ಶನಿವಾರ ಅಮೆರಿಕದಿಂದ ಗಡೀಪಾರು ಮಾಡಲಾದ ಎರಡನೇ ತಂಡದ 116 ಅಕ್ರಮ ಭಾರತೀಯ ವಲಸಿಗರಲ್ಲಿ ಇಬ್ಬರು ವ್ಯಕ್ತಿಗಳನ್ನು ಕೊಲೆ ಪ್ರಕರಣಕ್ಕೆ ಸಂಬಂಧಿಸಿದಂತೆ ಪಂಜಾಬ್ ಪೊಲೀಸರು ಬಂಧಿಸಿದ್ದಾರೆ. ಯುಎಸ್ ಸಿ -17 ವಿಮಾನವು ಗಡೀಪಾರು ಮಾಡಲ್ಪಟ್ಟವರೊಂದಿಗೆ ಅಮೃತಸರ ವಿಮಾನ ನಿಲ್ದಾಣದಲ್ಲಿ ಇಳಿಯಿತು.
ಸಂದೀಪ್ ಮತ್ತು ಪ್ರದೀಪ್ ಎಂದು ಗುರುತಿಸಲಾದ ಇಬ್ಬರು ವ್ಯಕ್ತಿಗಳು ಪಂಜಾಬ್‌ನ ಪಟಿಯಾಲ ಜಿಲ್ಲೆಯವರು. ಇಬ್ಬರೂ ಸೋದರಸಂಬಂಧಿಗಳಾಗಿದ್ದು, 2023 ರಲ್ಲಿ ಪಟಿಯಾಲಾದ ರಾಜಪುರದಲ್ಲಿ ಎಫ್‌ಐಆರ್ ಸಂಖ್ಯೆ 175 ರ ಅಡಿಯಲ್ಲಿ ದಾಖಲಾಗಿದ್ದ ಕೊಲೆ ಪ್ರಕರಣದಲ್ಲಿ ಪರಾರಿಯಾಗಿದ್ದಾರೆ ಎಂದು ವರದಿಗಳು ಸೂಚಿಸಿವೆ.
ಅಮೆರಿಕದಲ್ಲಿ ಪರಿಶೀಲನೆ ನಡೆಸಿದ ನಂತರ ಅವರ ಕ್ರಿಮಿನಲ್ ದಾಖಲೆಗಳು ಹೊರಬಂದವು. ಪಟಿಯಾಲ ಪೊಲೀಸರು ಅವರನ್ನು ವಶಕ್ಕೆ ಪಡೆದಿದ್ದು, ಅವರ ವಿರುದ್ಧ ಕಾನೂನು ಕ್ರಮಗಳನ್ನು ಈಗ ಪ್ರಾರಂಭಿಸಲಾಗಿದೆ.
116 ಅಕ್ರಮ ಭಾರತೀಯ ವಲಸಿಗರನ್ನು ಹೊತ್ತ ಯುಎಸ್ ಮಿಲಿಟರಿ ವಿಮಾನವು ಶನಿವಾರ ರಾತ್ರಿ ತಡವಾಗಿ ಪಂಜಾಬ್‌ನ ಅಮೃತಸರದಲ್ಲಿ ಬಂದಿಳಿದಿದೆ.
ಅಕ್ರಮ ವಲಸೆ ವಿರುದ್ಧದ ಕಠಿಣ ಕ್ರಮದ ಭಾಗವಾಗಿ ಡೊನಾಲ್ಡ್ ಟ್ರಂಪ್ ಆಡಳಿತವು ಗಡೀಪಾರು ಮಾಡಿದ ಭಾರತೀಯರ ಎರಡನೇ ಬ್ಯಾಚ್ ಇದು. ಗಡೀಪಾರುದಾರರ ಪಟ್ಟಿಯ ಪ್ರಕಾರ, ಅವರಲ್ಲಿ 60 ಕ್ಕೂ ಹೆಚ್ಚು ಜನರು ಪಂಜಾಬ್‌ನವರು. 30 ಕ್ಕೂ ಹೆಚ್ಚು ಜನರು ಹರಿಯಾಣದವರು. ಅವರಲ್ಲಿ ತಲಾ ಇಬ್ಬರು ಗುಜರಾತ್, ಉತ್ತರ ಪ್ರದೇಶ, ಗೋವಾ, ಮಹಾರಾಷ್ಟ್ರ, ರಾಜಸ್ಥಾನ, ಹಿಮಾಚಲ ಪ್ರದೇಶ ಮತ್ತು ಜಮ್ಮು ಮತ್ತು ಕಾಶ್ಮೀರದವರು.
ಇದನ್ನೂ ಓದಿ; ‘ಕೈಕೋಳ-ಸರಪಳಿ ಹಾಕಲಾಗಿತ್ತು..’; ಅಮೆರಿಕದಿಂದ ಗಡೀಪಾರಾದ ಎರಡನೇ ತಂಡದ ಪ್ರತಿಕ್ರಿಯೆ
