ದೆಹಲಿಯ ಜವಾಹರಲಾಲ್ ನೆಹರು ವಿಶ್ವ ವಿದ್ಯಾಲಯದ (ಜೆಎನ್ಯು) ಉಪಕುಲಪತಿ ಶಾಂತಿಶ್ರೀ ಧೂಳಿಪುಡಿ ಪಂಡಿತ್ ಅವರು ‘ದ ಸಂಡೇ ಗಾರ್ಡಿಯನ್’ ಯೂಟ್ಯೂಬ್ ಚಾನೆಲ್ನ ಪಾಡ್ಕಾಸ್ಟ್ನಲ್ಲಿ ‘ಜಾತಿ ಮತ್ತು ವಿಕ್ಟಿಮ್ ಕಾರ್ಡ್’ ಕುರಿತು ನೀಡಿದ ಹೇಳಿಕೆ ದೇಶದಾದ್ಯಂತ ತೀವ್ರ ಆಕ್ರೋಶಕ್ಕೆ ಕಾರಣವಾಗಿದೆ.
ಜೆಎನ್ಯು ವಿದ್ಯಾರ್ಥಿ ಸಂಘಟನೆ (ಜೆಎನ್ಯುಎಸ್ಯು) ಪಂಡಿತ್ ಹೇಳಿಕೆಯನ್ನು ತೀವ್ರವಾಗಿ ಖಂಡಿಸಿದ್ದು, ಅವರ ರಾಜೀನಾಮೆಗೆ ಒತ್ತಾಯಿಸಿದೆ. ಅಲ್ಲದೆ, ದೇಶದಾದ್ಯಂತ ಎಲ್ಲಾ ವಿದ್ಯಾರ್ಥಿ ಒಕ್ಕೂಟಗಳು, ಸಂಘಟನೆಗಳು ಮತ್ತು ವಿದ್ಯಾರ್ಥಿಗಳು ಪಂಡಿತ್ ಹೇಳಿಕೆ ಖಂಡಿಸಿ, ಅವರ ರಾಜೀನಾಮೆಗೆ ಆಗ್ರಹಿಸಿ ಶನಿವಾರ (ಫೆ. 21) ‘ರಾಷ್ಟ್ರೀಯ ಪ್ರತಿಭಟನಾ ದಿನ’ವನ್ನು ಆಚರಿಸುವಂತೆ ಮನವಿ ಮಾಡಿದೆ.
ಫೆ.16ರಂದು ಅಪ್ಲೋಡ್ ಮಾಡಲಾದ ಪಾಡ್ಕಾಸ್ಟ್ನಲ್ಲಿ ಮಾತನಾಡಿದ ಉಪಕುಲಪತಿ ಪಂಡಿತ್, “ಯಾರೂ ಕೂಡ ಶಾಶ್ವತವಾಗಿ ಸಂತ್ರಸ್ತರಾಗಿ ಅಥವಾ ವಿಕ್ಟಿಮ್ ಕಾರ್ಡ್ ಬಳಸುವ ಮೂಲಕ ಪ್ರಗತಿ ಸಾಧಿಸಲು ಸಾಧ್ಯವಿಲ್ಲ” ಎಂದು ಹೇಳಿದ್ದಾರೆ.
ಮುಂದುವರಿದು, “ಯಾರನ್ನಾದರೂ ಕೆಟ್ಟವರೆಂದು ಬಿಂಬಿಸುವ ಮೂಲಕ ಅಥವಾ ಶತ್ರು ಎಂದು ಕೂಗಾಡುವ ಮೂಲಕ ಪ್ರಗತಿ ಹೊಂದಲು ಸಾಧ್ಯವಿಲ್ಲ. ಇದು ಕೇವಲ ತಾತ್ಕಾಲಿಕವಾಗಿ ಒಳ್ಳೆಯ ಭಾವನೆ ನೀಡುವ ಒಂದು ಡ್ರಗ್ ತರಹದ ಪ್ರವೃತ್ತಿಯಾಗಿದೆ” ಎಂದಿದ್ದಾರೆ.
ದಲಿತ ವಿದ್ಯಾರ್ಥಿಗಳ ಹೋರಾಟಕ್ಕೆ ಅಂತಾರಾಷ್ಟ್ರೀಯ ಉದಾಹರಣೆಯನ್ನು ನೀಡಿದ ಪಂಡಿತ್, “ಇದೇ ವಿಷಯವನ್ನು ವಿದೇಶಗಳಲ್ಲಿ ಕಪ್ಪು ಸಮುದಾಯದ ವಿಚಾರದಲ್ಲಿ ಮಾಡಲಾಗಿತ್ತು; ಈಗ ಅದೇ ವಿಷಯವನ್ನು ಇಲ್ಲಿ ದಲಿತರ ವಿಚಾರದಲ್ಲೂ ತರಲಾಗಿದೆ” ಎಂದು ಹೇಳಿದ್ದಾರೆ.
ವಿವಾದಾತ್ಮಕ ಹೇಳಿಕೆಯನ್ನು ಕೆಳಗಿನ ವಿಡಿಯೋದಲ್ಲಿ 45 ನಿಮಿಷದಿಂದ ನೋಡಬಹುದು
ಅಂದರೆ, ಸಾಮಾಜಿಕ ನ್ಯಾಯದ ಹೋರಾಟಗಳು ಅಥವಾ ಮೀಸಲಾತಿಯಂತಹ ನೀತಿಗಳು ಸಮುದಾಯಗಳನ್ನು ಶಾಶ್ವತವಾಗಿ ‘ಸಂತ್ರಸ್ತರು’ ಎಂಬ ಭಾವನೆಯಲ್ಲಿ ಇರಿಸುತ್ತವೆ ಎಂಬುದು ಪಂಡಿತ್ ಅವರ ಮಾತಿನ ಅರ್ಥವಾಗಿದೆ ಎಂದು ವಿಶ್ಲೇಷಿಸಲಾಗಿದೆ.
ವಿಶ್ವವಿದ್ಯಾಲಯಗಳಲ್ಲಿ ಜಾತಿ ಆಧಾರಿತ ತಾರತಮ್ಯ ತಡೆಯಲು ರೂಪಿಸಲಾದ ‘ಯುಜಿಸಿ ಈಕ್ವಿಟಿ ರೆಗ್ಯುಲೇಷನ್ಸ್ 2026’ ಅನ್ನು ಪಂಡಿತ್ ‘ಅನಗತ್ಯ ಮತ್ತು ‘ಅಸಂಬದ್ಧ’ ಎಂದು ಹೇಳಿದ್ದಾರೆ. ಒಬ್ಬರ ಹುಟ್ಟಿನ ಗುರುತಿನ ಆಧಾರದ ಮೇಲೆ ಅವರಿಗೆ ಹಕ್ಕುಗಳನ್ನು ನಿರಾಕರಿಸಬಾರದು ಅಥವಾ ಅದರ ಆಧಾರದ ಮೇಲೆ ಶಿಕ್ಷಿಸಬಾರದು ಎಂದು ಅವರು ವಾದಿಸಿದ್ದಾರೆ.
ಈ ಹೇಳಿಕೆಗಳು ದಲಿತರ ದಶಕಗಳ ಕಾಲದ ಹೋರಾಟ ಮತ್ತು ಅವರಿಗೆ ಸಂವಿಧಾನಬದ್ಧವಾಗಿ ಸಿಗಬೇಕಾದ ಹಕ್ಕುಗಳನ್ನು ಕಡೆಗಣಿಸುವಂತಿವೆ ಎಂದು ಜೆಎನ್ಯು ವಿದ್ಯಾರ್ಥಿ ಸಂಘ ಖಂಡಿಸಿದೆ.
ವಿಡಿಯೋದಲ್ಲಿ ಆರ್ಎಸ್ಎಸ್ ಜೊತೆಗಿನ ನಂಟಿನ ಕುರಿತು ಪಂಡಿತ್ ಅವರು ನೀಡಿರುವ ಹೇಳಿಕೆಗೂ ಜೆಎನ್ಯುಎಸ್ಯು ಖಂಡನೆ ವ್ಯಕ್ತಪಡಿಸಿದೆ.
ಆದರೆ, ಪಂಡಿತ್ ಅವರು ತನ್ನ ಮಾತುಗಳನ್ನು ತಪ್ಪಾಗಿ ಅರ್ಥೈಸಲಾಗಿದೆ ಎಂದು ಹೇಳಿಕೊಂಡಿದ್ದಾರೆ.
