ಕೊರೊನಾ ಕಾರಣದಿಂದಾಗಿ 2000ರ ನಂತರ ಮೊದಲ ಬಾರಿಗೆ, ತೀವ್ರ ಜಾಗತಿಕ ಬಡತನದಲ್ಲಿ ಏರಿಕೆ ಕಂಡುಬರಲಿದೆ. ಕೊರೊನಾ ಸಾಂಕ್ರಾಮಿಕ ರೋಗವು ಈಗಾಗಲೇ 88 ರಿಂದ 114 ದಶಲಕ್ಷ ಜನರನ್ನು ತೀವ್ರ ಬಡತನಕ್ಕೆ ದೂಡಿದ್ದು, 2020ರ ಅಂತ್ಯದ ವೇಳೆಗೆ 150 ದಶಲಕ್ಷ ಜನರನ್ನು ತೀವ್ರ ಬಡತನಕ್ಕೆ ತಳ್ಳಬಹುದು ಎಂದು ವಿಶ್ವಬ್ಯಾಂಕ್ ವರದಿ ಮಾಡಿದೆ.
ವಿಶ್ವ ಬ್ಯಾಂಕಿನ ಅಂದಾಜುಗಳು ಈ ಹಿಂದೆ ನಿರೀಕ್ಷಿಸಿದ್ದಕ್ಕಿಂತ ಹೆಚ್ಚು ಭೀಕರ ಪರಿಸ್ಥಿತಿಯನ್ನು ತೋರಿಸುತ್ತವೆ. ಉದಾಹರಣೆಗೆ, ಸಾಂಕ್ರಾಮಿಕ ರೋಗದಿಂದಾಗಿ 37 ಮಿಲಿಯನ್ ಜನರು ತೀವ್ರ ಬಡತನಕ್ಕೆ ಒಳಗಾಗಿದ್ದಾರೆ ಎಂದು ಬಿಲ್ & ಮೆಲಿಂಡಾ ಗೇಟ್ಸ್ ಫೌಂಡೇಶನ್ ವರದಿ ಮಾಡಿತ್ತು.
ಹೊಸ ಅಂದಾಜಿನ ಪ್ರಕಾರ ಈಗ 703 ರಿಂದ 729 ಮಿಲಿಯನ್ ಜನರು ತೀವ್ರ ಬಡತನದಲ್ಲಿದ್ದಾರೆ. ಅವರು ದಿನಕ್ಕೆ $1.90 ಕ್ಕಿಂತ ಕಡಿಮೆ ಹಣದಲ್ಲಿ ಜೀವನ ನಡೆಸುತ್ತಿದ್ದಾರೆ ಎಂದು ವ್ಯಾಖ್ಯಾನಿಸಲಾಗಿದೆ. ಜೊತೆಗೆ 2021ರಲ್ಲಿ ಈ ಸಂಖ್ಯೆ ಮತ್ತಷ್ಟು ಹೆಚ್ಚಾಗಬಹುದು ಎಂದು ವಿಶ್ವಬ್ಯಾಂಕ್ ಅಂದಾಜಿಸಿದೆ.
ಇದನ್ನೂ ಓದಿ: ಕೊರೊನಾ ಲಾಕ್‌ಡೌನ್‌ ಕಾರಣಕ್ಕೆ 12.2 ಕೋಟಿ ಉದ್ಯೋಗ ನಷ್ಟ, 4.9 ಕೋಟಿ ಜನ ಬಡತನದಲ್ಲಿ
1998 ರಲ್ಲಿ ಏಷ್ಯಾದ ಆರ್ಥಿಕ ಬಿಕ್ಕಟ್ಟು ಹತ್ತಾರು ದಶಲಕ್ಷ ಜನರನ್ನು ತೀವ್ರ ಬಡತನಕ್ಕೆ ದೂಡಿತ್ತು. 2008 ರ ಆರ್ಥಿಕ ಬಿಕ್ಕಟ್ಟು ಮತ್ತು ಜಾಗತಿಕ ಆರ್ಥಿಕ ಹಿಂಜರಿತದ ಸಮಯದಲ್ಲಿಯೂ ಸಹ, ಭಾರತ ಮತ್ತು ಚೀನಾದ ಉದಯೋನ್ಮುಖ ಮಾರುಕಟ್ಟೆಗಳ ನಿರಂತರ ಬೆಳವಣಿಗೆಯಿಂದಾಗಿ ತೀವ್ರ ಬಡತನದಲ್ಲಿರುವವರ ಸಂಖ್ಯೆ ಕುಸಿದಿತ್ತು.
