ಮಹತ್ವದ ಬೆಳವಣಿಗೆಯೊಂದರಲ್ಲಿ, ಭಾಗಶಃ ಕುಸಿದಿರುವ ಶ್ರೀಶೈಲಂ ಎಡದಂಡೆ ಕಾಲುವೆಯ ಸುರಂಗದಲ್ಲಿ ಕಳೆದ ಐದು ದಿನಗಳಿಂದ ಸಿಲುಕಿಕೊಂಡಿರುವ ಎಂಟು ಮಂದಿಯನ್ನು ರಕ್ಷಿಸುವ ಕಾರ್ಯದಲ್ಲಿ ತೊಡಗಿರುವ ತಜ್ಞರ ತಂಡವು, ಸುರಂಗ ಕುಸಿದಲ್ಲಿಗೆ ತಲುಪಿ ಹಿಂದಿರುಗುವಲ್ಲಿ ಯಶಸ್ವಿಯಾಗಿದೆ ಎಂದು ವರದಿಯಾಗಿದೆ.
ಸುರಂಗದ ಕೊನೆ ಭಾಗಕ್ಕೆ 50 ಮೀಟರ್ ದೂರದವರೆಗೆ ರಕ್ಷಣಾ ತಂಡಗಳು ಹೋಗಿ ಬಂದಿವೆ. ಅದಕ್ಕಿಂತ ಮುಂದೆ ಕೆಸರು ಮತ್ತು ಅವಶೇಷಗಳು ಇರುವುದರಿಂದ ಹೋಗಲು ಸಾಧ್ಯವಾಗಿಲ್ಲ ಎಂದು ತಿಳಿದು ಬಂದಿದೆ.
“ಎನ್ಡಿಆರ್ಎಫ್, ಎಸ್ಡಿಆರ್ಎಫ್ ಮತ್ತು ರ್ಯಾಟ್ ಮೈನರ್ಸ್ ಒಳಗೊಂಡ 20 ಸದಸ್ಯರ ತಂಡ ಸುರಂಗದ ಕೊನೆಯ ಹಂತ ತಲುಪಲು ಸಾಧ್ಯವಾಗಿದೆ. ಆದರೆ, ಅಲ್ಲಿ ಬಹಳಷ್ಟು ಅವಶೇಷಗಳು ಇವೆ. ಅಲ್ಲಿಂದ ಹೇಗೆ ಮುಂದುವರಿಯಬೇಕೆಂದು ಯೋಚಿಸುತ್ತಿದ್ದಾರೆ” ಎಂದು ನಾಗರ್ಕರ್ನೂಲ್ ಪೊಲೀಸ್ ವರಿಷ್ಠಾಧಿಕಾರಿ ವೈಭವ್ ಗಾಯಕ್ವಾಡ್ ತಿಳಿಸಿದ್ದಾಗಿ ಸುದ್ದಿ ಸಂಸ್ಥೆ ಪಿಟಿಐ ಹೇಳಿದೆ.
“ನಿನ್ನೆ ರಕ್ಷಣಾ ತಂಡಗಳು ಸುರಂಗ ಕೊನೆಯಾಗುವ 40 ಮೀಟರ್ ದೂರಕ್ಕೆ ತಲುಪಿದ್ದರು. ಅಲ್ಲಿ ರಾತ್ರಿ ಹುಡುಕಾಟ ನಡೆಸಲಾಗಿದೆ ಏನು ಸಿಕ್ಕಿಲ್ಲ” ಎಂದು ಗಾಯಕ್ವಾಡ್ ಹೇಳಿದ್ದಾರೆ.
ಪ್ರಶ್ನೆಯೊಂದಕ್ಕೆ ಉತ್ತರಿಸಿದ ಅವರು, ಮಾದರಿಗಳನ್ನು ಸಂಗ್ರಹಿಸಿರುವ ಭಾರತೀಯ ಭೂವೈಜ್ಞಾನಿಕ ಸರ್ವೇಕ್ಷಣಾ ತಂಡವು ಮಣ್ಣಿನ ಬಲ ಮತ್ತು ಇತರ ವಿಷಯದ ಬಗ್ಗೆ ಇನ್ನೂ ವರದಿಗಳನ್ನು ಸಲ್ಲಿಸಿಲ್ಲ ಎಂದಿದ್ದಾರೆ.
ಕುಸಿದ ಎಸ್ಎಲ್ಬಿಸಿ ಸುರಂಗದ ರಕ್ಷಣಾ ಕಾರ್ಯದಲ್ಲಿ ಪ್ರಗತಿ ಸಾಧಿಸಲು ನಿರಂತರ ಪ್ರಯತ್ನಗಳನ್ನು ಮಾಡುತ್ತಿರುವ ಭಾರತೀಯ ಸೇನೆ, ನೌಕಾಪಡೆ, ಎನ್ಡಿಆರ್ಎಫ್, ಜಿಎಸ್ಐ ಮತ್ತು ಇತರ ಏಜೆನ್ಸಿಗಳ ಉನ್ನತ ತಜ್ಞರು, ಹೂಳು ಮತ್ತು ನೀರಿನ ನಿರಂತರ ಹರಿವಿನಿಂದ ರಕ್ಷಣಾ ಸಿಬ್ಬಂದಿಯ ಜೀವಕ್ಕೆ ಅಪಾಯವಿದ್ದು, ಆದರೂ, ಬುಧವಾರ ತಮ್ಮ ಕಾರ್ಯಾಚರಣೆಯನ್ನು ಮುಂದುವರಿಸಿದ್ದಾರೆ.
ಮಂಗಳವಾರ ಮಾಧ್ಯಮ ಪ್ರತಿನಿಧಿಗಳನ್ನುದ್ದೇಶಿಸಿ ಮಾತನಾಡಿದ ನೀರಾವರಿ ಸಚಿವ ಉತ್ತಮ್ ಕುಮಾರ್ ರೆಡ್ಡಿ, ಎಸ್ಎಲ್ಬಿಸಿ ಸುರಂಗಕ್ಕೆ ಒಂದೇ ಪ್ರವೇಶ ಮತ್ತು ನಿರ್ಗಮನ ಇರುವುದರಿಂದ ಇದು ವಿಶ್ವದ ಅಥವಾ ಕನಿಷ್ಠ ಭಾರತದಲ್ಲಿ ಅತ್ಯಂತ ಸಂಕೀರ್ಣ ಮತ್ತು ಕಷ್ಟಕರವಾದ ಸುರಂಗ ರಕ್ಷಣಾ ಕಾರ್ಯಾಚರಣೆ ಎಂಬುವುದಾಗಿ ತಜ್ಞರು ಬಣ್ಣಿಸಿದ್ದಾರೆ ಎಂದಿದ್ದರು.
ಸುರಂಗದೊಳಗೆ ಆಮ್ಲಜನಕವನ್ನು ನಿರಂತರವಾಗಿ ಪಂಪ್ ಮಾಡಲಾಗುತ್ತಿದೆಯಾದರೂ, ಸಿಲುಕಿರುವ ವ್ಯಕ್ತಿಗಳೊಂದಿಗೆ ಯಾವುದೇ ಸಂಪರ್ಕ ಸಾಧಿಸು ಸಾಧ್ಯವಾಗಿಲ್ಲ ಎಂದು ಸಚಿವರು ಹೇಳಿದ್ದಾರೆ.
ದೆಹಲಿ ಗಲಭೆಯ 120 ಪ್ರಕರಣಗಳಲ್ಲಿ ಶೇ. 80 ರಷ್ಟು ಆರೋಪಿಗಳು ಖುಲಾಸೆ: ವರದಿ
