ನ್ಯಾಯದ ಸಂಕೇತವಾಗಿ ಕೋರ್ಟ್‌ಗಳಲ್ಲಿರುವ ಕಣ್ಣಿಗೆ ಪಟ್ಟಿ ಕಟ್ಟಿದ ‘ಲೇಡಿ ಜಸ್ಟಿಸ್’ ಪ್ರತಿಮೆ ಬಗ್ಗೆ ಬಹುತೇಕ ಗೊತ್ತಿದೆ. ಸಾಮಾನ್ಯವಾಗಿ ನ್ಯಾಯಾಲಯಗಳು, ಚಲನಚಿತ್ರಗಳು ಮತ್ತು ಕಾನೂನು ಕೋಣೆಗಳಲ್ಲಿ ಆ ಪ್ರತಿಮೆಯನ್ನು ಕಣ್ಣುಮುಚ್ಚಿರುವುದನ್ನು ನೋಡಲಾಗುತ್ತದೆ. ಹೊಸ ಭಾರತದಲ್ಲಿ ಈಗ ಅದು ರೂಪಾಂತರಕ್ಕೆ ಒಳಗಾಗಿದೆ. ಸಾಂಕೇತಿಕ ಬದಲಾವಣೆಯಲ್ಲಿ, ಕಣ್ಣಿಗೆ ಬಟ್ಟೆಯನ್ನು ತೆಗೆದುಹಾಕಿ, ಲೇಡಿ ಜಸ್ಟೀಸ್ ಕೈಯಲ್ಲಿದ್ದ ಕತ್ತಿಯನ್ನು ಸಂವಿಧಾನದೊಂದಿಗೆ ಬದಲಾಯಿಸಲಾಗಿದೆ.
ಈ ಬದಲಾವಣೆಯು ದೇಶದಲ್ಲಿ ಇತ್ತೀಚೆಗೆ ನಡೆದ ಬ್ರಿಟಿಷ್ ಕಾಲದ ಕಾನೂನುಗಳ ಬದಲಾವಣೆಯನ್ನು ಪ್ರತಿಬಿಂಬಿಸುತ್ತದೆ ಎನ್ನಲಾಗುತ್ತಿದೆ. ಏಕೆಂದರೆ, ಭಾರತೀಯ ನ್ಯಾಯಾಂಗವು ಹೊಸ ಗುರುತನ್ನು ಸ್ವೀಕರಿಸುತ್ತಿದೆ.
ಸುಪ್ರೀಂ ಕೋರ್ಟ್‌ನ ಲಾಂಛನವನ್ನು ನವೀಕರಿಸಿರುವುದು ಮಾತ್ರವಲ್ಲದೆ, ‘ಲೇಡಿ ಜಸ್ಟೀಸ್’ ಎಂಬ ಐಕಾನಿಕ್‌ನ ಕಣ್ಣು ಪಟ್ಟಿಯನ್ನೂ ತೆಗೆಯಲಾಗಿದೆ. ‘ಕಾನೂನು ಇನ್ನು ಮುಂದೆ ಕುರುಡಲ್ಲ’ ಎಂಬ ಸ್ಪಷ್ಟ ಸಂದೇಶವನ್ನು ಸುಪ್ರೀಂ ಕೋರ್ಟ್ ರವಾನಿಸಿದೆ. ಭಾರತದ ಮುಖ್ಯ ನ್ಯಾಯಮೂರ್ತಿ (ಸಿಜೆಐ) ಡಿವೈ ಚಂದ್ರಚೂಡ್ ಅವರು ಕ್ರಮವನ್ನು ಮುನ್ನಡೆಸಿದ್ದಾರೆ. ಭಾರತೀಯ ನ್ಯಾಯದ ವಿಕಾಸದ ಸ್ವರೂಪವನ್ನು ಒತ್ತಿಹೇಳಿದ್ದು, ಹೊಸ ಪ್ರತಿಮೆಯನ್ನು ಸುಪ್ರೀಂ ಕೋರ್ಟ್‌ನ ನ್ಯಾಯಾಧೀಶರ ಗ್ರಂಥಾಲಯದಲ್ಲಿ ಸ್ಥಾಪಿಸಲಾಗಿದೆ.
ಖಡ್ಗದ ಬದಲಿಗೆ ಸಂವಿಧಾನ
ಹಿಂದಿನ ಪ್ರತಿಮೆಯಲ್ಲಿ, ‘ಲೇಡಿ ಜಸ್ಟೀಸ್’ ಒಂದು ಕೈಯಲ್ಲಿ ಶಿಕ್ಷೆಯ ಸಂಕೇತವಾಗಿ ಕತ್ತಿಯನ್ನು ಹಿಡಿದಿದ್ದರೆ, ಇನ್ನೊಂದು ಕೈಯಲ್ಲಿ ನ್ಯಾಯವನ್ನು ಪ್ರತಿನಿಧಿಸುವ ತಕ್ಕಡಿಗಳನ್ನು ಹಿಡಿದಿದ್ದರು. ಹೊಸ ಪ್ರತಿಮೆಯಲ್ಲಿ, ಕತ್ತಿಯನ್ನು ಸಂವಿಧಾನದಿಂದ ಬದಲಾಯಿಸಲಾಗಿದೆ. ಆದರೆ, ತಕ್ಕಡಿ ಬದಲಾಗದೆ ಉಳಿದಿದೆ. ಎಲ್ಲರಿಗೂ ಸಮಾನತೆಯನ್ನು ಖಾತ್ರಿಪಡಿಸುವ ಸಂವಿಧಾನದ ಪ್ರಕಾರ ಭಾರತದಲ್ಲಿ ನ್ಯಾಯವನ್ನು ವಿತರಿಸಲಾಗಿದೆ ಎಂಬುದನ್ನು ಈ ಬದಲಾವಣೆಯು ಸಂಕೇತಿಸುತ್ತದೆ.
ಇದನ್ನೂ ಓದಿ; ಪಂಜಾಬ್‌ | ನಡೆಯುತ್ತಿರುವ ಪಂಚಾಯತ್ ಚುನಾವಣೆಗೆ ತಡೆ ನೀಡಲು ನಿರಾಕರಿಸಿದ ಸುಪ್ರೀಂಕೋರ್ಟ್
