ಸಮಾಜದಲ್ಲಿ ತಾರತಮ್ಯ ಮತ್ತು ಶೋಷಣೆಗೆ ಒಳಗಾದ ಸಮುದಾಯಗಳು ಒಗ್ಗಟ್ಟಾಗಿ ನಿಂತಾಗ ಮಾತ್ರ ಸಾಮಾಜಿಕ ನ್ಯಾಯ ಮತ್ತು ಸಮಾನ ಹಕ್ಕುಗಳನ್ನು ಪಡೆದುಕೊಳ್ಳಲು ಸಾಧ್ಯ ಎಂದು ಸಚಿವ ರಿಜ್ವಾನ್ ಅರ್ಷದ್ ಹೇಳಿದ್ದಾರೆ. ಬೆಂಗಳೂರಿನ ವಿಧಾನಸೌಧದ ಬ್ಯಾಂಕ್ವೆಟ್ ಹಾಲ್‌ನಲ್ಲಿ ಆಯೋಜಿಸಲಾಗಿದ್ದ ಮಹರ್ಷಿ ವಾಲ್ಮೀಕಿ ಜಯಂತಿ ಕಾರ್ಯಕ್ರಮದಲ್ಲಿ ಭಾಗವಹಿಸಿ ಮಾತನಾಡಿದ ಅವರು, ಎಸ್‌ಸಿ, ಎಸ್‌ಟಿ ಮತ್ತು ಮುಸ್ಲಿಂ ಸಮುದಾಯಗಳ ನಡುವಿನ ಐತಿಹಾಸಿಕ, ಸಾಮಾಜಿಕ ಹಾಗೂ ರಕ್ತಸಂಬಂಧದ ಬಾಂಧವ್ಯವನ್ನು ಉಲ್ಲೇಖಿಸಿ ಮಹತ್ವದ ಮಾತುಗಳನ್ನು ಆಡಿದ್ದಾರೆ.
ಎಸ್‌ಸಿ, ಎಸ್‌ಟಿ ಮತ್ತು ಹಿಂದುಳಿದ ವರ್ಗಗಳ ಹೋರಾಟಗಳು ಹಾಗೂ ಕಾರ್ಯಕ್ರಮಗಳಲ್ಲಿ ತಾವು ಸದಾ ಮುಂಚೂಣಿಯಲ್ಲಿ ಭಾಗವಹಿಸುವುದಕ್ಕೆ ಇರುವ ಐತಿಹಾಸಿಕ ಕಾರಣವನ್ನು ಬಿಚ್ಚಿಟ್ಟ ರಿಜ್ವಾನ್ ಅರ್ಷದ್, ಇಂದಿನ ಬಹುತೇಕ ಮುಸ್ಲಿಮರು ಮೂಲತಃ ಎಸ್‌ಸಿ ಮತ್ತು ಎಸ್‌ಟಿ ಸಮುದಾಯದ ಹಿನ್ನೆಲೆಯಿಂದ ಬಂದವರಾಗಿದ್ದಾರೆ, “ನಾವು (ಮುಸಲ್ಮಾನರು) ಮೂಲತಃ ಮಾಜಿ ದಲಿತರು ಹಾಗೂ ಮಾಜಿ ಎಸ್‌ಸಿ-ಎಸ್‌ಟಿಗಳು” ಎಂದು ವ್ಯಾಖ್ಯಾನಿಸಿದ ಅವರು, ಈ ಸಮುದಾಯಗಳು ಬೇರೆ ಬೇರೆಯಲ್ಲ; ಬದಲಿಗೆ ಒಂದೇ ಇತಿಹಾಸ, ಒಂದೇ ಸಂಕಟ ಮತ್ತು ಒಂದೇ ಹಿನ್ನೆಲೆಯನ್ನು ಹಂಚಿಕೊಂಡಿರುವ ಸಮುದಾಯಗಳು ಎಂದು ತಿಳಿಸಿದ್ದಾರೆ.
ಚಾರಿತ್ರಿಕವಾಗಿ ಭಾರತೀಯ ಸಮಾಜದಲ್ಲಿದ್ದ ಮನುಷ್ಯವಿರೋಧಿ ವ್ಯವಸ್ಥೆ, ಜಾತಿಯಾಧಾರಿತ ಅನ್ಯಾಯಗಳು ಹಾಗೂ ಅಸಮಾನತೆಯ ಕಡಿವಾಣಗಳಿಂದ ಹೊರಬರಲು ನಮ್ಮ ಪೂರ್ವಜರು ಪರ್ಯಾಯ ವ್ಯವಸ್ಥೆಯನ್ನು ಅರಸಿದರು. ಅಂದು ಅನುಭವಿಸಿದ ತೀವ್ರ ಶೋಷಣೆಯ ಫಲವಾಗಿಯೇ ನಮ್ಮ ಹಿರಿಯರು ಇಸ್ಲಾಂ ಧರ್ಮವನ್ನು ಸ್ವೀಕರಿಸಿದರು ಎಂದು ಸ್ಮರಿಸಿದ ಅವರು, ಧರ್ಮ ಪರಿವರ್ತನೆಯಾದ ತಕ್ಷಣ ರಕ್ತ ಅಥವಾ ಮೂಲ ಸಾಮಾಜಿಕ ಹಿನ್ನೆಲೆ ಬದಲಾಗುವುದಿಲ್ಲ ಎಂದು ಪ್ರತಿಪಾದಿಸಿದ್ದಾರೆ. ಧಾರ್ಮಿಕ ಪರಿವರ್ತನೆಯಾಗಿದ್ದರೂ ಎಸ್‌ಸಿ, ಎಸ್‌ಟಿ ಮತ್ತು ಮುಸ್ಲಿಂ ಸಮುದಾಯಗಳ ರಕ್ತ, ಜೀವಪರ ಕಾಳಜಿ ಮತ್ತು ದೈನಂದಿನ ಬದುಕಿನ ವಾಸ್ತವಗಳು ಇಂದಿಗೂ ಒಂದೇ ಆಗಿವೆ ಎಂದಿದ್ದಾರೆ.
ಸಮಾಜದ ಭೌಗೋಳಿಕ ಮತ್ತು ಸಾಮಾಜಿಕ ರಚನೆಯನ್ನು ಉಲ್ಲೇಖಿಸಿದ ಅವರು, ಇಂದಿಗೂ ದೇಶದ ಯಾವುದೇ ಮೂಲೆಗೆ ಹೋದರೂ ಎಸ್‌ಸಿ ಮತ್ತು ಎಸ್‌ಟಿ ಸಮುದಾಯಗಳ ಪಕ್ಕದಲ್ಲೇ ಮುಸ್ಲಿಂ ಸಮುದಾಯದ ಬಡಾವಣೆಗಳು ಇರುವುದನ್ನು ಕಾಣಬಹುದು. ಇದು ಕೇವಲ ಕಾಕತಾಳೀಯವಲ್ಲ, ಬದಲಿಗೆ ಶತಮಾನಗಳಿಂದ ಬೆಳೆದು ಬಂದಿರುವ ಸಾಮಾಜಿಕ ಹಾಗೂ ಆರ್ಥಿಕ ಬಾಂಧವ್ಯಕ್ಕೆ ಸಾಕ್ಷಿಯಾಗಿದೆ ಎಂದಿದ್ದಾರೆ. ಆದ್ದರಿಂದ, ಮನುಷ್ಯ ಮನುಷ್ಯರನ್ನು ಗೌರವಿಸುವ, ಪ್ರತಿಯೊಬ್ಬರಿಗೂ ಸಮಾನ ಅವಕಾಶ ಮತ್ತು ಹಕ್ಕುಗಳನ್ನು ನೀಡುವ ಪ್ರಗತಿಪರ ಸಮಾಜವನ್ನು ನಿರ್ಮಿಸಲು ಈ ಎಲ್ಲಾ ಶೋಷಿತ ವರ್ಗಗಳು ಒಂದಾಗಿ ಹೋರಾಡುವುದು ಇಂದಿನ ತುರ್ತು ಪರಿಸ್ಥಿತಿಗೆ ಅಗತ್ಯವಾಗಿದೆ ಎಂದು ರಿಜ್ವಾನ್ ಅರ್ಷದ್ ಕರೆ ನೀಡಿದ್ದಾರೆ.
