ಅಮೆರಿಕಕ್ಕೆ ಅಕ್ರಮವಾಗಿ ಜನರನ್ನು ಕಳುಹಿಸಿದ್ದಾರೆ ಎಂಬ ಆರೋಪದ ಮೇಲೆ ಪಂಜಾಬ್ ಪೊಲೀಸರು ಮಂಗಳವಾರ ಆರು ಟ್ರಾವೆಲ್ ಏಜೆಂಟ್‌ಗಳ ವಿರುದ್ಧ ಎರಡು ಎಫ್‌ಐಆರ್‌ಗಳನ್ನು ದಾಖಲಿಸಿದ್ದಾರೆ ಎಂದು ಹಿಂದೂಸ್ತಾನ್ ಟೈಮ್ಸ್ ವರದಿ ಮಾಡಿದೆ. ಅಮೆರಿಕ 104 ಭಾರತೀಯರನ್ನು ಗಡೀಪಾರು ಮಾಡಿದ ನಂತರ ಭಾರತದಲ್ಲಿ ಒಟ್ಟು 10 ಪ್ರಕರಣಗಳು ದಾಖಲಾಗಿವೆ. ಅಕ್ರಮ ವಲಸೆ
ಮೊದಲ ಪ್ರಕರಣದಲ್ಲಿ ಜಸ್ಕರನ್ ಸಿಂಗ್, ಮಹಿಂದರ್ ಸಿಂಗ್, ಹರ್ದೇವ್ ಕೌರ್ ಮತ್ತು ಸುಜನ್ ಸಿಂಗ್ ವಿರುದ್ಧ ದಾಖಲಾಗಿದ್ದು, ಇವರೆಲ್ಲರೂ ಹೋಶಿಯಾರ್‌ಪುರ ಜಿಲ್ಲೆಯ ನಿವಾಸಿಗಳು. ಎರಡನೇ ಪ್ರಕರಣದಲ್ಲಿ ಹ್ಯಾಪಿ ಮತ್ತು ಗಿಲ್ ಎಂಬ ಇಬ್ಬರು ವ್ಯಕ್ತಿಗಳ ವಿರುದ್ಧ ದಾಖಲಾಗಿದೆ. ಆರೋಪಿಗಳ ವಿರುದ್ಧ ಭಾರತೀಯ ನ್ಯಾಯ ಸಂಹಿತಾ ಮತ್ತು ವಲಸೆ ಕಾಯ್ದೆಯಡಿ ಪ್ರಕರಣ ದಾಖಲಿಸಲಾಗಿದ್ದು, ಸುಳ್ಳು ಭರವಸೆಗಳೊಂದಿಗೆ ಜನರನ್ನು ವಂಚಿಸಿದ ಆರೋಪ ಹೊರಿಸಲಾಗಿದೆ. ಅಕ್ರಮ ವಲಸೆ
ನಾನುಗೌರಿ.ಕಾಂಗೆ ದೇಣಿಗೆ ನೀಡಿ ಬೆಂಬಲಿಸಿ
ಇಲ್ಲಿಕ್ಲಿಕ್ ಮಾಡಿ
ಪಂಜಾಬ್ ಪೊಲೀಸ್ ಮಹಾನಿರ್ದೇಶಕ ಗೌರವ್ ಯಾದವ್ ಅವರು, “ವಂಚನೆ ವಲಸೆ ಜಾಲ”ದ ವಿರುದ್ಧ ಕ್ರಮ ಕೈಗೊಳ್ಳಲು ಮತ್ತು ದುರ್ಬಲ ವ್ಯಕ್ತಿಗಳ ಶೋಷಣೆಯನ್ನು ಕೊನೆಗೊಳಿಸಲು ಪೊಲೀಸರು ಬದ್ಧರಾಗಿದ್ದಾರೆ ಎಂದು ಹೇಳಿದ್ದಾರೆ ಎಂದು ಇಂಡಿಯನ್ ಎಕ್ಸ್‌ಪ್ರೆಸ್ ವರದಿ ಮಾಡಿದೆ. ಅಂತಹ ಜಾಲಗಳ ಹಿಂದೆ ಇರುವವರನ್ನು ಬಂಧಿಸಲು ಸಹಾಯ ಮಾಡುವಂತೆ ಅವರು ನಾಗರಿಕರನ್ನು ಒತ್ತಾಯಿಸಿದ್ದಾರೆ.
“ಈ ವಂಚನೆ ಜಾಲಗಳನ್ನು ಕಿತ್ತುಹಾಕುವಲ್ಲಿ ಸಾರ್ವಜನಿಕ ಸಹಕಾರ ಅತ್ಯಗತ್ಯ” ಎಂದು ಹೇಳಿದ ಅವರು, ಜನರಲ್ಲಿ ಜಾಗೃತಿ ಮೂಡಿಸುವುದರಿಂದ ಇಂತಹ ಮೋಸದ ವಲಸೆಗೆ ಬಲಿಯಾಗುವುದನ್ನು ತಡೆಯಲು ಸಹಾಯವಾಗುತ್ತದೆ ಎಂದು ಹೇಳಿದ್ದಾರೆ.
ಫೆಬ್ರವರಿ 5 ರಂದು, ಗಡೀಪಾರು ಮಾಡಲಾದ 104 ಭಾರತೀಯ ಪ್ರಜೆಗಳನ್ನು ಹೊತ್ತ ಅಮೆರಿಕದ ಮಿಲಿಟರಿ ವಿಮಾನವು ಅಮೃತಸರ ವಿಮಾನ ನಿಲ್ದಾಣದಲ್ಲಿ ಬಂದಿಳಿಯಿತು. ಗಡೀಪಾರು ಮಾಡಲಾದವರಲ್ಲಿ 30 ಮಂದಿ ಪಂಜಾಬ್‌ನವರಾಗಿದ್ದರು.
ಅಮೆರಿಕ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್ ಆಡಳಿತವು ನಡೆಸಿದ ವ್ಯಾಪಕ ವಲಸೆ ವಿರೋಧಿ ಕಾರ್ಯಾಚರಣೆಯ ಭಾಗವಾಗಿ ಈ ಗಡೀಪಾರುಗಳನ್ನು ನಡೆಸಲಾಗಿತ್ತು. ಈ ಕಾರ್ಯಾಚರಣೆಯಲ್ಲಿ ದಾಖಲೆರಹಿತ ವಲಸಿಗರನ್ನು ವಾಪಸ್ ಕಳುಹಿಸಲು ಮಿಲಿಟರಿ ವಿಮಾನವನ್ನು ಬಳಸಲಾಗಿತ್ತು. ಜನವರಿ 20 ರಂದು ಟ್ರಂಪ್ ಅಧಿಕಾರಕ್ಕೆ ಮರಳಿದ ನಂತರ ಭಾರತೀಯ ನಾಗರಿಕರ ಮೊದಲ ಗಡೀಪಾರು ಇದಾಗಿದೆ.
ಈ ಗಡಿಪಾರಿನ ಎರಡು ದಿನಗಳ ನಂತರ, ಪಂಜಾಬ್ ಪೊಲೀಸ್ ಇಲಾಖೆಯು ದಾಖಲೆರಹಿತ ವಲಸೆ ಮತ್ತು ಮಾನವ ಕಳ್ಳಸಾಗಣೆ ಬಗ್ಗೆ ತನಿಖೆ ನಡೆಸಲು ನಾಲ್ಕು ಹಿರಿಯ ಅಧಿಕಾರಿಗಳನ್ನು ಒಳಗೊಂಡ ವಿಶೇಷ ತನಿಖಾ ತಂಡವನ್ನು ರಚಿಸಿತ್ತು.
ಇದನ್ನೂಓದಿ: ’86 ದೇಶಗಳ ಜೈಲಿನಲ್ಲಿ 10,152 ಭಾರತೀಯರು..’; ಸಂಸತ್ತಿನಲ್ಲಿ ಕೇಂದ್ರ ಸರ್ಕಾರದಿಂದ ಮಾಹಿತಿ
’86 ದೇಶಗಳ ಜೈಲಿನಲ್ಲಿ 10,152 ಭಾರತೀಯರು..’; ಸಂಸತ್ತಿನಲ್ಲಿ ಕೇಂದ್ರ ಸರ್ಕಾರದಿಂದ ಮಾಹಿತಿ
