ದೆಹಲಿ ಮುಖ್ಯಮಂತ್ರಿ ಮತ್ತು ಆಮ್ ಆದ್ಮಿ ಪಕ್ಷದ ಮುಖ್ಯಸ್ಥ ಅರವಿಂದ್ ಕೇಜ್ರಿವಾಲ್ ಅವರು ವಿಧಾನಸಭಾ ಚುನಾವಣೆಗೆ ಮುಂಚಿತವಾಗಿ ರಾಜ್ಯದ ಜನರಿಗೆ ಉಚಿತ ಸವಲತ್ತುಗಳನ್ನು ನೀಡುವ ಸರ್ಕಾರದ ನಿರ್ಧಾರವನ್ನು ಸಮರ್ಥಿಸಿಕೊಂಡಿದ್ದಾರೆ.
“ಉಚಿತವಾಗಿ ಸೀಮಿತ ಪ್ರಮಾಣದಲ್ಲಿ ಸಬ್ಸಿಡಿ ನೀಡುವುದು ಆರ್ಥಿಕತೆಗೆ ಒಳ್ಳೆಯದು. ಇದು ಬಡವರಿಗೆ ಹೆಚ್ಚಿನ ಹಣವನ್ನು ಲಭ್ಯವಾಗುವಂತೆ ಮಾಡುತ್ತದೆ. ಆದ್ದರಿಂದ ಬೇಡಿಕೆಯನ್ನು ಹೆಚ್ಚಿಸುತ್ತದೆ. ಆದರೂ, ಹೆಚ್ಚುವರಿ ತೆರಿಗೆಗಳನ್ನು ವಿಧಿಸಬೇಕಾಗಿಲ್ಲ ಮತ್ತು ಇದು ಬಜೆಟ್ ಕೊರತೆಗೆ ಕಾರಣವಾಗುವುದಿಲ್ಲ. ಬಜೆಟ್ ಮಿತಿಗಳಲ್ಲಿಯೇ ಇದನ್ನು ಮಾಡಲಾಗುವುದು” ಎಂದು ಕೇಜ್ರಿವಾಲ್ ಶುಕ್ರವಾರ ಬೆಳಿಗ್ಗೆ ಟ್ವಿಟ್ಟರ್ನಲ್ಲಿ ತಿಳಿಸಿದ್ದಾರೆ.
ಕೇಜ್ರಿವಾಲ್ ಸರ್ಕಾರದ ಉಚಿತ ನೀರು ಮತ್ತು ವಿದ್ಯುತ್ ಸವಲತ್ತುಗಳಿಂದ ಮತದಾರರು ಹತೋಟಿಯಲ್ಲಿಲ್ಲ ಎಂದು ದೆಹಲಿ ಬಿಜೆಪಿ ಮುಖ್ಯಸ್ಥ ಮನೋಜ್ ತಿವಾರಿ ಹೇಳಿದ ನಂತರ ಕೇಜ್ರಿವಾಲ್ ಮೇಲಿನ ರೀತಿಯಾಗಿ ಪ್ರತಿಕ್ರಿಯಿಸಿದ್ದಾರೆ. ಎಎಪಿ ಸರ್ಕಾರದ “ಉಚಿತ” ಗಳ ಬದಲು “ಸುರಕ್ಷತೆ ಮತ್ತು ಅಭಿವೃದ್ಧಿ”ಯ ಮೇಲೆ ಈ ಚುನಾವಣೆ ನಡೆಯಲಿದೆ ಎಂದು ದೆಹಲಿ ಬಿಜೆಪಿ ಮುಖ್ಯಸ್ಥರು ಹೇಳಿದ್ದಾರೆ.
“ಉಚಿತ ನೀರು ಮತ್ತು ವಿದ್ಯುತ್ ಸರಬರಾಜು ಕೇಜ್ರಿವಾಲ್ ಸರ್ಕಾರದ ಭ್ರಮೆ. ಫಲಾನುಭವಿಗಳ ಸಂಖ್ಯೆ ಮತ್ತು ಗುಣಮಟ್ಟವನ್ನು ಗಮನಿಸಿದರೆ ದೆಹಲಿಯಲ್ಲಿ ನೀರು ಸರಬರಾಜು ಉಚಿತವಾಗಿಲ್ಲ. ಯಾವುದೇ ಯೋಜನೆ ಇಲ್ಲ, ಉಚಿತ ವಿದ್ಯುತ್ ಸರಬರಾಜಿಗೆ ಯಾವುದೇ ಅಧಿಸೂಚನೆ ಇಲ್ಲ ಮತ್ತು ಮತದಾರರನ್ನು ಆಮಿಷವೊಡ್ಡುವ ಆತುರದಲ್ಲಿ ಮತದಾನಕ್ಕೆ ಮೊದಲು ಇದನ್ನು ಉಚಿತ ಎಂದು ಘೋಷಿಸಲಾಯಿತು” ಎಂದು ಬಿಜೆಪಿ ಆರೋಪಿಸಿದೆ.
ದೆಹಲಿ ವಿಧಾನಸಭಾ ಚುನಾವಣೆಯಲ್ಲಿ ಎಎಪಿಯ ಮತ್ತೊಂದು ಎದುರಾಳಿಯಾದ ಕಾಂಗ್ರೆಸ್ ಕೂಡ “ದೆಹಲಿ ಮುಖ್ಯಮಂತ್ರಿಯು ಉಚಿತ ಸೇವೆಗಳನ್ನು ನೀಡುವ ಬದಲು ಉದ್ಯೋಗ ಮತ್ತು ಮನೆಗಳನ್ನು ಒದಗಿಸುವತ್ತ ಗಮನ ಹರಿಸಬೇಕು” ಎಂದು ಹೇಳಿದೆ.
“ಅರವಿಂದ್ ಕೇಜ್ರಿವಾಲ್ ಅವರು ಉಚಿತ ಎಂದು ಹೇಳುತ್ತಾರೆ. ಆದರೆ, ನೀವು ಇದರ ಬಗ್ಗೆ ಜನರನ್ನು ಕೇಳಿದರೆ, ಅವರು ಉಚಿತಗಳನ್ನು ಬಯಸುವುದಿಲ್ಲ. ಅವರು ಮನೆಗಳು, ಉದ್ಯೋಗಗಳು ಮತ್ತು ಹಣದುಬ್ಬರದಿಂದ ಪರಿಹಾರವನ್ನು ಬಯಸುತ್ತಾರೆ. ಸರ್ಕಾರ ಈ ಮೂರು ವಿಷಯಗಳನ್ನು ಒದಗಿಸಬಹುದಾದರೆ, ಜನರು ತಮ್ಮ ವಿದ್ಯುತ್ ಮತ್ತು ನೀರಿನ ಬಿಲ್ಗಳನ್ನು ನೋಡಿಕೊಳ್ಳುತ್ತಾರೆ ಎಂದು ಅಲ್ಕಾ ಲಾಂಬಾ ಹೇಳಿದ್ದಾರೆ.
ಎಎಪಿ ಸರ್ಕಾರವು 2019ರಲ್ಲಿ ಬಾಕಿ ಉಳಿದಿರುವ ಚುನಾವಣಾ ಭರವಸೆಗಳನ್ನು ಈಡೇರಿಸಲು ಪ್ರಯತ್ನಿಸಿತು. ಮಹಿಳೆಯರಿಗೆ ಉಚಿತ ಬಸ್ ಸವಾರಿ, 200 ಘಟಕಗಳವರೆಗೆ ವಿದ್ಯುತ್ ಉಚಿತ, ಉಚಿತ ವೈಫೈ, ಹಿರಿಯ ನಾಗರಿಕರಿಗೆ ಉಚಿತ ತೀರ್ಥಯಾತ್ರೆ, ಶಾಲಾ ಅಭಿವೃದ್ಧಿ ಶುಲ್ಕ ಮನ್ನಾ ರೀತಿಯ ಹಲವು ಭರವಸೆಗಳನ್ನು ಈಡೇರಿಸಿದೆ ಎಂದು ಹೇಳಿಕೊಂಡಿದೆ.
ಅಲ್ಲದೇ ದೆಹಲಿ ಸರ್ಕಾರದ ಕನಸಿನ ಕೂಸಾದ ಸರ್ಕಾರಿ ಶಾಲೆಗಳು ಮತ್ತು ಮೊಹಲ್ಲಾ ಕ್ಲಿನಿಕ್ಗಳು ವಿಶ್ವಮಟ್ಟದಲ್ಲಿ ಪ್ರಶಂಸೆಗೆ ಒಳಗಾಗಿವೆ. ಇಷ್ಟೆಲ್ಲವನ್ನು ತೆರಿಗೆಗಳನ್ನು ಹೆಚ್ಚಿಸದೆ ಇದನ್ನು ಮಾಡಿದೆ ಮತ್ತು ಇನ್ನೂ ಬಜೆಟ್ ಹೆಚ್ಚುವರಿವನ್ನು ಉಳಿಸಿಕೊಂಡಿದೆ ಎಂದು ಕೇಜ್ರಿವಾಲ್ ಈ ಹಿಂದೆ ಸಮರ್ಥಿಸಿಕೊಂಡಿದ್ದರು.
ಕಳೆದ ಐದು ವರ್ಷಗಳಲ್ಲಿ ನಾನು ಭ್ರಷ್ಟಾಚಾರವನ್ನು ಕೊನೆಗೊಳಿಸುವ ಮೂಲಕ ಹಣವನ್ನು ಉಳಿಸಿದ್ದನ್ನು, ನಿಮಗೆ ಉಚಿತ ರೂಪದಲ್ಲಿ ಹಿಂದಿರುಗಿಸುತ್ತಿದ್ದೇನೆ. ಇದರಲ್ಲಿ ತಪ್ಪೇನು? ಎಂದು ಕೇಜ್ರಿವಾಲ್ ಕಳೆದ ತಿಂಗಳು ನಡೆದ ಹಿಂದೂಸ್ತಾನ್ ಟೈಮ್ಸ್ ನಾಯಕತ್ವ ಶೃಂಗಸಭೆಯಲ್ಲಿ ಹೇಳಿದ್ದರು.
ಕೇಂದ್ರ ಗೃಹ ಸಚಿವ ಅಮಿತ್ ಶಾ ಅವರು ಇಂದು ಬೆಳಿಗ್ಗೆ ಸೋಷಿಯಲ್ ಮೀಡಿಯಾದಲ್ಲಿ ಕೇಜ್ರಿವಾಲ್ ಜೊತೆ ಘರ್ಷಣೆ ನಡೆಸಿದರು. ಗುರುವಾರ ರಾತ್ರಿ ಪೋಸ್ಟ್ ಮಾಡಿದ ಟ್ವೀಟ್ನಲ್ಲಿ ಗೃಹ ಸಚಿವರು ದೆಹಲಿ ’ಸರ್ಕಾರ ನೀಡಿರುವ ಉಚಿತ ವೈ-ಫೈ ಪ್ರವೇಶಿಸಲು ಸಾಧ್ಯವಾಗುತ್ತಿಲ್ಲ, ನನ್ನ ಫೋನ್ ಬ್ಯಾಟರಿ ಖಾಲಿಯಾಯಿತು’ ಎಂದು ಟೀಕಿಸಿದ್ದರು.
ಕೆಲವೇ ಗಂಟೆಗಳ ನಂತರ “ಸರ್ … ನಾವು ಉಚಿತ ವೈ-ಫೈ ಜೊತೆಗೆ ಉಚಿತ ಬ್ಯಾಟರಿ ಚಾರ್ಜಿಂಗ್ ಅನ್ನು ಸಹ ವ್ಯವಸ್ಥೆ ಮಾಡಿದ್ದೇವೆ” ಎಂದು ಅರವಿಂದ್ ಕೇಜ್ರಿವಾಲ್ ಟ್ವೀಟ್ ಮಾಡಿದ್ದಾರೆ. ಅವರ ಸರ್ಕಾರವು ದೆಹಲಿ ನಾಗರಿಕರಿಗೆ 200 ಘಟಕಗಳವರೆಗೆ ಉಚಿತ ವಿದ್ಯುತ್ ನೀಡಿದ್ದರಿಂದ, ಗೃಹ ಸಚಿವರು ವಿದ್ಯುತ್ಗೆ ಹಣ ಪಾವತಿಸಬೇಕಾಗಿಲ್ಲ ಎಂದು ಅವರು ಸೂಚಿಸಿದ್ದರು.
ಕಳೆದ ಚುನಾವಣೆಯ ಪ್ರಮುಖ ಭರವಸೆಯಾದ 1,041 ಸರ್ಕಾರಿ ಶಾಲೆಗಳಲ್ಲಿ 1.2 ಲಕ್ಷ ಸಿಸಿಟಿವಿ ಕ್ಯಾಮೆರಾಗಳನ್ನು ಅಳವಡಿಸುವುದರ ಬಗ್ಗೆ ನಂತರ ಚರ್ಚೆ ನಡೆಯಿತು. ದೆಹಲಿಯಲ್ಲಿ ಎಎಪಿ ಕೆಲವೇ ಕ್ಯಾಮೆರಾಗಳನ್ನು ಸ್ಥಾಪಿಸುವ ಮೂಲಕ ಸಾರ್ವಜನಿಕರನ್ನು ಮರುಳು ಮಾಡುತ್ತಿದೆ ಎಂದು ಅಮಿತ್ ಶಾ ಹೇಳಿದರು.
ಆಗ ಕೇಜ್ರಿವಾಲ್ “ಕೆಲವು ಸಿಸಿಟಿವಿ ಕ್ಯಾಮೆರಾಗಳನ್ನು ಗಮನಿಸಿದ್ದಕ್ಕಾಗಿ ಶಾ ಮತ್ತು ಬಿಜೆಪಿಗೆ ಧನ್ಯವಾದ” ಎಂದು ಹೇಳಿದ್ದಾರೆ. ನೀವು ಕೆಲವು ಸಿಸಿಟಿವಿ ಕ್ಯಾಮೆರಾಗಳನ್ನು ನೋಡಿದ್ದಕ್ಕೆ ನನಗೆ ಖುಷಿಯಾಗಿದೆ. ಕೆಲವು ದಿನಗಳ ಹಿಂದೆ ನೀವು ಒಂದೂ ಕ್ಯಾಮೆರಾವನ್ನು ಸ್ಥಾಪಿಸಬೇಡಿ ಎಂದು ಹೇಳಿದ್ದೀರಿ. ಈಗ ಶಾಲೆಗಳನ್ನು ಸಹ ನಿಮಗೆ ತೋರಿಸೋಣವೇ?” “ದೆಹಲಿಯ ಜನರು ರಾಜಕೀಯವನ್ನು ಬದಲಾಯಿಸಿದ್ದಕ್ಕೆ ನನಗೆ ಸಂತೋಷವಾಗಿದೆ … ಆದ್ದರಿಂದ ಸಿಸಿಟಿವಿ ಮತ್ತು ಶಾಲೆಗಳ ಹೆಸರನಲ್ಲಿ ಬಿಜೆಪಿ ಮತ ಕೇಳಬೇಕಾಗಿದೆ” ಎಂದು ಹಿಮ್ಮೆಟ್ಟಿಸಿದ್ದಾರೆ.
