ಕೋಲ್ಕತ್ತಾ ಮತ್ತು ಸುತ್ತಮುತ್ತಲಿನ ಹಲವಾರು ವಿಧಾನಸಭಾ ಕ್ಷೇತ್ರಗಳ ಮತದಾರರ ಹೆಸರುಗಳು 2002 ರ ಮತದಾರರ ಪಟ್ಟಿಯಲ್ಲಿರುವ ನಮೂದುಗಳಿಗೆ ಹೊಂದಿಕೆಯಾಗುತ್ತಿಲ್ಲ ಎಂದು ಮುಖ್ಯ ಚುನಾವಣಾ ಅಧಿಕಾರಿ ಮನೋಜ್ ಕುಮಾರ್ ಅಗರ್ವಾಲ್ ಕಚೇರಿಯ ಅಧಿಕಾರಿಗಳು ತಿಳಿಸಿದ್ದಾರೆ ಎಂದು ‘ಮಾಧ್ಯಮ್’ ಆಂಗ್ಲ ಜಾಲತಾಣ ವರದಿ ಮಾಡಿದೆ.
ರಾಜ್ಯದಲ್ಲಿ ನಡೆಯುತ್ತಿರುವ ವಿಶೇಷ ತೀವ್ರ ಪರಿಷ್ಕರಣೆ (ಎಸ್‌ಐಆರ್‌) ಸಮಯದಲ್ಲಿ ಸಂಗ್ರಹಿಸಲಾದ ಎಣಿಕೆ ನಮೂನೆಗಳ ಡಿಜಿಟಲೀಕರಣ ಪ್ರಗತಿಯಲ್ಲಿದೆ, ಇಲ್ಲಿಯವರೆಗೆ ಸುಮಾರು 26 ಲಕ್ಷ ಮತದಾರರ ಹೆಸರುಗಳು ಅಥವಾ ಪೋಷಕರ ಹೆಸರುಗಳು 2002 ರ ಪಟ್ಟಿಗೆ ಹೊಂದಿಕೆಯಾಗುವುದಿಲ್ಲ ಎಂದು ಕಂಡುಬಂದಿದೆ ಎಂದು ಹೇಳಿದ್ದಾರೆ ಎಂದು ವರದಿಯಲ್ಲಿದೆ.
ಕೋಲ್ಕತ್ತಾ ಬಂದರು, ಕಸ್ಬಾ, ಸೋನಾರ್ಪುರ್ (ದಕ್ಷಿಣ), ಸೋನಾರ್ಪುರ್ (ಉತ್ತರ), ಬೆಹಾಲಾ (ಪುರ್ಬಾ), ಬೆಹಾಲಾ (ಪಶ್ಚಿಮ), ರಾಜರ್ಹತ್-ನ್ಯೂ ಟೌನ್ ಮತ್ತು ರಾಜರ್ಹತ್ ಗೋಪಾಲ್ಪುರ್ ಮುಂತಾದ ಕ್ಷೇತ್ರಗಳಲ್ಲಿ ಹೊಂದಾಣಿಕೆಯಾಗದ ಸಂಖ್ಯೆ 30,000 ಮೀರಿದೆ. ಇದು ಕೋಲ್ಕತ್ತಾ, ಉತ್ತರ 24 ಪರಗಣಗಳು ಮತ್ತು ದಕ್ಷಿಣ 24 ಪರಗಣಗಳಲ್ಲಿ ಹರಡಿದೆ, ಪಶ್ಚಿಮ ಬುರ್ದ್ವಾನ್ ಮತ್ತು ಗಡಿ ಜಿಲ್ಲೆಗಳಾದ ನಾಡಿಯಾ ಮತ್ತು ಮುರ್ಷಿದಾಬಾದ್‌ನಿಂದಲೂ ಹೆಚ್ಚಿನ ಸಂಖ್ಯೆಯ ಮತದಾರರು ವರದಿಯಾಗಿದ್ದಾರೆ.
ಪಶ್ಚಿಮ ಬಂಗಾಳದಲ್ಲಿ ಪ್ರಸ್ತುತ 7,66,37,529 ನೋಂದಾಯಿತ ಮತದಾರರಿದ್ದಾರೆ. ಬೂತ್ ಮಟ್ಟದ ಅಧಿಕಾರಿಗಳು ಸಲ್ಲಿಸಿದ ಐದು ಕೋಟಿ ನಮೂನೆಗಳ ಡಿಜಿಟಲೀಕರಣ ಪೂರ್ಣಗೊಂಡಿದೆ, ಡಿಸೆಂಬರ್ 9 ರಂದು ಕರಡು ಪಟ್ಟಿಗಳು ಪ್ರಕಟವಾದಾಗ ಪೂರ್ಣ ಚಿತ್ರಣ ಹೊರಬರುವ ನಿರೀಕ್ಷೆಯಿದೆ. ಎಸ್‌ಐಆರ್‌ ಮಾನದಂಡಗಳ ಅಡಿಯಲ್ಲಿ, 2002 ರ ಪಟ್ಟಿಯಲ್ಲಿ ಯಾರ ಪೋಷಕರು ಇದ್ದಾರೆಯೇ ಇಲ್ಲವೇ ಎಂಬುದರ ಆಧಾರದಲ್ಲಿ ಮಾನ್ಯ ಮತದಾರರೆಂದು ಪರಿಗಣಿಸಲಾಗುತ್ತದೆ. ಆದರೆ ಇತರರು, ಚುನಾವಣಾ ಆಯೋಗ-ಅನುಮೋದಿತ 11 ಗುರುತಿನ ದಾಖಲೆಗಳಲ್ಲಿ ಯಾವುದಾದರೂ ಒಂದನ್ನು ಒದಗಿಸಬೇಕು.
ಸುಪ್ರೀಂ ಕೋರ್ಟ್ ಆದೇಶದ ನಂತರ, ಆಧಾರ್ ಅನ್ನು 12 ನೇ ದಾಖಲೆಯಾಗಿ ಸೇರಿಸಲಾಗಿದೆ. ಆದರೆ, ಅದನ್ನು ಬಳಸುವ ಅರ್ಜಿದಾರರು ಮೊದಲು ಪಟ್ಟಿ ಮಾಡಿರುವ 11 ರ ಮೂಲ ಪಟ್ಟಿಯಿಂದ ಒಂದು ಹೆಚ್ಚುವರಿ ಐಡಿಯನ್ನು ಒದಗಿಸಬೇಕು. ಪಶ್ಚಿಮ ಬಂಗಾಳದಲ್ಲಿ ಎಸ್‌ಐಆರ್‌ ನವೆಂಬರ್ 4 ರಂದು ಪ್ರಾರಂಭವಾಗಿದ್ದು, ಮುಂದಿನ ವರ್ಷ ಮಾರ್ಚ್ ಅಂತ್ಯದವರೆಗೆ ಮುಂದುವರಿಯಲು ನಿರ್ಧರಿಸಲಾಗಿದೆ.
