ಅಮೆರಿಕದ ಸಂಸತ್ತು ಅಂಗೀಕರಿಸಿದ ಎಪ್ಸ್ಟೀನ್ ಫೈಲ್ಸ್ ಟ್ರಾನ್ಸ್‌ಪೆರೆನ್ಸಿ ಆಕ್ಟ್ (Epstein Files Transparency Act) ನಿಯಮದಂತೆ ಅಮೆರಿಕದ ನ್ಯಾಯ ಇಲಾಖೆ (ಡಿಒಜಿ) ಲೈಂಗಿಕ ದೌರ್ಜನ್ಯ ಪ್ರಕರಣದ ಅಪರಾಧಿ ಜೆಫ್ರಿ ಎಪ್‌ಸ್ಟೀನ್‌ಗೆ ಸಂಬಂಧಿಸಿದ ಅಂತಿಮ ಫೈಲ್‌ಗಳನ್ನು ಶುಕ್ರವಾರ (ಜ.30) ಬಿಡುಗಡೆ ಮಾಡಿದೆ.
ವರದಿಗಳ ಪ್ರಕಾರ, 3 ಮಿಲಿಯನ್ (30 ಲಕ್ಷ) ಪುಟಗಳಿಗೂ ಹೆಚ್ಚು ದಾಖಲೆಗಳು, 2,000 ವಿಡಿಯೋಗಳು ಮತ್ತು 180,000 ಫೋಟೋಗಳು ಅಂತಿಮ ಎಪ್ಸ್ಟೀನ್ ಫೈಲ್ಸ್ ಬಿಡುಗಡೆಯಲ್ಲಿ ಒಳಗೊಂಡಿವೆ. ಅಂತಿಮ ಫೈಲ್‌ಗಳಲ್ಲಿ ಎಲಾನ್ ಮಸ್ಕ್, ಬಿಲ್ ಗೇಟ್ಸ್ ಮತ್ತು ಬಿಲ್ ಕ್ಲಿಂಟನ್ ಅವರ ಇ-ಮೇಲ್‌ಗಳು ಮತ್ತು ಉಲ್ಲೇಖಗಳು ಹಾಗೂ ಡೊನಾಲ್ಡ್ ಟ್ರಂಪ್ ಅವರ ನೂರಾರು ಉಲ್ಲೇಖಗಳು ಇವೆ.
ಲೈಂಗಿಕ ದೌರ್ಜನ್ಯ ಪ್ರಕರಣದಲ್ಲಿ ಜೆಫ್ರಿ ಎಪ್ಸ್ಟೀನ್ ಒಬ್ಬನೇ ಅಪರಾಧಿ ಅಲ್ಲ. ಆತನಿಗೆ ಸಾಥ್ ನೀಡಿದ ಇತರ ಮೂವರೂ ಇದ್ದಾರೆ. ಎಪ್ಸ್ಟೀನ್ ನಡೆಸುತ್ತಿದ್ದ ಅಕ್ರಮ ಜಾಲದಲ್ಲಿ ಇವರ ಪಾತ್ರವೂ ಇತ್ತು ಎಂಬುವುದು ತನಿಖಾಧಿಕಾರಿಗಳ ನಂಬಿಕೆಯಾಗಿತ್ತು. ಈಗ ಬಿಡುಗಡೆಯಾಗಿರುವ ಅಂತಿಮ ದಾಖಲೆಗಳಲ್ಲಿ ಈ ಮೂವರ ಹೆಸರುಗಳ ಮೇಲೆ ಕಪ್ಪು ಮಸಿ ಬಳಿಯಲಾಗಿದೆ. ಅಂದರೆ ಅವರ ಹೆಸರುಗಳನ್ನು ಸಾರ್ವಜನಿಕರಿಗೆ ಬಹಿರಂಗಪಡಿಸಿಲ್ಲ ಎಂದು ವರದಿಗಳು ಹೇಳಿವೆ.
ಅಮೆರಿಕದ ನ್ಯಾಯಾಂಗ ಇಲಾಖೆಯ ನಿಯಮಗಳ ಪ್ರಕಾರ, ಒಬ್ಬ ವ್ಯಕ್ತಿಯ ಮೇಲೆ ಅಧಿಕೃತವಾಗಿ ಆರೋಪ ಸಾಬೀತಾಗದಿದ್ದರೆ ಅಥವಾ ಅವರನ್ನು ಬಂಧಿಸದಿದ್ದರೆ, ಅವರ ಖಾಸಗಿತನವನ್ನು ರಕ್ಷಿಸಲು ಹೆಸರುಗಳನ್ನು ಮರೆಮಾಚಲಾಗುತ್ತದೆ. ಹಾಗಾಗಿ,ಈ ಮೂವರ ಹೆಸರುಗಳಿಗೆ ಮಸಿ ಬಳಿಯಲಾಗಿದೆ ಎಂದು ತಿಳಿದು ಬಂದಿದೆ.
ಅಂತಿಮ ದಾಖಲೆಗಳಲ್ಲಿ ಜಗತ್ತಿನ ಅಥವಾ ಅಮೆರಿಕದ ಅನೇಕ ಪ್ರಭಾವಿ ವ್ಯಕ್ತಿಗಳ ಹೆಸರುಗಳಿವೆ. ಹೆಸರು ಇದ್ದ ಮಾತ್ರಕ್ಕೆ ಅವರು ಅಪರಾಧಿಗಳು ಎಂದಲ್ಲ. ಹೆಚ್ಚಿನ ಸಂದರ್ಭಗಳಲ್ಲಿ ಅವರು ಎಪ್ಸ್ಟೀನ್ ಅತಿಥಿಗಳಾಗಿ ಅಥವಾ ಅವನೊಂದಿಗೆ ಇ-ಮೇಲ್ ಸಂವಹನ ನಡೆಸಿದವರಾಗಿ ಕಾಣಿಸಿಕೊಂಡಿದ್ದಾರೆ ಎಂದು ವರದಿಗಳು ಹೇಳಿವೆ.
ಡೊನಾಲ್ಡ್ ಟ್ರಂಪ್
ಅಮೆರಿಕದ ಹಾಲಿ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್ ಹೆಸರು ಅಂತಿಮ ದಾಖಲೆಗಳಲ್ಲಿ ನೂರಾರು ಬಾರಿ ಕಾಣಿಸಿಕೊಂಡಿವೆ. ಎಫ್‌ಬಿಐ ಸಂಗ್ರಹಿಸಿದ ಕೆಲವು ಹಳೆಯ ದೂರುಗಳ ವಿವರಗಳು ಇದರಲ್ಲಿವೆ. ಆದರೆ, ಅಮೆರಿಕದ ನ್ಯಾಯಾಂಗ ಇಲಾಖೆಯು ಇವುಗಳಲ್ಲಿ ಹೆಚ್ಚಿನವು ‘ಆಧಾರರಹಿತ ಮತ್ತು ಸುಳ್ಳು’ ಎಂದು ಹೇಳಿವೆ. 1990ರ ದಶಕದಲ್ಲಿ ಅವರು ಎಪ್‌ಸ್ಟೀನ್‌ನ ಖಾಸಗಿ ವಿಮಾನದಲ್ಲಿ ಪ್ರಯಾಣಿಸಿದ್ದರು ಎಂಬ ಮಾಹಿತಿ ಇದೆ.
ಎಲಾನ್ ಮಸ್ಕ್
ವಿಶ್ವದ ಅತ್ಯಂತ ಶ್ರೀಮಂತ ವ್ಯಕ್ತಿ, ಟೆಸ್ಲಾ, ಸ್ಪೇಸ್‌ಎಕ್ಸ್ ಮತ್ತು ಎಕ್ಸ್ ಸೇರಿದಂತೆ ಹಲವು ಕಂಪನಿಗಳ ಒಡೆಯ ಎಲಾನ್ ಮಸ್ಕ್ ಹೆಸರು ಅಂತಿಮ ಫೈಲ್‌ಗಳಲ್ಲಿ ಕಂಡು ಬಂದಿವೆ. ಮಸ್ಕ್ ಮತ್ತು ಎಪ್ಸ್ಟೀನ್ ನಡುವೆ ನಡೆದ ಕೆಲವು ಇ-ಮೇಲ್ ಸಂಭಾಷಣೆಗಳು ಈ ಫೈಲ್‌ಗಳಲ್ಲಿವೆ. ಎಪ್‌ಸ್ಟೀನ್‌ನ ದ್ವೀಪದಲ್ಲಿ ನಡೆಯುವ ಪಾರ್ಟಿಗಳ ಬಗ್ಗೆ ಮಸ್ಕ್ ವಿಚಾರಿಸಿದ ಉಲ್ಲೇಖವಿದೆ. ಆದರೆ, ಮಸ್ಕ್ ಆ ದ್ವೀಪಕ್ಕೆ ಹೋಗಿದ್ದಕ್ಕೆ ಯಾವುದೇ ಸಾಕ್ಷ್ಯಗಳಿಲ್ಲ.
ಬಿಲ್ ಗೇಟ್ಸ್
ಎಪ್ಸ್ಟೀನ್ ಕಳುಹಿಸಿದ ಕೆಲವು ಇ-ಮೇಲ್‌ಗಳಲ್ಲಿ ಮೈಕ್ರೋಸಾಫ್ಟ್ ಸಂಸ್ಥಾಪಕ ಬಿಲ್ ಗೇಟ್ಸ್ ಬಗ್ಗೆ ಉಲ್ಲೇಖವಿದೆ. ಗೇಟ್ಸ್ ಅವರು ರಷ್ಯಾದ ಯುವತಿಯರೊಂದಿಗೆ ಸಂಬಂಧ ಹೊಂದಿದ್ದರು ಎಂಬ ಗಂಭೀರ ಆರೋಪವನ್ನು ಎಪ್ಸ್ಟೀನ್ ತನ್ನ ಇ-ಮೇಲ್‌ನಲ್ಲಿ ಮಾಡಿದ್ದಾನೆ. ಆದರೆ, ಬಿಲ್ ಗೇಟ್ಸ್ ಕಡೆಯವರು ಇವೆಲ್ಲವೂ “ಸಂಪೂರ್ಣ ಸುಳ್ಳು ಮತ್ತು ಅಸಂಬದ್ಧ” ಎಂದು ಹೇಳಿದ್ದಾರೆ.
ಬಿಲ್ ಕ್ಲಿಂಟನ್
ಅಮೆರಿಕ ಮಾಜಿ ಅಧ್ಯಕ್ಷ ಬಿಲ್ ಕ್ಲಿಂಟನ್ ಅವರು ಎಪ್ಸ್ಟೀನ್ ಮತ್ತು ಆತನ ಗೆಳತಿ ಗಿಸ್ಲೇನ್ ಮ್ಯಾಕ್ಸ್‌ವೆಲ್ ಜೊತೆ ಇರುವ ಹಳೆಯ ಫೋಟೋಗಳು ಬಿಡುಗಡೆಯಾಗಿವೆ. 2009ರಲ್ಲಿ ಅವರು ಎಪ್ಸ್ಟೀನ್ ಮನೆಗೆ ಭೇಟಿ ನೀಡಿದ್ದರು ಎಂಬ ಮಾಹಿತಿಯೂ ಇದೆ. ಆದರೆ ಕ್ಲಿಂಟನ್ ಅವರು ತಮಗೆ ಎಪ್‌ಸ್ಟೀನ್‌ನ ಅಪರಾಧಗಳ ಬಗ್ಗೆ ಏನೂ ತಿಳಿದಿರಲಿಲ್ಲ ಎಂದು ಮೊದಲೇ ಸ್ಪಷ್ಟಪಡಿಸಿದ್ದಾರೆ.
ಪ್ರಿನ್ಸ್ ಆಂಡ್ರ್ಯೂ
ಬ್ರಿಟನ್‌ನ ಪ್ರಿನ್ಸ್ ಆಂಡ್ರ್ಯೂ ಅವರನ್ನು ಎಪ್ಸ್ಟೀನ್ ಫೈಲ್‌ಗಳಲ್ಲಿ ‘ದಿ ಡ್ಯೂಕ್’ ಎಂದು ಕರೆಯಲಾಗಿದೆ. ಎಪ್ಸ್ಟೀನ್ ಜೊತೆಗಿನ ಇವರ ನಿಕಟ ಸಂಬಂಧದ ಬಗ್ಗೆ ಇ-ಮೇಲ್ ದಾಖಲೆಗಳಿವೆ. ಅವರು ಎಪ್ಸ್ಟೀನ್ ಮೂಲಕ ಹುಡುಗಿಯೊಬ್ಬಳನ್ನು ಲೈಂಗಿಕವಾಗಿ ಬಳಸಿಕೊಂಡಿದ್ದರು ಎಂಬ ಹಳೆಯ ಆರೋಪವೂ ಈ ಫೈಲ್‌ಗಳಲ್ಲಿ ಮತ್ತೆ ಪ್ರಸ್ತಾಪವಾಗಿದೆ.
ಮೈಕೆಲ್ ಜಾಕ್ಸನ್ ಮತ್ತು ಇತರ ಕಲಾವಿದರು
ಮೈಕೆಲ್ ಜಾಕ್ಸನ್, ಮಿಕಾ ಜಾಗರ್, ಮತ್ತು ಕೆವಿನ್ ಸ್ಪೇಸಿ ಅವರಂತಹ ಕಲಾವಿದರು ಎಪ್ಸ್ಟೀನ್ ಅಥವಾ ಕ್ಲಿಂಟನ್ ಅವರೊಂದಿಗೆ ಗ್ರೂಪ್ ಫೋಟೋಗಳಲ್ಲಿ ಕಾಣಿಸಿಕೊಂಡಿದ್ದಾರೆ. ಇವರು ಎಪ್‌ಸ್ಟೀನ್‌ನ ಪಾರ್ಟಿಗಳಲ್ಲಿ ಭಾಗವಹಿಸಿದ್ದಿರಬಹುದು ಎನ್ನಲಾಗಿದೆ. ಆದರೆ ಯಾವುದೇ ಅಪರಾಧದಲ್ಲಿ ಇವರ ಹೆಸರು ನೇರವಾಗಿ ಉಲ್ಲೇಖವಾಗಿಲ್ಲ.
ಸ್ಟೀವ್ ಟಿಶ್‌
ನ್ಯೂಯಾರ್ಕ್ ಜೈಂಟ್ಸ್ ತಂಡದ ಮಾಲೀಕರಾದ ಸ್ಟೀವ್ ಟಿಶ್‌ಗೆ ಎಪ್ಸ್ಟೀನ್ ಕೆಲವು ಮಹಿಳೆಯರನ್ನು ಪರಿಚಯಿಸುವ ಬಗ್ಗೆ ಚರ್ಚಿಸಿದ ಇಮೇಲ್‌ಗಳು ಅಂತಿಮ ಫೈಲ್‌ಗಳಲ್ಲಿವೆ ಇವೆ.
ಎಹುದ್ ಬರಾಕ್
ಇಸ್ರೇಲ್‌ನ ಮಾಜಿ ಪ್ರಧಾನಿ ಎಹುದ್ ಬರಾಕ್ ಅವರು ಎಪ್‌ಸ್ಟೀನ್‌ನ ನ್ಯೂಯಾರ್ಕ್ ನಿವಾಸಕ್ಕೆ ಹಲವು ಬಾರಿ ಭೇಟಿ ನೀಡಿದ್ದ ದಾಖಲೆಗಳು ಫೈಲ್‌ಗಳಲ್ಲಿವೆ. ಆದರೆ, ತಾವು ಕೇವಲ ಬೌದ್ಧಿಕ ಚರ್ಚೆಗಳಿಗಾಗಿ ಅಲ್ಲಿಗೆ ಹೋಗಿದ್ದಾಗಿ ಅವರು ಈ ಹಿಂದೆಯೇ ಸಮರ್ಥಿಸಿಕೊಂಡಿದ್ದಾರೆ.
ನೋಮ್ ಚೋಮ್ಸ್ಕಿ
ವಿಶ್ವಪ್ರಸಿದ್ಧ ಭಾಷಾಶಾಸ್ತ್ರಜ್ಞ ಮತ್ತು ಚಿಂತಕ ನೋಮ್ ಚೋಮ್ಸ್ಕಿ ಅವರು ಎಪ್‌ಸ್ಟೀನ್‌ನೊಂದಿಗೆ ಹಣಕಾಸಿನ ವಹಿವಾಟು ನಡೆಸಿದ ಬಗ್ಗೆ ಇಮೇಲ್‌ಗಳು ಕಂಡುಬಂದಿವೆ. ಶೈಕ್ಷಣಿಕ ಕಾರಣಗಳಿಗಾಗಿ ಭೇಟಿಯಾಗಿದ್ದಾಗಿ ಅವರು ತಿಳಿಸಿದ್ದಾರೆ.
ಲಾರೆನ್ಸ್ ಸಮ್ಮರ್ಸ್
ಅಮೆರಿಕದ ಮಾಜಿ ಖಜಾನೆ ಕಾರ್ಯದರ್ಶಿ ಮತ್ತು ಹಾರ್ವರ್ಡ್ ವಿಶ್ವವಿದ್ಯಾಲಯದ ಮಾಜಿ ಅಧ್ಯಕ್ಷ ಲಾರೆನ್ಸ್ ಸಮ್ಮರ್ಸ್ ಅವರು ಎಪ್‌ಸ್ಟೀನ್‌ನಿಂದ ದೇಣಿಗೆ ಪಡೆದಿದ್ದ ಬಗ್ಗೆ ಮತ್ತು ಆರ್ಥಿಕ ಸಲಹೆಗಳ ಬಗ್ಗೆ ಚರ್ಚಿಸಿದ್ದ ಇಮೇಲ್‌ಗಳು ಫೈಲ್‌ಗಳಲ್ಲಿವೆ.
ಥಾಮಸ್ ಪ್ರಿಟ್ಜ್ಕರ್
ಹ್ಯಾಟ್ ಹೋಟೆಲ್ ಸಮೂಹದ (Hyatt Hotels) ಕಾರ್ಯನಿರ್ವಾಹಕ ಅಧ್ಯಕ್ಷ ಥಾಮಸ್ ಪ್ರಿಟ್ಜ್ಕರ್ ಹೆಸರು ಕೆಲವು ಸಾಕ್ಷ್ಯಗಳಲ್ಲಿ ಉಲ್ಲೇಖವಾಗಿದೆ, ಆದರೆ ಯಾವುದೇ ತಪ್ಪು ಎಸಗಿದ ಬಗ್ಗೆ ದೃಢಪಟ್ಟಿಲ್ಲ.
ಜಾರ್ಜ್ ಮಿಚೆಲ್
ಅಮೆರಿಕದ ಮಾಜಿ ಸೆನೆಟರ್ ಜಾರ್ಜ್ ಮಿಚೆಲ್ ಎಪ್‌ಸ್ಟೀನ್‌ನ ಪಾರ್ಟಿಗಳಲ್ಲಿ ಭಾಗವಹಿಸಿದ್ದರು ಎಂಬ ಉಲ್ಲೇಖಗಳು ಕೆಲವು ಸಂತ್ರಸ್ತೆಯರ ಹೇಳಿಕೆಗಳಲ್ಲಿ ಕಂಡುಬಂದಿವೆ.
ಲೆಸ್ಲಿ ವೆಕ್ಸ್ನರ್
ವಿಕ್ಟೋರಿಯಾಸ್ ಸೀಕ್ರೆಟ್ ಕಂಪನಿಯ ಮಾಲೀಕ ಲೆಸ್ಲಿ ವೆಕ್ಸ್ನರ್ ಅವರ ಹಣಕಾಸು ವ್ಯವಹಾರಗಳನ್ನು ಎಪ್ಸ್ಟೀನ್ ನೋಡಿಕೊಳ್ಳುತ್ತಿದ್ದ. ಇವರ ನಡುವಿನ ನಿಕಟ ವ್ಯವಹಾರದ ಇಮೇಲ್‌ಗಳು ಮತ್ತು ದಾಖಲೆಗಳು ಈ ವರದಿಯಲ್ಲಿ ವಿವರವಾಗಿ ಉಲ್ಲೇಖಿಸಲಾಗಿದೆ.
ಸೆರ್ಗೆ ಬ್ರಿನ್
ಎಪ್‌ಸ್ಟೀನ್‌ನ ಜೆಪಿ ಮೋರ್ಗನ್ ಬ್ಯಾಂಕ್ ಖಾತೆಗಳ ಮೂಲಕ ನಡೆದ ವಹಿವಾಟುಗಳಿಗೆ ಸಂಬಂಧಿಸಿದಂತೆ ಗೂಗಲ್‌ನ ಸಹ-ಸಂಸ್ಥಾಪಕ ಸೆರ್ಗೆ ಬ್ರಿನ್ ಹೆಸರು ಪ್ರಸ್ತಾಪವಾಗಿದೆ.
ಮೀರಾ ನಾಯರ್ ಹೆಸರು
ನ್ಯೂಯಾರ್ಕ್ ನಗರದ ಮೇಯರ್ ಆಗಿ ಇತ್ತೀಚೆಗೆ ಪ್ರಮಾಣವಚನ ಸ್ವೀಕರಿಸಿದ ಝೊಹ್ರಾನ್ ಮಮ್ದಾನಿ ಅವರ ತಾಯಿ, ಭಾರತೀಯ ಮೂಲದ ವಿಶ್ವವಿಖ್ಯಾತ ಚಲನಚಿತ್ರ ನಿರ್ದೇಶಕಿ ಮೀರಾ ನಾಯರ್ ಅವರ ಹೆಸರು ಎಪ್ಸ್ಟೀನ್ ಫೈಲ್‌ಗಳಲ್ಲಿ ಉಲ್ಲೇಖವಾಗಿದೆ. 2002ರಲ್ಲಿ ಎಪ್ಸ್ಟೀನ್ ತನ್ನ ಮನೆಯಲ್ಲಿ ಆಯೋಜಿಸಿದ್ದ ಔತಣಕೂಟವೊಂದರ ಅತಿಥಿಗಳ ಪಟ್ಟಿಯಲ್ಲಿ ಮೀರಾ ನಾಯರ್ ಅವರ ಹೆಸರು ಕಂಡುಬಂದಿದೆ. ವರದಿಗಳ ಪ್ರಕಾರ, ಮೀರಾ ನಾಯರ್ ಕೇವಲ ಒಬ್ಬ ಅತಿಥಿಯಾಗಿ ಎಪ್ಸ್ಟೀನ್ ಮನೆಯ ಕಾರ್ಯಕ್ರಮದಲ್ಲಿ ಭಾಗವಹಿಸಿದ್ದರು. ಎಪ್ಸ್ಟೀನ್ ಆಗಿನ ಕಾಲದಲ್ಲಿ ದೊಡ್ಡ ದೊಡ್ಡ ಕಲಾವಿದರು ಮತ್ತು ಬುದ್ಧಿಜೀವಿಗಳನ್ನು ತನ್ನ ಪಾರ್ಟಿಗಳಿಗೆ ಆಹ್ವಾನಿಸುತ್ತಿದ್ದ.
ಜೆಫ್ರಿ ಎಪ್ಸ್ಟೀನ್ ಲೈಂಗಿಕ ಹಗರಣ ಮತ್ತು ಎಪ್ಸ್ಟೀನ್ ಫೈಲ್‌ ಬಿಡುಗಡೆಗೆ ಸಂಬಂಧಿಸಿದಂತೆ ವಿವರವಾದ ಮಾಹಿತಿ ನೀಡುವ ಕೆಲ ವರದಿ ಲಿಂಕ್‌ಗಳು ಕೆಳಗಿವೆ. ಈ ವರದಿಗಳನ್ನು ಓದಿದರೆ ಜಗತ್ತಿನಾದ್ಯಂತ ಚರ್ಚೆಯಲ್ಲಿರುವ ಈ ಪ್ರಕರಣದ ಸಂಪೂರ್ಣ, ವಿವರವಾದ ಮತ್ತು ಸ್ಪಷ್ಟ ಮಾಹಿತಿಯನ್ನು ತಿಳಿದುಕೊಳ್ಳಬಹುದು..
ನೂರಾರು ಹುಡುಗಿಯರ ಮೇಲೆ ಲೈಂಗಿಕ ದೌರ್ಜನ್ಯ, ಜೈಲಿನಲ್ಲಿ ನಿಗೂಢ ಸಾವು : ಅಮೆರಿಕವನ್ನು ತಲ್ಲಣಗೊಳಿಸಿದ ಜೆಫ್ರಿ ಎಪ್ಸ್ಟೀನ್ ಯಾರು?
https://naanugauri.com/sexual-abuse-of-hundreds-of-girls-mysterious-death-in-prison-who-is-jeffrey-epstein-who-shocked-america/
ಅಮೆರಿಕದ ಬಹು ನಿರೀಕ್ಷಿತ ‘ಎಪ್ಸ್ಟೀನ್ ಫೈಲ್ಸ್’ ಬಿಡುಗಡೆ : ಬಿಲ್ ಕ್ಲಿಂಟನ್, ಮೈಕಲ್ ಜಾಕ್ಸನ್ ಸೇರಿದಂತೆ ಪ್ರಮುಖರ ಫೋಟೋಗಳು ಬಹಿರಂಗ
ಜೆಫ್ರಿ ಎಪ್ಸ್ಟೀನ್ ಫೈಲ್ಸ್: ನ್ಯಾಯಾಂಗ ಇಲಾಖೆಯ ವೆಬ್ ಪುಟದಿಂದ ಟ್ರಂಪ್ ಫೋಟೋ ಸೇರಿದಂತೆ 16 ದಾಖಲೆಗಳು ಕಣ್ಮರೆ
