ವರವರ ರಾವ್ ಅವರ ಪುಸ್ತಕದಿಂದ, ‘ಹಿಂದುತ್ವ’, ‘ಸಂಘಪರಿವಾರ’ ಸೇರಿದಂತೆ ಹಲವು ಪದಗಳನ್ನು ಕೈಬಿಟ್ಟ ಪ್ರಕಾಶನ ಸಂಸ್ಥೆ!

‘ಪೆಂಗ್ವಿನ್ ರಾಂಡಮ್ ಹೌಸ್ ಇಂಡಿಯಾ’ದ ಕಾನೂನು ತಂಡವು ತೆಲುಗು ಕ್ರಾಂತಿಕಾರಿ ಕವಿ ವರವರ ರಾವ್ ಅವರ ಇತ್ತೀಚಿನ ಪುಸ್ತಕ, ‘ವರವರ ರಾವ್: ಎ ರೆವಲ್ಯೂಷನರಿ ಪೊಯೆಟ್‌’ನಿಂದ, ‘ಹಿಂದುತ್ವ’, ‘ಸಂಘ ಪರಿವಾರ’ ಮತ್ತು ‘ಕೇಸರಿಕರಣ’ ಮುಂತಾದ ಪದಗಳನ್ನು ತೆಗೆದುಹಾಕಿದೆ ಎಂದು ಕ್ವಿಂಟ್ ವರದಿ ಮಾಡಿದೆ. ಇನ್ನಷ್ಟೆ ಬಿಡುಗಡೆಯಾಗಬೇಕಿರುವ ಪುಸ್ತಕವು ಭೀಮಾ ಕೋರೆಗಾಂವ್ ಪ್ರಕರಣಕ್ಕೆ ಸಂಬಂಧಿಸಿದಂತೆ ಬಂಧಿತರಾಗಿರುವ 81 ವರ್ಷದ ವರವರ ರಾವ್ ಅವರ ಮೊದಲ ಇಂಗ್ಲಿಷ್ ಅನುವಾದಿತ ಕವನ ಸಂಕಲನವಾಗಲಿದೆ.

ವರವರ ರಾವ್ ಅವರು ಪ್ರಸ್ತುತ ವೈದ್ಯಕೀಯ ಜಾಮೀನಿನ ಮೇಲೆ ಬಿಡುಗಡೆಗೊಂಡಿದ್ದಾರೆ. ಅವರ ಆರು ದಶಕಗಳ ಸಾಹಿತ್ಯಿಕ ವೃತ್ತಿಜೀವನದ ಪ್ರತಿನಿಧಿಯಾಗಿದೆ ಈ ಪುಸ್ತಕ. ವರವರ ರಾವ್‌ ಅವರು 1960 ರ ದಶಕದಿಂದಲೂ ಹಲವು ಜನಪರ ಚಳುವಳಿಗಳೊಂದಿಗೆ ಗುರುತಿಸಿಕೊಂಡಿದ್ದಾರೆ. ಅವರನ್ನು ಎಲ್ಗರ್ ಪರಿಷತ್-ಭೀಮಾ ಕೋರೆಗಾಂವ್ ಪ್ರಕರಣದಲ್ಲಿ ಭಾಗಿಯಾಗಿದ್ದಕ್ಕಾಗಿ ಆಗಸ್ಟ್ 2018 ರಲ್ಲಿ ಬಂಧಿಸಲಾಗಿತ್ತು.
ನಾನುಗೌರಿ.ಕಾಂಗೆ ದೇಣಿಗೆ ನೀಡಿ ಬೆಂಬಲಿಸಿ
₹100 ₹200 ₹500 ₹1000 Others

2014 ರಲ್ಲಿ, ಪೆಂಗ್ವಿನ್ ಪ್ರಕಾಶನವು ತನ್ನ ಸ್ವಂತ ಪುಸ್ತಕ, ವೆಂಡಿ ಡೋನಿಗರ್ ಬರೆದಿರುವ ‘ದಿ ಹಿಂದೂಸ್’ ಅನ್ನು ಹಿಂದಕ್ಕೆ ತೆಗೆದುಕೊಂಡಿತ್ತು. ಈ ಪುಸ್ತಕವು ಹಿಂದೂ ಧರ್ಮವನ್ನು ‘ಅವಹೇಳನ’ ಮಾಡುತ್ತದೆ ಎಂದು ಕೆಲವು ಗುಂಪುಗಳು ದೂರುಗಳನ್ನು ಸಲ್ಲಿಸಿತ್ತು.

ಇದನ್ನೂ ಓದಿ: ವರವರ ರಾವ್‌ ಕೃತಿ ಪ್ರಕಟಣೆ ವಿಳಂಬ: ಸರ್ಕಾರಕ್ಕೆ ಹೆದರಿತೇ ಪೆಂಗ್ವಿನ್‌ ಪ್ರಕಾಶನ ಸಂಸ್ಥೆ?

ಈ ವರ್ಷದ ಆರಂಭದಲ್ಲಿ, ಅಂಬೇಡ್ಕರ್ ಜಯಂತಿಯಂದು (ಏಪ್ರಿಲ್ 14), ಪೆಂಗ್ವಿನ್ ರಾಂಡಮ್ ಹೌಸ್, ‘ದಿ ದಲಿತ್‌ ಟ್ರುತ್‌’ ಪುಸ್ತಕವನ್ನು ಬಿಡುಗಡೆ ಮಾಡಿತ್ತು. ಅದು, ಪ್ರಸ್ತುತ ದಲಿತರ ಸ್ಥಿತಿಯನ್ನು, ಆರ್ಥಿಕವಾಗಿ, ಸಾಮಾಜಿಕವಾಗಿ ಮತ್ತು ರಾಜಕೀಯವಾಗಿ ಅಂಬೇಡ್ಕರ್ ಅವರ ಪ್ರಸ್ತುತತೆಯನ್ನು ವಿಶ್ಲೇಷಿಸಿ, ಸಬಲೀಕರಣದ ಹೊಸ ಮಾರ್ಗವನ್ನು ರೂಪಿಸುವ ಬಗ್ಗೆ ಮಾತನಾಡುತ್ತದೆ.

‘ದಿ ದಲಿತ್ ಟ್ರುತ್’ ಬಿಡುಗಡೆಯಾದ ಒಂದು ತಿಂಗಳೊಳಗೆ, ವರವರ ರಾವ್ ಅವರ ಇತ್ತೀಚಿನ ಕವನಗಳ ಸಂಗ್ರಹವು ಪೆಂಗ್ವಿನ್ ರಾಂಡಮ್ ಹೌಸ್‌ನ ಕಾನೂನು ತಂಡದ ಕೈಯಲ್ಲಿ ಸೆನ್ಸಾರ್‌ಶಿಪ್‌ಗೆ ಒಳಗಾಗಿದೆ ಎಂದು ದಿ ಕ್ವಿಂಟ್ ವರದಿ ಹೇಳಿದೆ. ವರವರ ರಾವ್ ಅವರ ಪುಸ್ತಕದ ಒಪ್ಪಂದಕ್ಕೆ 2020 ರಲ್ಲಿ ಸಹಿ ಹಾಕಲಾಯಿತು ಮತ್ತು ಪ್ರಕಾಶಕರು ಅದನ್ನು 2021 ರ ಮಧ್ಯದಲ್ಲಿ ಬಿಡುಗಡೆ ಮಾಡುವುದಾಗಿ ಹೇಳಿದ್ದರು.