ರಾಜಸ್ಥಾನ ಸ್ಥಳೀಯ ಸಂಸ್ಥೆಗಳ ಚುನಾವಣೆಯಲ್ಲಿ ಎಡಪಕ್ಷವಾದ ಸಿಪಿಐ(ಎಂ) (CPI-M) ಐತಿಹಾಸಿಕ ಸಾಧನೆ ಮಾಡಿದ್ದು, ಬಿಕಾನೇರ್ ಜಿಲ್ಲೆಯ ನೋಖಾ ನಗರ ಪಾಲಿಕೆಯ ಆಡಳಿತದ ಚುಕ್ಕಾಣಿಯನ್ನು ತನ್ನದಾಗಿಸಿಕೊಂಡಿದೆ. ಹಲವು ವರ್ಷಗಳಿಂದ ಬಿಜೆಪಿ ಹಾಗೂ ಎನ್‌ಸಿಪಿ (NCP) ಪಕ್ಷಗಳೇ ಪರ್ಯಾಯವಾಗಿ ಆಡಳಿತ ನಡೆಸಿಕೊಂಡು ಬರುತ್ತಿದ್ದ ನೋಖಾ ನಗರ ಪಾಲಿಕೆಯಲ್ಲಿ ಈ ಬಾರಿ ಸಿಪಿಐ(ಎಂ) ಭರ್ಜರಿ ಜಯಭೇರಿ ಬಾರಿಸುವ ಮೂಲಕ ಹೊಸ ಇತಿಹಾಸ ಬರೆದಿದೆ.
ನೋಖಾ ನಗರ ಪಾಲಿಕೆಯ ಒಟ್ಟು 45 ವಾರ್ಡ್‌ಗಳ ಪೈಕಿ ಸಿಪಿಐ(ಎಂ) ಬರೋಬ್ಬರಿ 29 ವಾರ್ಡ್‌ಗಳಲ್ಲಿ ಸ್ಪಷ್ಟ ಮೇಲುಗೈ ಸಾಧಿಸಿ ಅಧಿಕಾರದ ಗದ್ದುಗೆಯೇರಿದೆ. ಬಲವಾದ ಪ್ರಚಾರ ಮತ್ತು ಸಂಘಟನೆಯೊಂದಿಗೆ ಕಣಕ್ಕಿಳಿದಿದ್ದ ಆಡಳಿತಾರೂಢ ಬಿಜೆಪಿ ಕೇವಲ 13 ಸ್ಥಾನಗಳಿಗೆ ತೃಪ್ತಿಪಟ್ಟುಕೊಂಡಿದ್ದರೆ, ಪಕ್ಷೇತರ ಅಭ್ಯರ್ಥಿಗಳು 3 ಸ್ಥಾನಗಳಲ್ಲಿ ಗೆಲುವು ಸಾಧಿಸಿದ್ದಾರೆ. ಈ ಫಲಿತಾಂಶವು ರಾಜ್ಯದ ಸ್ಥಳೀಯ ಆಡಳಿತದಲ್ಲಿ ಎಡಪಕ್ಷಗಳ ಪುನಶ್ಚೇತನಕ್ಕೆ ಸಾಕ್ಷಿಯಾಗಿದೆ.
ನೋಖಾ ನಗರ ಪಾಲಿಕೆ ಒಂದರಲ್ಲೇ ಅಲ್ಲದೆ, ರಾಜಸ್ಥಾನದಾದ್ಯಂತ ಸಿಪಿಐ(ಎಂ) ಗಮನಾರ್ಹ ಪ್ರದರ್ಶನ ನೀಡಿದೆ. ಲಭ್ಯವಿರುವ ತಾಜಾ ಮಾಹಿತಿಯಂತೆ, ಸಿಪಿಐ(ಎಂ) ಅಭ್ಯರ್ಥಿಗಳು ರಾಜ್ಯದ ವಿವಿಧ ನಗರ ಸ್ಥಳೀಯ ಸಂಸ್ಥೆಗಳಲ್ಲಿ ಒಟ್ಟು 38 ವಾರ್ಡ್‌ಗಳಲ್ಲಿ ಜಯಗಳಿಸಿದ್ದಾರೆ.
ಶ್ರೀಡೂಂಗರ್‌ಗಢ್ ನಗರ ಪಾಲಿಕೆ, ಸೂರತ್‌ಗಢ್ ನಗರ ಪಾಲಿಕೆ, ಹನುಮಾನ್‌ಗಢ್ ನಗರ ಪರಿಷತ್, ಟಿಬ್ಬಿ ನಗರ ಪಾಲಿಕೆ, ಉದಯಪುರವಾಟಿ ನಗರ ಪಾಲಿಕೆ, ಧೋಡ್ ನಗರ ಪಾಲಿಕೆ, ಲೋಸಲ್ ನಗರ ಪಾಲಿಕೆ, ಪಲ್ಸಾನಾ ನಗರ ಪಾಲಿಕೆ ಹಾಗೂ ಉದಯಪುರ ನಗರ ನಿಗಮಗಳಲ್ಲಿ ಸಿಪಿಐ(ಎಂ) ತಲಾ ಒಂದು ವಾರ್ಡ್‌ನಲ್ಲಿ ಜಯಭೇರಿ ಬಾರಿಸಿ ತನ್ನ ಬಲವನ್ನು ವಿಸ್ತರಿಸಿಕೊಂಡಿದೆ.
ರಾಜಸ್ಥಾನದಲ್ಲಿ ಎರಡು ಹಂತಗಳಲ್ಲಿ ನಡೆದ ಈ ಬೃಹತ್ ನಗರ ಸ್ಥಳೀಯ ಸಂಸ್ಥೆಗಳ ಚುನಾವಣೆಯಲ್ಲಿ ಒಟ್ಟು 309 ನಗರ ಸಂಸ್ಥೆಗಳ 10,244 ವಾರ್ಡ್‌ಗಳಿಗೆ ಮತದಾನ ನಡೆದಿತ್ತು. 10 ಮಹಾನಗರ ಪಾಲಿಕೆಗಳು, 51 ನಗರ ಪರಿಷತ್ಗಳು ಹಾಗೂ 248 ಪುರಸಭೆಗಳನ್ನು ಒಳಗೊಂಡ ಈ ಚುನಾವಣೆಗಳು ಸೆಪ್ಟೆಂಬರ್ 9 ಮತ್ತು 11ರಂದು ನಡೆದಿದ್ದವು . ಒಟ್ಟಾರೆ ಫಲಿತಾಂಶದಲ್ಲಿ ಎಡಪಕ್ಷಗಳ ಈ ಜಯ ಕೇವಲ ಸಾಂಪ್ರದಾಯಿಕ ಕಮ್ಯೂನಿಸ್ಟ್ ಕ್ಷೇತ್ರಗಳಲ್ಲದೆ, ನಗರ ಪ್ರದೇಶಗಳಲ್ಲೂ ಜನರು ಪರ್ಯಾಯ ರಾಜಕೀಯವನ್ನು ಬಯಸುತ್ತಿದ್ದಾರೆ ಎಂಬುದನ್ನು ನಿರೂಪಿಸಿದೆ.
ಇಲ್ಲಿ ಒಂದೇ ಒಂದು ವಾರ್ಡ್‌ನಲ್ಲೂ ಗೆಲ್ಲಲು ವಿಫಲವಾಗಿರುವ ಕಾಂಗ್ರೆಸ್, ಎಡಪಕ್ಷವು ನಗರ ಮಂಡಳಿ ರಚಿಸಲು ಸಂಪೂರ್ಣ ಹಾದಿ ಸುಗಮಗೊಳಿಸಿಕೊಟ್ಟಿದೆ. ಸಿಪಿಐ(ಎಂ)ಗೆ ನೋಖಾ ಫಲಿತಾಂಶವು ಸ್ಥಳೀಯ ಗೆಲುವಷ್ಟೇ ಅಲ್ಲದೆ, ರಾಜಸ್ಥಾನದ ಕೆಲವು ಭಾಗಗಳಲ್ಲಿ ಪಕ್ಷಕ್ಕೆ ಹೊಸ ರಾಜಕೀಯ ಅವಕಾಶಗಳು ತೆರೆದುಕೊಳ್ಳುತ್ತಿರುವುದರ ಮುನ್ಸೂಚನೆಯಾಗಿದೆ.
ಬಿಜೆಪಿಯ ಮೇಲಿನ ಆಕ್ರೋಶ ಮತ್ತು ಸ್ಥಳೀಯ ಹಾಗೂ ಆರ್ಥಿಕ ವಿಚಾರಗಳ ಕುರಿತು ಸಿಪಿಐ(ಎಂ) ನಡೆಸಿದ ಸತತ ಹೋರಾಟವೇ ಈ ಗೆಲುವಿಗೆ ಕಾರಣ ಎಂದು ಸಿಪಿಐ(ಎಂ) ರಾಜ್ಯ ಕಾರ್ಯದರ್ಶಿ ಕಿಶನ್ ಪಾರಿಖ್ ಹೇಳಿದ್ದಾರೆ. ತಮ್ಮ ಪಕ್ಷವು ಸ್ಥಳೀಯ ಸಮಸ್ಯೆಗಳ ಕುರಿತು ಧ್ವನಿ ಎತ್ತುತ್ತಾ ಬಂದಿದ್ದರಿಂದ ಜನ ತಮ್ಮನ್ನು ಪ್ರಬಲ ಪರ್ಯಾಯವಾಗಿ ನೋಡಿ ಮತ ಚಲಾಯಿಸಿದ್ದಾರೆ ಎಂದು ಅವರು ಅಭಿಪ್ರಾಯಪಟ್ಟಿದ್ದಾರೆ.
ಅಲ್ಲದೆ, ಕೋಮುವಾದಿ ರಾಜಕೀಯದ ವಿರುದ್ಧ ಮತ್ತು ಆರ್ಥಿಕ ವಿಚಾರಗಳ ಪರವಾಗಿ ಹೋರಾಡುವ ಪ್ರಮುಖ ಶಕ್ತಿಯಾಗಿ ಸಿಪಿಐ(ಎಂ) ಅನ್ನು ಜನರು ಗುರುತಿಸಿದ್ದಾರೆ ಹಾಗೂ ಸಂವಿಧಾನಾತ್ಮಕ ಮೌಲ್ಯಗಳ ರಕ್ಷಣೆಗಾಗಿ ಸಿಪಿಐ(ಎಂ) ಪಕ್ಷವನ್ನು ರಾಜಕೀಯ ಪರ್ಯಾಯವಾಗಿ ಆಯ್ಕೆ ಮಾಡಿದ್ದಾರೆ ಎಂದು ಪಾರಿಖ್ ಪ್ರತಿಪಾದಿಸಿದ್ದಾರೆ. ಈ ಚುನಾವಣೆಯಲ್ಲಿ ರಾಜಸ್ಥಾನದಾದ್ಯಂತ 192 ಅಭ್ಯರ್ಥಿಗಳನ್ನು ಕಣಕ್ಕಿಳಿಸಿದ್ದ ಸಿಪಿಐ(ಎಂ), ಸುಮಾರು 40 ವಾರ್ಡ್‌ಗಳಲ್ಲಿ ಗೆಲುವು ಸಾಧಿಸಿದೆ. ಒಂದೆರಡು ವಾರ್ಡ್‌ಗಳಲ್ಲಿನ ಗೆಲುವೂ ಸಹ ದೀರ್ಘಕಾಲದ ರಾಜಕೀಯ ಅಸ್ತಿತ್ವವನ್ನು ಕಟ್ಟಿಕೊಳ್ಳಲು ಮಹತ್ವದ ಹೆಜ್ಜೆಯಾಗಿದೆ ಎಂದು ಪಾರಿಖ್ ತಿಳಿಸಿದ್ದಾರೆ.
