ಕರ್ನಾಟಕ 2023ರಲ್ಲಿ ಕಂಡ ಅತ್ಯಂತ ಪ್ರಮುಖ ಬೆಳವಣಿಗೆ ಎಂದರೆ ವಿಧಾನಸಭಾ ಚುನಾವಣೆಯಲ್ಲಿ ಬಿಜೆಪಿ ಸೋತು ಕಾಂಗ್ರೆಸ್ ಅಧಿಕಾರ ಹಿಡಿದದ್ದು. 2019ರಿಂದ 2023ರವರೆಗಿನ ಬಿಜೆಪಿ ಸರಕಾರ ಕರ್ನಾಟಕ ಕಂಡ ಅತ್ಯಂತ ಕೆಟ್ಟ ಸರಕಾರಗಳ ಪೈಕಿ ಒಂದು ಎಂದು ತಿಳಿದಿದ್ದರೂ, ಕರ್ನಾಟಕದ ಜನ ಇದಕ್ಕಿಂತ ಎಷ್ಟೋ ಪಾಲು ಉತ್ತಮ ಎಂದು ಪರಿಗಣಿಸಲಾದ ಸರಕಾರಗಳಿಗೆ ಕೂಡ ಸತತ ಎರಡನೇ ಅವಕಾಶ ನೀಡಿಲ್ಲ ಎಂದು ತಿಳಿದಿದ್ದರೂ, ಬಿಜೆಪಿ ಏನೋ ಮೋಡಿ ಮಾಡಿ ಗೆದ್ದುಬಿಡಬಹುದು ಎನ್ನುವ ನಿರೀಕ್ಷೆಯೊಂದು ಬಹುತೇಕ ಜನರಿಗೆ ಇತ್ತು. ಬಿಜೆಪಿಗೆ ಪ್ರಧಾನ ಮಂತ್ರಿ ನರೇಂದ್ರ ಮೋದಿಯ ವರ್ಚಸ್ಸಿತ್ತು, ಮನಸೋ ಇಚ್ಛೆ ಚೆಲ್ಲಬಹುದಾದಷ್ಟು ಹಣವಿತ್ತು, ಇಪ್ಪತ್ತನಾಲ್ಕು ಗಂಟೆಯೂ ಸಕ್ರಿಯವಾಗಿರುವ ತಳಮಟ್ಟದ ಕಾರ್ಯಕರ್ತರ ಪಡೆ, ಡಿಜಿಟಲ್ ಮಟ್ಟದ ಕೀಲಾಲು (ಟ್ರೋಲ್) ಪಡೆ ಇತ್ತು. ಹಾಗಾಗಿ ಮೇಲಿನ ಮೂರೂ ರೀತಿಯ ಅನುಕೂಲಗಳೇನೂ ಇಲ್ಲದ, ಇದ್ದರೂ ಬಿಜೆಪಿಗಿದ್ದಷ್ಟು ಇಲ್ಲದ ಕಾಂಗ್ರೆಸ್ ಬಿಜೆಪಿಯ ದೈತ್ಯ ಶಕ್ತಿಯೆದುರು ಗೆಲ್ಲುವ ಬಗ್ಗೆ, ಗೆದ್ದರೂ ನಿರ್ಣಾಯಕವಾಗಿ ಗೆಲ್ಲುವ ಬಗ್ಗೆ, ಯಾರಿಗೂ ಭರವಸೆ ಇರಲಿಲ್ಲ. ಆದರೆ, ಕಾಂಗ್ರೆಸ್ ಗೆದ್ದಿತು. ಗೆದ್ದದ್ದು ಮಾತ್ರವಲ್ಲ ನಿರ್ಣಾಯಕವಾಗಿ ಗೆದ್ದಿತು. ಬಿಜೆಪಿ ಸೋತಿತು? ಸ್ಥಾನಗಳ ಸಂಖ್ಯೆಯನ್ನು ಪರಿಗಣಿಸಿದರೆ ಬಿಜೆಪಿ ನಿರ್ಣಾಯಕವಾಗಿ ಸೋತಿತು. ಆದರೆ ಅದು ಪಡೆದ ಮತಗಳ ಪ್ರಮಾಣವನ್ನು ಪರಿಗಣಿಸಿದರೆ ಬಿಜೆಪಿ ಸೋಲಲಿಲ್ಲ. ಅರ್ಥಾತ್ 2018ರಲ್ಲಿ ಅದು ಪಡೆದ ಪ್ರತಿಶತ ಮತಗಳನ್ನು, 2023ರಲ್ಲೂ ಉಳಿಸಿಕೊಂಡಿತ್ತು. ಹಾಗಾಗಿ ಕಾಂಗ್ರೆಸ್ಸು ಗೆಲುವಿನ ಸಂಭ್ರಮದಲ್ಲೂ ಚಿಂತೆ ಪಡಬೇಕಿತ್ತು, ಬಿಜೆಪಿಗೆ ಸೋಲಿನ ಚಿಂತೆಯಲ್ಲೂ ನೆಮ್ಮದಿಯ ನಿಟ್ಟುಸಿರು ಬಿಡುವ ಸಂದರ್ಭ ಒದಗಿತು. ಇನ್ನು ಚುನಾವಣೆಯಲ್ಲಿ ಕೇವಲ 19 ಸ್ಥಾನಗಳನ್ನು ಗೆದ್ದು ಹೆಚ್ಚುಕಡಿಮೆ ಅಸ್ತಿತ್ವವನ್ನೇ ಕಳೆದುಕೊಳ್ಳುವ ಹಂತ ತಲುಪಿ ಒಂದು ಕಾಲದ ರಾಜಕೀಯ ಶತ್ರು ಬಿಜೆಪಿಗೆ ತ್ರಿಕರಣಪೂರ್ವಕ ಶರಣಾಗಿರುವ ಜೆಡಿಎಸ್ ಎಂಬ ಮಧ್ಯವರ್ತಿ ಪಕ್ಷದ ವಿಚಾರವಾಗಿ ಹೇಳುವುದಕ್ಕೇನೂ ಉಳಿದಿಲ್ಲ.
ಚುನಾವಣೆಯೇ ವರ್ಷದ ನಿರ್ಣಾಯಕ ಘಟನೆಯಾಗಿತ್ತು ಎನ್ನುವ ಕಾರಣಕ್ಕೆ ಇಡೀ ವರ್ಷದಲ್ಲಿ ಏನಾಯಿತು ಎನ್ನುವುದನ್ನು ಹೇಳಲು ಚುನಾವಣೆಯ ನಂತರದ ಏಳು ತಿಂಗಳುಗಳಲ್ಲಿ ಆಗಿಹೋದ ಬೆಳವಣಿಗೆಗಳೇ ಪ್ರಮುಖವಾಗುತ್ತವೆ. ಚುನಾವಣೆಗೆ ಹಿಂದಿನ ಐದು ತಿಂಗಳುಗಳು ಕಂಡದ್ದು ಕೇವಲ ಚುನಾವಣಾ ತಯಾರಿಯನ್ನಷ್ಟೇ. ಹಾಗಾಗಿ ಚುನಾವಣಾ ನಂತರದ ಕತೆ ಹೇಳಿದರೆ ಅದು ಇಡೀ ವರ್ಷದ ಕತೆಯೂ ಆಗುತ್ತದೆ ಮತ್ತು ಅದು ವಿಚಿತ್ರವಾದ ವಿಪರ್ಯಾಸಗಳಿಂದ ಕೂಡಿದ ಕತೆಯೂ ಆಗಿದೆ.
ಮೊದಲನೆಯದಾಗಿ ಸೋತ ಬಿಜೆಪಿಗೆ ಸೋಲಿನಲ್ಲೂ ನಗೆ ಬೀರಬಲ್ಲಷ್ಟು ಶೇಕಡಾವಾರು ಮತಗಳು ದೊರೆತಿದ್ದರೂ, ವಿಶೇಷವಾಗಿ ಅಸ್ತಿತ್ವವೇ ಇಲ್ಲದಿದ್ದ ದಕ್ಷಿಣ ಕರ್ನಾಟಕದ ಕೆಲ ಭಾಗಗಳಲ್ಲಿ ಅದು ತನ್ನ ಪರವಾದ ಮತಗಳನ್ನು ಹೆಚ್ಚಿಸಿಕೊಂಡಿದ್ದರೂ, ಚುನಾವಣೆಯ ಫಲಿತಾಂಶ ಬಂದ ನಂತರದ ದಿನಗಳಲ್ಲಿ ಅದು ಚಿತ್ರವಿಚಿತ್ರವಾಗಿ ವರ್ತಿಸಲಾರಂಭಿಸಿತು. ಎಷ್ಟರಮಟ್ಟಿಗೆ ಎಂದರೆ ಸೋತವರ ಮುಖ ಕೂಡಾ ನೋಡಲಾರೆ ಎಂಬಂತೆ ಆ ಪಕ್ಷದ ಹೈಕಮಾಂಡ್ ರಾಜ್ಯದಲ್ಲಿ ವಿಧಾನಸಭೆಯ ವಿರೋಧ ಪಕ್ಷದ ನಾಯಕನನ್ನು ಆರಿಸುವ ಕನಿಷ್ಠ ಜವಾಬ್ದಾರಿಯನ್ನು ಮುಂದೂಡುತ್ತಾ ಹೋಯಿತು. ವಿಧಾನಸಭೆಯ ಮೊದಲ ಅಧಿವೇಶನ ಮತ್ತು ಬಜೆಟ್ ಅಧಿವೇಶನ ವಿರೋಧ ಪಕ್ಷದ ನಾಯಕನಿಲ್ಲದ ಸ್ಥಿತಿಯಲ್ಲೇ ನಡೆದುಹೋದದ್ದು ಕರ್ನಾಟಕ ಮಾತ್ರವಲ್ಲ ಇಡೀ ದೇಶದಲ್ಲೇ ಮೊದಲಿರಬೇಕು. ಕೊನೆಗೂ ಫಲಿತಾಂಶ ಬಂದು ಆರು ತಿಂಗಳ ನಂತರ ನವೆಂಬರ 17ರಂದು ವಿರೋಧಪಕ್ಷದ ನಾಯಕನ ಆಯ್ಕೆ ಆಯಿತು. ಅದೇ ರೀತಿಯಲ್ಲಿ ಚುನಾವಣೆಗೆ ಮೊದಲೇ ಆಗಬೇಕಿದ್ದ ರಾಜ್ಯ ಬಿಜೆಪಿ ಅಧ್ಯಕ್ಷರ ಆಯ್ಕೆಯೂ, ಚುನಾವಣೆ ನಡೆದು ಆರು ತಿಂಗಳ ನಂತರ ಈಗ ಆಗಿದೆ. ಆ ಪಕ್ಷದೊಳಗಣ ಯಾವ ವಿದ್ಯಮಾನಗಳಿಂದಾಗಿ ಇಂತಹ ಮೂಲಭೂತ ನಿರ್ಣಯಗಳು ಆಗಲು ಅಷ್ಟೊಂದು ತಡವಾಯಿತು ಅಂತ ಈಗಲೂ ಯಾರಿಗೂ ಗೊತ್ತಿಲ್ಲ. ಕರ್ನಾಟಕದಲ್ಲಿ ರಾಜಕೀಯ ಪತ್ರಿಕೋದ್ಯಮ ಎನ್ನುವುದು ಹೆಚ್ಚು ಕಡಿಮೆ ಸತ್ತೇ ಹೋಗಿರುವುದರಿಂದ ಇಂತಹ ಪ್ರಮುಖ ವಿಷಯಗಳ ಬಗ್ಗೆ ಈಗ ಜನರಿಗೆ ವಸ್ತುನಿಷ್ಠ ವಿಚಾರಗಳು ಬಿಡಿ, ಊಹಾತ್ಮಕ ವಿವರಣೆಗಳೂ ಲಭಿಸದ ಸ್ಥಿತಿ ನಿರ್ಮಾಣವಾಗಿದೆ. ಅದೇನೇ ಇರಲಿ, ಮತ್ತೆ ಬಿಜೆಪಿಯ ವಿಷಯಕ್ಕೆ ಬರುವುದಾದರೆ, ವಿರೋಧ ಪಕ್ಷದ ನಾಯಕ ಮತ್ತು ರಾಜ್ಯ ಅಧ್ಯಕ್ಷರ ಆಯ್ಕೆ ಘೋಷಣೆ ಯಾವಾಗ ಆಯಿತೋ ಅಂದಿನಿಂದ ಬಿಜೆಪಿ ಪರವಾಗಿರುವ ಕರ್ನಾಟಕದ ಮಾಧ್ಯಮಗಳೆಲ್ಲ, ಇನ್ನೇನು ಕರ್ನಾಟಕದಲ್ಲಿ ಬಿಜೆಪಿ 2024ರ ಲೋಕಸಭಾ ಚುನಾವಣೆ ಮಾತ್ರವಲ್ಲ ಬಹುದೂರದ 2028ರ ವಿಧಾನಸಭಾ ಚುನಾವಣೆಯನ್ನೂ ಗೆದ್ದಾಯಿತು ಎನ್ನುವ ರೀತಿಯ ಲಹರಿ ವರದಿಗಾರಿಕೆಯಲ್ಲಿ ತೊಡಗಿದರೆ, ಬಿಜೆಪಿಯೊಳಗಿಂದ ಎರಡೂ ಆಯ್ಕೆಗಳ ಬಗ್ಗೆ ಭಿನ್ನ ರಾಗಗಳು ಕೇಳಿ ಬರತೊಡಗಿದವು. ಅದು ಸಣ್ಣಗೆ ತಣ್ಣಗೆ ಎಲ್ಲಾ ಆಯ್ಕೆಗಳ ವಿಚಾರಗಳಲ್ಲೂ ಕೇಳಿಬರುವ ಅಪಶ್ರುತಿಯಲ್ಲ. ಬದಲಿಗೆ ಬೀದಿಬೀದಿಗಳಲ್ಲಿ ನಿಂತು ಕೆಲ ರಾಜ್ಯ ಬಿಜೆಪಿ ನಾಯಕರು ಪ್ರಪಂಚದ ಅತ್ಯಂತ ಬಲಿಷ್ಠ ಪಕ್ಷದ ಅತ್ಯಂತ ಬಲಿಷ್ಠ ಹೈಕಮಾಂಡ್‌ನ ಆಯ್ಕೆಯನ್ನು ಅಕ್ಷರಶಃ ಗೇಲಿ ಮಾಡುವುದಕ್ಕೆ ಆರಂಭಿಸಿದರು. ಮೊದಲಿಗೆ ವಿರೋಧ ಪಕ್ಷದ ನಾಯಕನ ಆಯ್ಕೆ ಇಷ್ಟೊಂದು ವಿಳಂಬವಾದದ್ದೇ ಒಂದು ವಿಚಿತ್ರ ಬೆಳವಣಿಗೆಯಾದರೆ, ಇನ್ನೊಂದೆಡೆ ವಿರೋಧ ಪಕ್ಷದ ನಾಯಕ ಮತ್ತು ರಾಜ್ಯಾಧ್ಯಕ್ಷರ ಹುದ್ದೆಗಳಿಗೆ ನಡೆದ ಆಯ್ಕೆಯ ಬಗ್ಗೆ ಈ ಮಟ್ಟದ ಭಿನ್ನಮತ ಈತನಕ ಯಾವುದೇ ರಾಜ್ಯದ ಯಾವುದೇ ಪಕ್ಷದಲ್ಲೂ ಕೇಳಿದ ನಿದರ್ಶನಗಳು ಕಡಿಮೆ ಅಥವಾ ಇಲ್ಲವೇ ಇಲ್ಲ ಎನ್ನಬಹುದು. ಬಿಜೆಪಿಯಂತಹ ’ಶಿಸ್ತಿನ’ ಪಕ್ಷದಲ್ಲಿ, ಹೈಕಮಾಂಡ್ ಮರ್ಜಿಯಲ್ಲಿರುವ ಪಕ್ಷದಲ್ಲಿ ಹೀಗೆಲ್ಲಾ ಆಗುವುದಕ್ಕೆ ಕರ್ನಾಟಕ 2023ರಲ್ಲಿ ಸಾಕ್ಷಿಯಾಯಿತು ಎನ್ನುವುದು ವಿಚಿತ್ರ ಬೆಳವಣಿಗೆಯೇನೋ ಸರಿ. ಆದರೆ ಈ ಬೆಳವಣಿಗೆಗಳನ್ನು ವಿಪರ್ಯಾಸಕರ ಅಂತ ಮೇಲೆ ಹೇಳಿದ್ದು ಇವಿಷ್ಟೇ ಕಾರಣಗಳಿಗೆ ಅಲ್ಲ. ಅದು ಬೇರೆಯೇ ಇದೆ.
ಚುನಾವಣಾ ಫಲಿತಾಂಶ ಬಂದು ಅರ್ಧ ವರ್ಷದ ತನಕ ವಿರೋಧ ಪಕ್ಷದ ನಾಯಕನಿಲ್ಲದೆ ಇದ್ದದ್ದು, ದಿನಾ ಬೆಳಗಾದರೆ ಪ್ರಮುಖ ವಿರೋಧ ಪಕ್ಷವಾದ ಬಿಜೆಪಿಯಲ್ಲಿ ಯಾರೋ ಒಬ್ಬ ಮುಖಂಡ ಅವರದ್ದೇ ಪಕ್ಷದ ಇತರ ನಾಯಕರ ಮೇಲೆ ಮುಗಿಬೀಳುತ್ತಿದ್ದುದು, ಪಕ್ಷ ಬಿಟ್ಟು ಹೋಗುವುದು ಇತ್ಯಾದಿ ಇತ್ಯಾದಿ ಬೆಳವಣಿಗೆಗಳು ನಡೆಯುತ್ತಲೇ ಇದ್ದರೂ, ಕರ್ನಾಟಕ ರಾಜ್ಯವು ಸಂದ ಆರು ತಿಂಗಳಲ್ಲಿ ಕಂಡದ್ದು ಅತ್ಯಂತ ಬಲಿಷ್ಠವಾದ ವಿರೋಧ ಪಕ್ಷವನ್ನು. ವಿಪರ್ಯಾಸ ಇರುವುದು ಇಲ್ಲಿ. ಒಂದೆಡೆ ಆಂತರಿಕವಾಗಿ ಜರ್ಜರಿತವಾಗಿರುತ್ತಲೇ ಇನ್ನೊಂದೆಡೆ ವಿರೋಧ ಪಕ್ಷವೊಂದು ಆಳುವ ಪಕ್ಷವನ್ನು ಸರಕಾರ ರಚಿಸಿದ ಮೊದಲ ದಿನದಿಂದಲೂ ತುದಿಗಾಲಲ್ಲಿ ನಿಲ್ಲುವಂತೆ ಮಾಡಿದ ಅಪೂರ್ವ ವಿದ್ಯಮಾನಕ್ಕೂ 2023ರ ಕರ್ನಾಟಕ ರಾಜಕೀಯ ಸಾಕ್ಷಿಯಾಯಿತು. ವಿಧಾನಸಭೆಯಲ್ಲಿ ವಿರೋಧ ಪಕ್ಷದ ನಾಯಕನ ಸ್ಥಾನ ಖಾಲಿ ಇದ್ದರೂ ಬಿಜೆಪಿಯ ಒಬ್ಬೊಬ್ಬ ಶಾಸಕನೂ ತಾನೇ ವಿರೋಧ ಪಕ್ಷದ ನಾಯಕ ಎಂಬಂತೆ ದಿನದಿನವೂ ಸರಕಾರದ ಮೇಲೆ ಮುಗಿಬೀಳುತಿದ್ದರು. ಇದು ಯಾವ ಹಂತ ತಲುಪಿತ್ತು ಎಂದರೆ, ಹೊಸ ಸರಕಾರ ಇನ್ನೂ ಪ್ರಮಾಣವಚನ ಸ್ವೀಕರಿಸಿದ ಚಪ್ಪರದ ಕಂಬಗಳನ್ನು ಕೀಳುವ ಮೊದಲೇ ಬಿಜೆಪಿಯ ಕೆಲವು ಶಾಸಕರು ಹೊಸ ’ಆಪರೇಷನ್ ಕಮಲ’ ನಡೆಸಿ ಸರಕಾರವನ್ನು ಉರುಳಿಸುವ ಬಗ್ಗೆ ಹೇಳಿಕೆ ನೀಡುತ್ತಿದ್ದರು. ಅದು ಗಂಭೀರ ಎನ್ನುವಂತೆ ಮಾಧ್ಯಮಗಳೂ ಬರೆಯುತ್ತಿದ್ದವು. ಹೆಚ್ಚುಕಡಿಮೆ ಮೂರನೇ ಎರಡರಷ್ಟು ಬಹುಮತ ಹೊಂದಿದ ಒಂದು ಪಕ್ಷದ ಸರಕಾರವನ್ನು ಉರುಳಿಸುವ ಮಾತುಗಳು ಈಗಲೂ ಕೇಳಿಬರುತ್ತಿವೆ. ಜನತಾದಳ ಬಿಜೆಪಿಗೆ ಶರಣಾಗಿ ಮಿತ್ರತ್ವವನ್ನು ಒಪ್ಪಿಕೊಂಡದ್ದು ಸರಕಾರದ ಅನಿಶ್ಚಿತ ಭವಿಷ್ಯದ ಕುರಿತಾದ ಹೇಳಿಕೆಗಳಿಗೆ ಇನ್ನಷ್ಟೂ ಬಲನೀಡಿದೆ.
ಬಿಜೆಪಿಯೊಳಗೆ ಅಷ್ಟೊಂದು ತಳಮಳಗಳಿದ್ದರೂ, ಆ ಪಕ್ಷದ ನಾಯಕರುಗಳು ಆಳುವ ಕಾಂಗ್ರೆಸ್ ಪಕ್ಷದೊಳಗಣ ಸಣ್ಣಪುಟ್ಟ ಭಿನ್ನಾಭಿಪ್ರಾಯಗಳನ್ನು ದೊಡ್ಡದು ಮಾಡಿ, ಅದರ ಮುಂದೆ ತಮ್ಮ ಪಕ್ಷದ ಭಿನ್ನಮತ ಏನೇನೂ ಅಲ್ಲ ಎಂಬಂತೆ ತೋರಿಸುವಲ್ಲಿ ಯಶಸ್ವಿಯಾಗಿದ್ದರು. ಬಿಜೆಪಿಯ ಸಹಕಾರಕ್ಕೆಂದೇ ಮುಡಿಪಾಗಿರುವ ಕರ್ನಾಟಕದ ಬಹುತೇಕ ಮಾಧ್ಯಮಗಳು ಈ ಕೆಲಸದಲ್ಲಿ ಬಿಜೆಪಿಯ ನಾಯಕರಿಗೆ ಯಥಾಶಕ್ತಿ ನೆರವಾಗುತ್ತಿದ್ದರೆ ಬಿಜೆಪಿಯ ತಟ್ಟೆಯ ಹೆಗ್ಗಣಕ್ಕಿಂತ ಹೆಚ್ಚಾಗಿ ಕಾಂಗ್ರೆಸ್ ತಟ್ಟೆಯ ನೊಣವೇ ಸಾರ್ವಜನಿಕವಾಗಿ ಪ್ರದರ್ಶನ ಆಗುತಿತ್ತು. ಕಾಂಗ್ರೆಸ್ ಸರಕಾರದ ಬತ್ತಳಿಕೆಯಲ್ಲಿದ್ದ ಏಕೈಕ ಅಸ್ತ್ರವಾಗಿರುವ ಗ್ಯಾರಂಟೀ ಯೋಜನೆಗಳಿಂದಾಗಿ ರಾಜ್ಯ ಬರ್ಬಾದ್ ಆಗಿ ಹೋಯಿತು ಎನ್ನುವ ಕಥನವೊಂದನ್ನು ಕಟ್ಟಿ, ಅದನ್ನು ಸ್ವತಃ ಗ್ಯಾರಂಟೀ ಯೋಜನೆಯ ಫಲಾನುಭವಿಗಳೇ ನಂಬುವಂತೆ ಮಾಡುವಲ್ಲಿ ಕೂಡಾ ಜರ್ಜರಿತ ಬಿಜೆಪಿ ಯಶಸ್ವಿಯಾಯಿತು. ವಿಪರ್ಯಾಸವೆಂದರೆ, ಸ್ವತಃ ಕಾಂಗ್ರೆಸ್ಸಿನ ಶಾಸಕರೇ ತಿಳಿದೋ ತಿಳಿಯದೆಯೋ ಬಿಜೆಪಿಯ ಈ ಮಹಾನ್ ಕಾರ್ಯಕ್ಕೆ ನೆರವಾಗುತ್ತಿದ್ದದ್ದು. ಗ್ಯಾರಂಟೀ ಯೋಜನೆಗಳನ್ನು ಸಮರ್ಥಿಸಿಕೊಳ್ಳಬೇಕಿದ್ದ ಕಾಂಗ್ರೆಸ್ ಶಾಸಕರೇ ಅಲ್ಲಲ್ಲಿ ಯೋಜನೆಗಳ ಬಗ್ಗೆ ಸಂಶಯ ವ್ಯಕ್ತಪಡಿಸಿದ್ದು, ನಮ್ಮ ಕ್ಷೇತ್ರಗಳಿಗೆ ಅಭಿವೃದ್ಧಿ ಹಣ ಬರುತ್ತಿಲ್ಲ ಅಂತ ಸಾರ್ವಜನಿಕವಾಗಿ ಹೇಳುತ್ತಿದ್ದದ್ದು ಇವೆಲ್ಲವೂ ಬಿಜೆಪಿಗೆ ಇನ್ನೂ ಕಣ್ಣು ಬಿಡುತ್ತಿರುವ ಹಂತದ ಸರಕಾರದ ಮೇಲೆ ಎರಗಲು ಬೇಕಾದ ಪರಿಕರಗಳನ್ನು ಒದಗಿಸುತ್ತಿದ್ದವು. ಸಾಮಾನ್ಯವಾಗಿ ಹೊಸ ಸರಕಾರವೊಂದು ಅಸ್ತಿತ್ವಕ್ಕೆ ಬಂದ ನಂತರ ಸ್ವಲ್ಪ ಸಮಯ ವಿರೋಧ ಪಕ್ಷಗಳು ಹೆಚ್ಚುಕಡಿಮೆ ಸುಮ್ಮನಿದ್ದು ಎಲ್ಲವನ್ನೂ ಅವಲೋಕಿಸಿ ಒಂದು ಹಂತದ ನಂತರ ಸರಕಾರ ಮೇಲೆ ಮುಗಿಬೀಳುವುದು ಈ ತನಕ ನಡೆದುಕೊಂಡು ಬಂದ ಅಲಿಖಿತ ಸಂಪ್ರದಾಯ. ಇದನ್ನು ಸಂಪೂರ್ಣವಾಗಿ ಮುರಿದು ಶೈಶವಾವಸ್ಥೆಯಲ್ಲಿರುವ ಕಾಂಗ್ರೆಸ್ ಸರಕಾರದ ಮೇಲೆ ವಿರೋಧ ಪಕ್ಷವಾದ ಬಿಜೆಪಿ ಅಭೂತಪೂರ್ವ ಪ್ರಹಾರಕ್ಕಿಳಿದದ್ದು, ಕರ್ನಾಟಕದ ರಾಜಕೀಯದಲ್ಲಿ 2023ರ ಇಸವಿಯ ಪ್ರಮುಖ ಬೆಳವಣಿಗೆ. ಅದು ಕೂಡಾ ಬಿಜೆಪಿಯ ಸ್ಥಿತಿ ಮೂರಾಬಟ್ಟೆಯಾಗಿರುವ ಹೊತ್ತಿನಲ್ಲಿ.
ಇನ್ನೊಂದೆಡೆ ಚುನಾವಣಾನಂತರದ ಇಡೀ ವರ್ಷ ಕಾಂಗ್ರೆಸ್ ನಡೆದುಕೊಂಡ ರೀತಿಯೂ ವಿಚಿತ್ರವಾಗಿಯೂ ವಿಪರ್ಯಾಸಕರವಾಗಿಯೂ ಇತ್ತು. ಕಾಂಗ್ರೆಸ್ಸಿನ ಚುನಾವಣಾ ಯಶಸ್ಸಿಗೆ ಕಾರಣವಾಗಿದ್ದು ಮುಖ್ಯವಾಗಿ ಎರಡು ರೀತಿಯ ಮತಗಳ ಕ್ರೋಢೀಕರಣ. ಮೊದಲನೆಯದ್ದು ಕೇಂದ್ರದ ಬಿಜೆಪಿ ಸರಕಾರದ ಮತ್ತು ಕರ್ನಾಟಕದ ಹಿಂದಿನ ಬಿಜೆಪಿ ಸರಕಾರದ ಆಡಳಿತದಲ್ಲಿ ಜನರ ಆರ್ಥಿಕ ಸ್ಥಿತಿಗತಿಗಳು ತೀರಾ ಹದಗೆಟ್ಟು ಚುನಾವಣೆಯ ಹೊತ್ತಿಗೆ ರಾಜ್ಯದ ಬಡ ಮತ್ತು ಕೆಳಮಧ್ಯಮ ವರ್ಗದ ಮತದಾರರು, ಅದರಲ್ಲೂ ಮುಖ್ಯವಾಗಿ ದಲಿತ ಮತ್ತು ತೀರಾ ಹಿಂದುಳಿದ ವರ್ಗಗಳಿಗೆ ಸೇರಿದ ಮತದಾರರು (ಬಡತನ ಈ ವರ್ಗಗಳ ನಡುವೆ ಹೆಚ್ಚಿದೆ ಎನ್ನುವ ಕಾರಣಕ್ಕೆ), ತಮ್ಮ ದೈನಂದಿನ ಬದುಕನ್ನು ನಿಭಾಯಿಸಲಾಗದೆ ರೋಸಿಹೋಗಿದ್ದರು. ಹಾಗಾಗಿ ಎಲ್ಲ ಸಮುದಾಯಗಳ ಬಡ ಮತ್ತು ಕೆಳಮಧ್ಯಮವರ್ಗದ ಮತದಾರರು ಬಿಜೆಪಿಯ ಕೋಮುವಾದೀ ಪ್ರಚಾರವನ್ನು ಕಡೆಗಣಿಸಿ ಕಾಂಗ್ರೆಸ್ಸಿಗೆ ಮತ ಹಾಕಿದರು. ಕಾಂಗ್ರೆಸ್ ಬಡವರ ಪರ ಮಾತನಾಡಿದ್ದು ಮತ್ತು ಗ್ಯಾರಂಟಿಗಳನ್ನು ಘೋಷಿಸಿದ್ದು ಕಾಂಗ್ರೆಸ್ ತಮ್ಮ ಪರವಾಗಿದೆ ಎನ್ನುವ ಭಾವನೆ ಮೂಡಿಸಿತ್ತು. ಹಾಗಾಗಿ, ಚುನಾವಣೆಯ ನಂತರ ಕಾಂಗ್ರೆಸ್ಸಿಗರು ಒಟ್ಟಾಗಿ ಗ್ಯಾರಂಟಿಗಳ ಪರವಾಗಿ ಮಾತನಾಡಬೇಕಿತ್ತು. ಗ್ಯಾರಂಟೀ ಯೋಜನೆಗಳ ಬಗ್ಗೆ ಯಾವುದೇ ರೀತಿಯ ಅಪಪ್ರಚಾರಕ್ಕೆ ಎಡೆ ಮಾಡಿಕೊಡಬಹುದಾದ ಹೇಳಿಕೆಗಳಿಂದ ದೂರ ಇರಬೇಕಿತ್ತು. ಜತೆಗೆ ಸರಕಾರ ಕೂಡಾ ಗ್ಯಾರಂಟಿಗಳು ಏನಿದ್ದರೂ ತತ್‌ಕ್ಷಣ ಬಡವರ ನೆರವಿಗೆಂದು ಘೋಷಿಸಿದ ಯೋಜನೆಗಳು, ದೂರಗಾಮಿಯಾಗಿ ಕರ್ನಾಟಕಕ್ಕೆ ತಮ್ಮ ಕನಸುಗಳು ಬೇರೆಯೇ ಇವೆ ಎನ್ನುವ ರೀತಿಯಲ್ಲಿ ಭರವಸೆಯ ರಾಜಕೀಯ ಮಾಡುವ ಅಗತ್ಯವಿತ್ತು. ಆದರೆ ಕಾಂಗ್ರೆಸ್‌ನ ಒಳಗಿಂದಲೇ ಗ್ಯಾರಂಟಿಗಳ ಬಗ್ಗೆ ಪ್ರತ್ಯಕ್ಷ ಮತ್ತು ಪರೋಕ್ಷವಾದ ಅಪಸ್ವರಗಳು ಎದ್ದದ್ದು ಕಾಂಗ್ರೆಸ್ಸಿಗರಿಗೆ ತಾವು ಯಾವ ಕಾರಣಕ್ಕೆ ಗೆದ್ದದ್ದು ಎನ್ನುವ ಪ್ರಾಥಮಿಕಪಾಠವೂ ಗೆಲ್ಲುತ್ತಲೇ ಮರೆತುಹೋಯಿತು ಎನ್ನುವುದನ್ನು ತೋರಿಸುತ್ತದೆ. ಕಾಂಗ್ರೆಸ್ ಗೆಲ್ಲಲು ಇನ್ನೊಂದು ಕಾರಣ ರಾಜ್ಯದಲ್ಲಿ ಮುಸ್ಲಿಂ ಮತದಾರರು ಒಟ್ಟಾಗಿ ಬಿಜೆಪಿಯ ವಿರುದ್ಧ ಮತ ಹಾಕಿದ್ದು. ಹಿಂದಿನ ಬಿಜೆಪಿ ಸರಕಾರ ಅನುಸರಿಸಿದ್ದ ವಿವಿಧ ರೀತಿಯ ಭಯಾನಕ ಧ್ರುವೀಕರಣ ನೀತಿಗಳಿಂದಾಗಿ ಮುಸ್ಲಿಂ ಮತದಾರರು ಇನ್ನಿಲ್ಲ ಎಂಬಂತೆ ಕಂಗೆಟ್ಟುಹೋಗಿದ್ದರಿಂದಾಗಿ ಅವರೆಲ್ಲಾ ಈ ಬಾರಿ ಹಿಂದಿಗಿಂತ ಹೆಚ್ಚು ಒಟ್ಟಾಗಿದ್ದರು. ಆದಕಾರಣ ಕಾಂಗ್ರೆಸ್ ಅಧಿಕಾರಕ್ಕೆ ಬರುತ್ತಲೇ ಅದರ ನಡೆ ನುಡಿ ರಾಜ್ಯದ ಅಲ್ಪಸಂಖ್ಯಾತ ಮತದಾರರಲ್ಲಿ ಭರವಸೆ ಹುಟ್ಟಿಸುವ ರೀತಿಯಲ್ಲಿ ಇರಬೇಕಿತ್ತು. ಆದರೆ ವರ್ಷ ಕೊನೆಯಾಗುವವರೆಗೂ ಕಾಂಗ್ರೆಸ್ ಈ ಕುರಿತಂತೆ ಖಡಾಖಂಡಿತ ಎಂಬಂತೆ ಏನನ್ನೂ ಹೇಳಿದ್ದೂ ಇಲ್ಲ, ಮಾಡಿದ್ದೂ ಇಲ್ಲ. ಕರಾವಳಿ ಕರ್ನಾಟಕದಲ್ಲಿ ಎಂದಿನಂತೆ ಅನೈತಿಕ ಪೊಲೀಸ್‌ಗಿರಿ ಮುಂದುವರಿದಿದೆ. ಅದರ ವಿರುದ್ಧ ಕ್ರಮ ಕೈಗೊಳ್ಳಲು ಒಂದು ವಿಶೇಷ ಪೊಲೀಸ್ ಪಡೆ ನೇಮಿಸಿದ್ದೇನೋ ಆಯಿತು. ಈಗ ಅದರ ಸುದ್ದಿಯೇ ಇಲ್ಲ. ಏನಿದ್ದರೂ, ಕರಾವಳಿ ಕರ್ನಾಟಕದಲ್ಲಿ ವ್ಯಾಪಿಸಿರುವುದು ಪೊಲೀಸರು ಮಾತ್ರ ಪರಿಹರಿಸಬಲ್ಲ ಪಿಡುಗಲ ಎನ್ನುವ ಕನಿಷ್ಠ ಅರಿವಾದರೂ ಸರಕಾರಕ್ಕೆ ಇದೆ ಅಂತ ಇನ್ನೂ ಅನ್ನಿಸುತ್ತಿಲ್ಲ. ಹಮಾಸ್ ನಿರ್ನಾಮದ ಹೆಸರಿನಲ್ಲಿ ಇಸ್ರೇಲ್ ಪಾಲೆಸ್ತೀನ್ ದೇಶದ ನಾಗರಿಕರ ಮೇಲೆ ಕ್ರೂರ ಯುದ್ಧ ಹೂಡಿರುವ ಸಂದರ್ಭದಲ್ಲಿ ಪ್ಯಾಲೆಸ್ತೀನ್ ನಾಗರಿಕರ ಪರವಾಗಿ ಕರ್ನಾಟಕದಲ್ಲಿ ಶಾಂತಿಯುತವಾದ ಸದ್ಭಾವನಾ ಸಭೆಗಳನ್ನು ಮಾಡಲು ಕೂಡಾ ಆರಂಭದಲ್ಲಿ ಅನುಮತಿ ನಿರಾಕರಿಸುವ ಮೂಲಕ ಕಾಂಗ್ರೆಸ್ ಸರಕಾರ ಎಡಬಿಡಂಗಿ ನೀತಿ ಪ್ರದರ್ಶಿಸಿತು. ಒಟ್ಟಿನಲ್ಲಿ, 2023ರ ಕರ್ನಾಟಕದ ರಾಜಕೀಯವನ್ನು ಅವಲೋಕಿಸಿದರೆ ಸ್ಪಷ್ಟವಾಗುವುದು ಇಷ್ಟು: ಬಿಜೆಪಿ ಸೋತ ನಂತರವೂ ವರ್ಷದುದ್ದಕ್ಕೂ ತನಗೆ ಮತ ಹಾಕಿದವರು ಯಾರು ಎನ್ನುವುದನ್ನು ಗಮನದಲ್ಲಿಟ್ಟುಕೊಂಡೇ ರಾಜಕೀಯ ಮಾಡುತ್ತಿದೆ. ಕಾಂಗ್ರೆಸ್ ಗೆದ್ದ ನಂತರ ತನ್ನನ್ನು ಗೆಲ್ಲಿಸಿದವರು ಯಾರು ಮತ್ತು ಯಾಕೆ ಎನ್ನುವುದನ್ನು ಮರೆತು ಆಡಳಿತ ಮಾಡುತ್ತಿದೆ.
ಎ ನಾರಾಯಣ
ಅಜೀಂ ಪ್ರೇಮ್‌ಜಿ ವಿಶ್ವವಿದ್ಯಾಲಯದಲ್ಲಿ ಪ್ರಾಧ್ಯಾಪಕರು
