ದೆಹಲಿಯ ಭಾರತ್ ಮಂಟಪಂನಲ್ಲಿ ಆಯೋಜಿಸಿದ್ದ ‘ಚಿನ್ಮಯ ಅಮೃತ ಮಹೋತ್ಸವ’ ಜಾಗತಿಕ ಸಮ್ಮೇಳನದ ವೇದಿಕೆ ಇತ್ತೀಚೆಗೆ ವಿಶಿಷ್ಟ ತಾಂತ್ರಿಕ ಪ್ರದರ್ಶನವೊಂದಕ್ಕೆ ಸಾಕ್ಷಿಯಾಯಿತು. 1993ರಲ್ಲೇ ಇಹಲೋಕ ತ್ಯಜಿಸಿದ್ದ ಚಿನ್ಮಯ ಮಿಷನ್ ಸಂಸ್ಥಾಪಕ ಸ್ವಾಮಿ ಚಿನ್ಮಯಾನಂದ ಅವರ 3D ಎಐ (AI/Hologram) ಮಾದರಿಯನ್ನು ವೇದಿಕೆಯಲ್ಲಿ ಪ್ರದರ್ಶಿಸಲಾಯಿತು. ಈ ಡಿಜಿಟಲ್ ಪ್ರತಿರೂಪದ ಮುಂದೆ ನಿಂತ ಪ್ರಧಾನಿ ನರೇಂದ್ರ ಮೋದಿ, ಸ್ವಾಮಿ ಚಿನ್ಮಯಾನಂದರೊಂದಿಗಿನ ತಮ್ಮ ಹಿಂದಿನ ಭೇಟಿಯನ್ನು ಸ್ಮರಿಸುತ್ತಾ, “ನಿಮ್ಮನ್ನು ಭೇಟಿಯಾಗುವ ಭಾಗ್ಯ ನನಗೆ ಸಿಕ್ಕಿತ್ತು. ನಾನು ನೆರವೇರಿಸಲು ಬಯಸುವ ಕಾರ್ಯಗಳಿಗೆ ಇಂದಿಗೂ ನಿಮ್ಮ ಆಶೀರ್ವಾದ ಕೋರುತ್ತೇನೆ” ಎಂದು ವಿನಂತಿಸಿಕೊಂಡರು.
ಸ್ವಾಮೀಜಿಯವರ ಹಳೆಯ ಧ್ವನಿ, ಉಪನ್ಯಾಸಗಳು ಮತ್ತು ದಾಖಲೆಗಳನ್ನು ಆಧರಿಸಿ ಪ್ರೋಗ್ರಾಮ್ ಮಾಡಲಾಗಿತ್ತು ಎನ್ನಲಾದ ಆ ಎಐ ಹೋಲೋಗ್ರಾಮ್, “ಹರಿ ಓಂ, ನರೇಂದ್ರ!” ಎಂದು ಸಂಭಾಷಣೆ ಆರಂಭಿಸಿತು. 1893ರ ಶಿಕಾಗೋ ವಿಶ್ವ ಧರ್ಮ ಸಂಸತ್ತಿನ 100ನೇ ವರ್ಷದ ಆಚರಣೆಗೆ ಆಹ್ವಾನಿಸಲು, 1993ರ ಫೆಬ್ರವರಿಯಲ್ಲಿ ನರೇಂದ್ರ ಮೋದಿಯವರು ತಮ್ಮ ಬಳಿ ವಡೋದರಾಗೆ ಬಂದಿದ್ದ ಸನ್ನಿವೇಶವನ್ನು ಸ್ವಾಮಿ ಚಿನ್ಮಯಾನಂದರ ಆ ಎಐ ರೂಪ ನೆನಪಿಸಿತು. ಸನಾತನ ಧರ್ಮವು ಸತ್ಯದ ಭವ್ಯ ಪ್ರಾಚೀನ ದೇವಾಲಯವಿದ್ದಂತೆ; ಶತಮಾನಗಳಿಂದ ನಿರ್ಲಕ್ಷ್ಯಕ್ಕೊಳಗಾಗಿದ್ದ ಇದರ ಸ್ತಂಭಗಳನ್ನು ಮರುನಿರ್ಮಿಸುವ ಜವಾಬ್ದಾರಿ ಯುವಕರ ಮೇಲಿದೆ ಎಂದು ಆ ಎಐ ರೂಪ ಪ್ರತಿಪಾದಿಸಿತು. ಆ ಸಂವಾದದ ಕೊನೆಯಲ್ಲಿ ಪ್ರಧಾನಿಗೆ ಎಚ್ಚರಿಕೆಯ ನುಡಿಯನ್ನೂ ನೀಡಿದ ಹೋಲೋಗ್ರಾಮ್, “ಪ್ರಧಾನಿಯವರೇ, ಉನ್ನತ ಸ್ಥಾನದಲ್ಲಿರುವ ವ್ಯಕ್ತಿ ಯಾವಾಗಲೂ ಒಂಟಿಯಾಗಿರುತ್ತಾನೆ ಎಂಬುದು ನೆನಪಿರಲಿ. ಭಕ್ತರಿಗೆ ನಿಮಗೆ ಶ್ರೀಖಂಡ್ ಪ್ರಸಾದ ನೀಡಲು ಹೇಳಿದ್ದೇನೆ, ಇವತ್ತು ಉಪವಾಸವೆಂದು ಹೇಳದೆ ಸ್ವೀಕರಿಸಿ. ಇಡೀ ಭಾರತ ನಿಮ್ಮೊಂದಿಗಿದೆ” ಎಂದು ನುಡಿಯಿತು. ಈ ಎಐ ಸಂವಾದದ ನಂತರ ಮಾತನಾಡಿದ ಪ್ರಧಾನಿ ಮೋದಿ, ‘ಇದನ್ನು ಕಂಡು ನಾನು 33 ವರ್ಷಗಳ ಹಿಂದಿನ ಸಮಯಕ್ಕೆ ಮರಳಿದ ಅನುಭವವಾಯಿತು’ ಎನ್ನುತ್ತಾ ಭಾವುಕರಾದರು.
ಆದರೆ, ಈ ವೇದಿಕೆಯಲ್ಲಿ ಪ್ರದರ್ಶನಗೊಂಡ ಎಐ ಸಂಭಾಷಣೆಯು ಸ್ವಾಮೀಜಿಯವರ ಹಳೆಯ ಧ್ವನಿ, ಉಪನ್ಯಾಸಗಳು ಮತ್ತು ದಾಖಲೆಗಳನ್ನು ಆಧರಿಸಿ ತಾಂತ್ರಿಕವಾಗಿ ಪ್ರೋಗ್ರಾಮ್ ಮಾಡಲಾಗಿತ್ತು ಎನ್ನಲಾದ ಹಿನ್ನೆಲೆಯಲ್ಲೇ, ಸಾಮಾಜಿಕ ಮಾಧ್ಯಮಗಳಲ್ಲಿ ಹೊಸ ವೈಚಾರಿಕ ಚರ್ಚೆಯೊಂದು ಹುಟ್ಟಿಕೊಂಡಿತು. ಈ ಎಐ ಆಧಾರಿತ ಧಾರ್ಮಿಕ ಪ್ರದರ್ಶನದ ವೀಡಿಯೋಗಳು ಪ್ರಸಾರವಾಗುತ್ತಿದ್ದಂತೆಯೇ, ಯೂಟ್ಯೂಬ್ ಹಾಗೂ ವಿವಿಧ ಸಾಮಾಜಿಕ ಮಾಧ್ಯಮಗಳಲ್ಲಿ ಸ್ವಾಮಿ ಚಿನ್ಮಯಾನಂದರು ತಮ್ಮ ಜೀವಿತಾವಧಿಯಲ್ಲಿ ಧರ್ಮ ಮತ್ತು ಮಾನವ ಸಮುದಾಯದ ನಡವಳಿಕೆಯ ಕುರಿತು ನೀಡಿದ್ದ ಮೂಲ ಪ್ರವಚನದ ತುಣುಕೊಂದು ಭಾರೀ ಸದ್ದು ಮಾಡಲು ಪ್ರಾರಂಭಿಸಿತು. ಆ ಹಳೆಯ ಪ್ರವಚನದ ವೀಡಿಯೋದಲ್ಲಿ ಸ್ವಾಮೀಜಿಯವರು, “ಕೇವಲ ದುಷ್ಟರಿಗಷ್ಟೇ ಅಥವಾ ವಿಕಾರ ಮನಸ್ಥಿತಿಯವರಿಗಷ್ಟೇ ಧರ್ಮದ ಅಗತ್ಯವಿರುತ್ತದೆ, ಸದ್ಗುಣಿಯಾದ ಒಳ್ಳೆಯ ಮನುಷ್ಯನಿಗೆ ಯಾವುದೇ ಧರ್ಮದ ಹಂಗಿರುವುದಿಲ್ಲ” ಎಂದು ಅತ್ಯಂತ ತೀಕ್ಷ್ಣವಾಗಿ ಪ್ರತಿಪಾದಿಸಿದ್ದರು. ಇದನ್ನು ಸಮರ್ಥಿಸಲು ವೈದ್ಯರ ಉದಾಹರಣೆ ನೀಡಿದ್ದ ಅವರು, “ಯಾವ ಆರೋಗ್ಯವಂತ ವ್ಯಕ್ತಿಯೂ ನನ್ನ ಬಳಿ ಬರುವುದಿಲ್ಲ, ಬರೀ ರೋಗಿಗಳೇ ಬರುತ್ತಾರೆ ಎಂದು ದೂರಿ ರಾಜೀನಾಮೆ ನೀಡುವ ಯಾವ ವೈದ್ಯನಾದರೂ ಇದ್ದಾನೆಯೇ? ಖಂಡಿತ ಇಲ್ಲ…” ಅದೇ ರೀತಿ, ಯಾವುದೇ ಯೋಗ್ಯ ಸ್ವಾಮೀಜಿ ಅಥವಾ ಆಧ್ಯಾತ್ಮಿಕ ಮಾರ್ಗದರ್ಶಕರ ಬಳಿಗೆ ಬರುವವರಲ್ಲಿ ದುಷ್ಟ ಅಥವಾ ದೋಷಪೂರಿತ ಜನರೇ ಇರುತ್ತಾರೆ. ಏಕೆಂದರೆ ಸಮಾಜದಲ್ಲಿನ ಅಂತಹ ವಿಕಾರ ಮತ್ತು ಅಪಾಯಕಾರಿ ಮನಸ್ಥಿತಿಯ ಜನರನ್ನು ತಿದ್ದುವುದು ಹಾಗೂ ಸನ್ಮಾರ್ಗಕ್ಕೆ ತರುವುದೇ ಧರ್ಮದ ಮೂಲ ಕೆಲಸವೇ ಹೊರತು ಮತ್ತೇನಕ್ಕೂ ಅಲ್ಲ” ಎಂದು ಸ್ಪಷ್ಟಪಡಿಸಿದ್ದರು.
ಹೀಗೆ ಒಂದು ಕಡೆ ಪ್ರಧಾನಿ ನರೇಂದ್ರ ಮೋದಿ ಅವರೊಂದಿಗಿನ ಎಐ ಹೋಲೋಗ್ರಾಮ್ ತಾಂತ್ರಿಕ ಸಂವಾದದ ಪ್ರದರ್ಶನ ಹಾಗೂ ಇನ್ನೊಂದೆಡೆ ಸ್ವಾಮಿ ಚಿನ್ಮಯಾನಂದರು ಧರ್ಮದ ಮೂಲ ಉದ್ದೇಶದ ಕುರಿತು ಆಡಿದ್ದ ಈ ಮಾತುಗಳು ಒಟ್ಟಾಗಿಯೇ ಸಾಮಾಜಿಕ ಜಾಲತಾಣಗಳಲ್ಲಿ ತೀವ್ರ ಚರ್ಚೆಗೆ ಗ್ರಾಸವಾಗಿದ್ದು, ಸ್ವಾಮೀಜಿಯವರ ಈ ಎರಡೂ ಸಂವಾದಗಳು ಈಗ ಇಡೀ ಘಟನೆಯ ಪ್ರಮುಖ ಮುಖ್ಯಾಂಶಗಳಾಗಿ ಮುನ್ನೆಲೆಗೆ ಬಂದಿವೆ.
