ಯೋಗಿ ಆದಿತ್ಯನಾಥ್ ನೇತೃತ್ವದ ಸರ್ಕಾರದ ಅಡಿಯಲ್ಲಿ ಉತ್ತರಪ್ರದೇಶದ ಶ್ರಾವಸ್ತಿ ಜಿಲ್ಲಾಡಳಿತವು ನೇಪಾಳದ ಪಕ್ಕದ ಗಡಿ ಜಿಲ್ಲೆಗಳಲ್ಲಿರುವ ಮಸೀದಿಗಳು, ಮದರಸಾಗಳು ಮತ್ತು ಗೋರಿಗಳ ವಿರುದ್ಧ ಬುಲ್ಡೋಜರ್ ಕಾರ್ಯಾಚರಣೆಯನ್ನು ತೀವ್ರಗೊಳಿಸಿದೆ. ಆಡಳಿತವು “ಅಕ್ರಮ, ಅತಿಕ್ರಮಣ” ನಿರ್ಮಾಣಗಳು ಎಂದು ಕರೆಯುವ ಕಟ್ಟಡಗಳ ವಿರುದ್ಧದ ನಿರಂತರ ಕಾರ್ಯಾಚರಣೆಯ ಭಾಗವಾಗಿ ಇದು ಬಂದಿದೆ.
ಮಂಗಳವಾರ (ಮೇ 6), ಶ್ರಾವಸ್ತಿ ಆಡಳಿತವು ಎರಡು ಮದರಸಾಗಳನ್ನು ಕೆಡವುವ ಮೂಲಕ ತನ್ನ ಕಾರ್ಯಾಚರಣೆಯನ್ನು ಹೆಚ್ಚಿಸಿದೆ. ಕುಂಡಾ ಗ್ರಾಮದಲ್ಲಿರುವ ಇಸ್ಲಾಮಿಯಾ ಅರೇಬಿಯಾ ತಲೀಮುಲ್ ಕುರಾನ್ ಮತ್ತು ಬಂಥಿಹಾವಾದ ದಾರುಲ್ ಉಲೂಮ್ ಅಹ್ಲೆ ಸುನ್ನತ್ ಗೌಸ್ ಅಜಮ್ ಎಂಬು ಎರಡೂ ಮದರಸಾಗಳು ಸರಿಯಾದ ಮಾನ್ಯತೆ ಇಲ್ಲದೆ ಸರ್ಕಾರಿ ಭೂಮಿಯಲ್ಲಿ ಕಾರ್ಯನಿರ್ವಹಿಸುತ್ತಿದ್ದವು ಎಂದು ಆರೋಪಿಸಲಾಗಿದೆ. ಕ್ರಮವನ್ನು ಮೇಲ್ವಿಚಾರಣೆ ಮಾಡುವ ಹಿರಿಯ ಅಧಿಕಾರಿಗಳು ಸೇರಿದಂತೆ ಭಾರೀ ಪೊಲೀಸ್ ಉಪಸ್ಥಿತಿಯ ನಡುವೆ ತೆರವು ಕಾರ್ಯಾಚರಣೆಗಳು ನಡೆದವು.
“ಸರ್ಕಾರಿ ಭೂಮಿಯಲ್ಲಿ ಈ ಅಕ್ರಮ ನಿರ್ಮಾಣಗಳ ವಿರುದ್ಧದ ಕ್ರಮವು ಈ ಪ್ರದೇಶದಲ್ಲಿ ಕಾನೂನು ಸುವ್ಯವಸ್ಥೆ ಮತ್ತು ಶಿಸ್ತನ್ನು ಕಾಪಾಡಿಕೊಳ್ಳಲು ಅವಶ್ಯಕವಾಗಿದೆ” ಎಂದು ಹಿರಿಯ ಜಿಲ್ಲಾ ಅಧಿಕಾರಿಯೊಬ್ಬರು ಹೇಳಿದರು. ಅತಿಕ್ರಮಣಗಳನ್ನು ನಿರ್ಮೂಲನೆ ಮಾಡುವ ಸರ್ಕಾರದ ವಿಶಾಲ ಕಾರ್ಯತಂತ್ರಕ್ಕೆ ಅನುಗುಣವಾಗಿ ಈ ಕ್ರಮವನ್ನು ಕೈಗೊಳ್ಳಲಾಗಿದೆ ಎಂದು ಒತ್ತಿ ಹೇಳಿದರು.
ಈ ಧ್ವಂಸವು ಮುಸ್ಲಿಂ ಸಮುದಾಯದೊಳಗೆ ತೀವ್ರ ಕೋಪ ಮತ್ತು ಪ್ರತಿಭಟನೆಗಳನ್ನು ಹುಟ್ಟುಹಾಕಿದೆ. ಸ್ಥಳೀಯರು ತಮ್ಮ ಧಾರ್ಮಿಕ ಸಂಸ್ಥೆಗಳ ಮೇಲಿನ ದಾಳಿ ಎಂದು ಭಾವಿಸಿದ್ದಕ್ಕೆ ಆಕ್ರೋಶ ವ್ಯಕ್ತಪಡಿಸಿದರು. ಹಲವರು ಈ ನಡೆಯನ್ನು ರಾಜಕೀಯ ಪ್ರೇರಿತ ಮತ್ತು ಮುಸ್ಲಿಮರನ್ನು ಅಸಮಾನವಾಗಿ ಗುರಿಯಾಗಿಸಿಕೊಂಡಿವೆ ಎಂದು ಹೇಳಿದ್ದಾರೆ. “ಇದು ಕೇವಲ ಮದರಸಾಗಳ ಮೇಲಿನ ದಾಳಿಯಲ್ಲ; ಇದು ನಮ್ಮ ಗುರುತು, ನಮ್ಮ ನಂಬಿಕೆ ಮತ್ತು ನಮ್ಮ ಸಮುದಾಯದ ಮೇಲಿನ ದಾಳಿಯಾಗಿದೆ” ಎಂದು ಆಕ್ರೋಶಗೊಂಡ ಸ್ಥಳೀಯ ಮುಸ್ಲಿಂ ಮುಖಂಡರು ಹೇಳಿದರು. ಜಿಲ್ಲೆಯ ವಿವಿಧ ಭಾಗಗಳಲ್ಲಿ ಪ್ರತಿಭಟನೆಗಳು ಭುಗಿಲೆದ್ದವು, ಸರ್ಕಾರದ ಕ್ರಮಗಳ ಬಗ್ಗೆ ವ್ಯಕ್ತಿಗಳು ತಮ್ಮ ಹತಾಶೆಯನ್ನು ವ್ಯಕ್ತಪಡಿಸಿದರು.
ಬುಲ್ಡೋಜರ್ ಕ್ರಮದ ಜೊತೆಗೆ, ಜಿಲ್ಲಾಡಳಿತವು “ಗುರುತಿಸದ” ಮದರಸಾಗಳ ವಿರುದ್ಧವೂ ಕಠಿಣ ಕ್ರಮಗಳನ್ನು ತೆಗೆದುಕೊಂಡಿತು. ಶ್ರಾವಸ್ತಿ ಜಿಲ್ಲೆಯಾದ್ಯಂತ ಒಟ್ಟು 18 ಮದರಸಾಗಳನ್ನು ಸೀಲ್ ಮಾಡಲಾಯಿತು, ಏಕೆಂದರೆ ಅವು ಸರ್ಕಾರಿ ನಿಯಮಗಳನ್ನು ಪಾಲಿಸಲು ವಿಫಲವಾಗಿವೆ ಮತ್ತು ಕಾರ್ಯಾಚರಣೆಗೆ ಸರಿಯಾದ ದಾಖಲೆಗಳನ್ನು ಹೊಂದಿಲ್ಲ ಎಂದು ಆರೋಪಿಸಲಾಗಿದೆ.
ಶಿಕ್ಷಣ ಮತ್ತು ಧಾರ್ಮಿಕ ಮಂಡಳಿಗಳಿಂದ ಅಗತ್ಯ ಅನುಮೋದನೆ ಇಲ್ಲದೆ ಈ ಮದರಸಾಗಳು ಕಾರ್ಯನಿರ್ವಹಿಸುತ್ತಿರುವುದು ಕಂಡುಬಂದಿದೆ ಎಂದು ಸ್ಥಳೀಯ ಅಧಿಕಾರಿಗಳು ಹೇಳಿದ್ದಾರೆ. “ಈ ಮದರಸಾಗಳನ್ನು ಸೀಲ್ ಮಾಡುವುದು ಜಿಲ್ಲೆಯಲ್ಲಿ ಕಾನೂನುಬದ್ಧವಾಗಿ ಮಾನ್ಯತೆ ಪಡೆದ ಸಂಸ್ಥೆಗಳು ಮಾತ್ರ ಕಾರ್ಯನಿರ್ವಹಿಸಲು ಅವಕಾಶ ನೀಡುವುದನ್ನು ಖಚಿತಪಡಿಸಿಕೊಳ್ಳಲು ನಡೆಯುತ್ತಿರುವ ಪ್ರಯತ್ನದ ಭಾಗವಾಗಿದೆ” ಎಂದು ಆಡಳಿತ ವಕ್ತಾರರು ಹೇಳಿದರು.
ಆದಾಗ್ಯೂ, ಈ ಕ್ರಮಗಳು ಮುಸ್ಲಿಂ ಸಮುದಾಯದಿಂದ ತೀವ್ರ ಅಸಮಾಧಾನಕ್ಕೆ ಕಾರಣವಾಯಿತು. ಮದರಸಾಗಳ ಸೀಲ್ ಮಾಡುವಿಕೆಯನ್ನು ಧಾರ್ಮಿಕ ತಾರತಮ್ಯದ ಮತ್ತೊಂದು ನಿದರ್ಶನವೆಂದು ಹಲವರು ಅಭಿಪ್ರಾಯಿಸಿದ್ದಾರೆ. ಮುಸ್ಲಿಮೇತರ ಸಂಸ್ಥೆಗಳಿಗೆ ಆಡಳಿತವು ಇದೇ ರೀತಿಯ ಕ್ರಮವನ್ನು ತಗೆದುಕೊಂಡಿಲ್ಲ ಎಂದು ಉಲ್ಲೇಖಿಸಿದ್ದಾರೆ. “ಸರ್ಕಾರವು ನಮ್ಮನ್ನು ಬೆದರಿಸಲು ಮತ್ತು ನಮ್ಮ ಶಿಕ್ಷಣ ಸಂಸ್ಥೆಗಳನ್ನು ಮುಚ್ಚಲು ಬುಲ್ಡೋಜರ್‌ಗಳನ್ನು ಬಳಸುತ್ತಿದೆ” ಎಂದು ಸಮುದಾಯದ ಸದಸ್ಯರೊಬ್ಬರು ಹೇಳಿದ್ದಾರೆ. ಸರಿಯಾದ ಸೂಚನೆ ಇಲ್ಲದೆ 18 ಮದರಸಾಗಳನ್ನು ಸೀಲ್ ಮಾಡಿರುವುದು ಬೆಂಕಿಗೆ ತುಪ್ಪ ಸುರಿದಂತಾಗಿದೆ. ಈ ಪ್ರದೇಶದಲ್ಲಿ ಮುಸ್ಲಿಮರ ವಿರುದ್ಧ ಅನ್ಯಾಯದ ವರ್ತನೆ ಮತ್ತು ಪಕ್ಷಪಾತದ ಧೋರಣೆ ಎಂದು ಅವರು ಆರೋಪಿಸಿದ್ದಾರೆ.
ಜಿಲ್ಲಾಡಳಿತವು ಐದು ಮದರಸಾಗಳು ಮತ್ತು ಒಂದು ಈದ್ಗಾವನ್ನು ನೆಲಸಮಗೊಳಿಸಿದಾಗ ಸೋಮವಾರ ಬುಲ್ಡೋಜರ್ ಕ್ರಮ ಪ್ರಾರಂಭವಾಯಿತು. ಧ್ವಂಸಗೊಂಡವುಗಳಲ್ಲಿ ಇಕೌನಾದ ಅಲಿನಗರದಲ್ಲಿರುವ ಮದರಸಾ ಇಸ್ಲಾಮಿಯಾ ಚಿಂತಾಯೊ ಗರೀಬ್ ನವಾಜ್ ಮತ್ತು ಖಾನ್ವಾ ಪೋಖರ್‌ನಲ್ಲಿರುವ ಈದ್ಗಾ ಸೇರಿವೆ.
ಬುಲ್ಡೋಜರ್ ಕಾರ್ಯಾಚರಣೆಯು ಯೋಗಿ ಸರ್ಕಾರವು ಸರ್ಕಾರಿ ಭೂಮಿಯನ್ನು ಅತಿಕ್ರಮಿಸುತ್ತಿದೆ ಎಂದು ಹೇಳಲಾದ ಧಾರ್ಮಿಕ ಮತ್ತು ಶಿಕ್ಷಣ ಸಂಸ್ಥೆಗಳನ್ನು ಗುರಿಯಾಗಿಸಿಕೊಂಡು ನಡೆಸುತ್ತಿರುವ ದೊಡ್ಡ ಅಭಿಯಾನದ ಭಾಗವಾಗಿದೆ, ಮುಖ್ಯವಾಗಿ ಭಾರತ-ನೇಪಾಳ ಗಡಿಯ ಸಮೀಪವಿರುವ ಬಹ್ರೈಚ್, ಸಿದ್ಧಾರ್ಥನಗರ, ಮಹಾರಾಜ್‌ಗಂಜ್ ಮತ್ತು ಬಸ್ತಿ ಜಿಲ್ಲೆಗಳಲ್ಲಿ ಈ ಅಭಿಯಾನವನ್ನು ನಡೆಸಲಾಗುತ್ತಿದೆ.
ಮುಸ್ಲಿಮ್ ಯುವಕನ ಜೊತೆ ಹಿಂದೂ ಯುವತಿಯ ವೀಡಿಯೋ: ಮುಸ್ಲಿಮರ ಮನೆಗಳಿಗೆ ಬೆಂಕಿ ಹಚ್ಚಿ ದಾಳಿ
