ದಿಟ್ಟ ಪತ್ರಕರ್ತೆ ಗೌರಿ ಲಂಕೇಶ್ ಪ್ರಕರಣದ ಆರೋಪಿ ಹೃಷಿಕೇಶ್ ದೇವ್ಡೀಕರ್ ಸಲ್ಲಿಸಿದ್ದ ಜಾಮೀನು ಅರ್ಜಿಯನ್ನು ಕರ್ನಾಟಕ ಹೈಕೋರ್ಟ್ ತಿರಸ್ಕರಿಸಿದೆ. ಪ್ರಕರಣದಲ್ಲಿ 18 ಆರೋಪಿಯಾಗಿರುವ ಹೃಷಿಕೇಶ್ ಡೀಫಾಲ್ಟ್ ಜಾಮೀನು ಕೋರಿ ಸಲ್ಲಿಸಿದ್ದ ಅರ್ಜಿಯನ್ನು ನ್ಯಾಯಮೂರ್ತಿ ಸೂರಜ್ ಗೋವಿಂದರಾಜ್‌ ನೇತೃತ್ವದ ಪೀಠ ವಜಾಗೊಳಿಸಿದೆ.
ಮಹಾರಾಷ್ಟ್ರದ ಔರಂಗಬಾದ್‌ನ ಹೃಷಿಕೇಶ್ ದೇವ್ಡೀಕರ್‌ನನ್ನು ಗೌರಿ ಲಂಕೇಶ್‌ರವರ ಹತ್ಯೆಗೆ ಬಳಸಿದ್ದ ಗನ್ ನಾಶಪಡಿಸಿದ ಆರೋಪದ ಮೇಲೆ 2020ರ ಜನವರಿ 09ರಂದು ಧನ್ಬಾಗ್ ಜಿಲ್ಲೆಯ ಕತ್ರಾಸ್ ಎಂಬಲ್ಲಿ ವಿಶೇಷ ತನಿಖಾ ತಂಡದ ಸದಸ್ಯರು ಬಂಧಿಸಿದ್ದರು. ಆದರೆ ನಿಗಧಿತ ಸಮಯದಲ್ಲಿ ಆರೋಪ ಪಟ್ಟಿ ಸಲ್ಲಿಸಿಲ್ಲವಾದ್ದರಿಂದ ಡೀಫಾಲ್ಟ್ ಜಾಮೀನು ಮಂಜೂರು ಮಾಡುವಂತೆ ಆರೋಪಿ ಪರ ವಕೀಲರಾದ ಬಿ.ಎಸ್ ಕಿರಣ್ ಮನವಿ ಮಾಡಿದ್ದರು.
ಬಂಧನವಾದ 90 ದಿನಗಳ ಒಳಗೆ ಅಂದರೆ ಏಪ್ರಿಲ್ 09ರ ಒಳಗೆ ಆರೋಪ ಪಟ್ಟಿ ಸಲ್ಲಿಸಬೇಕಾಗಿತ್ತು. ಆದರೆ ಈ ಅವಧಿಯಲ್ಲಿ ಆರೋಪ ಪಟ್ಟಿ ಸಲ್ಲಿಸಿಲ್ಲವಾದ್ದರಿಂದ ಡೀಫಾಲ್ಟ್ ಜಾಮೀನು ನೀಡಬೇಕೆಂದು ಈ ಮೊದಲು ಮೇ 12 ರಂದು ಇಮೇಲ್ ಮೂಲಕ ಅರ್ಜಿ ಸಲ್ಲಿಸಲಾಗಿತ್ತು. ಆದರೆ ಅದೇ ಸಮಯದಲ್ಲಿ ಆರೋಪ ಪಟ್ಟಿ ಸಲ್ಲಿಸಲು ಸಮಯ ವಿಸ್ತರಣೆ ಕೋರಿ ಪೊಲೀಸರು ಸಲ್ಲಿಸಿದ ಅರ್ಜಿಯನ್ನು ವಿಶೇಷ ನ್ಯಾಯಾಲಯ ಪುರಸ್ಕರಿಸಿತ್ತು.
ವಿಶೇಷ ಸರ್ಕಾರಿ ಅಭಿಯೋಜಕರಾದ ಅಶೋಕ್ ಎನ್ ನಾಯಕ್‌ರವರು ವಾದ ಮಂಡಿಸಿ, “ಆರೋಪಿ ಮೊದಲಿಗೆ ನಾಪತ್ತೆಯಾಗಿದ್ದರು. 2018ರ ನವೆಂಬರ್ 23ರಂದು ಅವರ ವಿರುದ್ಧ ಆರೋಪ ಪಟ್ಟಿ ಸಲ್ಲಿಸಲಾಗಿತ್ತು. ಬಂಧನದ ನಂತರ 2020ರ ಜೂನ್ 25ರಂದು ಪೂರಕ ಆರೋಪ ಪಟ್ಟಿ ಸಲ್ಲಿಸಲಾಗಿದೆ. ಸಿಆರ್‌ಪಿಸಿ ಸೆಕ್ಷನ್ 167ರ ಉಪ ಸೆಕ್ಷನ್ 2ರ ಅಡಿಯಲ್ಲಿ ಆರೋಪಿ ಡೀಫಾಲ್ಡಟ್ ಜಾಮೀನು ಕೋರುವಂತಿಲ್ಲ” ಎಂದರು.
ಆರೋಪಿ ಹೃಷಿಕೇಶ್ ದೇವ್ಡೀಕರ್ ಮೇಲೆ ಐಪಿಸಿಯ 302,120(ಬಿ), 109, 114,118, 201, 203, 204, ಶಸ್ತ್ರಾಸ್ತ್ರ ಕಾಯಿದೆಯ 25(1), 25(1ಬಿ), 27(1), ಕೋಕಾ ಸೆಕ್ಷನ್ 3(ಐ), 3(2), 3(3) ಅಡಿಯಲ್ಲಿ ಪ್ರಕರಣ ದಾಖಲಾಗಿದೆ.
ಗೌರಿ ಲಂಕೇಶ್ ಹತ್ಯಾ ಪ್ರಕರಣದ ವಿಚಾರಣೆಯು ಹೊಸ ಸೆಷನ್ಸ್ ನ್ಯಾಯಾಧೀಶರಾದ ನ್ಯಾಯಮೂರ್ತಿ ರಾಮಚಂದ್ರ ಪಿ. ಹುದ್ದಾರ್ ಅವರ ನ್ಯಾಯಾಲಯದಲ್ಲಿ ನಡೆಯುತ್ತಿದೆ. ಗೌರಿ ಲಂಕೇಶ್ ಹತ್ಯೆಯ 18 ಆರೋಪಿಗಳಲ್ಲಿ ಪೊಲೀಸರು 17 ಜನರನ್ನು ಬಂಧಿಸಿದ್ದಾರೆ. ಇವರಲ್ಲಿ 11 ಆರೋಪಿಗಳು ಬೆಂಗಳೂರಿನ ಪರಪ್ಪನ ಅಗ್ರಹಾರ ಜೈಲಿನಲ್ಲಿದ್ದರೆ, ಉಳಿದ 06 ಜನರು ನರೇಂದ್ರ ದಾಬೋಲ್ಕರ್, ಪನ್ಸಾರೆ ಮತ್ತು ಕಲ್ಬುರ್ಗಿಯವರ ಹತ್ಯೆ ಪ್ರಕರಣದಲ್ಲಿಯೂ ಆರೋಪಿಗಳಾಗಿರುವ ಕಾರಣಕ್ಕೆ ಮಹಾರಾಷ್ಟ್ರದಲ್ಲಿ ಅರ್ಥರ್ ರೋಡ್ ಜೈಲಿನಲ್ಲಿದ್ದಾರೆ.
ಇದನ್ನೂ ಓದಿ: ಗೌರಿ ಲಂಕೇಶ್ ಹತ್ಯೆ ಪ್ರಕರಣದ ವಿಚಾರಣೆ; ಆರೋಪಿಗಳನ್ನು ಗುರುತು ಹಚ್ಚಿದ ಪ್ರಮುಖ ಸಾಕ್ಷಿ
