ಬೆಂಗಳೂರು: ದೇವನಹಳ್ಳಿ ತಾಲೂಕಿನ ಚನ್ನರಾಯಪಟ್ಟಣ ಹೋಬಳಿಯಲ್ಲಿ ಭೂಸ್ವಾಧೀನ ಪ್ರಕ್ರಿಯೆಯ ವಿರುದ್ಧ ರೈತರು ನಡೆಸುತ್ತಿರುವ ಹೋರಾಟ 1197 ದಿನಗಳನ್ನು ಪೂರೈಸಿದೆ. ಈ ನಿರಂತರ ಹೋರಾಟದ ಭಾಗವಾಗಿ, ಇಂದು ‘ಗ್ರಾಮ ಸಂಕಲ್ಪ ಸಮಾವೇಶ’ ನಡೆಯಿತು. 13 ಗ್ರಾಮಗಳ ರೈತರು ಈ ಸಮಾವೇಶದಲ್ಲಿ ಭಾಗವಹಿಸಿ, ಕರ್ನಾಟಕದ ಜನಸಂಘಟನೆಗಳ ಪ್ರತಿನಿಧಿಗಳ ಸಮ್ಮುಖದಲ್ಲಿ ಭಾವುಕ ಪ್ರತಿಜ್ಞೆ ಮಾಡಿದರು. ಪ್ರತಿ ರೈತರೂ ತಮ್ಮ ಎದೆಗೆ ಕೈಯಿಟ್ಟು, “ನಮ್ಮ ಪ್ರಾಣ ಹೋದರೂ ಈ ಮಣ್ಣನ್ನು ನಾವು ಮಾರಿಕೊಳ್ಳುವುದಿಲ್ಲ. ನೀವೆಷ್ಟೇ ನಮ್ಮನ್ನು ಕಾಡಿಸಿದರೂ ಈ ಹಸಿರನ್ನು ನಾಶಮಾಡಲು ನಾವು ಬಿಡುವುದಿಲ್ಲ” ಎಂದು ಘೋಷಿಸುವ ಮೂಲಕ ತಮ್ಮ ಅಚಲ ಸಂಕಲ್ಪವನ್ನು ಹೊರಹಾಕಿದರು.
ಈ ರೈತರು ಶತಮಾನಗಳಿಂದ ತಮ್ಮ ಭೂಮಿ ಮತ್ತು ಕೃಷಿ ಬದುಕನ್ನು ಅತೀವವಾಗಿ ಪ್ರೀತಿಸುತ್ತಾ ಬಂದಿದ್ದಾರೆ. ಪೂರ್ವಜರಿಂದ ಬಂದ ಈ ಅಮೂಲ್ಯ ಬಳುವಳಿಯನ್ನು ಉಳಿಸಿಕೊಳ್ಳಲು ಮತ್ತು ಭೂಮಿಯೊಂದಿಗಿನ ತಮ್ಮ ನಂಟನ್ನು ಎಂದಿಗೂ ಕಡಿದುಕೊಳ್ಳಬಾರದು ಎಂಬ ದೃಢ ನಿಲುವಿನಿಂದಲೇ ಈ ಹೋರಾಟವನ್ನು ನಡೆಸುತ್ತಿದ್ದಾರೆ. ಇದು ಕೇವಲ ಭೂಮಿಯ ಹಕ್ಕಿನ ಹೋರಾಟವಲ್ಲ, ಬದಲಿಗೆ ಅವರ ಜೀವನಶೈಲಿ, ಸಂಸ್ಕೃತಿ ಮತ್ತು ಅಸ್ತಿತ್ವವನ್ನು ಉಳಿಸಿಕೊಳ್ಳುವ ಹೋರಾಟವಾಗಿದೆ.
ಸಮಾವೇಶದಲ್ಲಿ ರೈತರು ತಮ್ಮ ನೋವು ಮತ್ತು ಸವಾಲುಗಳನ್ನು ಹಂಚಿಕೊಂಡರು. “ಇಂದು ನಮ್ಮ ಒಗ್ಗಟ್ಟನ್ನು ಮುರಿಯಲು, ಹಣದ ದುರಾಸೆ ತೋರಿಸಲು ಮತ್ತು ಬೆದರಿಸಲು ಸರ್ಕಾರ ಹಾಗೂ ಕೆಲವು ಶಕ್ತಿಗಳು ಪ್ರಯತ್ನಿಸುತ್ತಿವೆ” ಎಂದು ಅವರು ಆರೋಪಿಸಿದರು. ಇಂತಹ ಪ್ರಯತ್ನಗಳ ನಡುವೆಯೂ, ಕರ್ನಾಟಕದ ಸಮಸ್ತ ಜನಸಂಘಟನೆಗಳು ಮತ್ತು ಜನವರ್ಗಗಳ ಪ್ರತಿನಿಧಿಗಳ ಮುಂದೆ ತಾವು ಮತ್ತೊಮ್ಮೆ ಈ ಮಹಾ ಪ್ರತಿಜ್ಞೆ ಮಾಡುತ್ತಿರುವುದಾಗಿ ಘೋಷಿಸಿದರು.
ಈ ಪ್ರತಿಜ್ಞೆಯು ದೇವನಹಳ್ಳಿ ರೈತರ ಸಾಮೂಹಿಕ ಶಕ್ತಿ ಮತ್ತು ಒಗ್ಗಟ್ಟಿನ ಸಂಕೇತವಾಗಿದೆ. ಭೂಮಿಯ ಮೇಲಿನ ಅವರ ಅಚಲ ಪ್ರೀತಿ ಮತ್ತು ಅದನ್ನು ಉಳಿಸಿಕೊಳ್ಳುವ ಛಲವು ಈ ಹೋರಾಟದ ಮುಖ್ಯ ಆಧಾರಸ್ತಂಭವಾಗಿದೆ. ಮುಂದಿನ ದಿನಗಳಲ್ಲಿ ಸರ್ಕಾರದ ನಿರ್ಧಾರ ಏನೇ ಇರಲಿ, ತಮ್ಮ ಭೂಮಿ ಮತ್ತು ಹಸಿರನ್ನು ಉಳಿಸಿಕೊಳ್ಳುವ ಹೋರಾಟವನ್ನು ಬಿಡದಿರಲು ರೈತರು ದೃಢ ನಿರ್ಧಾರ ಮಾಡಿದ್ದಾರೆ ಎಂದು ಸಮಾವೇಶದಲ್ಲಿ ಭಾಗವಹಿಸಿದ ಎಲ್ಲರೂ ಸ್ಪಷ್ಟಪಡಿಸಿದರು.
ಅಹಂಕಾರ-ಗಂಡಿನ ದರ್ಪದ ಮುಂದೆ ‘ತಾಯ್ತನ’ ಗೆಲ್ಲುತ್ತದೆ: ಚುಕ್ಕಿ ನಂಜುಂಡಸ್ವಾಮಿ
