‘ಪ್ರಧಾನಿ ಮೋದಿಯವರು ಅದಾನಿ-ಅಂಬಾನಿ ಬಗ್ಗೆ ಮಾತನಾಡಲು ಪ್ರಾರಂಭಿಸಿರುವುದು ಪವಾಡ’ ಎಂದು ಹೇಳಿರುವ ಶಿವಸೇನೆ (ಯುಬಿಟಿ) ಮುಖ್ಯಸ್ಥ ಉದ್ಧವ್ ಠಾಕ್ರೆ, “ಜೂನ್ 4 ರಂದು ಮತ ಎಣಿಕೆಯ ನಂತರ ಪ್ರಧಾನಿ ನರೇಂದ್ರ ಮೋದಿ ಅವರು ಕಚೇರಿಯಲ್ಲಿ ಉಳಿಯುವುದಿಲ್ಲ” ಎಂದು ವಾಗ್ದಾಳಿ ನಡೆಸಿದರು.
‘ಇಂದು ನಾನು ವೀಡಿಯೊವನ್ನು ನೋಡಿದೆ. ಇದನ್ನು ಎಐ ಬಳಸಿ ತಯಾರಿಸಲಾಗಿದೆ ಎಂದು ನಾನು ಭಾವಿಸಿದೆ. ಇಲ್ಲ, ಪ್ರಧಾನಿ ಮೋದಿಯೇ ಮಾತನಾಡುತ್ತಿದ್ದರು. ಅವರು ಅದಾನಿ ಮತ್ತು ಅಂಬಾನಿ ಬಗ್ಗೆ ಮಾತನಾಡಲು ಪ್ರಾರಂಭಿಸಿದ್ದಾರೆ. ಇದೊಂದು ಪವಾಡ! ಮೋದಿಗೆ ಅದಾನಿ ಮತ್ತು ಅಂಬಾನಿ ಮೇಲೆ ಕೋಪವಿದ್ದರೆ ಅವರಿಗೆ ನೀಡಿರುವ ವಿಮಾನ ನಿಲ್ದಾಣವನ್ನು ವಾಪಸ್ ತೆಗೆದುಕೊಳ್ಳುತ್ತಾರಾ” ಎಂದು ಮಾವಲ್ ಲೋಕಸಭಾ ಕ್ಷೇತ್ರದ ಸಾಂಗ್ವಿಯಲ್ಲಿ ಪಕ್ಷದ ಅಭ್ಯರ್ಥಿ ಸಂಜೋಗ್ ವಾಘರೆ ಅವರ ಪರ ನಡೆದ ರ್ಯಾಲಿಯಲ್ಲಿ ಠಾಕ್ರೆ ಹೇಳಿದರು.
“ಧಾರವಿ ಯೋಜನೆಯ ಮೂಲಕ ಇಡೀ ಮುಂಬೈಯನ್ನು ಅದಾನಿಗಳ ಕೈಗೆ ನೀಡಲಾಗುತ್ತಿದೆ. ಮೊದಲಿಗೆ, ಯೋಜನೆಯನ್ನು ರದ್ದುಗೊಳಿಸುವ ಆದೇಶವನ್ನು ಪ್ರಧಾನಿ ಹೊರಡಿಸಬೇಕು ಮತ್ತು ನಂತರ ಮಾತನಾಡಬೇಕು…” ಎಂದು ಠಾಕ್ರೆ ಆಗ್ರಹಿಸಿದರು.
‘ಪ್ರಧಾನಿಯವರ ಅವಧಿ ಮುಗಿಯುವ ಹಂತದಲ್ಲಿದೆ’ ಎಂದು ಹೇಳಿದ ಠಾಕ್ರೆ, “2014 ಮತ್ತು 2019ರ ಲೋಕಸಭೆ ಚುನಾವಣೆಗಳಲ್ಲಿ ಪ್ರಸ್ತಾಪಿಸಿದ ವಿಷಯಗಳನ್ನೇ ಈಗ ಪ್ರಸ್ತಾಪಿಸಲಾಗುತ್ತಿದೆ. ಆಡಳಿತ ಪಕ್ಷಗಳಿಗೆ ಪ್ರಸ್ತಾಪಿಸಲು ಯಾವುದೇ ಸಮಸ್ಯೆಗಳಿಲ್ಲ. ದೇಶದ ಜನತೆ ತಮ್ಮ ಭವಿಷ್ಯವನ್ನು ಈಗಾಗಲೇ ನಿರ್ಧರಿಸಿದ್ದಾರೆ. ಮೋದಿ ರೋಡ್ ಶೋ ಮಾಡುತ್ತಿದ್ದಾರೆ, ಜನರನ್ನು ರಸ್ತೆಗೆ ಕರೆತಂದಿದ್ದಾರೆ. ಜೂನ್ 4 ರಂದು, ಮೋದಿ ನೋಟು ರದ್ದತಿಯನ್ನು ಜಾರಿಗೆ ತಂದ ರೀತಿಯಲ್ಲಿ, ಅದೇ ರೀತಿಯಲ್ಲಿ, ಅವರು ಪ್ರಧಾನಿಯಾಗಿ ಉಳಿಯುವುದಿಲ್ಲ. ಆದರೆ, ನರೇಂದ್ರ ಮೋದಿಯಾಗಿ ಉಳಿಯುತ್ತಾರೆ” ಎಂದು ಠಾಕ್ರೆ ತೀವ್ರ ವಾಗ್ದಾಳಿ ನಡೆಸಿದರು.
ಮಹಾರಾಷ್ಟ್ರ ಮುಖ್ಯಮಂತ್ರಿ ಏಕನಾಥ್ ಶಿಂಧೆ ಅವರಿಗೆ ಬಿಲ್ಲು ಮತ್ತು ಬಾಣದ ಚಿಹ್ನೆಯನ್ನು ನೀಡಿದ್ದಕ್ಕಾಗಿ ಮೋದಿಯವರಿಗೆ ಠಾಕ್ರೆ ಅವರು ಧನ್ಯವಾದ ಅರ್ಪಿಸಿದರು. ಇದು ಚುನಾವಣಾ ಆಯೋಗದ ನಾಟಕವನ್ನು ಬಯಲು ಮಾಡಿದೆ. ಇದು ಸುಪ್ರೀಂ ಕೋರ್ಟ್‌ನಲ್ಲಿ ನಮಗೆ ಸಾಕ್ಷಿಯಾಗಲಿದೆ. ಮುಖ್ಯಮಂತ್ರಿಗಳೇ ಅದನ್ನು ಒಪ್ಪಿಕೊಂಡಿದ್ದಾರೆ ಎಂದು ಠಾಕ್ರೆ ಹೇಳಿದ್ದಾರೆ.
ಇದನ್ನೂ ಓದಿ; ಪ್ರಚಾರದಲ್ಲಿ ಬಿಜೆಪಿಯಿಂದ ಧಾರ್ಮಿಕ ಚಿಹ್ನೆಗಳ ಬಳಕೆ: ಚುನಾವಣಾ ಆಯೋಗ ಭೇಟಿಗೆ ಮುಂದಾದ ಇಂಡಿಯಾ ಬ್ಲಾಕ್ ನಾಯಕರು
