ಬಿಜೆಪಿಯ ಆಸ್ತಿಯಲ್ಲಿ ಗಣನೀಯ ಹೆಚ್ಚಳ

ಭಾರತೀಯ ಜನತಾ ಪಕ್ಷದ ಆಸ್ತಿಯು 2021-22ರ ಆರ್ಥಿಕ ವರ್ಷದಲ್ಲಿ 21.17% ರಷ್ಟು ಹೆಚ್ಚಳವಾಗಿದೆ ಎಂದು ಅಸೋಸಿಯೇಷನ್ ಫಾರ್ ಡೆಮಾಕ್ರಟಿಕ್ ರಿಫಾರ್ಮ್ಸ್ (ADR) ವರದಿ ತಿಳಿಸಿದೆ.

ಬಿಜೆಪಿ ಬಳಿ 6,046.81 ಕೋಟಿ ಆಸ್ತಿ ಇದ್ದು 2021–22ರಲ್ಲಿ ಅತೀ ಶ್ರೀಮಂತ ಪಕ್ಷವಾಗಿ ಬಿಜೆಪಿ ಹೊರಹೊಮ್ಮಿದೆ ಎಂದು ಅಸೋಸಿಯೇಷನ್‌ ಫಾರ್‌ ಡೆಮಾಕ್ರಟಿಕ್‌ ರಿಫಾರ್ಮ್ಸ್‌ (ಎಡಿಆರ್‌) ಬಿಡುಗಡೆ ಮಾಡಿದ ವರದಿಯಲ್ಲಿ ತಿಳಿಸಲಾಗಿದೆ.

ದೇಶದ ಎಂಟು ರಾಷ್ಟ್ರೀಯ ಪಕ್ಷಗಳ ಒಟ್ಟು ಆಸ್ತಿಯ ಮೌಲ್ಯ 8,829.15 ಕೋಟಿ. ಈ ಮೊತ್ತದಲ್ಲಿ ಬಿಜೆಪಿಯದ್ದೇ ಹೆಚ್ಚಿನ ಪ್ರಮಾಣ ಅಂದರೆ, ಶೇ 69ರಷ್ಟಿದೆ ಎಂದು ವರದಿಯಲ್ಲಿ ಹೇಳಲಾಗಿದೆ.

ಎಂಟು ರಾಷ್ಟ್ರೀಯ ಪಕ್ಷಗಳು ಘೋಷಿಸಿದ ಆಸ್ತಿ ಕುರಿತು ಎಡಿಆರ್‌ ವಿಶ್ಲೇಷಣೆಯನ್ನು ಮಾಡಿದ್ದು, ಬಿಜೆಪಿ, ಕಾಂಗ್ರೆಸ್,  ಎನ್‌ಸಿಪಿ, ಬಿಎಸ್‌ಪಿ, ಸಿಪಿಐ,  ತೃಣಮೂಲ ಕಾಂಗ್ರೆಸ್, ನ್ಯಾಷನಲ್ ಪೀಪಲ್ಸ್ ಪಾರ್ಟಿ ಸೇರಿ ವಿವಿಧ ಪಕ್ಷಗಳು ಘೋಷಿಸಿದ ಅಂಕಿ-ಅಂಶಗಳನ್ನು ವಿಶ್ಲೇಷಿಸಿ ಎಡಿಆರ್‌ ವರದಿಯನ್ನು ಸಿದ್ದಪಡಿಸಿದೆ.

2020-21ರ ಆರ್ಥಿಕ ವರ್ಷದಲ್ಲಿ 8 ರಾಷ್ಟ್ರೀಯ ಪಕ್ಷಗಳು ಘೋಷಿಸಿದ ಒಟ್ಟು ಆಸ್ತಿ 7297.618 ಕೋಟಿ ರೂ. 2021-22 ರ ಆರ್ಥಿಕ ವರ್ಷದಲ್ಲಿ ರಾಷ್ಟ್ರೀಯ ಪಕ್ಷಗಳು ಘೋಷಿಸಿದ ಆಸ್ತಿ 8829.158 ಕೋಟಿ ರೂ. ಆಗಿದೆ.

ಬಿಜೆಪಿ ಈ ಅವಧಿಯಲ್ಲಿ ಹೆಚ್ಚು ಆಸ್ತಿಯನ್ನು ಘೋಷಿಸಿದೆ. ಎರಡು ವರ್ಷಗಳಲ್ಲಿ ಅದರ ಪ್ರಮಾಣವೂ ಹೆಚ್ಚಳವಾಗಿದೆ. ಬಿಎಸ್ಪಿ ವಾರ್ಷಿಕವಾಗಿ ಆಸ್ತಿಯಲ್ಲಿ ಇಳಿಕೆ ಕಂಡ ಏಕೈಕ ರಾಷ್ಟ್ರೀಯ ಪಕ್ಷವಾಗಿದೆ.2020-21, ಮತ್ತು 2021-22  ಆರ್ಥಿಕ ವರ್ಷದಲ್ಲಿ  BSP ಯ ಒಟ್ಟು ಆಸ್ತಿಯು 5.74% ರಷ್ಟು ಕಡಿಮೆಯಾಗಿದೆ (ರೂ. 732.79 ಕೋಟಿಯಿಂದ ರೂ. 690.71 ಕೋಟಿಗೆ) ಎಂದು ಎಡಿಆರ್ ವರದಿ ತಿಳಿಸಿದೆ.

ಇದನ್ನು ಓದಿ: ಕರ್ನಾಟಕದಲ್ಲಿ ಪಿಯುಸಿ, ಎಸೆಸೆಲ್ಸಿ ವಿದ್ಯಾರ್ಥಿಗಳಿಗೆ 3 ಬಾರಿ ವಾರ್ಷಿಕ ಪರೀಕ್ಷೆ