ಗಾಝಾ ನರಮೇಧಕ್ಕೆ ಸಂಬಂಧಿಸಿದಂತೆ ಇಸ್ರೇಲ್ ವಿರುದ್ದ ಅಂತಾರಾಷ್ಟ್ರೀಯ ನ್ಯಾಯಾಲಯದಲ್ಲಿ ದಕ್ಷಿಣ ಆಫ್ರಿಕಾ ಹೂಡಿರುವ ಪ್ರಕರಣದಲ್ಲಿ ಅಮೆರಿಕ ಸೇರಿದಂತೆ ಕೆಲ ರಾಷ್ಟ್ರಗಳು ಮಧ್ಯ ಪ್ರವೇಶಿಸಿದ್ದು, ಇಸ್ರೇಲ್ ಪರ ವಕಾಲತ್ತು ವಹಿಸಲು ಮುಂದಾಗಿವೆ ಎಂದು ವರದಿಯಾಗಿದೆ.
ದಿ ಹೇಗ್‌ನಲ್ಲಿರುವ ಅಂತಾರಾಷ್ಟ್ರೀಯ ನ್ಯಾಯಾಲಯವು ಮಾರ್ಚ್ 13ರಂದು ಹೊರಡಿಸಿದ ಪತ್ರಿಕಾ ಪ್ರಕಟಣೆಯ ಪ್ರಕಾರ, ನಮೀಬಿಯಾ, ಯುನೈಟೆಡ್ ಸ್ಟೇಟ್ಸ್, ಹಂಗೇರಿ ಮತ್ತು ಫಿಜಿ ದೇಶಗಳು ನ್ಯಾಯಾಲಯದ ಶಾಸನದ 63 ನೇ ವಿಧಿಯ ಅಡಿಯಲ್ಲಿ ಪ್ರಕರಣದಲ್ಲಿ ಮಧ್ಯಪ್ರವೇಶದ ಅರ್ಜಿಗಳನ್ನು ಸಲ್ಲಿಸಿವೆ.
ನೆದರ್ಲ್ಯಾಂಡ್ಸ್ ಮತ್ತು ಐಸ್‌ಲ್ಯಾಂಡ್ ರಾಷ್ಟ್ರಗಳು ನ್ಯಾಯಾಲಯದ ಶಾಸನದ 63ನೇ ವಿಧಿಯ ಅಡಿಯಲ್ಲಿ ಮಧ್ಯಪ್ರವೇಶದ ಅರ್ಜಿಗಳನ್ನು ಸಲ್ಲಿಸಿದ ಬೆನ್ನಲ್ಲೇ ಈ ಬೆಳವಣಿಗೆ ನಡೆದಿದೆ.
ಈ ಪ್ರಕರಣವನ್ನು ಅಧಿಕೃತವಾಗಿ ‘ಗಾಝಾ ಪಟ್ಟಿಯಲ್ಲಿ ಹತ್ಯಾಕಾಂಡದ ತಡೆಗಟ್ಟುವಿಕೆ ಮತ್ತು ಶಿಕ್ಷೆ’ (ದಕ್ಷಿಣ ಆಫ್ರಿಕಾ vs ಇಸ್ರೇಲ್) ಎಂದು ಕರೆಯಲಾಗುತ್ತದೆ. ದಕ್ಷಿಣ ಆಫ್ರಿಕಾ 2023ರ ಡಿಸೆಂಬರ್‌ನಲ್ಲಿ ಇಸ್ರೇಲ್ ವಿರುದ್ಧ ಈ ದೂರನ್ನು ದಾಖಲಿಸಿದೆ.
ಗಾಝಾ ಪಟ್ಟಿಯಲ್ಲಿ ಇಸ್ರೇಲ್ ನಡೆಸುತ್ತಿರುವ ಯುದ್ಧವು ಅಲ್ಲಿನ ಫ್ಯಾಲೆಸ್ತೀನಿಯರ ಹತ್ಯಾಕಾಂಡಕ್ಕೆ ಕಾರಣವಾಗುತ್ತಿದೆ ಎಂಬುವುದು ದಕ್ಷಿಣ ಆಫ್ರಿಕಾದ ಮುಖ್ಯ ಆರೋಪವಾಗಿದೆ.
ನರಮೇಧ ಆರೋಪ ಅಲ್ಲಗಳೆದ ಅಮೆರಿಕ
ತನ್ನ ಮಧ್ಯ ಪ್ರವೇಶದ ಅರ್ಜಿಯಲ್ಲಿ ಇಸ್ರೇಲನ್ನು ಬಲವಾಗಿ ಸಮರ್ಥಿಸಿಕೊಂಡಿರುವ ಅಮೆರಿಕ, ಇಸ್ರೇಲ್ ಗಾಝಾದಲ್ಲಿ ನರಮೇಧ ನಡೆಸಿದೆ ಎಂಬ ಆರೋಪಗಳನ್ನು ಆಧಾರರಹಿತ ಎಂದು ತಿರಸ್ಕರಿಸಿದೆ. ಇಸ್ರೇಲ್ ವಿರುದ್ಧದ ನರಮೇಧದ ಆರೋಪಗಳು ಸುಳ್ಳು ಎಂದಿರುವ ಅಮೆರಿಕ, ಇಸ್ರೇಲ್ ದೇಶದ ಕಾನೂನುಬದ್ಧತೆಯನ್ನು ಹಾಳುಮಾಡುವ ಪ್ರಯತ್ನದ ಭಾಗವಾಗಿ ಇಂತಹ ಆರೋಪಗಳನ್ನು ಅಂತಾರಾಷ್ಟ್ರೀಯ ವೇದಿಕೆಗಳಲ್ಲಿ ಪದೇ ಪದೇ ಮಾಡಲಾಗುತ್ತದೆ ಎಂದು ಹೇಳಿದೆ.
ಅಮೆರಿಕ ಇಸ್ರೇಲ್ ಪರ ವಕಾಲತ್ತು ವಹಿಸಿದರೂ, ವಿಶ್ವಸಂಸ್ಥೆಯ ತಜ್ಞರು ಸೇರಿದಂತೆ ಹಲವಾರು ಅಂತಾರಾಷ್ಟ್ರೀಯ ಮಾನವ ಹಕ್ಕುಗಳ ಸಂಘಟನೆಗಳು ಇಸ್ರೇಲ್ ಮೇಲೆ ನರಮೇಧದ ಆರೋಪ ಹೊರಿಸಿವೆ. ಗಾಝಾದಲ್ಲಿ ಕನಿಷ್ಠ 72,000 ಪ್ಯಾಲೆಸ್ತೀನಿಯರ ಹತ್ಯೆ ಮಾಡಲಾಗಿದೆ ಮತ್ತು ಅಲ್ಲಿನ ಬಹುತೇಕ ಸಂಪೂರ್ಣ ಜನಸಂಖ್ಯೆಯನ್ನು ಸ್ಥಳಾಂತರಗೊಳ್ಳುವಂತೆ ಅಥವಾ ಬಲವಂತವಾಗಿ ಸ್ಥಳಾಂತರಿಸಲಾಗಿದೆ ಎಂದು ಈ ಗುಂಪುಗಳು ದೂರಿವೆ.
ಇಸ್ರೇಲ್ ಪರ ವಕಾಲತ್ತು ವಹಿಸಿರುವ ಅಮೆರಿಕ, ಯಾವುದನ್ನಾದರೂ ನರಮೇಧ ಎಂದು ಕರೆಯಬೇಕಾದರೆ, ಒಂದು ನಿರ್ದಿಷ್ಟ ಗುಂಪಿನ ಜನರನ್ನು ಪೂರ್ತಿಯಾಗಿ ಅಥವಾ ಹೆಚ್ಚಿನ ಸಂಖ್ಯೆಯಲ್ಲಿ ನಾಶಪಡಿಸುವ ಉದ್ದೇಶ ಇತ್ತು ಎಂಬುವುದು ಸಾಬೀತಾಗಬೇಕು ಎಂದಿದೆ.
ಯುದ್ಧದ ಸಮಯದಲ್ಲಿ ಸಾಮಾನ್ಯ ಜನರು ಸಾವನ್ನಪ್ಪುವುದು ಸಹಜ. ಅಂತಹ ಸಾವುಗಳು ಸಂಭವಿಸಿದ ತಕ್ಷಣ ಅದನ್ನು ನರಮೇಧ ಎನ್ನಲು ಬರುವುದಿಲ್ಲ ಎಂದು ಪ್ರತಿಪಾದಿಸಿದೆ.
ಜನರನ್ನು ಕೊಲ್ಲುವುದು ಇಸ್ರೇಲ್‌ನ ಮುಖ್ಯ ಗುರಿಯಾಗಿತ್ತು ಎಂದು ಖಚಿತವಾಗಿ ಸಾಬೀತುಪಡಿಸದ ಹೊರತು, ಅದನ್ನು ಅಪರಾಧ ಎಂದು ಪರಿಗಣಿಸಬಾರದು ಎಂಬುವುದು ಅಮೆರಿಕದ ವಾದವಾಗಿದೆ.
ನರಮೇಧದಂತಹ ದೊಡ್ಡ ಆರೋಪ ಮಾಡುವಾಗ ನ್ಯಾಯಾಲಯವು ಸಾಧಾರಣ ಸಾಕ್ಷ್ಯಗಳನ್ನು ನಂಬಬಾರದು, ಬದಲಿಗೆ ಅತ್ಯಂತ ಪ್ರಬಲವಾದ ಮತ್ತು ಕಟ್ಟುನಿಟ್ಟಾದ ಸಾಕ್ಷ್ಯಗಳನ್ನು ಕೇಳಬೇಕು. ಒಂದು ದೇಶದ ನಡವಳಿಕೆಯನ್ನು ನೋಡಿದಾಗ, ‘ಇವರು ಜನರನ್ನು ನಾಶಪಡಿಸಲೆಂದೇ ಹೀಗೆ ಮಾಡುತ್ತಿದ್ದಾರೆ’ ಎಂಬ ತೀರ್ಮಾನಕ್ಕೆ ಬರಲು ಬೇರೆ ಯಾವುದೇ ಕಾರಣಗಳು ಇಲ್ಲದಿದ್ದಾಗ ಮಾತ್ರ ಅದನ್ನು ನರಮೇಧ ಎಂದು ಕರೆಯಬೇಕು. ಇಸ್ರೇಲ್‌ನ ಕ್ರಮಗಳು ಕೇವಲ ಯುದ್ಧದ ಭಾಗವಾಗಿರದೆ, ಒಂದು ಜನಾಂಗವನ್ನು ಮುಗಿಸುವ ಸಂಚು ಎಂಬುವುದು ಪಕ್ಕಾ ಸಾಬೀತಾಗಬೇಕು ಎಂದು ಅಮೆರಿಕದ ಹೇಳಿದೆ.
ನರಮೇಧದ ಆರೋಪಗಳನ್ನು ಪರಿಶೀಲಿಸುವಾಗ, ಅಲ್ಲಿ ನಡೆಯುತ್ತಿರುವ ಯುದ್ಧದ ಪರಿಸ್ಥಿತಿಯನ್ನು ಗಣನೆಗೆ ತೆಗೆದುಕೊಳ್ಳಬೇಕು ಎಂದು ಅಮೆರಿಕ ಒತ್ತಿ ಹೇಳಿದೆ. ನಗರಗಳಂತಹ ಜನನಿಬಿಡ ಪ್ರದೇಶಗಳಲ್ಲಿ ಯುದ್ಧ ನಡೆಯುವಾಗ ನಾಗರಿಕರಿಗೆ ಹಾನಿಯಾಗುವುದು ಸಹಜ. ಅಂತಹ ಸಾವುಗಳು ಸಂಭವಿಸಿದ ತಕ್ಷಣ ಅದನ್ನು ನರಮೇಧ ಮಾಡುವ ಉದ್ದೇಶ ಎಂದು ಕರೆಯಲು ಬರುವುದಿಲ್ಲ. ಯುದ್ಧದಲ್ಲಿ ‘ಪಕ್ಷಪಾತವಿಲ್ಲದ ದಾಳಿ’ ಮತ್ತು ‘ಅಗತ್ಯಕ್ಕೆ ತಕ್ಕಷ್ಟು ಬಲಪ್ರಯೋಗ’ ಎಂಬ ನಿಯಮಗಳಿವೆ. ಇಸ್ರೇಲ್ ಈ ನಿಯಮಗಳ ಅಡಿಯಲ್ಲೇ ಕಾರ್ಯನಿರ್ವಹಿಸುತ್ತಿದೆ ಹೊರತು, ಜನರನ್ನು ನಾಶಪಡಿಸುವ ಉದ್ದೇಶದಿಂದಲ್ಲ ಎಂದು ಅಮೆರಿಕ ವಾದಿಸಿದೆ.
ನರಮೇಧ ಆರೋಪದ ಪ್ರಮುಖ ನಿಯಮಗಳನ್ನು (ವಿಧಿ 1, 2 ಮತ್ತು 3) ನ್ಯಾಯಾಲಯವು ಹೇಗೆ ಅರ್ಥೈಸಬೇಕು ಎಂಬುವುದರ ಮೇಲೆ ಪ್ರಭಾವ ಬೀರಲು ಅಮೆರಿಕ ಪ್ರಯತ್ನಿಸುತ್ತಿದೆ. ನರಮೇಧ ಎಂದರೇನು? ಅದನ್ನು ಹೇಗೆ ನಿರ್ಧರಿಸಬೇಕು? ಮತ್ತು ಅದಕ್ಕೆ ಯಾವ ಪುರಾವೆಗಳು ಬೇಕು? ಎಂಬ ವಿಷಯಗಳಲ್ಲಿ ಇಸ್ರೇಲ್‌ಗೆ ಅನುಕೂಲವಾಗುವಂತೆ ಕಾನೂನು ವಿವರಣೆ ನೀಡಲು ಅಮೆರಿಕ ಮುಂದಾಗಿದೆ. ನರಮೇಧವನ್ನು ಅಪರಾಧ ಎಂದು ಪರಿಗಣಿಸುವ ಮಾನದಂಡಗಳನ್ನು ಹೆಚ್ಚು ಕಠಿಣಗೊಳಿಸುವುದು ಅಮೆರಿಕದ ಉದ್ದೇಶವಾಗಿದೆ, ಇದರಿಂದ ಇಸ್ರೇಲ್ ಮೇಲಿನ ಆರೋಪಗಳು ಸಾಬೀತಾಗುವುದು ಕಷ್ಟವಾಗುತ್ತದೆ.
ಪ್ರಕರಣದಲ್ಲಿ ಜಾಗತಿಕ ಪಾಲ್ಗೊಳ್ಳುವಿಕೆ
ಈ ಪ್ರಕರಣವು ಎಷ್ಟು ಮುಖ್ಯವಾಗಿದೆಯೆಂದರೆ, ವಿಶ್ವದ ಅನೇಕ ದೇಶಗಳು ಇದರಲ್ಲಿ ಭಾಗಿಯಾಗಲು ಆಸಕ್ತಿ ತೋರಿಸಿವೆ. ಕೊಲಂಬಿಯಾ, ಮೆಕ್ಸಿಕೋ, ಟರ್ಕಿ, ಸ್ಪೇನ್, ಐರ್ಲೆಂಡ್, ಬ್ರೆಝಿಲ್ ಮತ್ತು ಬೆಲ್ಜಿಯಂ ಸೇರಿದಂತೆ ಹಲವಾರು ರಾಷ್ಟ್ರಗಳು ಈಗಾಗಲೇ ಮಧ್ಯಪ್ರವೇಶದ ಅರ್ಜಿಗಳನ್ನು ಸಲ್ಲಿಸಿವೆ.
ಕಳೆದ ಕೆಲವು ತಿಂಗಳುಗಳಲ್ಲಿ ಈ ದೇಶಗಳು ತಮ್ಮ ನಿಲುವನ್ನು ನ್ಯಾಯಾಲಯಕ್ಕೆ ತಿಳಿಸಿವೆ. ಇದು ಕೇವಲ ಎರಡು ದೇಶಗಳ ನಡುವಿನ ಸಮಸ್ಯೆಯಾಗಿ ಉಳಿಯದೆ, ಇಡೀ ವಿಶ್ವದ ಗಮನ ಸೆಳೆದಿರುವ ಪ್ರಕರಣವಾಗಿದೆ.
ನ್ಯಾಯಾಲಯದ ನಿಯಮಗಳ ಪ್ರಕಾರ, ಹೊಸದಾಗಿ ಸಲ್ಲಿಕೆಯಾಗಿರುವ ಈ ಮಧ್ಯಪ್ರವೇಶದ ಅರ್ಜಿಗಳ ಕುರಿತು ತಮ್ಮ ಲಿಖಿತ ಅಭಿಪ್ರಾಯವನ್ನು ಸಲ್ಲಿಸುವಂತೆ ಇಸ್ರೇಲ್ ಮತ್ತು ದಕ್ಷಿಣ ಆಫ್ರಿಕಾ ಎರಡೂ ದೇಶಗಳಿಗೆ ಅಂತಾರಾಷ್ಟ್ರೀಯ ನ್ಯಾಯಾಲಯ ಸೂಚಿಸಿದೆ.
ಅಂತಾರಾಷ್ಟ್ರೀಯ ನ್ಯಾಯಾಲಯವು ಈ ಪ್ರಕರಣಕ್ಕೆ ಸಂಬಂಧಿಸಿದಂತೆ ಈಗಾಗಲೇ ಹಲವು ಆದೇಶಗಳನ್ನು ನೀಡಿದೆ.
ಜನವರಿ 2024ರಂದು ನರಮೇಧ ಎಂದು ಪರಿಗಣಿಸುವ ಯಾವುದೇ ಕೃತ್ಯಗಳು ನಡೆಯದಂತೆ ತಡೆಯಲು ಇಸ್ರೇಲ್‌ಗೆ ನ್ಯಾಯಾಲಯ ಸೂಚಿಸಿತ್ತು. ಗಾಝಾದ ಜನರಿಗೆ ತುರ್ತಾಗಿ ಅಗತ್ಯವಿರುವ ಮೂಲಭೂತ ಸೇವೆಗಳು ಮತ್ತು ಮಾನವೀಯ ಸಹಾಯವನ್ನು ಒದಗಿಸಲು ಇಸ್ರೇಲ್ ತಕ್ಷಣದ ಕ್ರಮಗಳನ್ನು ತೆಗೆದುಕೊಳ್ಳಬೇಕು ಎಂದು ಆದೇಶಿಸಿತ್ತು.
ಪ್ರಕರಣಕ್ಕೆ ಸಂಬಂಧಿಸಿದ ಯಾವುದೇ ಪುರಾವೆಗಳು ಅಥವಾ ಸಾಕ್ಷ್ಯಗಳು ನಾಶವಾಗದಂತೆ ನೋಡಿಕೊಳ್ಳಲು ಮತ್ತು ಅವುಗಳನ್ನು ಸಂರಕ್ಷಿಸಲು ಸೂಚಿಸಿತ್ತು. ಈ ಆದೇಶಗಳನ್ನು ಜಾರಿಗೆ ತರಲು ತಾನು ಕೈಗೊಂಡ ಕ್ರಮಗಳ ಬಗ್ಗೆ ಒಂದು ತಿಂಗಳೊಳಗೆ ನ್ಯಾಯಾಲಯಕ್ಕೆ ವರದಿ ಸಲ್ಲಿಸುವಂತೆ ಇಸ್ರೇಲ್‌ಗೆ ತಿಳಿಸಿತ್ತು.
ಇನ್ನು, ಇದು ಅತ್ಯಂತ ಸಂಕೀರ್ಣವಾದ ಪ್ರಕರಣವಾಗಿದ್ದು, ಅಂತಿಮ ತೀರ್ಪು ಹೊರಬರಲು ಹಲವು ವರ್ಷಗಳು (ಬಹುಶಃ 2028ರವರೆಗೆ) ಹಿಡಿಯಬಹುದು ಎಂದು ಅಂದಾಜಿಸಲಾಗಿದೆ.
