ಆನ್ಲೈನ್ನಲ್ಲಿ ಭೇಟಿಯಾದ ಒಂಬತ್ತು ಜನರನ್ನು ಕೊಲೆ ಮಾಡಿ ತುಂಡು ತುಂಡು ಮಾಡಿದ್ದ ಜಪಾನಿನ ’ಟ್ವಿಟರ್ ಕಿಲ್ಲರ್’ ಎಂದು ಖ್ಯಾತನಾಗಿದ್ದ ವ್ಯಕ್ತಿಗೆ ಟೋಕಿಯೊ ನ್ಯಾಯಾಲಯ ಮಂಗಳವಾರ ಮರಣದಂಡನೆ ವಿಧಿಸಿದೆ.
30 ವರ್ಷದ ಅಪರಾಧಿ ತಕಾಹಿರೋ ಶಿರೈಶಿ ಯುವ ಸಂತ್ರಸ್ತರನ್ನು ಕೊಂದು ತುಂಡು ತುಂಡು ಮಾಡಿದ್ದನ್ನು ಒಪ್ಪಿಕೊಂಡಿದ್ದಾನೆ. ಹತರಾದವರಲ್ಲಿ ಒಬ್ಬರನ್ನು ಹೊರತುಪಡಿಸಿ ಎಲ್ಲರೂ ಅಪರಾಧಿಗೆ ಸಾಮಾಜಿಕ ಮಾಧ್ಯಮದಲ್ಲಿ ಭೇಟಿಯಾಗಿದ್ದವರು.
15 ರಿಂದ 26 ವರ್ಷದೊಳಗಿನ ಮೃತ ಸಂತ್ರಸ್ತರು ಸಾಮಾಜಿಕ ಮಾಧ್ಯಮದಲ್ಲಿ ಆತ್ಮಹತ್ಯಾ ಆಲೋಚನೆಗಳನ್ನು ವ್ಯಕ್ತಪಡಿಸಿದ್ದರು. ತಮ್ಮ ಸಾವಿಗೆ ಒಪ್ಪಿಗೆ ಸೂಚಿಸಿದ್ದರು ಎಂದು ವಾದಿಸಿದ ಆರೋಪಿ ಪರ ವಕೀಲ ಜೈಲು ಶಿಕ್ಷೆ ನೀಡುವಂತೆ ಮನವಿ ಮಾಡಿದ್ದರು.
ಆದರೆ, ಮಂಗಳವಾರ ಅಪರಾಧಿ ತಕಾಹಿರೋ ಶಿರೈಶಿಗೆ ನ್ಯಾಯಾಧೀಶ ನೌಕುನಿ ಯಾನೊ ಮರಣದಂಡನೆ ವಿಧಿಸಿದ್ದಾರೆ ಎಂದು ನ್ಯಾಯಾಲಯದ ಅಧಿಕಾರಿಯೊಬ್ಬರು ಮಾಧ್ಯಮಗಳಿಗೆ ತಿಳಿಸಿದ್ದಾರೆ.
ಇದನ್ನೂ ಓದಿ: ನಮಗೆ ಜಿಯೋ ಬೇಡ, BSNLಗೆ ಪೋರ್ಟ್ ಆಗಲು 4G ಸೇವೆ ಕೊಡಿ: KVS ಒತ್ತಾಯ
’ಟ್ವಿಟರ್ ಕಿಲ್ಲರ್’ ಒಂಬತ್ತು ಮಂದಿಯನ್ನು ಕೊಲೆ ಮಾಡಿ, ಅವರ ದೇಹದಿಂದ ಅಂಗಾಂಗಗಳನ್ನು ಬೇರ್ಪಡಿಸಿ ಅವುಗಳನ್ನು ತನ್ನ ಅಪಾರ್ಟ್ಮೆಂಟ್ನ ಶೀತಲೀಕರಣ ಘಟಕದಲ್ಲಿ ಸಂಗ್ರಹಿಸಿಟ್ಟಿದ್ದ.
“ಒಂಬತ್ತು ಯುವಕರ ಪ್ರಾಣವನ್ನು ಕಸಿದುಕೊಳ್ಳುವುದು ಅತ್ಯಂತ ಗಂಭೀರವಾಗಿದೆ. ಈ ಕೊಲೆಗಳಿಗೆಲ್ಲ ಆರೋಪಿಯೇ ನೇರ ಹೊಣೆ. ಹತರಾದವರ್ಯಾರೂ ಕೊಲೆಯಾಗಲು ಒಪ್ಪಿರಲಿಲ್ಲ. ಈತನ ಕೃತ್ಯದಿಂದ ಸಮಾಜದಲ್ಲಿ ಭಯದ ವಾತಾವರಣ ಸೃಷ್ಟಿಯಾಗಿದೆ ಎಂದು ನ್ಯಾಯಾಧೀಶರು ತೀರ್ಪಿನಲ್ಲಿ ಉಲ್ಲೇಖಿಸಿದ್ದಾರೆ’ ಎಂದು ಸ್ಥಳೀಯ ಮಾಧ್ಯಮಗಳು ವರದಿ ಮಾಡಿವೆ.
ತಾವು ಆತ್ಮಹತ್ಯೆ ಮಾಡಿಕೊಳ್ಳಲು ನಿರ್ಧರಿಸಿರುವುದಾಗಿ ಹಲವರು ಸಾಮಾಜಿಕ ಜಾಲತಾಣಗಳಲ್ಲಿ ಪೋಸ್ಟ್ಗಳನ್ನು ಹಾಕುತ್ತಿದ್ದರು. ಅಂತಹವರನ್ನು ಸಂಪರ್ಕಿಸಲು ಶಿರೈಶಿ ಟ್ವಿಟ್ಟರ್ ಅನ್ನು ಬಳಸಿದ್ದಾರೆ. ಟ್ವಿಟರ್ನಲ್ಲಿ ‘ಹ್ಯಾಂಗ್ ಮ್ಯಾನ್’ ಹೆಸರಿನಲ್ಲಿ ಖಾತೆ ತೆರೆದಿದ್ದ ಆರೋಪಿ, ತಾನು ಅವರಿಗೆ ಸಹಾಯ ಮಾಡುವುದಾಗಿ ತಿಳಿಸಿ, ತನ್ನ ಅಪಾರ್ಟ್ಮೆಂಟ್ಗೆ ಕರೆಸಿಕೊಂಡು ಕೊಲೆ ಮಾಡುತ್ತಿದ್ದ ಎಂದು ತನಿಖಾಧಿಕಾರಿಗಳು ಮಾಹಿತಿ ನೀಡಿದ್ದಾರೆ.
ವಿಚಾರಣೆ ವೀಕ್ಷಣೆಗೆ ನ್ಯಾಯಾಲಯವು ಸಾರ್ವಜನಿಕರಿಗಾಗಿ ಕೇವಲ 16 ಸ್ಥಾನಗಳನ್ನು ಮಾತ್ರ ಹೊಂದಿತ್ತು. ಆದರೆ, ಈ ಪ್ರಕರಣದ ವಿಚಾರಣೆಯನ್ನು ಖುದ್ದಾಗಿ ನೋಡಲು ಸುಮಾರು 435 ಜನರು ನ್ಯಾಯಾಲಯದಲ್ಲಿ ಹಾಜರಿದ್ದರು ಎಂದು ವರದಿಯಾಗಿದೆ.
