ಹೊಸದಿಲ್ಲಿ: ವಿಶ್ವವಿದ್ಯಾಲಯಗಳು ರಾಜಕೀಯ ಚರ್ಚೆಗಳಿಂದ ದೂರವಿರಬೇಕು ಎಂಬ ವಾದಗಳು ಕೇಳಿಬರುತ್ತಿರುವಾಗಲೇ, ಜವಾಹರಲಾಲ್ ನೆಹರು ವಿಶ್ವವಿದ್ಯಾಲಯದ (ಜೆಎನ್‌ಯು) ವಿದ್ಯಾರ್ಥಿಗಳು ಮತ್ತೊಮ್ಮೆ ತಮ್ಮ ಹೋರಾಟದ ಪರಂಪರೆಯನ್ನು ಪ್ರದರ್ಶಿಸಿದ್ದಾರೆ. ಶನಿವಾರ ಸಂಜೆ ನಡೆದ ಬೃಹತ್ ಸಾರ್ವಜನಿಕ ಸಭೆಯಲ್ಲಿ, ನೂರಾರು ವಿದ್ಯಾರ್ಥಿಗಳು ಪ್ಯಾಲೆಸ್ತೀನ್‌ ಮೇಲಿನ ಇಸ್ರೇಲ್ ಆಕ್ರಮಣದ ವಿರುದ್ಧ ಗಟ್ಟಿಯಾಗಿ ದನಿ ಎತ್ತಿದರು. “ಗಾಜಾ ಕೇವಲ ಸಾವಿನ ಸ್ಥಳವಲ್ಲ, ಅದು ಪ್ರತಿಭಟನೆಯ ಸಂಕೇತ,” ಎಂಬ ಶೀರ್ಷಿಕೆಯೊಂದಿಗೆ ಆರಂಭವಾದ ಈ ಸಭೆಯು, ಇಡೀ ವಿಶ್ವದ ಗಮನ ಸೆಳೆದಿದೆ.
ಪಿಡಿಎಸ್‌ಯು (ಪ್ರೊಗ್ರೆಸ್ಸಿವ್ ಡೆಮಾಕ್ರಟಿಕ್ ಸ್ಟೂಡೆಂಟ್ಸ್ ಯೂನಿಯನ್) ಆಯೋಜಿಸಿದ್ದ ಈ ಕಾರ್ಯಕ್ರಮ, ಜೆಎನ್‌ಯುವಿನ ಸಾಬರಮತಿ ಟಿ-ಪಾಯಿಂಟ್‌ನಲ್ಲಿ ನಡೆಯಿತು. ಸುಮಾರು 300 ವಿದ್ಯಾರ್ಥಿಗಳು ಸೇರಿ, ಭಾಷಣಗಳು, ಘೋಷಣೆಗಳು ಮತ್ತು ಸಾಂಸ್ಕೃತಿಕ ಕಾರ್ಯಕ್ರಮಗಳ ಮೂಲಕ ಪ್ಯಾಲೆಸ್ಟೈನ್‌ ಜನರ ನೋವು ಮತ್ತು ಹೋರಾಟಕ್ಕೆ ಬೆಂಬಲ ವ್ಯಕ್ತಪಡಿಸಿದರು.
ಸಭೆಯ ಮುಖ್ಯ ಭಾಷಣಕಾರರಲ್ಲಿ ಒಬ್ಬರಾದ ಪ್ರಸಿದ್ಧ ಶಿಕ್ಷಣ ತಜ್ಞೆ ಮತ್ತು ಚಿಂತಕಿ ಪ್ರೊಫೆಸರ್ ನಿವೇದಿತಾ ಮೆನನ್, ಪ್ಯಾಲೆಸ್ಟೈನ್‌ಗೆ ಬೆಂಬಲ ನೀಡುವುದು ಕೇವಲ ರಾಜಕೀಯ ನಿಲುವು ಮಾತ್ರವಲ್ಲ, ಅದೊಂದು ಮಾನವೀಯ ಜವಾಬ್ದಾರಿ ಎಂದು ಪ್ರತಿಪಾದಿಸಿದರು. ವೆಸ್ಟ್‌ ಬ್ಯಾಂಕ್‌ನಲ್ಲಿ ಪ್ಯಾ ಪ್ಯಾಲೆಸ್ತೀನಿಯನ್ ಶಿಕ್ಷಣ ತಜ್ಞರು ಮತ್ತು ಯುವಕರೊಂದಿಗೆ ತಾವು ನಡೆಸಿದ ಸಂವಾದಗಳನ್ನು ಮೆನನ್ ನೆನಪಿಸಿಕೊಂಡರು. “ನಾವು ಪ್ಯಾಲೆಸ್ತೀನ್‌ ಪರವಾಗಿ ಮಾತನಾಡುತ್ತೇವೆಯೇ ಎಂಬುದು ಮುಖ್ಯವಲ್ಲ, ಬದಲಾಗಿ ಅವರ ನೋವು ಮತ್ತು ಕಷ್ಟಗಳನ್ನು ನಾವು ಆಲಿಸಲು ಸಿದ್ಧರಿದ್ದೇವೆಯೇ ಎಂಬುದು ನಿಜವಾದ ಪ್ರಶ್ನೆ,” ಎಂದು ಅವರು ಹೇಳಿದರು. ಗಾಜಾವನ್ನು ನೋವಿನ ಕೇಂದ್ರವಾಗಿ ಮಾತ್ರ ನೋಡದೆ, ಅದು ಹೋರಾಟದ ಸಂಕೇತ ಎಂದು ಮೆನನ್ ಬಣ್ಣಿಸಿದರು. “ಗಾಜಾ ಅವಶೇಷಗಳ ಅಡಿಯಲ್ಲಿಯೂ ಮೌನವಾಗಲು ನಿರಾಕರಿಸುತ್ತದೆ,” ಎಂಬ ಅವರ ಮಾತುಗಳು ಸಭೆಯಲ್ಲಿ ಭಾವನಾತ್ಮಕ ವಾತಾವರಣ ಸೃಷ್ಟಿಸಿದವು.
ಪಿಡಿಎಸ್‌ಯುನ ಜೆಎನ್‌ಯು ಘಟಕದ ಅಧ್ಯಕ್ಷ ಕಾಮ್ರೇಡ್ ಸೌರವ್, ವಿಶ್ವವಿದ್ಯಾಲಯಗಳ ಪಾತ್ರದ ಬಗ್ಗೆ ಪ್ರಮುಖ ಹೇಳಿಕೆಗಳನ್ನು ನೀಡಿದರು. “ಕೇವಲ ಪದವಿಗಳನ್ನು ಪಡೆಯುವುದು ಕಲಿಕೆಯ ಉದ್ದೇಶವಲ್ಲ. ಇದು ತುಳಿತಕ್ಕೊಳಗಾದವರ ಪರವಾಗಿ ನಿಲ್ಲುವುದು, ನಮ್ಮ ಜ್ಞಾನವನ್ನು ಬಳಸಿಕೊಂಡು ಬಾಂಬ್‌ಗಳು ಮತ್ತು ಗಡಿಗಳ ಅಡಿಯಲ್ಲಿ ಹೂತುಹೋಗಿರುವವರ ದನಿಗಳನ್ನು ಹೊರತರುವುದು,” ಎಂದು ಅವರು ಹೇಳಿದರು. ಜೆಎನ್‌ಯು ಯಾವಾಗಲೂ ಸಾಮಾನ್ಯ ಜನರ ಹೋರಾಟಗಳಿಗೆ ದನಿಯಾಗಿದೆ ಮತ್ತು ಈ ಹೋರಾಟವನ್ನು ಮುಂದುವರಿಸುವುದು ನಮ್ಮ ಕರ್ತವ್ಯ ಎಂದು ಸೌರವ್ ಒತ್ತಿ ಹೇಳಿದರು.
ಐಐಟಿ ದೆಹಲಿಯ ನಿವೃತ್ತ ಪ್ರಾಧ್ಯಾಪಕ ಮತ್ತು ಹಿರಿಯ ಶಾಂತಿ ಕಾರ್ಯಕರ್ತ ಪ್ರೊಫೆಸರ್ ವಿಪಿನ್ ತ್ರಿಪಾಠಿ, ಜೆಎನ್‌ಯು ವಿದ್ಯಾರ್ಥಿಗಳ ಧೈರ್ಯವನ್ನು ಶ್ಲಾಘಿಸಿದರು. “ಇಂದು ಸರ್ಕಾರಗಳು ತಮ್ಮದೇ ಜನರ ವಿರುದ್ಧ ತಿರುಗುತ್ತಿವೆ. ನಾವು ಧರ್ಮ ಮತ್ತು ಜನಾಂಗದ ಕನ್ನಡಕಗಳನ್ನು ತೆಗೆದರೆ, ಭಾರತವಾಗಲಿ ಅಥವಾ ಪ್ಯಾಲೆಸ್ತೀನ್‌ ಆಗಲಿ, ಇದು ಅಧಿಕಾರದ ವಿರುದ್ಧ ನಡೆಯುತ್ತಿರುವ ಸಾಮಾನ್ಯ ಜನರ ಹೋರಾಟ ಎಂಬುದು ಸ್ಪಷ್ಟವಾಗುತ್ತದೆ,” ಎಂದು ಅವರು ವಿಶ್ಲೇಷಿಸಿದರು. ಜೆಎನ್‌ಯು ತನ್ನ ಪ್ರಜಾಸತ್ತಾತ್ಮಕ ಹೋರಾಟದ ಪರಂಪರೆಯನ್ನು ಉಳಿಸಿಕೊಂಡು, ಮೌನ ಮುರಿದು ಘರ್ಜಿಸಬೇಕು ಎಂದು ಅವರು ಕರೆ ನೀಡಿದರು.
ಜನಹತ್ಶೇಪ್‌ನ ಸಂಚಾಲಕ ಡಾ. ವಿಕಾಸ್ ಬಾಜಪೈ, ಇಸ್ರೇಲ್‌ನ ಆಕ್ರಮಣವನ್ನು “ಸಾಮ್ರಾಜ್ಯಶಾಹಿ ವಿನ್ಯಾಸ” ಎಂದು ಕರೆದು, ಗಾಜಾ ಇಡೀ ಮಾನವೀಯತೆಗೆ ಒಂದು ಪರೀಕ್ಷಾ ಪ್ರಕರಣವಾಗಿದೆ ಎಂದು ಹೇಳಿದರು. ಇಸ್ರೇಲ್‌ನ ನರಮೇಧದ ಬಗ್ಗೆ ಭಾರತ ಸರ್ಕಾರ ಅನುಸರಿಸುತ್ತಿರುವ ಮೌನ ನೀತಿಯನ್ನು ಅವರು ತೀವ್ರವಾಗಿ ಖಂಡಿಸಿದರು ಮತ್ತು ಎಲ್ಲ ಶಾಂತಿಪ್ರಿಯ ಜನರು ಈ ಅನ್ಯಾಯದ ವಿರುದ್ಧ ಹೋರಾಡಬೇಕು ಎಂದು ಕರೆ ನೀಡಿದರು.
ಈ ಸಭೆಯು ವಿದ್ಯಾರ್ಥಿಗಳ ಒಗ್ಗಟ್ಟಿನ ಪ್ರತಿಜ್ಞೆಯೊಂದಿಗೆ ಮುಕ್ತಾಯಗೊಂಡಿತು. ಗಾಜಾದ ಮೇಲಿನ ಬಾಂಬ್ ದಾಳಿಗಳ ನಡುವೆ, ಜೆಎನ್‌ಯು ವಿದ್ಯಾರ್ಥಿಗಳು ಮೌನಕ್ಕೆ ಶರಣಾಗದೆ, ಹೋರಾಟವನ್ನು ಆಯ್ಕೆ ಮಾಡಿದ್ದಾರೆ ಎಂಬ ಸ್ಪಷ್ಟ ಸಂದೇಶವನ್ನು ಈ ಕಾರ್ಯಕ್ರಮ ನೀಡಿದೆ. ಭವಿಷ್ಯದಲ್ಲಿಯೂ ಪ್ಯಾಲೆಸ್ತೀನ್‌ ಗೆ ಬೆಂಬಲವಾಗಿ ಕ್ಯಾಂಪಸ್ ಮತ್ತು ಹೊರಗೆ ಜಾಗೃತಿ ಮೂಡಿಸುವ ಕಾರ್ಯಕ್ರಮಗಳನ್ನು ಮುಂದುವರಿಸುವುದಾಗಿ ವಿದ್ಯಾರ್ಥಿಗಳು ಘೋಷಿಸಿದರು.
