ರಾಜ್ಯದಲ್ಲಿ ಆಡಳಿತಾರೂಢ ಎಡಪಕ್ಷದ ಬಗ್ಗೆ ತಮ್ಮ ಅಸಮಾಧಾನವನ್ನು ವಿಧಾನಸಭೆಯಲ್ಲೂ ಪ್ರದರ್ಶಿಸಿರುವ ಕೇರಳ ರಾಜ್ಯಪಾಲ ಆರಿಫ್ ಮೊಹಮ್ಮದ್ ಖಾನ್, ಸರ್ಕಾರದ ಸಾಂಪ್ರದಾಯಿಕ ನೀತಿ ಭಾಷಣದಲ್ಲಿ ಕೊನೆಯ ಪ್ಯಾರಾಗ್ರಾಫ್ ಅನ್ನು ಓದುವ ಮೂಲಕ ಆತುರಾತುರವಾಗಿ ಮುಕ್ತಾಯಗೊಳಿಸಿದ್ದಾರೆ.
ಬೆಳಗ್ಗೆ 9 ಗಂಟೆ ಸುಮಾರಿಗೆ ವಿಧಾನಸಭೆ ತಲುಪಿದ ಖಾನ್, 9.02ಕ್ಕೆ ಮೊದಲು ನೀತಿ ಭಾಷಣ ಮುಗಿಸಿ 9.04ಕ್ಕೆ ಸದನದಿಂದ ನಿರ್ಗಮಿಸಿದರು. ಖಾನ್ ಅವರನ್ನು ಸದನದ ಹೊರಗೆ ಸ್ಪೀಕರ್ ಎಎನ್ ಶಂಸೀರ್, ಮುಖ್ಯಮಂತ್ರಿ ಪಿಣರಾಯಿ ವಿಜಯನ್ ಮತ್ತು ಸಂಸದೀಯ ವ್ಯವಹಾರಗಳ ಸಚಿವ ಕೆ. ರಾಧಾಕೃಷ್ಣನ್ ಅವರು ಹೂಗುಚ್ಛಗಳೊಂದಿಗೆ ಸ್ವಾಗತಿಸಿದರು.
ಖಾನ್ ಅವರು ಸದನದಲ್ಲಿ ಎಲ್ಲರಿಗೂ ಶುಭಾಶಯ ಕೋರುವ ಮೂಲಕ ಸಾಂಪ್ರದಾಯಿಕ ನೀತಿಯ ಭಾಷಣವನ್ನು ಪ್ರಾರಂಭಿಸಿ, ‘ನಾನು ಈಗ ಕೊನೆಯ ಪ್ಯಾರಾವನ್ನು ಓದುತ್ತೇನೆ’ ಎಂದರು.
62 ಪುಟಗಳ ನೀತಿ ಭಾಷಣದ 136 ಪ್ಯಾರಾಗಳಲ್ಲಿ ಕೊನೆಯದನ್ನು ಓದಿದ ರಾಜ್ಯಪಾಲರು, ‘ನಮ್ಮ ಶ್ರೇಷ್ಠ ಪರಂಪರೆ ಕಟ್ಟಡಗಳು ಅಥವಾ ಸ್ಮಾರಕಗಳಿಂದಲ್ಲ. ಸಂವಿಧಾನದ ಅಮೂಲ್ಯ ಪರಂಪರೆಗೆ ನಾವು ತೋರುವ ಗೌರವವನ್ನು ನೆನಪಿಸಿಕೊಳ್ಳೋಣ. ಭಾರತದ ಪ್ರಜಾಪ್ರಭುತ್ವ, ಜಾತ್ಯತೀತತೆ, ಫೆಡರಲಿಸಂ ಮತ್ತು ಸಾಮಾಜಿಕ ನ್ಯಾಯದ ಮೌಲ್ಯಗಳನ್ನು ಅರಿಯೋಣ. ಒಕ್ಕೂಟ ವ್ಯವಸ್ಥೆಯ ಮೂಲತತ್ವವೇ ಭಾರತವನ್ನು ಇಷ್ಟು ವರ್ಷಗಳ ಕಾಲ ಏಕತೆ ಮತ್ತು ಬಲಿಷ್ಠವಾಗಿ ಇರಿಸಿದೆ’ ಎಂದು ಅವರು ಹೇಳಿದರು. ‘ಈ ಸಾರವು ದುರ್ಬಲಗೊಳ್ಳದಂತೆ ನೋಡಿಕೊಳ್ಳುವುದು ಪ್ರತಿಯೊಬ್ಬರ ಕರ್ತವ್ಯವಾಗಿದೆ’ ಎಂದರು.
‘ಈ ವೈವಿಧ್ಯಮಯ ಮತ್ತು ಸುಂದರವಾದ ರಾಷ್ಟ್ರದ ಭಾಗವಾಗಿ, ನಾವು ನಮ್ಮ ದಾರಿಯಲ್ಲಿ ಸಿಗುವ ಎಲ್ಲಾ ಸವಾಲುಗಳನ್ನು ಜಯಿಸುವ ಮೂಲಕ ಅಂತರ್ಗತ ಬೆಳವಣಿಗೆ ಮತ್ತು ಜವಾಬ್ದಾರಿಯುತ ಸ್ಥಿತಿಸ್ಥಾಪಕತ್ವದ ವಸ್ತ್ರವನ್ನು ನೇಯುತ್ತೇವೆ’ ಎಂದು ಅವರು ತಮ್ಮ ಭಾಷಣವನ್ನು ಮುಗಿಸಿ, ತಮಗೆ ಮೀಸಲಿಟ್ಟ ಆಸನದಲ್ಲಿ ಕುಳಿತುಕೊಂಡರು.
ರಾಷ್ಟ್ರಗೀತೆ ಮುಗಿದ ನಂತರ ಖಾನ್ ಅವರು ವಿಧಾನಸಭೆಯಿಂದ ಹೊರನಡೆದರು. ಈ ಸಂಪೂರ್ಣ ಪ್ರಹಸನವು ಕೇವಲ 5 ನಿಮಿಷಗಳಿಗಿಂತ ಕಡಿಮೆ ಸಮಯವನ್ನು ತೆಗೆದುಕೊಂಡಿತು.
ರಾಜ್ಯಪಾಲ ಖಾನ್ ಮತ್ತು ಪಿಣರಾಯಿ ವಿಜಯನ್ ಸರ್ಕಾರದ ನಡುವೆ ಹಲವು ದಿನಗಳಿಂದ ತಿಕ್ಕಾಟ ನಡೆಯುತ್ತಿದೆ. ಮುಖ್ಯವಾಗಿ, ರಾಜ್ಯದ ವಿಶ್ವವಿದ್ಯಾಲಯಗಳ ಕಾರ್ಯನಿರ್ವಹಣೆ ಮತ್ತು ವಿಧಾನಸಭೆ ಅಂಗೀಕರಿಸಿದ ಕೆಲವು ಮಸೂದೆಗಳಿಗೆ ಅವರು ಸಹಿ ಹಾಕದಿರುವುದು ಮನಸ್ಥಾಪಕ್ಕೆ ಕಾರಣವಾಗಿದೆ.
ರಾಜ್ಯಪಾಲರ ಕಾರ್ಯವೈಖರಿ ವಿರುದ್ಧ ಸಿಪಿಐ(ಎಂ), ಅದರ ಯುವ ಘಟಕ ‘ಡೆಮಾಕ್ರಟಿಕ್ ಯೂತ್ ಫೆಡರೇಶನ್ ಆಫ್ ಇಂಡಿಯಾ’ (ಡಿವೈಎಫ್ಐ), ವಿದ್ಯಾರ್ಥಿ ಸಂಘಟನೆಯಾದ ಸ್ಟೂಡೆಂಟ್ಸ್ ಫೆಡರೇಶನ್ ಆಫ್ ಇಂಡಿಯಾ (ಎಸ್ಎಫ್ಐ) ಘಟಕಗಳು ರಾಜ್ಯದಾದ್ಯಂತ ವ್ಯಾಪಕ ಪ್ರತಿಭಟನೆ ನಡೆಸಿದವು.
ಇದನ್ನೂ ಓದಿ; ನನಗೆ ಹಿಂದಿ ಬರಲ್ಲ, ಕ್ರಿಮಿನಲ್ ಕಾನೂನುಗಳನ್ನು ಹಳೆಯ ಹೆಸರಿನಿಂದಲೇ ಉಲ್ಲೇಖಿಸುತ್ತೇನೆ: ನ್ಯಾ. ಆನಂದ್ ವೆಂಕಟೇಶ್
