ಯೆಮನ್‌ನ ರೆಬೆಲ್ ಗ್ರೂಪ್ ಹೌತಿ ಮತ್ತು ಸೌದಿ ಬೆಂಬಲಿತ ಪಡೆಗಳ ಸಂಘರ್ಷ ತೀವ್ರಗೊಂಡಿದ್ದು, ಇತಿಹಾಸದಲ್ಲೇ ಮೊದಲ ಬಾರಿಗೆ ಮುಸ್ಲಿಮರ ಪವಿತ್ರ ನಗರ ಮಕ್ಕಾದಲ್ಲಿ ಸೌದಿ ಅರೇಬಿಯಾದ ನಾಗರಿಕ ರಕ್ಷಣಾ (ಸಿವಿಲ್ ಡಿಫೆನ್ಸ್) ಇಲಾಖೆಯು ಸಂಭವನೀಯ ವೈಮಾನಿಕ ದಾಳಿಯ ಬಗ್ಗೆ ಎಚ್ಚರಿಸುವ ತುರ್ತು ಸಂದೇಶವನ್ನು ಹೊರಡಿಸಿತ್ತು ಎಂದು ವರದಿಯಾಗಿದೆ.
ಅಪಾಯದ ಪರಿಸ್ಥಿತಿ ತೆರವಾಗುವವರೆಗೆ ಜನರು ಸುರಕ್ಷಿತ ಸ್ಥಳಗಳಿಗೆ ತೆರಳುವಂತೆ ಹಾಗೂ ಕಿಟಕಿ ಮತ್ತು ಬಾಗಿಲುಗಳಿಂದ ದೂರವಿರುವಂತೆ ಸೆಪ್ಟೆಂಬರ್ 15, ಮಂಗಳವಾರ ಹೊರಡಿಸಿದ ಎಚ್ಚರಿಕೆ ಸಂದೇಶದಲ್ಲಿ ಸೂಚಿಸಲಾಗಿತ್ತು. ಇದೇ ರೀತಿಯ ಎಚ್ಚರಿಕೆಗಳನ್ನು ಜಿದ್ದಾ ಮತ್ತು ತಾಯಿಫ್ ಗವರ್ನರೇಟ್‌ಗಳಿಗೂ ನೀಡಲಾಗಿತ್ತು. ಆದರೆ, ಕೆಲವೇ ನಿಮಿಷಗಳಲ್ಲಿ ಎಚ್ಚರಿಕೆಯನ್ನು ಹಿಂಪಡೆಯಲಾಗಿದೆ ಎಂದು timesofindia.indiatimes.com ವರದಿ ತಿಳಿಸಿದೆ.
ಮುಸ್ಲಿಮರ ಅತ್ಯಂತ ಪವಿತ್ರ ಸ್ಥಳವಾದ ಮಕ್ಕಾವನ್ನು ಗುರಿಯಾಗಿಸಿಕೊಂಡು ಹೌತಿಗಳು ಉಡಾಯಿಸಿದ್ದ ಡ್ರೋನ್ ಒಂದನ್ನು ಹೊಡೆದುರುಳಿಸಿ ನಾಶಪಡಿಸಲಾಗಿದೆ ಎಂದು ಸೌದಿ ಅರೇಬಿಯಾ ತಿಳಿಸಿದೆ. ಆದರೆ, ಈ ಹೇಳಿಕೆಯನ್ನು ತಳ್ಳಿಹಾಕಿರುವ ಹೌತಿ, “ಇದು ಅಸಹ್ಯಕರ ಸುಳ್ಳು” ಎಂದಿದೆ ಎಂಬುವುದಾಗಿ aljazeera.com ವರದಿ ಮಾಡಿದೆ.
ಮಕ್ಕಾ ಮತ್ತು ಮದೀನಾ ಪ್ರದೇಶಗಳ ಮೇಲೆ ಹೌತಿಗಳು ನಡೆಸಿದ್ದಾರೆ ಎನ್ನಲಾದ ದಾಳಿಯನ್ನು ‘ಹೇಯ ಕೃತ್ಯ’ ಎಂದಿರುವ ಇಸ್ಲಾಮಿಕ್ ಸಹಕಾರ ಸಂಘಟನೆಯು (OIC), ತೀವ್ರ ಖಂಡನೆ ವ್ಯಕ್ತಪಡಿಸಿದೆ. ಈ ದಾಳಿಗಳು ನಾಗರಿಕರಿಗೆ ಬೆದರಿಕೆ ಒಡ್ಡಿವೆ, ಪವಿತ್ರ ಸ್ಥಳಗಳು ಮತ್ತು ಮಸೀದಿಗಳ ಪವಿತ್ರತೆಯನ್ನು ಉಲ್ಲಂಘಿಸಿವೆ ಹಾಗೂ ವಿಶ್ವದಾದ್ಯಂತ ಇರುವ ಮುಸ್ಲಿಮರ ಭಾವನೆಗಳನ್ನು ಕೆರಳಿಸಿವೆ ಎಂದು ಸಂಘಟನೆಯು ಹೇಳಿದೆ.
ಪವಿತ್ರ ಸ್ಥಳಗಳು, ಮಸೀದಿಗಳು ಮತ್ತು ನಾಗರಿಕ ಮೂಲಸೌಕರ್ಯಗಳ ಮೇಲಿನ ದಾಳಿಯನ್ನು ‘ಭಯೋತ್ಪಾದನೆ’ ಎಂದು ಬಣ್ಣಿಸಿರುವ ಓಐಸಿ, ಇಂತಹ ಸ್ವೀಕಾರ್ಹವಲ್ಲ ಎಂದಿದೆ. ಸಂಘಟನೆಯು ಸೌದಿ ಅರೇಬಿಯಾದೊಂದಿಗೆ ತನ್ನ ಒಗ್ಗಟ್ಟನ್ನು ವ್ಯಕ್ತಪಡಿಸಿದ್ದು, ತನ್ನ ಭದ್ರತೆ, ಸಾರ್ವಭೌಮತ್ವ, ನಾಗರಿಕರು ಮತ್ತು ಪವಿತ್ರ ಸ್ಥಳಗಳನ್ನು ರಕ್ಷಿಸಲು ಸೌದಿ ಸರ್ಕಾರ ಕೈಗೊಳ್ಳುವ ಎಲ್ಲಾ ಕ್ರಮಗಳನ್ನು ಬೆಂಬಲಿಸುವುದಾಗಿ ತಿಳಿಸಿದೆ.
