ಅಹಮದಾಬಾದ್: ಬೆಂಗಳೂರಿನ ದೇವನಹಳ್ಳಿ ಗ್ರಾಮೀಣ ಪ್ರದೇಶದಲ್ಲಿ 13 ಗ್ರಾಮಗಳ ರೈತರು ತಮ್ಮ 1777 ಎಕರೆ ಫಲವತ್ತಾದ ಕೃಷಿ ಭೂಮಿಯ ಬಲವಂತದ ಸ್ವಾಧೀನ ವಿರೋಧಿಸಿ ನಡೆಸುತ್ತಿರುವ 3 ವರ್ಷಗಳ ಹೋರಾಟವು, ಕಾರ್ಮಿಕ ಸಂಘಟನೆಗಳಲ್ಲೂ ಪ್ರತಿಧ್ವನಿಸಿದೆ. ಗುಜರಾತ್‌ನ ಕಾರ್ಮಿಕರ ಪ್ರಮುಖ ಟ್ರೇಡ್ ಯೂನಿಯನ್ ಆದ ‘ಮಜೂರ್ ಅಧಿಕಾರ್ ಮಂಚ್’ (Majur Adhikar Manch)ರೈತರ ‘ಭೂಮಿ ಸತ್ಯಾಗ್ರಹ’ ಹೋರಾಟಕ್ಕೆ ತನ್ನ ಸಂಪೂರ್ಣ ಬೆಂಬಲ ಘೋಷಿಸಿದೆ.
ಜುಲೈ 3, 2025 ರಂದು ನೀಡಿದ ಪತ್ರಿಕಾ ಹೇಳಿಕೆಯಲ್ಲಿ, ಮಜೂರ್ ಅಧಿಕಾರ್ ಮಂಚ್‌ನ ಪ್ರಧಾನ ಕಾರ್ಯದರ್ಶಿ ರಮೇಶ್ ಶ್ರೀವಾಸ್ತವ ಅವರು, “ಕರ್ನಾಟಕದ ರಾಜಧಾನಿ ಸಮೀಪದ ಈ ಫಲವತ್ತಾದ ಭೂಮಿಯನ್ನು ದುರ್ಬಲ ವರ್ಗದ ರೈತರಿಗೆ ಭೂ ಸುಧಾರಣೆ ಕಾಯಿದೆಯಡಿಯಲ್ಲಿ ನೀಡಲಾಗಿತ್ತು. ಆದರೆ, ಕೆಂಪೇಗೌಡ ಅಂತಾರಾಷ್ಟ್ರೀಯ ವಿಮಾನ ನಿಲ್ದಾಣದ ಸಾಮೀಪ್ಯದಿಂದಾಗಿ ಇದು ಕಾರ್ಪೊರೇಟ್ ವಲಯದ ಆಮಿಷಕ್ಕೆ ಒಳಗಾಗಿದೆ” ಎಂದು ವಿಶ್ಲೇಷಿಸಿದ್ದಾರೆ.
ರಾಜಕೀಯ ಪಕ್ಷಗಳ ‘ಮುಖವಾಡ’ ಬಯಲು: ಶ್ರೀವಾಸ್ತವ ಅವರು ಹಿಂದಿನ ಬಿಜೆಪಿ ಮತ್ತು ಹಾಲಿ ಕಾಂಗ್ರೆಸ್ ಸರ್ಕಾರಗಳ ನೀತಿಗಳನ್ನು ತೀವ್ರವಾಗಿ ಟೀಕಿಸಿದ್ದಾರೆ. “ಹಿಂದಿನ ಬಿಜೆಪಿ ಸರ್ಕಾರ, 2013ರ ‘ಭೂಸ್ವಾಧೀನ ಕಾಯಿದೆ’ಯನ್ನು ಬದಿಗೊತ್ತಿ ಕೆ.ಐ.ಎ.ಡಿ.ಬಿ. ಮೂಲಕ ಭೂಸ್ವಾಧೀನಕ್ಕೆ ಮುಂದಾಗಿತ್ತು. ಆಗ ವಿರೋಧ ಪಕ್ಷದಲ್ಲಿದ್ದ ಕಾಂಗ್ರೆಸ್, ಅಧಿಕಾರಕ್ಕೆ ಬಂದರೆ ಅಧಿಸೂಚನೆ ರದ್ದುಪಡಿಸುವುದಾಗಿ ಭರವಸೆ ನೀಡಿತ್ತು. ಆದರೆ, ಅಧಿಕಾರಕ್ಕೆ ಬಂದ ನಂತರ ಕಾಂಗ್ರೆಸ್ ಸರ್ಕಾರ ಸಂಪೂರ್ಣ ‘ಯು-ಟರ್ನ್’ ತೆಗೆದುಕೊಂಡಿದೆ. ರೈತರ ನ್ಯಾಯಯುತ ಹಕ್ಕುಗಳನ್ನು ಕಡೆಗಣಿಸಿ, ಕಾರ್ಪೊರೇಟ್ ಹಿತಾಸಕ್ತಿಗಳನ್ನು ಪೂರೈಸುವಲ್ಲಿ ಹಿಂದಿನ ಬಿಜೆಪಿ ಸರ್ಕಾರದಂತೆಯೇ ವರ್ತಿಸುತ್ತಿದೆ” ಎಂದು ಅವರು ಆಕ್ರೋಶ ವ್ಯಕ್ತಪಡಿಸಿದ್ದಾರೆ. ಈ ‘ಮತಿಗೆಟ್ಟ’ (ಫ್ಲಿಪ್-ಫ್ಲಾಪ್) ವರ್ತನೆಯನ್ನು ಸಂಘಟನೆ ತೀವ್ರವಾಗಿ ಖಂಡಿಸಿದೆ.
ಬಲವಂತದ ಸ್ವಾಧೀನ ರದ್ದುಪಡಿಸಿ: ಮಜೂರ್ ಅಧಿಕಾರ್ ಮಂಚ್ ದೇವನಹಳ್ಳಿ ರೈತರ ನಾಲ್ಕು ಪ್ರಮುಖ ಬೇಡಿಕೆಗಳಿಗೆ ಸಂಪೂರ್ಣ ಬೆಂಬಲ ನೀಡುವುದಾಗಿ ತಿಳಿಸಿದ್ದು, “ಕರ್ನಾಟಕ ಸರ್ಕಾರವು ಈ ಬಲವಂತದ ಭೂಸ್ವಾಧೀನ ಅಧಿಸೂಚನೆಯನ್ನು ತಕ್ಷಣವೇ ಸಂಪೂರ್ಣವಾಗಿ ರದ್ದುಗೊಳಿಸಬೇಕು” ಎಂದು ದೃಢವಾಗಿ ಆಗ್ರಹಿಸಿದೆ. ಇದು ಕಾರ್ಪೊರೇಟ್ ಪರ ನೀತಿಗಳ ವಿರುದ್ಧ ರೈತ ಮತ್ತು ಕಾರ್ಮಿಕ ವರ್ಗದ ಐಕ್ಯತೆಯ ಸಂಕೇತವಾಗಿ ಹೊರಹೊಮ್ಮಿದೆ.
ದೇವನಹಳ್ಳಿ ಭೂಸ್ವಾಧೀನದ ವಿರುದ್ಧ ಪ್ರತಿಭಟನೆ: ಸಿದ್ದರಾಮಯ್ಯ ಸರಕಾರ ವಿಶ್ವಾಸಾರ್ಹತೆಯಿಂದ ನಡೆದುಕೊಳ್ಳಲಿದೆಯೇ?
