2010 ರಲ್ಲಿ ”ಡಂಕಿ ರೂಟ್ – Dunky Route” (ಕತ್ತೆ ಮಾರ್ಗ) ಮೂಲಕ ಅಮೆರಿಕಕ್ಕೆ ತೆರಳಿದ್ದ 102 ಭಾರತೀಯರಲ್ಲಿ ಪಂಜಾಬ್‌ನ ಸುಮಾರು 40 ಯುವಕರು ಕಳೆದ 15 ವರ್ಷಗಳಿಂದ ಕಾಣೆಯಾಗಿದ್ದಾರೆ ಎಂದು TNIE ವರದಿ ಮಾಡಿದೆ. ”ಕತ್ತೆ ಮಾರ್ಗ- Donkey Route” ಎಂಬುದು ಅಕ್ರಮ ವಲಸೆ ತಂತ್ರವಾಗಿದ್ದು, ಟ್ರಾವೆಲ್ ಏಜೆನ್ಸಿಗಳು ಕಡಿಮೆ ಶುಲ್ಕದಲ್ಲಿ ಜನರಿಗೆ ವೀಸಾ ನೀಡುವುದಾಗಿ ಭರವಸೆ ನೀಡಿ ಅವರನ್ನು ವಿದೇಶಕ್ಕೆ ಅಕ್ರಮವಾಗಿ ಪ್ರವೇಶ ಮಾಡಿಸುತ್ತದೆ. ಡಂಕಿ ಮಾರ್ಗದಿಂದ

ಪಂಜಾಬ್‌ನ ಫತೇಘರ್ ಸಾಹಿಬ್ ಜಿಲ್ಲೆಯ ಟ್ಯಾಪ್ರಿಯನ್ ಗ್ರಾಮದ ದಲ್ಜಿತ್ ಸಿಂಗ್ ಅವರ ಮಗ ರವೀಂದರ್ ಸಿಂಗ್ ಸೆಪ್ಟೆಂಬರ್ 15, 2010 ರಂದು ಅಮೆರಿಕಕ್ಕೆ ಡಂಕಿ ರೂಟ್‌ನಲ್ಲಿ ತೆರಳಿದ್ದರು. ಆದರೆ ಅವರ ಕುಟುಂಬಕ್ಕೆ ಇದುವರೆಗೆ ಅವರ ಬಗ್ಗೆ ಯಾವುದೇ ಸುಳಿವು ಇಲ್ಲ ಎಂದು ವರದಿ ಹೇಳಿದೆ.

“ಹನ್ನೆರಡನೇ ತರಗತಿ ಓದಿದ್ದ ನನ್ನ ಹಿರಿಯ ಮಗ ಚಾಲಕನಾಗಿದ್ದನು. ಜೀವನೋಪಾಯಕ್ಕಾಗಿ ವಿದೇಶಕ್ಕೆ ಹೋಗಲು ಬಯಸಿದನು. ಪಂಚಕುಲದಲ್ಲಿರುವ ಟ್ರಾವೆಲ್ ಏಜೆಂಟ್‌ಗಳನ್ನು ನಾವು ಸಂಪರ್ಕಿಸಿದ್ದು, ಅಲ್ಲಿ ಅವರೊಂದಿಗೆ ಒಪ್ಪಂದವನ್ನು 20 ಲಕ್ಷ ರೂ.ಗೆ ಇತ್ಯರ್ಥಪಡಿಸಲಾಯಿತು. ನಾವು ಅವರಿಗೆ ಮುಂಗಡವಾಗಿ 5 ಲಕ್ಷ ರೂ.ಗಳನ್ನು ಪಾವತಿಸಿದ್ದೆವು” ಎಂದು ಅವರ ದಲ್ಜಿತ್ ಸಿಂಗ್ ಹೇಳಿದ್ದಾರೆ. ಡಂಕಿ ಮಾರ್ಗದಿಂದ

“ನಮ್ಮ ಮಗನನ್ನು ಇತರರೊಂದಿಗೆ ನೇರವಾಗಿ ಮೆಕ್ಸಿಕೊಕ್ಕೆ ಕರೆದೊಯ್ಯಲಾಗುವುದು ಮತ್ತು ನಂತರ ಅವರು ಅಮೆರಿಕಕ್ಕೆ ಪ್ರವೇಶಿಸಲಿದ್ದಾರೆ ಎಂದು ನಮಗೆ ತಿಳಿಸಲಾಯಿತು. ಆದರೆ ಅವರನ್ನು ದೆಹಲಿಯಿಂದ ಮನಾಗುವಾಗೆ ವಿಮಾನದಲ್ಲಿ ಕರೆದೊಯ್ಯಲಾಯಿತು. ಅಲ್ಲಿ ಅವರನ್ನು ಇನ್ನೊಬ್ಬ ಏಜೆಂಟ್ ಸ್ವೀಕರಿಸಿದರು. ಇದರ ನಂತರ ನಾವು ಬೇಡಿಕೆಯಂತೆ ಅವರಿಗೆ 5 ಲಕ್ಷ ರೂ.ಗಳನ್ನು ಪಾವತಿಸಿದ್ದೇವೆ” ಎಂದು ದಲ್ಜಿತ್ ಸಿಂಗ್ ತಿಳಿಸಿದ್ದಾರೆ.

“10 ದಿನಗಳ ನಂತರ ಅವರು ಮತ್ತು ಇತರರು ಗ್ವಾಟೆಮಾಲಾ ನಗರವನ್ನು ತಲುಪಿದ್ದಾರೆಂದು ನಮಗೆ ತಿಳಿಯಿತು. ಈ ಏಜೆಂಟರು ಉಳಿದ 10 ಲಕ್ಷ ರೂ.ಗಳನ್ನು ಕೇಳಿದರು ಮತ್ತು ನಾವು ಅವರಿಗೆ 7 ಲಕ್ಷ ರೂ.ಗಳನ್ನು ಪಾವತಿಸಿದ್ದೇವೆ. ನಮ್ಮ ಮಗ ಅಮೆರಿಕ ತಲುಪಿದ ನಂತರ ಅವರು ನಮಗೆ ಮರಳಿ ಕರೆ ಮಾಡುತ್ತಾರೆ ಎಂದು ನಮಗೆ ತಿಳಿಸಲಾಯಿತು. ಆದರೆ ಇಲ್ಲಿಯವರೆಗೆ ಅವನು ನಮ್ಮೊಂದಿಗೆ ಮಾತನಾಡಿಲ್ಲ” ಎಂದು ದಲ್ಜಿತ್ ಸಿಂಗ್ ಹೇಳಿದ್ದಾರೆ.

ದಲ್ಜಿತ್ ಸಿಂಗ್ ಅವರ ಮತ್ತೊಬ್ಬ ಮಗ ಜಸ್ವಿಂದರ್ ಸಿಂಗ್ ಸ್ಪೇನ್‌ನಲ್ಲಿದ್ದಾರೆ ಎಂದು ಅವರು ತಿಳಿಸಿದ್ದು, “ನಾವು ಎಲ್ಲಾ ಭರವಸೆಯನ್ನು ಕಳೆದುಕೊಂಡಿದ್ದೇವೆ. ಸಿಬಿಐ ಪ್ರಕರಣದ ತನಿಖೆ ನಡೆಸುತ್ತಿದೆ; ಅವರು ಕಳೆದ ತಿಂಗಳು ನಮ್ಮ ರಕ್ತದ ಮಾದರಿಗಳನ್ನು ತೆಗೆದುಕೊಂಡರು ಮತ್ತು ಜಾರಿ ನಿರ್ದೇಶನಾಲಯ (ED) ಅಧಿಕಾರಿಗಳು ನಮ್ಮನ್ನು ಎರಡು ಬಾರಿ ಪ್ರಶ್ನಿಸಿದ್ದಾರೆ. ನಮ್ಮ ಮಗನ ಬಗ್ಗೆ ಸಿಬಿಐಗೆ ಏನಾದರೂ ಸುಳಿವು ಸಿಗಬಹುದು ಎಂದು ನಾವು ಭಾವಿಸುತ್ತೇವೆ” ಎಂದು ಅವರು ಹೇಳಿದ್ದಾರೆ.

ತಾವು ಏಜೆಂಟರ ವಿರುದ್ಧ ದೂರು ನೀಡಿದ್ದರೂ ಪೊಲೀಸರು ಎಫ್‌ಐಆರ್ ದಾಖಲಿಸಲಿಲ್ಲ ಎಂದು ಅವರು ದೂರಿದ್ದಾರೆ.

ಮಕ್ಕಳು ಕಾಣೆಯಾಗಿರುವ ಈ ಕುಟುಂಬಗಳ ವಕೀಲ ಸುಖ್‌ಪ್ರೀತ್ ಗ್ರೆವಾಲ್, 2023 ರಲ್ಲಿ ಪಂಜಾಬ್ ಮತ್ತು ಹರಿಯಾಣ ಹೈಕೋರ್ಟ್ ಈ ಪ್ರಕರಣವನ್ನು ವಿಲೇವಾರಿ ಮಾಡಿದೆ ಮತ್ತು ಸಿಬಿಐ ಪ್ರಕರಣವನ್ನು ದಾಖಲಿಸಿದೆ ಎಂದು ಹೇಳಿದ್ದಾರೆ.

“2010 ರಲ್ಲಿ ದೇಶದ ಒಟ್ಟು 102 ಯುವಕರು ‘ಡಂಕಿ ಮಾರ್ಗ’ದ ಮೂಲಕ ಅಮೆರಿಕಕ್ಕೆ ಹೋಗಿದ್ದರು. ಪಂಜಾಬ್‌ನ 42 ಜನರು ತಮ್ಮ ಗುರಿಯನ್ನು ತಲುಪಲಿಲ್ಲ ಮತ್ತು ಅವರು ಕೊನೆಯ ಬಾರಿಗೆ ತಮ್ಮ ಕುಟುಂಬಗಳನ್ನು ಯಾವಾಗ ಸಂಪರ್ಕಿಸಿದರು ಎಂಬುದು ಯಾರಿಗೂ ತಿಳಿದಿಲ್ಲ. ಈ ಪ್ರಕರಣವನ್ನು ಸಿಬಿಐ ತನಿಖೆ ನಡೆಸುತ್ತಿದೆ” ಎಂದು ಗ್ರೇವಾಲ್ ಹೇಳಿದ್ದಾರೆ.

“ವರೀಂದರ್ ಸಿಂಗ್ ಅವರ ತಂದೆ ಜಸ್ವಂತ್ ಸಿಂಗ್ ಅವರು 2010 ರಲ್ಲಿ ಅರ್ಜಿ ಸಲ್ಲಿಸಿದ್ದರು. ಹೈಕೋರ್ಟ್ ಹಸ್ತಕ್ಷೇಪದ ನಂತರ ಅದರ ಮೇಲೆ ಎಫ್‌ಐಆರ್ ದಾಖಲಿಸಲಾಯಿತು. ಆರೋಪಿಗಳ ನಿರೀಕ್ಷಣಾ ಜಾಮೀನು ವಜಾಗೊಳಿಸಲಾಯಿತು. ಆದರೆ ಅವರನ್ನು ಬಂಧಿಸುವ ಬದಲು, ಪಂಜಾಬ್ ಪೊಲೀಸರು ರದ್ದತಿ ವರದಿಯನ್ನು ಸಲ್ಲಿಸಿದರು.” ಎಂದು ಅವರು ಹೇಳಿದ್ದಾರೆ.

“ಅದರ ನಂತರ ಜಸ್ವಂತ್ ಸಿಂಗ್ 2013 ರಲ್ಲಿ ಮತ್ತೊಂದು ಅರ್ಜಿಯನ್ನು ಸಲ್ಲಿಸಿದರು, ಇದನ್ನು 2023 ರಲ್ಲಿ ಹೈಕೋರ್ಟ್ ನಿರ್ಧರಿಸಿತು. ಅರ್ಜಿಯ ವಿಚಾರಣೆಯ ಸಮಯದಲ್ಲಿ, 100 ಕ್ಕೂ ಹೆಚ್ಚು ಯುವಕರು ಕಾಣೆಯಾಗಿದ್ದಾರೆ ಎಂಬ ಅಂಶವನ್ನು ಹೈಕೋರ್ಟ್‌ಗೆ ತಿಳಿಸಲಾಯಿತು. ಇನ್ನೂ ಮೂರು ಕುಟುಂಬಗಳು ಸಹ ಅರ್ಜಿಗಳನ್ನು ಸಲ್ಲಿಸಿದವು. ಆ ನಂತರ ತನಿಖೆಯನ್ನು ಸಿಬಿಐಗೆ ಹಸ್ತಾಂತರಿಸಲಾಯಿತು” ಎಂದು ವಕೀಲರು ಹೇಳಿದ್ದಾರೆ.

“ಜನವರಿ 2, 2012 ರಂದು ಇಂದಿರಾ ಗಾಂಧಿ ಅಂತಾರಾಷ್ಟ್ರೀಯ ವಿಮಾನ ನಿಲ್ದಾಣದ ಕಸ್ಟಮ್ಸ್ ಅಧಿಕಾರಿಗಳು 102 ಪಾಸ್‌ಪೋರ್ಟ್‌ಗಳನ್ನು ಹೊಂದಿರುವ ಚೀಲವನ್ನು ವಶಪಡಿಸಿಕೊಂಡಿದ್ದರು. ಆದರೆ ಅಂದು ಯಾವುದೇ ಪ್ರಕರಣ ದಾಖಲಾಗಿಲ್ಲ ಮತ್ತು ಕೆಲವು ಪಾಸ್‌ಪೋರ್ಟ್‌ಗಳು ಈ ಕಾಣೆಯಾದ ಯುವಕರದ್ದಾಗಿವೆ” ಎಂದು ಅವರು ಹೇಳಿದ್ದಾರೆ.

ದೆಹಲಿಯಿಂದ ಏಜೆಂಟರು ಅವರನ್ನು ದೋಹಾಗೆ ಕರೆದೊಯ್ದಿದ್ದಾರೆ ಎಂದು ಶಂಕಿಸಲಾಗಿದೆ ಆದರೆ ಅವರ ಪ್ರವೇಶದ ಯಾವುದೇ ವಲಸೆ ದಾಖಲೆ ಅಲ್ಲಿ ಲಭ್ಯವಿಲ್ಲದ ಕಾರಣ ಅದು ದೃಢೀಕರಿಸಲ್ಪಟ್ಟಿಲ್ಲ ಎಂದು ಅವರು ತಿಳಿಸಿದ್ದಾರೆ.

ಕೆನಡಾದಲ್ಲಿ ನೆಲೆಸಿರುವ ಮತ್ತೊಂದು ಕುಟುಂಬ ತಮ್ಮ ಮಗ ಹರ್ಸಿಮ್ರಂಜಿತ್ ಸಿಂಗ್ ಧಲಿವಾಲ್ ಆಗ ಕಾಣೆಯಾಗಿದ್ದಾನೆ ಎಂದು ವಕೀಲ ಗ್ರೆವಾಲ್ ಅವರನ್ನು ಸಂಪರ್ಕಿಸಿದ್ದಾರೆ. “ಈ ಕುಟುಂಬವು ಅಂದಿನಿಂದ ಮಕ್ಕಳು ಕಾಣೆಯಾಗಿರುವ ಎಂಟಕ್ಕೂ ಹೆಚ್ಚು ಕುಟುಂಬಗಳೊಂದಿಗೆ ಸಂಪರ್ಕದಲ್ಲಿದೆ. ಧಲಿವಾಲ್ ಅವರ ಸಹೋದರಿ ತನ್ನ ಸಹೋದರನನ್ನು ಹುಡುಕಲು ಅಮೆರಿಕಕ್ಕೆ ಹೋಗಿದ್ದರು. ಅಮೆರಿಕ ಅಧಿಕಾರಿಗಳಿಗೆ ಹಾಗೂ ಸಿಬಿಐಗೆ ಹಲವಾರು ಇಮೇಲ್‌ಗಳನ್ನು ಬರೆದರು. ಅವರು ಭಾರತಕ್ಕೆ ಬಂದು ಸಿಬಿಐ ಅಧಿಕಾರಿಗಳಲ್ಲದೆ ಪಂಜಾಬ್ ಪೊಲೀಸರ ಎನ್‌ಆರ್‌ಐ ವಿಭಾಗದ ಅಧಿಕಾರಿಗಳನ್ನು ಭೇಟಿಯಾಗಿದ್ದರು” ಎಂದು ಗ್ರೆವಾಲ್ ಹೇಳಿದ್ದಾರೆ.

ಇಲ್ಲಿ ಕ್ಲಿಕ್ ಮಾಡಿ

ಇದನ್ನೂಓದಿ:  ಇಂದೋರ್‌| ಕಳ್ಳತನ ಮಾಡಿ ಗೆಳತಿಯರನ್ನು ಕುಂಭಮೇಳಕ್ಕೆ ಕರೆದೊಯ್ದ ಕದೀಮರು; ಹಿಂದಿರುಗಿದ ಬಳಿಕ ಬಂಧನ

ಇಂದೋರ್‌| ಕಳ್ಳತನ ಮಾಡಿ ಗೆಳತಿಯರನ್ನು ಕುಂಭಮೇಳಕ್ಕೆ ಕರೆದೊಯ್ದ ಕದೀಮರು; ಹಿಂದಿರುಗಿದ ಬಳಿಕ ಬಂಧನ