ರಾಮ ನವಮಿ ಆಚರಣೆಯ ಸಂದರ್ಭದ ಧಾರ್ಮಿಕ ಮೆರವಣಿಗೆಗಳಲ್ಲಿ ಶಸ್ತ್ರಾಸ್ತ್ರಗಳ ಉಪಸ್ಥಿತಿಯನ್ನು ಸಮರ್ಥಿಸಿಕೊಳ್ಳುವ ಮೂಲಕ ಹಿರಿಯ ಬಿಜೆಪಿ ನಾಯಕ ದಿಲೀಪ್ ಘೋಷ್ ವಿವಾದ ಹುಟ್ಟುಹಾಕಿದ್ದಾರೆ. “ಮೆರವಣಿಯಲ್ಲಿ ಯಾರಾದರೂ ಆಯುಧ ಹಿಡಿದರೆ ತಪ್ಪೇನು” ಎಂದು ಪ್ರಶ್ನಿಸಿದ್ದಾರೆ.
ಖರಗ್‌ಪುರದಲ್ಲಿ ನಡೆದ ಕಾರ್ಯಕ್ರಮವೊಂದರಲ್ಲಿ ಮಾತನಾಡಿದ ಘೋಷ್, ಪಶ್ಚಿಮ ಬಂಗಾಳದಾದ್ಯಂತ ರಾಮ ನವಮಿಯನ್ನು ಅತ್ಯಂತ ಉತ್ಸಾಹದಿಂದ ಆಚರಿಸಲಾಗುವುದು; ಹಿಂದೂ ಸಮುದಾಯವು ತನ್ನದೇ ಆದ ರೀತಿಯಲ್ಲಿ ಹಬ್ಬಗಳನ್ನು ಆಚರಿಸುವ ಎಲ್ಲ ಹಕ್ಕನ್ನು ಹೊಂದಿದೆ ಎಂದು ಪ್ರತಿಪಾದಿಸಿದರು.
“ರಾಮ ನವಮಿಯನ್ನು ಪಶ್ಚಿಮ ಬಂಗಾಳದಾದ್ಯಂತ ಅದ್ಧೂರಿಯಾಗಿ ಆಚರಿಸಲಾಗುವುದು. ಆಚರಣೆಗಳ ಶಾಂತಿಯುತ ನಡವಳಿಕೆಯನ್ನು ಖಚಿತಪಡಿಸಿಕೊಳ್ಳುವುದು ಪೊಲೀಸರ ಕರ್ತವ್ಯ. ಹಿಂದೂ ಸಮುದಾಯವು ತಮ್ಮ ಸಂಪ್ರದಾಯಗಳ ಪ್ರಕಾರ ಹಬ್ಬವನ್ನು ಆಚರಿಸುತ್ತದೆ, ಇದರಲ್ಲಿ ಯಾವುದೇ ಸಮಸ್ಯೆ ಇರಬಾರದು” ಎಂದು ಅವರು ಹೇಳಿದರು.
“ಕೋಟ್ಯಂತರ ಜನರು ಬೀದಿಗಿಳಿಯುತ್ತಾರೆ. ಯಾರಾದರೂ ತೊಂದರೆ ಸೃಷ್ಟಿಸಲು ಪ್ರಯತ್ನಿಸಿದರೆ, ಅವುಗಳನ್ನು ತಡೆಯುವುದು ಪೊಲೀಸರು ಮತ್ತು ಆಡಳಿತದ ಜವಾಬ್ದಾರಿಯಾಗಿದೆ” ಎಂದು ಅವರು ಹೇಳಿದರು.
ಇತ್ತೀಚಿನ ದಿನಗಳಲ್ಲಿ ದೇವಾಲಯಗಳನ್ನು ಧ್ವಂಸಗೊಳಿಸಲಾಗಿದೆ, ವಿಗ್ರಹಗಳನ್ನು ಕದ್ದಿದ್ದಾರೆ ಮತ್ತು ಪೆಂಡಾಲ್‌ಗಳಿಗೆ ಬೆಂಕಿ ಹಚ್ಚಲಾಗಿದೆ ಎಂದು ಘೋಷ್ ಹೇಳಿದ್ದಾರೆ. “ಇಂತಹ ಪರಿಸ್ಥಿತಿಯಲ್ಲಿ, ಹಿಂದೂಗಳು ತಮ್ಮನ್ನು ತಾವು ರಕ್ಷಿಸಿಕೊಳ್ಳಲು ಮುಂದಾದರೆ, ಅದು ಹೇಗೆ ಅಪರಾಧ?” ಎಂದು ಅವರು ರಾಮನವಮಿ ಮೆರವಣಿಯಲ್ಲಿ ಭಾಗವಹಿಸುವವರು ಕತ್ತಿ ಮತ್ತು ಕೋಲುಗಳಂತಹ ಶಸ್ತ್ರಾಸ್ತ್ರಗಳನ್ನು ಹಿಡಿದುಕೊಂಡು ಹೋಗುವುದನ್ನು ಸಮರ್ಥಿಸಿಕೊಂಡಿದ್ದಾರೆ.
“ಹಿಂದೂಗಳು ತಮ್ಮ ಹಬ್ಬಗಳನ್ನು ಹೇಗೆ ಆಚರಿಸುತ್ತಾರೆ ಎಂಬುದನ್ನು ಯಾರೂ ಆಕ್ಷೇಪಿಸಬಾರದು” ಎಂದು ಅವರು ಹೇಳಿದರು.
ರಾಮನವಮಿ ಮೆರವಣಿಗೆಗಳಲ್ಲಿ ಬಹಿರಂಗವಾಗಿ ಶಸ್ತ್ರಾಸ್ತ್ರ ಪ್ರದರ್ಶನ ನಡೆದ ಹಲವಾರು ಜಿಲ್ಲೆಗಳಿಂದ ಬಂದ ವರದಿಗಳ ಮಧ್ಯೆ ಅವರ ಹೇಳಿಕೆಗಳು ಬಂದವು. ಮಾಲ್ಡಾದಲ್ಲಿ, ರಾಮಕೃಷ್ಣ ಪಲ್ಲಿ ಮೈದಾನದಿಂದ ದೊಡ್ಡ ಮೆರವಣಿಗೆ ಪ್ರಾರಂಭವಾಯಿತು, ಭಾಗವಹಿಸಿದ್ದವರು ಕತ್ತಿಗಳು ಮತ್ತು ಇತರ ಶಸ್ತ್ರಾಸ್ತ್ರಗಳನ್ನು ಬಹಿರಂಗವಾಗಿ ಝಳಪಿಸುತ್ತಿದ್ದರು.
ಹೌರಾದ ಸಂಕ್ರೈಲ್‌ನಲ್ಲಿ, ಇದೇ ರೀತಿಯ ದೃಶ್ಯಗಳು ವರದಿಯಾಗಿವೆ. ಪೊಲೀಸ್ ಮೂಲಗಳ ಪ್ರಕಾರ, ರ್ಯಾಲಿಯ ಸಮಯದಲ್ಲಿ ಆಯೋಜಕರು ಶಸ್ತ್ರಾಸ್ತ್ರಗಳನ್ನು ಸಾಗಿಸಲು ಅಧಿಕೃತ ಅನುಮತಿಯನ್ನು ಹೊಂದಿರಲಿಲ್ಲ. ಕಾರ್ಯಕ್ರಮದ ನಿಯಮಗಳನ್ನು ಉಲ್ಲಂಘಿಸಿದ್ದಕ್ಕಾಗಿ ಅಧಿಕಾರಿಗಳು ಈಗ ಆಯೋಜಕರ ವಿರುದ್ಧ ಕಾನೂನು ಕ್ರಮ ಕೈಗೊಳ್ಳುವ ನಿರೀಕ್ಷೆಯಿದೆ.
ಹೆಚ್ಚುತ್ತಿರುವ ಕಳವಳಗಳ ನಡುವೆ, ತೃಣಮೂಲ ಕಾಂಗ್ರೆಸ್ ಸಂಸದ ಡೋಲಾ ಸೇನ್ ಬೆಳವಣಿಗೆಗಳಿಗೆ ತೀವ್ರವಾಗಿ ಪ್ರತಿಕ್ರಿಯಿಸಿದರು. “ರಾಮನವಮಿಗೆ ಇಷ್ಟೊಂದು ಬಿಗಿ ಪೊಲೀಸ್ ಬಂದೋಬಸ್ತ್ ನಾನು ಹಿಂದೆಂದೂ ನೋಡಿಲ್ಲ. ಆದರೆ, ಈಗ ಪೊಲೀಸರು ಜಾಗರೂಕರಾಗಿರಬೇಕು. ರಾಮನವಮಿ ಆಚರಣೆಯ ಸಮಯದಲ್ಲಿ ದಿಲೀಪ್ ಘೋಷ್ ಶಸ್ತ್ರಾಸ್ತ್ರಗಳೊಂದಿಗೆ ಕಾಣಿಸಿಕೊಂಡರು…” ಎಂದರು.
