ಹಿಜಾಬ್‌ ನಿಷೇಧ ಕುರಿತು ಹಿರೇಮಗಳೂರು ಕಣ್ಣನ್‌ ಆಕ್ಷೇಪಾರ್ಹ ಹೇಳಿಕೆ; ಆಕ್ರೋಶ

ವಿವಾದದ ಮೂಲಕವೇ ಆರಂಭವಾಗಿ ವಿವಾದಾತ್ಮಕ ಭಾಷಣಗಳ ಮೂಲಕವೇ ಮೈಸೂರು ರಂಗಾಯಣದ ಬಹುರೂಪಿ ರಾಷ್ಟ್ರೀಯ ನಾಟಕೋತ್ಸವಕ್ಕೆ ತೆರೆಬಿದ್ದಿದೆ. ರಾಜಕೀಯ ಪ್ರೇರಿತ ಮಾತುಗಳೇ ಪ್ರಧಾನವಾಗಿ ರಂಗಭೂಮಿಯ ನೈಜ ಆಶಯಗಳು ಬದಿಗೆ ಸರಿದಿದ್ದು- ಈ ಸಲದ ಬಹುರೂಪಿಯ ಕೊಡುಗೆ.

ಬಿಜೆಪಿಯ ಪ್ರೊಪಗಾಂಡಗಳಲ್ಲಿ ತೀವ್ರ ತೆರನಾಗಿ ತೊಡಗಿಸಿಕೊಂಡಿರುವ, ಸುಳ್ಳುಗಳನ್ನು ಹೇಳುತ್ತಾರೆಂಬ ಅಪಖ್ಯಾತಿಗೂ ಗುರಿಯಾಗಿರುವ ಚಕ್ರವರ್ತಿ ಸೂಲಿಬೆಲೆಯಂಥವರನ್ನು ಸಮಾರೋಪ ಸಮಾರಂಭಕ್ಕೆ ಆಹ್ವಾನ ನೀಡಿದ್ದು ವಿವಾದದ ಕಿಡಿ ಹಚ್ಚಿತ್ತು. ರಂಗಾಯಣದ ನಿರ್ದೇಶಕರಾದ ಅಡ್ಡಂಡ ಸಿ.ಕಾರ್ಯಪ್ಪನವರ ಅಸಂವಿಧಾನಿಕ ಪ್ರತಿಕ್ರಿಯೆಗಳಿಗೂ ನಾಡು ಸಾಕ್ಷಿಯಾಯಿತು. ಅನೇಕ ವಿಚಾರವಂತರು, ಕಲಾವಿದರು ಬಹುರೂಪಿಯಿಂದ ದೂರ ಉಳಿದರು.

ಕೋವಿಡ್ ಕಾರಣದಿಂದ ಮುಂದೂಡಲ್ಪಟ್ಟ ಬಹುರೂಪಿ ರಾಷ್ಟ್ರೀಯ ನಾಟಕೋತ್ಸವ ಕೊನೆಗೂ ಮಾರ್ಚ್ 11ರಿಂದ ಮಾರ್ಚ್ 20ರವರೆಗೆ ನಡೆದು ತೆರೆಬಿದ್ದಿದೆ. ಬಹುರೂಪಿ ಎಬ್ಬಿಸಿರುವ ರಾಜಕೀಯ ಧೂಳು ಮಾತ್ರ ರಂಗಾಯಣದ ಅಂಗಳದಿಂಚಾಚೆಗೂ ಹಬ್ಬಿದೆ.

‘ತಾಯಿ’ ವಿಷಯವನ್ನಾಧಾರಿಸಿ ನಡೆದ ಈ ಸಲದ ಬಹುರೂಪಿಯ ಸಮಾರೋಪ ಸಮಾರಂಭದಲ್ಲಿ ಚಕ್ರವರ್ತಿ ಸೂಲಿಬೆಲೆಯವರು ಏನು ಮಾತನಾಡಬಹುದು ಎಂಬುದನ್ನು ಎಲ್ಲರೂ ಬಲ್ಲವರಾಗಿದ್ದರು. ಆದರೆ ಹಿರಿಯ ವಿದ್ವಾಂಸ, ಕನ್ನಡದಲ್ಲೇ ಪೌರೋಹಿತ್ಯ ಮಾಡುತ್ತಾರೆಂಬ ಮೆಚ್ಚುಗೆಗೂ ಪಾತ್ರರಾಗಿರುವ ಹಿರೇಮಗಳೂರು ಕಣ್ಣನ್ ಅವರಾಡಿರುವ ಅನಿರೀಕ್ಷಿತ ಮಾತುಗಳು ಚರ್ಚೆಗೆ ಗ್ರಾಸವಾಗಿವೆ.

ಕಣ್ಣನ್‌ ತಾವು ಮಾತನಾಡುತ್ತ ಹೀಗೆ ಹೇಳಿದ್ದಾರೆ: “ಹಿಜಾಬ್‌ ವಿಚಾರದಲ್ಲಿ ಹೈಕೋರ್ಟ್ ಮಹತ್ವದ ತೀರ್ಪು ನೀಡಿದೆ. ಹೀಗಾಗಿ ಶಾಲಾ, ಕಾಲೇಜುಗಳಿಂದ ಹಿಜಾಬ್ ಹೊರಟು ಹೋಗಿದೆ. ವಿದ್ಯಾರ್ಥಿಗಳು ಇನ್ನು ಮುಂದೆ ಶಾಲೆಗೆ ಬರುವಾಗ ‘ಮುಖ’ ಮುಚ್ಕೊಂಡು ಬಾರದೆ ……… ಮುಚ್ಕೊಂಡು ಬರಲಿ. ಮೈಸೂರಿನಲ್ಲಿ ಧಾರಾಕಾರ ಮಳೆ ಸುರಿದಿದೆ. ಇಂದು ಮಳೆಯ ಸುಳಿವು ಇಲ್ಲ. ವಾಗ್ಮಿ ಚಕ್ರವರ್ತಿ ಸೂಲಿಬೆಲೆ ಬಂದಿದ್ದಾನೆ ಅಂತ ಮಳೆಗೂ ಭಯ. ರಾಜ್ಯದಲ್ಲಿ ಹಿಜಾಬೇ ಹೊರಟು ಹೋಗಿದೆ, ಇನ್ನು ಮಳೆ ಯಾವ ಲೆಕ್ಕ. ಹೀಗಾಗಿ ಇನ್ನು ಮುಂದೆ ಶಾಲೆಗೆ ‘……’ ಮುಚ್ಕೊಂಡು ಬರಬೇಕು. ನನಗೆ ಈ ಮಾತು ಹೇಳಲು ಯಾವುದೇ ಭಯವಿಲ್ಲ. ವೈದ್ಯರ ಬಳಿ ಹೋದಾಗ ಎಲ್ಲ ಬಿಚ್ಚಿ ತೋರಿಸುತ್ತೇವೆ. ಹಾಗಿರುವಾಗ ಈ ವಿಚಾರ ಮಾತನಾಡಲು ಏತಕ್ಕೆ ಭಯ?” (`ಆಂದೋಲನ’ ದಿನಪತ್ರಿಕೆಯ ವರದಿ, ದಿನಾಂಕ 21- 03-2022)

ಇದನ್ನೂ ಓದಿರಿ: ಬಹುರೂಪಿಗೆ ಸೂಲಿಬೆಲೆ, ಮಾಳವಿಕಾಗೆ ಆಹ್ವಾನ ವಿರೋಧಿಸಿ ‘ಪರ್ವ’ ಕಿರಿಯ ಕಲಾವಿದರಿಂದ ರಂಗಾಯಣಕ್ಕೆ ಪತ್ರ

ಕಣ್ಣನ್ ಅಂಥವರು ಈ ರೀತಿ ಮಾತನಾಡುತ್ತಿರುವ ಹಿಂದಿನ ಪ್ರೇರಣೆ ಯಾವುದು? ‘ತಾಯಿ’ ಎಂಬ ವಿಷಯವನ್ನಾಧರಿಸಿ ರೂಪಿಸಲಾದ ಬಹುರೂಪಿಯಲ್ಲಿ ಹೆಣ್ಣಿನ ಬಗ್ಗೆ ಈ ರೀತಿಯ ಧೋರಣೆ ಹೊರ ಹೊಮ್ಮಿದ್ದು ಹೇಗೆ? ಇತ್ಯಾದಿ ಪ್ರಶ್ನೆಗಳು ಮುನ್ನೆಲೆಗೆ ಬಂದಿವೆ.

‘ನಾನುಗೌರಿ.ಕಾಂ’ ಜೊತೆ ಮಾತನಾಡಿದ ಮೈಸೂರಿನ ಚಿಂತಕರಾದ ನಾ.ದಿವಾಕರ್‌, “ಇದು ಅತ್ಯಂತ ಆಘಾತಕಾರಿ ಬೆಳವಣಿಗೆ. ಕಣ್ಣನ್‌ ಅವರ ಮೇಲೆ ಗೌರವವಿತ್ತು. ಆದರೆ ಅವರು ಹೀಗೇಕಾದರು ಎಂಬುದು ತಿಳಿಯುತ್ತಿಲ್ಲ” ಎಂದು ವಿಷಾದಿಸಿದರು.

“ತಾಯಿ ಹಾಗೂ ಹಿಜಾಬ್‌ ಎನ್ನುವ ವಿಚಾರ ಬಂದಾಗ ಕಣ್ಣನ್ ಅವರಿಗೆ ಹೆಣ್ಣುಮಕ್ಕಳು ಮಾತ್ರ ಕಾಣಬೇಕಿತ್ತು. ಧರ್ಮ ಕಾಣಬಾರದಿತ್ತು. ಹೆಣ್ಣು ಮಕ್ಕಳೇ ತಾಯಿ ಅಲ್ಲವಾ? ಅಮೂರ್ತ ಕಲ್ಪನೆಯ ತಾಯಿಯನ್ನು ಸಂಕುಚಿತಗೊಳಿಸಿ, ಅದನ್ನು ಹಿಜಾಬ್‌ ಮಟ್ಟಕ್ಕೆ ಇಳಿಸಿ ಕಮೆಂಟ್ ಮಾಡುವುದು ಕಣ್ಣನ್ ಅವರ ವಿದ್ವತ್ತಿಗೆ ಸರಿ ಹೊಂದುವುದಿಲ್ಲ. ಅವರೊಂದಿಗೆ ವೇದಿಕೆಯಲ್ಲಿ ಭಾಗವಹಿಸಿದ್ದೇನೆ. ಅದ್ಭುತವಾಗಿ ಕನ್ನಡ ಮಾತನಾಡುತ್ತಾರೆ. ಕನ್ನಡದ ಪೂಜಾರಿ ಎಂದು ಕರೆಸಿಕೊಂಡಿದ್ದಾರೆ. ಕನ್ನಡದ ಪೂಜಾರಿಯವರ ಬಾಯಲ್ಲಿ ಈ ರೀತಿಯ ಆಕ್ಷೇಪಾರ್ಹ ಪದಗಳು ಬರುತ್ತವೆ ಎಂದರೆ ಇವರು ಸಮಾಜಕ್ಕೆ ಯಾವ ಸಂದೇಶ ಕೊಡುತ್ತಿದ್ದಾರೆ?” ಎಂದು ಪ್ರಶ್ನಿಸಿದರು.

“ದಿನದಿಂದ ದಿನಕ್ಕೆ ಬಲಪಂಥದ ಹಿಡನ್ ಮುಖಗಳು ಅನಾವರಣ ಆಗುತ್ತಿವೆ. ಹೆಚ್ಚು ಕುಡಿದಾಗ ಏನಾಗುತ್ತದೆ? ವೈಯಕ್ತಿಕ ವಿವರಗಳನ್ನೆಲ್ಲ ಹೇಳಿಕೊಂಡು ಬಿಡುತ್ತಾರೆ. ಇಲ್ಲಿಯೂ ಹೀಗೆಯೇ ಆಗುತ್ತಿದೆ. ಜಾತಿ, ಧರ್ಮಗಳ ಉನ್ಮಾದ ಹೆಚ್ಚಾಗಿ ಅನೇಕರ ಅಂತರಂಗ ಬಯಲಾಗುತ್ತಿದೆ. ಈ ಉನ್ಮಾದದಲ್ಲೇ ಬಲಪಂಥೀಯರ ಕೆಡುಕೆಲ್ಲ ಹೊರಬರುತ್ತಿದೆ. ಕಾಶ್ಮೀರಿ ಫೈಲ್ಸ್ ವಿಚಾರದಲ್ಲಿಯೂ ಇದು ಸತ್ಯವಾಗಿದೆ. ಜನರಿಗೆ ಸಿನಿಮಾ ತೋರಿಸಿದ್ದೇವೆಂದು ಖುಷಿಪಡುತ್ತಿರಬಹುದು. ಆದರೆ ಜನರಿಗೆ ಗೊತ್ತಿಲ್ಲದ ವಿಷಯಗಳೆಲ್ಲ ತಿಳಿಯುತ್ತಿವೆ. ಪ್ರಕಾಶ್‌ ಬೆಳವಾಡಿ, ಪಿ.ಶೇಷಾದ್ರಿ, ಅನಂತನಾಗ್‌ ಬಳಿಕ ಕಣ್ಣನ್‌ ಅವರು ಎಕ್ಸ್‌ಪೋಸ್ ಆಗಿದ್ದಾರೆ. ಬಲಪಂಥೀಯ ಬುದ್ದಿಜೀವಿಗಳು, ಕಲಾವಿದರು ಉನ್ಮಾದಕ್ಕೆ ಒಳಗಾಗಿ ತಮ್ಮನ್ನು ತಾವೇ ಬಯಲು ಮಾಡಿಕೊಳ್ಳುತ್ತಿದ್ದಾರೆ” ಎಂದು ಅಭಿಪ್ರಾಯಪಟ್ಟರು.

“ವಿದ್ವಾಂಸರಾಗಿ ಬಂದವರು ವೇದಿಕೆಯ ಶಿಷ್ಟಾಚಾರ ಪಾಲಿಸಬೇಕಾಲ್ಲವಾ? ಬಹುರೂಪಿಯಲ್ಲಿ ಈ ಹಿಂದೆಯೂ ವಿವಾದಗಳಾಗಿವೆ. ಸೂಲಿಬೆಲೆಯಂಥವರಿಂದ ಬಹುರೂಪಿ ಕೋಮುವಾದದ ಸುಳಿಗೆ ಸಿಲುಕುತ್ತದೆ ಎಂದು ನಾವು ಆರೋಪಿಸಿದ್ದ ನಿಜವಾಗಿದೆ. ಸುಲಿಬೆಲೆಯವರು ಮಾಡಿರುವ ಸಮಾರೋಪ ಭಾಷಣ ನೋಡಿದರೆ ಇದು ಸ್ಪಷ್ಟವಾಗುತ್ತದೆ. ಇಂಥವರು ಇದನ್ನಲ್ಲದೆ ರಂಗಭೂಮಿ ಕುರಿತು ಮಾತನಾಡಲು ಸಾಧ್ಯವೇ?” ಎಂದು ಕೇಳಿದರು.

ಹಿಜಾಬ್‌ ಸುಪ್ರೀಂ ಅಂಗಳದಲ್ಲಿರುವುದು ಇವರಿಗೆ ಕಾಣುವುದಿಲ್ಲವೆ?

ಬಹುರೂಪಿಯನ್ನು ಹಲವು ವರ್ಷಗಳಿಂದ ಹತ್ತಿರದಿಂದ ಕಂಡಿರುವ, ರಂಗಕರ್ಮಿಗಳೊಂದಿಗೆ ಒಡನಾಟ ಹೊಂದಿರುವ ಜಿ.ಪಿ.ಬಸವರಾಜು ಅವರು ಈ ಸಲದ ಬಹುರೂಪಿಯ ವಿವಾದದ ಕುರಿತು ಮಾತನಾಡಿದರು.

“ಕಣ್ಣನ್‌ ಅವರು ಕನ್ನಡದಲ್ಲಿ ಪೌರೋಹಿತ್ಯ ಮಾಡುತ್ತಾರೆಂಬ ಕಾರಣಕ್ಕೆ ಬಹಳ ಗೌರವವಿದೆ. ಆದರೆ ಅವರಾಡಿರುವ ಮಾತುಗಳಲ್ಲಿ ದ್ವೇಷ ಇದೆ, ಮಾತಿನ ಘನತೆಯೂ ಕಳೆದು ಹೋಗಿದೆ. ಇದನ್ನು ಎಲ್ಲರೂ ಗಮನಿಸುತ್ತಾರೆ” ಎಂದರು.

“ಹಿಜಾಬ್‌ ಕುರಿತು ಹೈಕೋರ್ಟ್ ತೀರ್ಪು ಬಂದಿದೆ ಎಂದ ಮಾತ್ರ ಮುಕ್ತಾಯವಾಗಿಲ್ಲ. ಪ್ರಕರಣ ಸುಪ್ರೀಂ ಕೋರ್ಟ್ ಮೆಟ್ಟಿಲೇರಿದೆ. ಸುಪ್ರೀಂ ಕೋರ್ಟ್‌ನಲ್ಲಿ ಏನು ತೀರ್ಪು ಬರುತ್ತದೆ ಎಂದು ಯಾರಿಗೂ ಗೊತ್ತಿಲ್ಲ. ಹೀಗಿರುವಾಗ ಮುಚ್ಚೊಂಡು ಬನ್ನಿ ಎಂದು ಯಾರೂ ಮಾತನಾಡಬಾರದು. ಕಣ್ಣನ್‌ ಥರದವರಿಗೆ ಒಂದು ಗೌರವಿರುತ್ತದೆ. ಇಂಥವರು ಭಾಷೆಯ ಮೇಲೆ ಹಿಡಿತವಿಲ್ಲದೆ ಮಾತನಾಡುವುದು ಸರಿಯಲ್ಲ. ಒಂದು ಪ್ರಜಾಪ್ರಭುತ್ವದಲ್ಲಿ ಎಲ್ಲರೂ ವಿಶ್ವಾಸದಿಂದ ಬದುಕಬೇಕು. ಬಹುಸಂಖ್ಯಾತರಾದ ಮಾತ್ರಕ್ಕೆ ಅಲ್ಪಸಂಖ್ಯಾತರನ್ನು, ದಲಿತರನ್ನು ಅವಮಾನ ಮಾಡಬಾರದು. ಇಲ್ಲಿ ಸರ್ವಾಧಿಕಾರವಿಲ್ಲ. ಪ್ರಜಾಪ್ರಭುತ್ವವಿದೆ” ಎಂದು ನೆನಪಿಸಿದರು.

ಇದನ್ನೂ ಓದಿರಿ: ಬಹುರೂಪಿ ರಂಪಾಟ: ಸೈದ್ಧಾಂತಿಕ ವಿರೋಧಿಗಳಿಗೆ ರಂಗಾಯಣದಿಂದ ಗೇಟ್‌ ಪಾಸ್‌?