ಗಜಾ ನಗರದಿಂದ ಸ್ಥಳಾಂತರಗೊಂಡ ಪ್ಯಾಲೆಸ್ಟೀನಿಯನ್ನರ ಶಿಬಿರದಲ್ಲಿ ಇಸ್ರೇಲಿ ಮಾರಣಾಂತಿಕ ದಾಳಿಯ ನಂತರ ಸೋಮವಾರದಿಂದ “ಎಲ್ಲ ಕಣ್ಣುಗಳು ರಫಾಹ್” (All Eyes On Rafah) ಎಂಬ ಪದಗಳನ್ನು ಹೊಂದಿರುವ ಎಐ ರಚಿತವಾದ ಚಿತ್ರವನ್ನು 44 ದಶಲಕ್ಷಕ್ಕೂ ಹೆಚ್ಚು ಇನ್‌ಸ್ಟಾಗ್ರಾಮ್ ಖಾತೆಗಳಿಂದ ಹಂಚಿಕೊಳ್ಳಲಾಗಿದೆ.
ಹಮಾಸ್ ವಿರುದ್ಧ ಇಸ್ರೇಲ್‌ನ ಮಿಲಿಟರಿ ಕಾರ್ಯಾಚರಣೆಯ ಸಮಯದಲ್ಲಿ ಅಲ್ಲಿಗೆ ಓಡಿಹೋದ ಲಕ್ಷಾಂತರ ಪ್ಯಾಲೆಸ್ಟೀನಿಯನ್ನರನ್ನು ಸೂಚಿಸುವ, ಪರ್ವತಗಳಿಂದ ಆವೃತವಾಗಿರುವ ಮರುಭೂಮಿಯ ಭೂದೃಶ್ಯದಾದ್ಯಂತ ಅಂತ್ಯವಿಲ್ಲದೆ ಚಾಚಿಕೊಂಡಿರುವ ಡೇರೆಗಳ ಸಾಲುಗಳನ್ನು ಚಿತ್ರವು ತೋರಿಸುತ್ತಿದೆ.
ಚಿಲಿ-ಯುಎಸ್ ನಟ ಪೆಡ್ರೊ ಪ್ಯಾಸ್ಕಲ್, ಪ್ಯಾಲೇಸ್ಟಿನಿಯನ್ ಮೂಲದ ಟಾಪ್ ಮಾಡೆಲ್‌ಗಳಾದ ಬೆಲ್ಲಾ, ಗಿಗಿ ಹಡಿಡ್ ಮತ್ತು ಫ್ರೆಂಚ್ ಫುಟ್‌ಬಾಲ್ ತಾರೆ ಉಸ್ಮಾನೆ ಡೆಂಬೆಲೆ ಇದನ್ನು ಇನ್‌ಸ್ಟಾಗ್ರಾಮ್‌ನಲ್ಲಿ ಹಂಚಿಕೊಂಡಿರುವ ಸೆಲೆಬ್ರಿಟಿಗಳಲ್ಲಿ ಸೇರಿದ್ದಾರೆ.
ಆನ್ಲೈನ್ ಮಾನಿಟರ್ ವಿಸಿಬ್ರೇನ್ ಪ್ರಕಾರ, “ಆಲ್ ಐಸ್ ಆನ್ ರಾಫಾ” ಎಂಬ ಘೋಷಣೆಯನ್ನು ಇತರ ಪ್ರಕಟಣೆಗಳು ಮತ್ತು ಸಾಮಾಜಿಕ ನೆಟ್‌ವರ್ಕ್‌ಗಳಲ್ಲಿ ವ್ಯಾಪಕವಾಗಿ ಹಂಚಿಕೊಳ್ಳಲಾಗಿದೆ, ವಿಶೇಷವಾಗಿ ಎಕ್ಸ್, ಹ್ಯಾಶ್‌ಟ್ಯಾಗ್ #alleyesonrafah ಸುಮಾರು ಒಂದು ಮಿಲಿಯನ್ ಹಿಟ್‌ಗಳನ್ನು ಕಂಡಿದೆ.
ಈಜಿಪ್ಟ್‌ನ ಗಡಿಯಲ್ಲಿರುವ ದಕ್ಷಿಣ ಗಜಾ ನಗರದ ಮೇಲಿನ ದಾಳಿಯ ಬಗ್ಗೆ ಮೂರು ದಿನಗಳಲ್ಲಿ ಎಕ್ಸ್ ವೇದಿಕೆಯಲ್ಲಿ 27.5 ಮಿಲಿಯನ್ ಸಂದೇಶಗಳನ್ನು ಪ್ರಕಟಿಸಲಾಗಿದೆ; ಇದು ಅಂತರರಾಷ್ಟ್ರೀಯವಾಗಿ ಆಕ್ರೋಶವನ್ನು ಉಂಟುಮಾಡಿದೆ.
ಶಿಬಿರದ ಮೇಲೆ ಇಸ್ರೇಲಿ ನಡೆಸಿದ ದಾಳಿಯಲ್ಲಿ ಭಾನುವಾರ ಬೆಂಕಿ ಕಾಣಿಸಿಕೊಂಡು 45 ಜನರು ಸಾವನ್ನಪ್ಪಿದರು. 249 ಮಂದಿ ಗಾಯಗೊಂಡರು ಎಂದು ಗಾಜಾದ ಹಮಾಸ್ ನಡೆಸುತ್ತಿರುವ ಆರೋಗ್ಯ ಸಚಿವಾಲಯ ತಿಳಿಸಿದೆ.
ಇಬ್ಬರು ಹಿರಿಯ ಹಮಾಸ್ ಉಗ್ರಗಾಮಿಗಳನ್ನು ಗುರಿಯಾಗಿಸಿ ಕೊಂದಿರುವುದಾಗಿ ಇಸ್ರೇಲ್‌ನ ಸೇನೆ ಹೇಳಿದ್ದು, ಪ್ರಧಾನಿ ಬೆಂಜಮಿನ್ ನೆತನ್ಯಾಹು ಅವರು ತಮ್ಮ ಸರ್ಕಾರ ತನಿಖೆ ನಡೆಸುತ್ತಿರುವ “ದುರಂತ ಅಪಘಾತ”ದ ಕುರಿತು ಮಾತನಾಡಿದ್ದಾರೆ.
ಇಸ್ರೇಲಿ ಅಧಿಕೃತ ಅಂಕಿಅಂಶಗಳ ಆಧಾರದ ಮೇಲೆ ಎಎಫ್‌ಪಿ ಲೆಕ್ಕಾಚಾರದ ಪ್ರಕಾರ, ದಕ್ಷಿಣ ಇಸ್ರೇಲ್‌ನಲ್ಲಿ ಹಮಾಸ್‌ನ ಅಭೂತಪೂರ್ವ ಅಕ್ಟೋಬರ್ 7 ದಾಳಿಯಿಂದ ಮಾರಣಾಂತಿಕ ಗಾಜಾ ಯುದ್ಧವು 1,189 ಜನರ ಸಾವಿಗೆ ಕಾರಣವಾಯಿತು, ಹೆಚ್ಚಾಗಿ ಸಮಾನ್ಯ ನಾಗರಿಕರು ತಮ್ಮ ಪ್ರಾಣ ಕಳೆದುಕೊಂಡಿದ್ದಾರೆ.
ಉಗ್ರಗಾಮಿಗಳು 252 ಒತ್ತೆಯಾಳುಗಳನ್ನು ಇರಿಸಿಕೊಂಡಿದ್ದು, ಅವರಲ್ಲಿ 121 ಮಂದಿ ಗಾಜಾದಲ್ಲಿ ಉಳಿದಿದ್ದಾರೆ, ಇದರಲ್ಲಿ 37 ಮಂದಿ ಸತ್ತಿದ್ದಾರೆ ಎಂದು ಇಸ್ರೇಲಿ ಸೇನೆ ಹೇಳಿದೆ.
ಹಮಾಸ್ ನಡೆಸುತ್ತಿರುವ ಪ್ರದೇಶದ ಆರೋಗ್ಯ ಸಚಿವಾಲಯದ ಪ್ರಕಾರ, ಇಸ್ರೇಲ್‌ನ ಪ್ರತೀಕಾರದ ಆಕ್ರಮಣವು ಗಾಜಾದಲ್ಲಿ ಕನಿಷ್ಠ 36,171 ಜನರನ್ನು ಕೊಂದಿದೆ, ಅಲ್ಲಿಯೂ ಕೂಡ ಹೆಚ್ಚಾಗಿ ನಾಗರಿಕರು ಹತರಾಗಿದ್ದಾರೆ.
ಇದನ್ನೂ ಓದಿ; ‘ಆಲ್ ಐಸ್ ಆನ್ ರಫಾ’: ಸಾಮಾಜಿಕ ಜಾಲತಾಣದಲ್ಲಿ ವ್ಯಾಪಕವಾಗಿ ಹಂಚಿಕೊಂಡ ಪೋಸ್ಟ್‌ನ ಅರ್ಥವೇನು?
