ಯುಎಪಿಎ ಕಾಯ್ದೆ ಅಡಿ ಬಂಧಿತರಾಗಿದ್ದ ತಮ್ಮ ಸಂಬಂಧಿಕರನ್ನು ನೋಡಲು ಉತ್ತರ ಪ್ರದೇಶಕ್ಕೆ ತೆರಳಿದ್ದ ಕೇರಳದ ಮೂವರು ಮಹಿಳೆಯರನ್ನು ಉತ್ತರ ಪ್ರದೇಶದ ಪೊಲೀಸರು ಬಂಧಿಸಿದ್ದಾರೆ ಎಂದು ನ್ಯೂಸ್ ಮಿನಿಟ್ ವರದಿ ಮಾಡಿದೆ.
ನಕಲಿ ಆರ್‌ಟಿ-ಪಿಸಿಆರ್ ಕೋವಿಡ್‌ ಪರೀಕ್ಷಾ ಪ್ರಮಾಣಪತ್ರಗಳನ್ನು ಸಲ್ಲಿಸಲಾಗಿದೆ ಎಂದು ಆರೋಪಿಸಿ ಪೊಲೀಸರು ಮಹಿಳೆಯರನ್ನು ಬಂಧಿಸಿದ್ದಾರೆ. ಮುಹ್ಸಿನಾ (31), ಆಕೆಯ ಅತ್ತೆ ನಸೀಮಾ (62) ಮತ್ತು ಹಲೀಮಾ (65) ಬಂಧಿತರು. ಮುಹ್ಸಿನಾ ಮತ್ತು ನಸೀಮಾ ಪತ್ತನಂತಿಟ್ಟ ಜಿಲ್ಲೆಯವರಾಗಿದ್ದರೆ, ಹಲೀಮಾ ಮಲಪ್ಪುರಂನವರಾಗಿದ್ದಾರೆ. ವಂಚನೆ ಮತ್ತು ನಕಲಿಗೆ ಸಂಬಂಧಿಸಿದಂತೆ ಈ ಮೂವರ ಮೇಲೆ ಪ್ರಕರಣ ದಾಖಲಿಸಲಾಗಿದೆ.
ಮಹಿಳೆಯರು ಕೋವಿಡ್‌ ಪರೀಕ್ಷೆಗಳನ್ನು ಮಾಡಿರುವುದಾಗಿ ನೀಡಿರುವ ಗಾಜಿಯಾಬಾದ್‌ನ ಪ್ರಯೋಗಾಲಯದ ವರದಿಗಳನ್ನು ನಕಲಿ ಎಂದು ಪೊಲೀಸರು ನಿರಾಕರಿಸಿದ್ದಾರೆ ಎಂಬುದು ಎಫ್‌ಐಆರ್‌‌ನಿಂದ ತಿಳಿದುಬಂದಿದೆ. ಎಫ್ಐಆರ್‌ನಲ್ಲಿ ಪ್ರಯೋಗಾಲಯದ ಹೆಸರನ್ನು ಉಲ್ಲೇಖಿಸಿಲ್ಲ.
ಮುಹ್ಸಿನಾ ಅವರ ಪತಿ ಅಂಶಾದ್ ಬದ್ರುದ್ದೀನ್ ಮತ್ತು ಹಲೀಮಾ ಅವರ ಮಗ ಫಿರೋಜ್ ಖಾನ್ ಫೆಬ್ರವರಿಯಿಂದ ಉತ್ತರ ಪ್ರದೇಶದ ಜೈಲಿನಲ್ಲಿ ಇದ್ದಾರೆ. ಉತ್ತರ ಪ್ರದೇಶದಲ್ಲಿ ಅವರು ಬಾಂಬ್ ಸ್ಫೋಟಗಳನ್ನು ಯೋಜಿಸಿದ್ದಾರೆ ಎಂದು ಪೊಲೀಸರು ಆರೋಪಿಸಿದ್ದಾರೆ. ಬದ್ರುದ್ದೀನ್ ಸಹೋದರ ಅಜರ್, ಮಹಿಳೆಯರನ್ನು ಬಂಧಿಸಲು ಸಂಚು ರೂಪಿಸಿದ್ದಾರೆ ಎಂಬುದಾಗಿ ನ್ಯೂಸ್ ಮಿನಿಟ್ ವರದಿ ಮಾಡಿದೆ.
ಸೆಪ್ಟೆಂಬರ್ 24ರಂದು ಬದ್ರುದ್ದೀನ್ ಮತ್ತು ಖಾನ್ ಅವರನ್ನು ನ್ಯಾಯಾಲಯದ ಮುಂದೆ ಹಾಜರುಪಡಿಸಲಿದ್ದಾರೆ ಎನ್ನಲಾಗಿತ್ತು. ಆದರೆ ಪೊಲೀಸರು ಹಾಗೆ ಮಾಡಲಿಲ್ಲ. ಸೆಪ್ಟೆಂಬರ್ 25ರಂದು ಕುಟುಂಬ ಸದಸ್ಯರು ತಮ್ಮವರನ್ನು ಇರಿಸಲಾಗಿರುವ ಜೈಲಿಗೆ ಹೋದರು. ಬಂಧಿತರನ್ನು ಭೇಟಿಯಾಗಲು ಬಯಸಿದ್ದರು. ಆದರೆ ಪೊಲೀಸರು ಇದಕ್ಕೂ ಅವಕಾಶ ನೀಡಲಿಲ್ಲ. ಹಾಗಾಗಿ ಅವರು ತಂಗಿದ್ದ ಕೋಣೆಗೆ ಮರಳಿದರು. ಆ ಸಂಜೆ ನಂತರ, ಪೊಲೀಸರು ಹಿಂತಿರುಗಿ ಬಂದು ಅವರಲ್ಲಿ ಮೂವರನ್ನು ಬಂಧಿಸಿದ್ದಾರೆ. ಯುಎಪಿಎ ಅಡಿಯಲ್ಲಿ ಬಂಧಿಯಾಗಿರುವ ಸಂಬಂಧಿಕರನ್ನು ಭೇಟಿ ಮಾಡಲು ಹೋದ ಗುಂಪಿನ ಭಾಗವಾಗಿದ್ದ ಇತರರಲ್ಲಿ ಫಿರೋಜ್ ಖಾನ್ ಅವರ ಪತ್ನಿ ಸೌಜತ್ ಮತ್ತು ಆಕೆಯ ನಾಲ್ಕು ಮಕ್ಕಳು ಸೇರಿದ್ದಾರೆ ಎಂದು ಮಕ್ತೂಬ್ ಮೀಡಿಯಾ ತಿಳಿಸಿದೆ.
ಇದನ್ನೂ ಓದಿರಿ: ಲಖಿಂಪುರ್‌ ಭೇಟಿ: ರಾಹುಲ್ ಗಾಂಧಿಗೆ ಅನುಮತಿ ನೀಡಿ ಏರ್‌ಪೋರ್ಟ್‌ನಲ್ಲಿ ತಡೆದ ಆದಿತ್ಯನಾಥ್‌ ಸರ್ಕಾರ
