಿಸುತ್ತಿದ್ದಾರೆ ಎಂದು ಸೂಚಿಸುತ್ತದೆ. ಲಸಿಕೆಗಳು ಲಭ್ಯವಿಲ್ಲದಿರುವುದು ಅಥವಾ ಪ್ರಕರಣಗಳ ಹೆಚ್ಚಳದಿಂದಾಗಿ ಆಸ್ಪತ್ರೆಗಳಿಗೆ ಭೇಟಿ ನೀಡಲು ಹಿಂಜರಿಯುವುದು ಇದಕ್ಕೆ ಕಾರಣವಾಗಿರಬಹುದು.
ಕೋವಿಶೀಲ್ಡ್ ಮತ್ತು ಕೊವಾಕ್ಸಿನ್
ಇಲ್ಲಿಯವರೆಗೆ ನೀಡಲಾದ ಒಟ್ಟು ಲಸಿಕೆಗಳಲ್ಲಿ ಭಾರತ್ ಬಯೊಟೆಕ್‌ನ ಶೇ.9ರಷ್ಟು ಕೋವ್ಯಾಕ್ಸಿನ್ ಲಸಿಕೆಗಳಿವೆ. ಈವರೆಗೆ ಶೇಕಡಾ 90 ಕ್ಕೂ ಹೆಚ್ಚು ಭಾರತೀಯರು ಸೀರಂನ ಕೋವಿಶೀಲ್ಡ್ ಲಸಿಕೆ ಪಡೆದಿದ್ದಾರೆ. ಕೇಂದ್ರದಿಂದ 1,500 ಕೋಟಿ ರೂ, ಹಣ ಪಡೆದ ಭಾರತ್ ಬಯೋಟೆಕ್ ಸಾಧನೆ ಗಮನಿಸಿ!
ಲಿಂಗವಾರು ವಿತರಣೆ
ಇಲ್ಲಿಯವರೆಗೆ, ಲಸಿಕೆ ಪಡೆದವರಲ್ಲಿ ಶೇಕಡಾ 52.18 ರಷ್ಟು ಪುರುಷರು, ಶೇ. 47.8 ರಷ್ಟು ಮಹಿಳೆಯರು ಇದ್ದಾರೆ. ಶೇಕಡಾ 0.01 ರಷ್ಟು ಲಸಿಕೆಗಳನ್ನು ತೃತೀಯ ಲಿಂಗಿಗಳಿಗೆ ನೀಡಲಾಗಿದೆ.
* ಪಿ.ಕೆ. ಮಲ್ಲನಗೌಡರ್
(ಮಾಹಿತಿ: ಕೇಂದ್ರ ಆರೋಗ್ಯ ಇಲಾಖೆ, ದಿ ಪ್ರಿಂಟ್ ಮತ್ತು ಇತರ ಮೂಲಗಳು)
ಚಿತ್ರಗಳು: ದಿ ಪ್ರಿಂಟ್
ಅಯೋಗ್ಯರು, ಅಪ್ರಾಮಾಣಿಕರು ಹಾಗೂ ಅದಕ್ಶರ ಕೈಗೆ ಅಧಿಕಾರ ಸಿಕ್ಕಿರುವುದರ ಪರಿಣಾಮವನ್ನು ನಾವಿಂದು ಅನುಬವಿಸುತ್ತಿದ್ದೇವೆ.