ಜಮ್ಮು ಮತ್ತು ಕಾಶ್ಮೀರದ ಬಗ್ಗೆ ಭಾರತದ ನೀತಿಗಳನ್ನು ಟೀಕಿಸಿದ ಬ್ರಿಟಿಷ್ ಸಂಸದೆ ಡೆಬ್ಬಿ ಅಬ್ರಹಾಮ್ಸ್ ಅವರನ್ನು ದೆಹಲಿ ವಿಮಾನ ನಿಲ್ದಾಣದಿಂದ ನಿನ್ನೆ ವಾಪಾಸು ಕಳುಹಿಸಲಾಗಿತ್ತು. ವಿಚಾರವಾಗಿ ಒಂದು ದಿನದ ನಂತರ ಸರ್ಕಾರ ಈ ಬಗ್ಗೆ ಸಮರ್ಥನೆ ನೀಡಿದ್ದು “ಭಾರತದ ರಾಷ್ಟ್ರೀಯ ಹಿತಾಸಕ್ತಿಯ ವಿರುದ್ಧದ ಚಟುವಟಿಕೆಗಾಗಿ ಭಾರತಕ್ಕೆ ಪ್ರಯಾಣಿಸುವ ಮೊದಲು ಅವರ ಇ-ವೀಸಾವನ್ನು ರದ್ದುಪಡಿಸಲಾಗಿದೆ”ಎಂದಿದೆ. ಅಲ್ಲದೇ ಫೆಬ್ರವರಿ 14 ರಂದು ವೀಸಾವನ್ನು ತಿರಸ್ಕರಿಸಿದ ಬಗ್ಗೆ ಅವರಿಗೆ ತಿಳಿಸಲಾಗಿದೆ ಎಂದು ಅಧಿಕಾರಿಗಳು ಹೇಳಿದ್ದಾರೆ.
ಈ ಬಗ್ಗೆ ಟ್ವಿಟ್ಟರ್ನಲ್ಲಿ ಪ್ರತಿಕ್ರಿಯಿಸಿರುವ ಅಬ್ರಹಾಮ್ಸ್ “ಸ್ನೇಹಿತನೊಬ್ಬ ಇನ್ನೊಬ್ಬ ಸ್ನೇಹಿತನನ್ನು ಗೌರವದಿಂದ ಟೀಕಿಸಲು ಸಾಧ್ಯವಿಲ್ಲ ಎಂಬುದು ತುಂಬಾ ನಿರಾಶಾದಾಯಕವಾಗಿದೆ. ಇಂತಹಾ ಟೀಕೆಗಳು ಆರೋಗ್ಯಕರ ಪ್ರಜಾಪ್ರಭುತ್ವದ ಸಂಕೇತವಲ್ಲವೇ?” ಎಂದು ಪ್ರಶ್ನಿಸಿದ್ದಾರೆ. ಅಲ್ಲದೆ ತಮ್ಮ ವೀಸಾವೂ ಈ ವರ್ಷದ ಅಕ್ಟೋಬರ್ ವರೆಗೆ ಮಾನ್ಯವಾಗಿದೆ ಎಂದು ಸಾಬೀತುಪಡಿಸಲು ಟ್ವಿಟ್ಟರನಲ್ಲಿ ಅದರ ಫೋಟೋವನ್ನು ಕೂಡಾ ಹಾಕಿದ್ದಾರೆ.
Very disappointing that a friend can't respecfully criticise another friend. Isn't this the sign of a healthy democracy? https://t.co/s40JRelOgM
— Debbie Abrahams (@Debbie_abrahams) February 18, 2020
ನಾನು ಮಾನವ ಹಕ್ಕುಗಳು ಮತ್ತು ಸಾಮಾಜಿಕ ನ್ಯಾಯದ PRO ಆಗಿದ್ದೇನೆ. ನಿಯಂತ್ರಣ ರೇಖೆಯ ಎರಡೂ ಬದಿಗಳಲ್ಲಿ ಕಾಶ್ಮೀರಿಗಳು ಸೇರಿದಂತೆ ಈ ಹಕ್ಕುಗಳನ್ನು ಪಡೆಯದ ಜನರ ಪರವಾಗಿ ನಾನು ಯಾವಾಗಲೂ ಮಾತನಾಡುತ್ತೇನೆ ಎಂದು ಅವರು ಟ್ವೀಟ್ ಮಾಡಿದ್ದಾರೆ.
ಅಬ್ರಹಾಮ್ಸ್ ಅವರಿಗೆ ಅಕ್ಟೋಬರ್ 7, 2019 ರಂದು ಇ-ಬಿಸಿನೆಸ್ ವೀಸಾ ನೀಡಲಾಗಿತ್ತು, ಇದು ವ್ಯವಹಾರ ಸಭೆಗಳಿಗೆ ಹಾಜರಾಗಲು 2020ರ ಅಕ್ಟೋಬರ್ 5ರವರೆಗೆ ಮಾನ್ಯವಾಗಿತ್ತು.
ಸೋಮವಾರ ಡೆಬ್ಬಿ ಅಬ್ರಹಾಮ್ಸ್ ದುಬೈನಿಂದ ವಿಮಾನದಲ್ಲಿ ಬೆಳಿಗ್ಗೆ 8.50 ರ ಸುಮಾರಿಗೆ ದೆಹಲಿಗೆ ಬಂದಾಗ, ಅವರ ವೀಸಾವನ್ನು ರದ್ದು ಮಾಡಲಾಗಿದೆ ಎಂದು ಅಧಿಕಾರಿಗಳು ತಿಳಿಸಿದ್ದರು. ನನ್ನನ್ನು ತುಂಬಾ ಕೆಟ್ಟದಾಗಿ ಮತ್ತು ಅಪರಾಧಿಗಳ ರೀತಿ ನಡೆಸಿಕೊಳ್ಳಲಾಗಿದೆ ಎಂದು ಅವರು ಆರೋಪಿಸಿದ್ದರು.
