ಜಾತಿ ಜನಗಣತಿ ಸಮೀಕ್ಷೆಯನ್ನು ರಾಜಕೀಯ ಸಾಧನವಾಗಿ ಬಳಸುವುದರ ಬಗ್ಗೆ ತಾನು ಜಾಗರೂಕನಾಗಿದ್ದೇನೆ ಎಂದು ರಾಷ್ಟ್ರೀಯ ಸ್ವಯಂಸೇವಕ ಸಂಘ (ಆರ್ಎಸ್ಎಸ್) ಹೇಳಿದೆ ಎಂದು ರಾಷ್ಟ್ರೀಯ ಮಾಧ್ಯಮಗಳು ವರದಿ ಮಾಡಿವೆ.
ದಶಮಾನ ಜನಗಣತಿಯೊಂದಿಗೆ ಜಾತಿ ಆಧಾರಿತ ಸಮೀಕ್ಷೆ ನಡೆಸುವ ಕೇಂದ್ರ ಸರ್ಕಾರದ ನಿರ್ಧಾರಕ್ಕೆ ಸಂಘ ಇನ್ನೂ ಅಧಿಕೃತವಾಗಿ ಪ್ರತಿಕ್ರಿಯಿಸಿಲ್ಲ.
ಜಾತಿ ಆಧಾರದ ಮೇಲೆ ವಿಭಜನೆ ಮತ್ತು ಪ್ರತ್ಯೇಕತೆಯನ್ನು ಆರ್ಎಸ್ಎಸ್ ಸಾಂಪ್ರದಾಯಿಕವಾಗಿ ವಿರೋಧಿಸುತ್ತಾ ಬಂದಿದೆ. ಆದರೆ, ಪರಿಶಿಷ್ಟ ಜಾತಿ ಮತ್ತು ಪರಿಶಿಷ್ಟ ಪಂಗಡಗಳಿಗೆ ಕೋಟಾಗಳಲ್ಲಿ ಉಪ-ವರ್ಗೀಕರಣ ಮತ್ತು ಕೆನೆ ಪದರವನ್ನು ಪರಿಚಯಿಸುವಂತಹ ವಿಷಯಗಳನ್ನು ಸಂಬಂಧಪಟ್ಟವರೊಂದಿಗೆ ಸಮಾಲೋಚಿಸಿ, ಒಮ್ಮತ ನಿರ್ಧಾರದ ನಂತರ ಕೈಗೊಳ್ಳಬೇಕು ಎಂಬ ನಿಲುವನ್ನು ತೆಗೆದುಕೊಂಡಿದೆ.
ಪ್ರಧಾನಿ ನರೇಂದ್ರ ಮೋದಿ ಅವರು ಆರ್ಎಸ್ಎಸ್ ಮುಖ್ಯಸ್ಥ ಮೋಹನ್ ಭಾಗವತ್ ಅವರನ್ನು ಅಧಿಕೃತ ನಿವಾಸದಲ್ಲಿ ಭೇಟಿಯಾದ ಒಂದು ದಿನದ ನಂತರ ಜಾತಿ ಜನಗಣತಿ ಸಮೀಕ್ಷೆಯನ್ನು ನಡೆಸುವ ಕೇಂದ್ರ ಸರ್ಕಾರದ ನಿರ್ಧಾರ ಬಂದಿದೆ.
ಹಿಂದೂ ಸಮಾಜವನ್ನು ಒಗ್ಗೂಡಿಸಲು ‘ಸಮಾಜಿಕ್ ಸಮರಸ್ತ’ ಅಥವಾ ಸಾಮಾಜಿಕ ಸಾಮರಸ್ಯ ಅಭಿಯಾನವನ್ನು ನಡೆಸುತ್ತಿರುವ ಸಂಘವು, ಜಾತಿ ಎಣಿಕೆಯ ವಿಷಯವನ್ನು ರಾಜಕೀಯ ಕಾರ್ಯಸೂಚಿಯಾಗಿ ನೋಡಬಾರದು ಎಂದು ಈ ಹಿಂದೆ ಹೇಳಿತ್ತು.
ಕಳೆದ ವರ್ಷ ಸೆಪ್ಟೆಂಬರ್ನಲ್ಲಿ ಕೇರಳದ ಪಾಲಕ್ಕಾಡ್ನಲ್ಲಿ ಮಾಧ್ಯಮಗಳನ್ನುದ್ದೇಶಿಸಿ ಮಾತನಾಡಿದ ಸಂಘದ ಮುಖ್ಯ ವಕ್ತಾರ ಸುನಿಲ್ ಅಂಬೇಕರ್, ಜಾತಿ ಸಂಬಂಧಗಳು ಸೂಕ್ಷ್ಮ ವಿಷಯಗಳಾಗಿವೆ, ರಾಷ್ಟ್ರೀಯ ಏಕತೆ ಮತ್ತು ಸಮಗ್ರತೆಗೆ ಮುಖ್ಯವಾಗಿವೆ ಎಂದು ಹೇಳಿದರು.
“ಜಾತಿ ಸಮೀಕ್ಷೆಯನ್ನು ಚುನಾವಣೆಗಳು ಅಥವಾ ಚುನಾವಣಾ ರಾಜಕೀಯವನ್ನು ಆಧರಿಸಿ ಅಲ್ಲ, ಬಹಳ ಸೂಕ್ಷ್ಮವಾಗಿ ವ್ಯವಹರಿಸಬೇಕು” ಎಂದು ಅವರು ಹೇಳಿದರು.
ಜಾತಿ ಜನಗಣತಿಯ ಬೇಡಿಕೆಯ ಕುರಿತಾದ ಪ್ರಶ್ನೆಗೆ ಉತ್ತರಿಸಿದ ಅಂಬೇಕರ್, “ಎಲ್ಲ ಕಲ್ಯಾಣ ಚಟುವಟಿಕೆಗಳಿಗೆ, ವಿಶೇಷವಾಗಿ ಹಿಂದುಳಿದಿರುವ ಮತ್ತು ವಿಶೇಷ ಗಮನ ಅಗತ್ಯವಿರುವ ಸಮುದಾಯಗಳು ಅಥವಾ ಜಾತಿಗಳಿಗೆ… ಸರ್ಕಾರಕ್ಕೆ ಸಂಖ್ಯೆಗಳು ಬೇಕಾದರೆ, ಅದು ಸುಸ್ಥಾಪಿತ ಅಭ್ಯಾಸ ಎಂದು ಆರ್ಎಸ್ಎಸ್ ಭಾವಿಸುತ್ತದೆ. ಈ ಹಿಂದೆ, ಅಂತಹ ಡೇಟಾವನ್ನು ಸಂಗ್ರಹಿಸಲಾಗಿತ್ತು…ಆದರೆ ಅದನ್ನು ಆ ಸಮುದಾಯಗಳು ಮತ್ತು ಜಾತಿಗಳ ಕಲ್ಯಾಣಕ್ಕಾಗಿ ಮಾತ್ರ ಮಾಡಬೇಕು. ಇದನ್ನು ಚುನಾವಣೆಗಳಿಗೆ ರಾಜಕೀಯ ಸಾಧನವಾಗಿ ಬಳಸಬಾರದು” ಎಂದು ಹೇಳಿದೆ.
ಜಾತಿ ದತ್ತಾಂಶ ಸಂಗ್ರಹಣೆಗೆ ತನ್ನ ಯಾವುದೇ ಆಕ್ಷೇಪಣೆ ಇಲ್ಲ ಎಂದು ಆರ್ಎಸ್ಎಸ್ ಸ್ಪಷ್ಟಪಡಿಸಿದೆ. ಆದರೆ, ಅದನ್ನು ‘ಸಾರ್ವಜನಿಕ ಕಲ್ಯಾಣಕ್ಕಾಗಿ ಬಳಸಬೇಕು; ವಿಭಜಕ ರಾಜಕೀಯ-ಚುನಾವಣಾ ಕಾರ್ಯಸೂಚಿಗಳಿಗಾಗಿ ಅಲ್ಲ’ ಎಂದಿದೆ. ಈ ಹೇಳಿಕೆಯನ್ನು ಈಗ ನರೇಂದ್ರ ಮೋದಿ ಸರ್ಕಾರವು ತನ್ನ ಪ್ರಮುಖ ಬೆಂಬಲ ನೆಲೆಯಿಂದ ಸೈದ್ಧಾಂತಿಕ ಹಿನ್ನಡೆಯನ್ನು ಎದುರಿಸದೆ ಮುಂದುವರಿಯಲು ಅನುವು ಮಾಡಿಕೊಟ್ಟ ನಿರ್ಣಾಯಕ ಹಸಿರು ನಿಶಾನೆಯಾಗಿ ನೋಡಲಾಗುತ್ತಿದೆ.
ಬಿಹಾರದಲ್ಲಿ ಜಾತಿ ಸಮೀಕ್ಷೆ ತಳಮಟ್ಟದ ಅನುಷ್ಠಾನ ಮತ್ತು ಆರ್ಎಸ್ಎಸ್ನ ರಾಷ್ಟ್ರೀಯ ಮಟ್ಟದ ಬೆಂಬಲದೊಂದಿಗೆ, ಜಾತಿ ಜನಗಣತಿಯು ಈಗ ಭಾರತದ ಸಾಮಾಜಿಕ-ಆರ್ಥಿಕ ಮತ್ತು ರಾಜಕೀಯ ನೀತಿಯ ನಿಯಮಗಳನ್ನು ಹಾಗೂ ಅದರ ಚುನಾವಣಾ ಸಂವಾದವನ್ನು ಮರು ವ್ಯಾಖ್ಯಾನಿಸಲು ಸಜ್ಜಾಗಿದೆ.
ಆರ್ಎಸ್ಎಸ್ ‘ಭಾರತದ ಹಮಾಸ್, ಐಸಿಸ್’: ಕಾಂಗ್ರೆಸ್ ನಾಯಕಿ ರಾಗಿಣಿ ನಾಯಕ್ ಆರೋಪ
