ಹಿಜಾಬ್: ನ್ಯಾಯ ವ್ಯವಸ್ಥೆಯ ಬಗ್ಗೆ ವಿಶ್ವಾಸವಿದೆ, ಆದರೆ ಸರಕಾರ, ಶಿಕ್ಷಣ ಸಂಸ್ಥೆಗಳ ಮೇಲಿಲ್ಲ – ರಾಜೇಂದ್ರ ಚೆನ್ನಿ

ನಾನು ಒಂದು ದೃಶ್ಯ ಮತ್ತು ಒಂದು ವರದಿಯ ಬಗ್ಗೆ ಬರೆಯುತ್ತಿದ್ದೇನೆ. ನ್ಯಾಯಾಲಯಗಳಿಗೆ ಸಂಬಂಧಪಟ್ಟ ಯಾವುದೇ ವಿದ್ಯಮಾನದ ಬಗ್ಗೆ, ವಿಶೇಷವಾಗಿ ನ್ಯಾಯಾಲಯದ ತೀರ್ಪುಗಳ ಬಗ್ಗೆ ಬರೆಯಬಾರದೆಂದು ಹೇಳಲಾಗುತ್ತದೆ. ಸಂವಿಧಾನವು ಈ ಬಗ್ಗೆ ಖಚಿತವಾಗಿ ಏನು ಹೇಳಿದೆ ಎಂದು ನನಗೆ ಗೊತ್ತಿಲ್ಲ, ಆದ್ದರಿಂದ ಏನೇ ಇರಲಿ, ನಾನು ವಿಮರ್ಶೆಯ ಬದಲಾಗಿ ಒಬ್ಬ ನಾಗರೀಕನಾಗಿ ನನಗೆ ಅನ್ನಿಸಿದ ಗೊಂದಲಗಳ ಬಗ್ಗೆ ಬರೆಯುತ್ತಿದ್ದೇನೆ.

ಮೊದಲನೆಯದಾಗಿ ಒಂದು ದೃಶ್ಯ ಚಿಕ್ಕಮಗಳೂರಿನ ಪ್ರಥಮದರ್ಜೆ ಕಾಲೇಜಿನ ಗೇಟಿನ ಬಳಿ ತಗೆದ ವೀಡಿಯೋ, ಇದನ್ನು ನಾನು ಸಾಮಾಜಿಕ ತಾಣಗಳಲ್ಲಿ ನೋಡಿದೆ. ಹಿಜಾಬ್ ಹಾಕಿದ ಕೆಲವು ವಿದ್ಯಾರ್ಥಿನಿಯರು ಅವರಿಗೆ ಆಂತರಿಕ ಪರೀಕ್ಷೆ ಬರೆಯಲು ಅಥವಾ ಪ್ರಾಯೋಗಿಕ ಪರೀಕ್ಷೆಗೆ ಹಾಜರಾಗಲು ಒಳಗೆ ಬಿಟ್ಟಿಲ್ಲವೆಂದು ಅಳುತ್ತಿರುವ ದೃಶ್ಯ. ಪ್ರಾಚಾರ್ಯರು ಉಚ್ಚನ್ಯಾಯಾಲಯದ ಮಧ್ಯಂತರ ಆಜ್ಞೆ ಇದೆ ನೀವು ಜಿಲ್ಲಾಧಿಕಾರಿಗಳನ್ನು ಕೇಳಿ ಎಂದರಂತೆ. ಅವರೂ ಅದೇ ಉತ್ತರವನ್ನು ಕೊಟ್ಟರಂತೆ. ನಮಗೆ ಬೇರೆ ಕೊಠಡಿಯಲ್ಲಿ ಕುಳಿತು ಬರೆಯಲು ಅವಕಾಶ ಕೊಡಬೇಕಿತ್ತು ಎಂದು ಈ ವಿದ್ಯಾರ್ಥಿನಿಯರು ಅಳುತ್ತಿದ್ದರು. ಮನುಷ್ಯರಾದ ಯಾರಿಗಾದರೂ ಕರುಳು ಮಿಡಿಯುವಂಥ ದೃಶ್ಯವಿದಾಗಿತ್ತು. ತಪ್ಪು ಒಪ್ಪು ಚರ್ಚಿಸೋಣ, ಆದರೆ ಮಕ್ಕಳೂ ಹೀಗೆ ಅಸಹಾಯಕರಾಗಿ ಅಳುವುದು ಯಾವ ಸಮಾಜಕ್ಕೂ ಕಳಂಕವೆ.

ಈಗ ಒಂದು ವರದಿ. ಕರ್ನಾಟಕದ ಉಚ್ಛನ್ಯಾಯಾಲಯವು ವಯಸ್ಕಳಲ್ಲದ ಹುಡುಗಿಯೊಬ್ಬಳನ್ನು ರೇಪ್ ಮಾಡಿದ ಆರೋಪವಿರುವ ವಿದ್ಯಾರ್ಥಿಯೊಬ್ಬನಿಗೆ ಪರೀಕ್ಷೆ ಬರೆಯಲು ಅವಕಾಶ ಕೊಡಬೇಕೆಂದು ಆದೇಶ ನೀಡಿದೆ. (ಇಂದು 11/03/22 ಪತ್ರಿಕೆಗಳಲ್ಲಿ ವರದಿಯಾಗಿದೆ). ವರದಿಯ ಪ್ರಕಾರ ಮಾನ್ಯ ನ್ಯಾಯಮೂರ್ತಿಯವರು, “ಆರೋಪವಿದ್ದರೂ ವಿಚಾರಣೆ ನಡೆಯುತ್ತಿರುವ ಕಾರಣಕ್ಕಾಗಿ ವಿದ್ಯಾರ್ಥಿಯು ಪರೀಕ್ಷೆ ಬರೆಯುವುದನ್ನು ನಿರ್ಬಂಧಿಸಲಾಗದು” ಎಂದು ಹೇಳಿದ್ದಾರೆ. ಇದು ನ್ಯಾಯದ ದೃಷ್ಟಿಯಿಂದ ಸರಿಯೆಂದು ತೋರುತ್ತದೆ. ಅಲ್ಲದೆ ಈಗ ಪರೀಕ್ಷೆಗೆ ನಿರ್ಬಂಧಿಸಿದರೆ ಮುಂದೆ ಒಂದು ವೇಳೆ ಆರೋಪಿಯು ಅಪರಾಧಿಯಲ್ಲ ಎಂದು ಸಾಬೀತಾದರೆ ಅದು ಅವನಿಗೆ ಅನ್ಯಾಯವಾಗುತ್ತದೆ ಎನ್ನುವ ಸರಿಯಾದ ತರ್ಕವೂ ಇಲ್ಲಿದೆ.

ಹಾಗಿದ್ದರೆ ಹಿಜಾಬ್ ಪ್ರಕರಣದಲ್ಲಿ ಯಾರೂ ಆರೋಪಿಗಳಿಲ್ಲ. ಈ ವಿದ್ಯಾರ್ಥಿನಿಯರು ಆರೋಪಿಗಳಲ್ಲ. ಉಚ್ಛನ್ಯಾಯಾಲಯದಲ್ಲಿ ನಡೆಯುತ್ತಿರುವ ಪ್ರಕರಣವು ಧಾರ್ಮಿಕ ಸಂಕೇತಗಳು ಹಾಗೂ ಶಿಕ್ಷಣ ಸಂಸ್ಥೆಗಳ ಬಗ್ಗೆ ಅಪರಾಧದ ಬಗ್ಗೆ ಅಲ್ಲ. ನ್ಯಾಯಾಲಯದ ಮಧ್ಯಂತರ ಆದೇಶವು ಪರಿಸ್ಥಿತಿಯನ್ನು ನಿಭಾಯಿಸಲು ಅವಶ್ಯಕವಾಗಿರಬಹುದು. ಆದರೆ ಪದೇ ಪದೇ ಸ್ಪಷ್ಟೀಕರಣದ ನಂತರವೂ ಶಿಕ್ಷಣ ಸಂಸ್ಥೆಗಳು ತಪ್ಪಾಗಿ, ಕ್ರೂರವಾಗಿ ವರ್ತಿಸಿವೆ. ಘನತೆವೆತ್ತ ನ್ಯಾಯಾಲಯವು ಮಾನವೀಯವಾದ ಉದ್ದೇಶದ ವಿರುದ್ಧ ನಡೆದುಕೊಂಡಿವೆ. ಸರಕಾರವನ್ನು ಓಲೈಸಲು ಅನೇಕ ಜಿಲ್ಲಾಧಿಕಾರಿಗಳು ಉದ್ದೇಶಪೂರ್ವಕವಾಗಿ ನ್ಯಾಯಾಯಲದ ಮಧ್ಯಂತರ ಆದೇಶದ ವಿರುದ್ಧ ನಡೆದುಕೊಂಡಿದ್ದಾರೆ. ಘನವಾದ ಸಂಪ್ರದಾಯವಿರುವ ಉಚ್ಛನ್ಯಾಯಾಲಯದ ಆದೇಶದ Spirit ಅನ್ನು ವಿಕೃತಿಗೊಳಿಸಿದ್ದಾರೆ.

ಈಗ ಈ ದೃಶ್ಯ ಈ ವರದಿಯನ್ನು ಒಟ್ಟಿಗೆ ನೋಡೋಣ. ಹಿಜಾಬ್ ಧರಿಸಿದ ವಿದ್ಯಾರ್ಥಿಗಳು ಆರೋಪಿಗಳಲ್ಲ. ಅವರಿಗೆ ಆಂತರಿಕ ಪರೀಕ್ಷೆ ಅಥವಾ ಪ್ರಾಯೋಗಿಕ ಪರೀಕ್ಷೆಗೆ ನಿರ್ಬಂಧಿಸಿದರೆ ಅದು natural justice ಹೇಗೆ ಆಗುತ್ತದೆ? ಈಗ ಉಚ್ಛನ್ಯಾಯಾಲಯವು ಕಾಯ್ದಿರಿಸಿದ ತೀರ್ಪನ್ನು ಇನ್ನು ಮುಂದೆ ಪ್ರಕಟಿಸಿದಾಗ ಒಂದು ವೇಳೆ ಆ ತೀರ್ಪು ಹಿಜಾಬ್ ಪರವಾಗಿ ಬಂದರೆ, ಅಥವಾ ಪರೀಕ್ಷೆಗೆ ನಿರ್ಬಂಧವಿರಬಾರದೆಂದು ಬಂದರೆ? ಕೊನೇಪಕ್ಷ ಕಾಯ್ದು ನೋಡೋಣ, ನಿಮಗೆ ಅವಕಾಶ ಸಿಕ್ಕಬಹುದು ಎಂದು ಹೇಳಬಹುದಾಗಿತ್ತು. ಘನತೆವೆತ್ತ ನ್ಯಾಯಾಧೀಶರಿಗಿಂತ ತಾವು ದೊಡ್ಡವರು ಎಂದು ತಿಳಿದಿರುವ ಮಂತ್ರಿಗಳು ‘ಇಲ್ಲವೇ ಇಲ್ಲ, ಇನ್ನೊಂದು ಅವಕಾಶವೇ ಇಲ್ಲ’ ಎಂದು ಯಾವ ಆಧಾರದ ಮೇಲೆ ಹೇಳಿದ್ದಾರೆ? ತಾವೇ ತೀರ್ಪು ಬರೆದುಬಿಟ್ಟಿದ್ದೇನೆ ಎಂದುಕೊಂಡಿದ್ದಾರೆಯೆ? ಇರಲಿ, ಈಗ ಇದೇ ನ್ಯಾಯಾಲಯವು ಆರೋಪಿಗೆ ಕೂಡ ಪರೀಕ್ಷೆಗೆ ಅವಕಾಶ ಮಾಡಿಕೊಡಬೇಕು ಎಂದು ಆದೇಶಿಸುವಾಗ ಹಿಜಾಬ್ ಧರಿಸಿದ ವಿರ್ದ್ಯಾರ್ಥಿನಿಯರಿಗೆ ಪ್ರತ್ಯೇಕ ಕೊಠಡಿಯಲ್ಲಿ ಅವಕಾಶ ಮಾಡಿಕೊಡಿ ಅಥವಾ ಪರ್ಯಾಯ ಪರೀಕ್ಷೆಗೆ ಅವಕಾಶವಿರಲಿ ಎಂದು ಅದು ಹೇಳುವುದು ಸಹಜ ನ್ಯಾಯವಾಗಬಹುದು. ಇದು ಕಾನೂನು ತಜ್ಞರಲ್ಲದವರಿಗೆ ಸರಿ ಎನ್ನಿಸುತ್ತದೆ. ಇದು ನನಗೆ ಅನ್ನಿಸಿರುವ ಗೊಂದಲ. ನನಗೆ ನ್ಯಾಯಾಲಯ ನ್ಯಾಯ ವ್ಯವಸ್ಥೆಯ ಬಗ್ಗೆ ವಿಶ್ವಾಸವಿದೆ. ಹಾಗೂ ಗೌರವ ಇದೆ. ಆದರೆ ಸರಕಾರ, ಶಿಕ್ಷಣ ಸಂಸ್ಥೆಗಳ ಬಗ್ಗೆ ಇವೆರಡೂ ಇಲ್ಲ.

• ಪ್ರೊ. ರಾಜೇಂದ್ರ ಚೆನ್ನಿ

ಕುವೆಂಪು ವಿಶ್ವವಿದ್ಯಾಲಯದ ನಿವೃತ್ತ ಇಂಗ್ಲಿಷ್ ಪ್ರಾಧ್ಯಾಪಕರು. ಕಥೆಗಾರರು, ವಿಮರ್ಶಕರು ಮತ್ತು ಸಂಸ್ಕೃತಿ ಚಿಂತಕರು. ಪ್ರಜಾಪ್ರಭುತ್ವದ ಮೌಲ್ಯಗಳ ಉಳಿವಿಗಾಗಿ ನಡೆಯುತ್ತಿರುವ ದಕ್ಷಿಣಾಯನ ಅಭಿಯಾನದ ಸಂಚಾಲಕರು.

ಇದನ್ನೂ ಓದಿ; ಕರ್ನಾಟಕದಲ್ಲಿ ಹಿಜಾಬ್ ಧರಿಸಿದ್ದಕ್ಕಾಗಿ ತೊಂದರೆಗೊಳಗಾದ ವಿದ್ಯಾರ್ಥಿನಿಯರಿಗೆ ಸಲಹೆಗಳು