ಅಮೆರಿಕದ ಮಕ್ಕಳ ಲೈಂಗಿಕ ಹಗರಣದ ಅಪರಾಧಿ ಜೆಫ್ರಿ ಎಪ್ಸ್ಟೀನ್ಗೆ ಸಂಬಂಧಿಸಿದ ದಾಖಲೆಗಳು ಬಹಿರಂಗಗೊಂಡ ಬೆನ್ನಲ್ಲೇ ಬ್ರಿಟನ್ ರಾಜಕಾರಣಿ ಲಾರ್ಡ್ ಪೀಟರ್ ಮ್ಯಾಂಡೆಲ್ಸನ್ ಲೇಬರ್ ಪಕ್ಷದ ಸದಸ್ಯತ್ವಕ್ಕೆ ರಾಜೀನಾಮೆ ನೀಡಿದ್ದಾರೆ. ಎಪ್ಸ್ಟೀನ್ ಜೊತೆಗಿನ ಸಂಪರ್ಕ ಬಯಲಾದ ಕಾರಣ ‘ಲೇಬರ್ ಪಕ್ಷಕ್ಕೆ ಮತ್ತಷ್ಟು ಮುಜುಗರ ಉಂಟಾಗುವುದು ತನಗೆ ಇಷ್ಟವಿಲ್ಲ’ ಎಂದು ಮ್ಯಾಂಡೆಲ್ಸನ್ ಹೇಳಿರುವುದಾಗಿ ಬಿಬಿಸಿ ವರದಿ ಮಾಡಿದೆ.
ಕಳೆದ ವರ್ಷ ಜೆಫ್ರಿ ಎಪ್ಸ್ಟೀನ್ ಜೊತೆಗಿನ ಹಳೆಯ ಸಂಬಂಧದ ಹಿನ್ನೆಲೆ ಅಮೆರಿಕದ ಬ್ರಿಟಿಷ್ ರಾಯಭಾರಿ ಹುದ್ದೆಯಿಂದ ವಜಾಗೊಂಡಿದ್ದ ಮಾಜಿ ಕ್ಯಾಬಿನೆಟ್ ಸಚಿವ ಲಾರ್ಡ್ ಮ್ಯಾಂಡೆಲ್ಸನ್ ಅವರ ಹೆಸರು, ಕಳೆದ ಶುಕ್ರವಾರ ಅಮೆರಿಕದ ನ್ಯಾಯಾಂಗ ಇಲಾಖೆ ಬಿಡುಗಡೆ ಮಾಡಿದ ಹೊಸ ದಾಖಲೆಗಳಲ್ಲಿ ಮತ್ತೆ ಕಾಣಿಸಿಕೊಂಡಿದೆ. ಈ ಹೊಸ ಫೈಲ್ಗಳಲ್ಲಿ ಎಪ್ಸ್ಟೀನ್ ಮ್ಯಾಂಡೆಲ್ಸನ್ ಅವರಿಗೆ ಹಣಕಾಸಿನ ನೆರವು ನೀಡಿದ್ದ ಬಗ್ಗೆ ಮತ್ತು ಮ್ಯಾಂಡೆಲ್ಸನ್ ಸರ್ಕಾರಿ ನೀತಿಗಳ ಬಗ್ಗೆ ಎಪ್ಸ್ಟೀನ್ ಜೊತೆ ಚರ್ಚಿಸಿದ ಬಗ್ಗೆ ಸಂಶಯಾಸ್ಪದ ವಿವರಗಳಿವೆ ಎಂದು ವರದಿಯಾಗಿದೆ.
ಎಪ್ಸ್ಟೀನ್ ಕಡೆಯಿಂದ ತನಗೆ ಯಾವುದೇ ಹಣಕಾಸಿನ ನೆರವು ಸಿಕ್ಕಿಲ್ಲ ಎಂದು ಮ್ಯಾಂಡೆಲ್ಸನ್ ವಾದಿಸಿದ್ದು, ಪಕ್ಷದ ಹಿತದೃಷ್ಟಿಯಿಂದ ಸದಸ್ಯತ್ವ ತ್ಯಜಿಸುತ್ತಿರುವುದಾಗಿ ಹೇಳಿದ್ದಾರೆ. ಈ ನಡುವೆ ಮ್ಯಾಂಡೆಲ್ಸನ್ ಅವರನ್ನು ಹೌಸ್ ಆಫ್ ಲಾರ್ಡ್ಸ್ನಿಂದಲೂ ಹೊರಹಾಕಬೇಕು ಎಂಬ ಒತ್ತಾಯಗಳು ಕೇಳಿಬರುತ್ತಿವೆ.
ಅಮೆರಿಕದ ನ್ಯಾಯಾಂಗ ಇಲಾಖೆಯು ಇತ್ತೀಚೆಗೆ ಬಿಡುಗಡೆ ಮಾಡಿದ ದಾಖಲೆಗಳ ಪ್ರಕಾರ, ಜೆಫ್ರಿ ಎಪ್ಸ್ಟೀನ್ 2003 ಮತ್ತು 2004ರ ಅವಧಿಯಲ್ಲಿ ಲಾರ್ಡ್ ಮ್ಯಾಂಡೆಲ್ಸನ್ ಅವರಿಗೆ ಒಟ್ಟು 75,000 ಡಾಲರ್ (£55,000) ಹಣವನ್ನು ಪಾವತಿಸಿದ್ದಾನೆ ಎಂದು ತಿಳಿದುಬಂದಿದೆ. ಈ ಹಣವನ್ನು ತಲಾ 25,000 ಡಾಲರ್ ಮೊತ್ತದ ಮೂರು ಪ್ರತ್ಯೇಕ ಕಂತುಗಳಲ್ಲಿ ವರ್ಗಾಯಿಸಲಾಗಿತ್ತು ಎನ್ನಲಾಗಿದೆ.
ಭಾನುವಾರದಂದು ಲೇಬರ್ ಪಕ್ಷದ ಪ್ರಧಾನ ಕಾರ್ಯದರ್ಶಿಗೆ ಬರೆದ ಪತ್ರದಲ್ಲಿ ಲಾರ್ಡ್ ಮ್ಯಾಂಡೆಲ್ಸನ್, “ಈ ವಾರಾಂತ್ಯದಲ್ಲಿ ಜೆಫ್ರಿ ಎಪ್ಸ್ಟೀನ್ ಸುತ್ತ ಸೃಷ್ಟಿಯಾಗಿರುವ ತೀವ್ರ ಆಕ್ರೋಶದ ವಿದ್ಯಮಾನಗಳೊಂದಿಗೆ ನನ್ನ ಹೆಸರು ಮತ್ತೆ ತಳುಕು ಹಾಕಿಕೊಂಡಿದೆ. ಈ ಬಗ್ಗೆ ನಾನು ವಿಷಾದಿಸುತ್ತೇನೆ ಮತ್ತು ಕ್ಷಮೆಯಾಚಿಸುತ್ತೇನೆ ಎಂದಿದ್ದಾರೆ.
ಮುಂದುವರಿದು, “ಸುಮಾರು 20 ವರ್ಷಗಳ ಹಿಂದೆ ಎಪ್ಸ್ಟೀನ್ ನನಗೆ ಹಣ ಪಾವತಿ ಮಾಡಿದ್ದಾನೆ ಎಂಬ ಆರೋಪಗಳು ಸುಳ್ಳು ಎಂದು ನಾನು ನಂಬುತ್ತೇನೆ. ಈ ಬಗ್ಗೆ ನನ್ನ ಬಳಿ ಯಾವುದೇ ದಾಖಲೆಗಳಿಲ್ಲ ಅಥವಾ ನೆನಪೂ ಇಲ್ಲ. ಆದರೂ ಈ ವಿಚಾರಗಳ ಬಗ್ಗೆ ನಾನು ಸ್ವತಃ ತನಿಖೆ ನಡೆಸುವ ಅಗತ್ಯವಿದೆ” ಎಂದು ಹೇಳಿದ್ದಾರೆ.
“ಈ ತನಿಖೆ ನಡೆಸುವ ಸಮಯದಲ್ಲಿ ಲೇಬರ್ ಪಕ್ಷಕ್ಕೆ ಮತ್ತಷ್ಟು ಮುಜುಗರ ಉಂಟಾಗುವುದು ನನಗೆ ಇಷ್ಟವಿಲ್ಲ, ಆದ್ದರಿಂದ ನಾನು ಪಕ್ಷದ ಸದಸ್ಯತ್ವಕ್ಕೆ ರಾಜೀನಾಮೆ ನೀಡುತ್ತಿದ್ದೇನೆ” ಎಂದು ಮ್ಯಾಂಡೆಲ್ಸನ್ ಅವರು ತಮ್ಮ ಪತ್ರದಲ್ಲಿ ತಿಳಿಸಿದ್ದಾರೆ.
“ಈ ಹಿಂದೆಯೇ ಯಾರ ಧ್ವನಿಯನ್ನು ಆಲಿಸಬೇಕಿತ್ತೋ ಅಂತಹ ಮಹಿಳೆಯರು ಮತ್ತು ಹುಡುಗಿಯರಲ್ಲಿ (ಎಪ್ಸ್ಟೀನ್ ಸಂತ್ರಸ್ತರಲ್ಲಿ) ಮತ್ತೊಮ್ಮೆ ಕ್ಷಮೆಯಾಚಿಸಲು ನಾನು ಈ ಅವಕಾಶವನ್ನು ಬಳಸಿಕೊಳ್ಳಲು ಬಯಸುತ್ತೇನೆ” ಎಂದು ಮ್ಯಾಂಡೆಲ್ಸನ್ ಹೇಳಿದ್ದಾರೆ.
“ನಾನು ನನ್ನ ಜೀವನವನ್ನೇ ಲೇಬರ್ ಪಕ್ಷದ ಮೌಲ್ಯಗಳು ಮತ್ತು ಅದರ ಯಶಸ್ಸಿಗಾಗಿ ಮುಡಿಪಾಗಿಟ್ಟಿದ್ದೇನೆ. ಪಕ್ಷದ ಹಿತದೃಷ್ಟಿಯಿಂದಲೇ ನಾನು ಈ ನಿರ್ಧಾರವನ್ನು ತೆಗೆದುಕೊಳ್ಳುತ್ತಿದ್ದೇನೆ ಎಂದು ನಾನು ನಂಬುತ್ತೇನೆ” ಎಂದು ಮ್ಯಾಂಡೆಲ್ಸನ್ ತಮ್ಮ ಪತ್ರದಲ್ಲಿ ತಿಳಿಸಿದ್ದಾರೆ.
ಹೊಸದಾಗಿ ಬಿಡುಗಡೆಯಾದ ದಾಖಲೆಗಳು ಅಧಿಕೃತವೇ ಎಂದು ತನಗೆ ತಿಳಿದಿಲ್ಲ ಎಂದು ಲಾರ್ಡ್ ಮ್ಯಾಂಡೆಲ್ಸನ್ ಭಾನುವಾರ ಹೇಳಿದ್ದರು.
