ದೆಹಲಿ ಎಸ್ಐಆರ್ ಪ್ರಕ್ರಿಯೆಯ ಭಾಗವಾಗಿ ಯಾರ ಹೆಸರುಗಳನ್ನು ಮತದಾರರ ಪಟ್ಟಿಯಿಂದ ಕೈಬಿಡಲಾಗಿದೆಯೋ, ಆ ಮತದಾರರ ಹೆಸರುಗಳನ್ನು ಮರುಸೇರ್ಪಡೆ ಮಾಡಲು ಫಾರಂ 6 ಅನ್ನು ಭರ್ತಿ ಮಾಡುವಂತೆ ಕೇಳಲಾಗುತ್ತಿರುವ ಹಿನ್ನೆಲೆ, ಸುಪ್ರೀಂ ಕೋರ್ಟ್ ಇಂದು (ಅ.14) ದೆಹಲಿ ಎಸ್ಐಆರ್ ಪ್ರಕರಣದ ವಿಚಾರಣೆಯನ್ನು ನಿಗದಿಗಿಂತ ಮೊದಲೇ ನಡೆಸಲು ನಿರ್ಧರಿಸಿದೆ.
ನ್ಯಾಯವಾದಿ ಪ್ರಶಾಂತ್ ಭೂಷಣ್ ಅವರ ವಾದವನ್ನು ಆಲಿಸಿದ ನಂತರ, ಮುಖ್ಯ ನ್ಯಾಯಮೂರ್ತಿ ಸೂರ್ಯಕಾಂತ್ ಮತ್ತು ನ್ಯಾಯಮೂರ್ತಿ ಜಾಯ್ಮಾಲ್ಯ ಬಾಗ್ಚಿ ಅವರನ್ನೊಳಗೊಂಡ ಪೀಠವು ವಿಚಾರಣೆಯ ದಿನಾಂಕವನ್ನು ಅಕ್ಟೋಬರ್ 30ರಿಂದ ಅಕ್ಟೋಬರ್ 28ಕ್ಕೆ ಬದಲಾಯಿಸಿದೆ ಎಂದು livelaw.in ವರದಿ ಮಾಡಿದೆ.
ಅಕ್ಟೋಬರ್ 30ರಂದು ಹೆಸರುಗಳ ಕೈಬಿಡುವಿಕೆಯನ್ನು ಸರಿಪಡಿಸಲು ಕೊನೆಯ ದಿನಾಂಕವಾಗಿರುವುದರಿಂದ, ಅಕ್ಟೋಬರ್ 28ರಂದು ನಡೆಯುವ ವಿಚಾರಣೆಯಿಂದ ಹೆಚ್ಚಿನ ಪ್ರಯೋಜನವಾಗದಿರಬಹುದು ಎಂದು ಭೂಷಣ್ ಪ್ರತಿಪಾದಿಸಿದಾಗ, ಮುಖ್ಯ ನ್ಯಾಯಮೂರ್ತಿಗಳು “ಇವೆಲ್ಲವನ್ನೂ ಪರಿಗಣನೆಗೆ ತೆಗೆದುಕೊಳ್ಳುವಂತಹ ಆದೇಶವೊಂದನ್ನು ಹೊರಡಿಸುವ ಬಗ್ಗೆ ನಾವು ಯೋಚಿಸುತ್ತಿದ್ದೇವೆ” ಎಂಬುವುದಾಗಿ ಹೇಳಿದ್ದಾರೆ ಎಂದು ವರದಿ ಉಲ್ಲೇಖಿಸಿದೆ.
ದೆಹಲಿ ಎಸ್ಐಆರ್ ವಿರುದ್ಧ ಬಾಕಿ ಇರುವ ಅರ್ಜಿಯಲ್ಲಿ, ಸಾಮಾಜಿಕ ಹೋರಾಟಗಾರರಾದ ಅಂಜಲಿ ಭಾರದ್ವಾಜ್ ಮತ್ತು ಅಮೃತಾ ಜೋಹ್ರಿ ಅವರು ಸಲ್ಲಿಸಿದ್ದ ಅರ್ಜಿಯ ಬಗ್ಗೆ ಭೂಷಣ್ ಪ್ರಸ್ತಾಪಿಸಿದ್ದಾರೆ.
“ಅವರು (ಚುನಾವಣಾ ಆಯೋಗದವರು) ಜನರಿಗೆ ‘ಫಾರ್ಮ್ 6’ ಅನ್ನು ಭರ್ತಿ ಮಾಡುವಂತೆ ಕೇಳುತ್ತಿದ್ದಾರೆ. ಆದರೆ, ನಾನು ಈ ಹಿಂದೆಂದೂ ಮತ ಚಲಾಯಿಸಿಲ್ಲ ಎಂಬ ಘೋಷಣೆಯು ಫಾರ್ಮ್ 6ರಲ್ಲಿ ಇರುತ್ತದೆ. ಒಂದು ವೇಳೆ ಜನರು ಸುಳ್ಳು ಘೋಷಣೆ ನೀಡಿದರೆ, ಅವರಿಗೆ ಜೈಲು ಶಿಕ್ಷೆ ವಿಧಿಸಬಹುದಾದ ಸಾಧ್ಯತೆಯಿರುತ್ತದೆ. ಆದ್ದರಿಂದ, ಸ್ಥಳ ಬದಲಾಯಿಸಿದ ಮತದಾರರಿಗಾಗಿ ಇರುವ ಫಾರ್ಮ್ 8 ಅನ್ನು ಭರ್ತಿ ಮಾಡಲು ಅಥವಾ ಇದಕ್ಕಾಗಿ ಬೇರೆ ಯಾವುದಾದರೂ ಹೊಸ ನಮೂನೆಯನ್ನು ರೂಪಿಸಲು ಭಾರತೀಯ ಚುನಾವಣಾ ಆಯೋಗಕ್ಕೆ ನಿರ್ದೇಶನ ನೀಡಬೇಕೆಂದು ನಾವು ಕೋರುತ್ತಿದ್ದೇವೆ” ಎಂದು ಪ್ರಶಾಂತ್ ಭೂಷಣ್ ನ್ಯಾಯಾಲಯಕ್ಕೆ ತಿಳಿಸಿದ್ದರು. ಈ ವಿಷಯವನ್ನು ಶುಕ್ರವಾರದಂದು ವಿಚಾರಣಾ ಪಟ್ಟಿಯಲ್ಲಿ ಸೇರಿಸಬೇಕೆಂದು ಅವರು ಮನವಿ ಮಾಡಿದ್ದರು.
ಈ ಕೋರಿಕೆಯನ್ನು ಆಲಿಸಿದ ನ್ಯಾಯಾಲಯ, ಅಂತಿಮವಾಗಿ ಮುಖ್ಯ ವಿಷಯವನ್ನು ಅಕ್ಟೋಬರ್ 28ಕ್ಕೆ ನಿಗದಿಪಡಿಸಿತು ಎಂದು livelaw.in ವರದಿ ಉಲ್ಲೇಖಿಸಿದೆ.
ನೋಟಿಸ್‌ಗಳನ್ನು ಪಡೆದ ಮತದಾರರ ಹೆಸರುಗಳು ಹಾಗೂ ಆ ನೋಟಿಸ್‌ಗಳನ್ನು ನೀಡಲು ಕಾರಣವಾದ ನಿರ್ದಿಷ್ಟ ಅಂಶಗಳನ್ನು ಸಮರ್ಪಕವಾಗಿ ಬಹಿರಂಗಪಡಿಸುವಲ್ಲಿ ಭಾರತೀಯ ಚುನಾವಣಾ ಆಯೋಗ ಮತ್ತು ದೆಹಲಿಯ ಮುಖ್ಯ ಚುನಾವಣಾ ಅಧಿಕಾರಿ ವಿಫಲರಾಗಿದ್ದಾರೆ ಎಂದು ಮುಖ್ಯ ಅರ್ಜಿಯಲ್ಲಿ ಆರೋಪಿಸಲಾಗಿದೆ. ಅಂಜಲಿ ಭಾರದ್ವಾಜ್ ಮತ್ತು ಅಮೃತಾ ಜೋಹ್ರಿ ಅವರೂ ಸಲ್ಲಿಸಿರುವ ಈ ಅರ್ಜಿಯು, ‘ತಾರ್ಕಿಕ ವ್ಯತ್ಯಾಸಗಳು’ ಎಂಬ ವರ್ಗದ ಅಡಿಯಲ್ಲಿ ಮತದಾರರನ್ನು ವರ್ಗೀಕರಿಸಲು ಅನ್ವಯವಾಗುವ ಮಾನದಂಡಗಳು, ವ್ಯಾಖ್ಯಾನಗಳು, ಅಲ್ಗಾರಿದಮಿಕ್ ನಿಯತಾಂಕಗಳು ಮತ್ತು ಕಾರ್ಯಾಚರಣೆಯ ಮಾರ್ಗಸೂಚಿಗಳನ್ನು ಬಹಿರಂಗಪಡಿಸುವಂತೆ ಕೋರಿದೆ.
ದೆಹಲಿ ಎಸ್ಐಆರ್ ಸಮಯದಲ್ಲಿ ಮತದಾರರಿಗೆ ನೋಟಿಸ್‌ಗಳನ್ನು ‘ಬಹುತೇಕ ಯಾಂತ್ರಿಕವಾಗಿ’ ನೀಡಲಾಗಿದೆ ಎಂದು ಸುಪ್ರೀಂ ಕೋರ್ಟ್ ಇತ್ತೀಚೆಗೆ ಚುನಾವಣಾ ಆಯೋಗಕ್ಕೆ ಹೇಳಿತ್ತು. ‘ತಾರ್ಕಿಕ ವ್ಯತ್ಯಾಸ’ ವನ್ನು ಗುರುತಿಸಲು ಆಧಾರವು ಸ್ಪಷ್ಟೀಕರಣದ ಅಗತ್ಯವಿದೆ ಎಂದಿತ್ತು.
