ಕರ್ನಾಟಕದ ಮತದಾರರ ಪಟ್ಟಿಯಿಂದ ಹೆಸರುಗಳನ್ನು ಕೈಬಿಡುವಂತೆ ಕೋರಿ ಕನಿಷ್ಠ 61,059 ಫಾರಂ-7 ಅರ್ಜಿಗಳನ್ನು ಸ್ವತಃ ಚುನಾವಣಾ ಅಧಿಕಾರಿಗಳೇ ಸಲ್ಲಿಸಿದ್ದು, ಅವುಗಳಲ್ಲಿ ಒಂದೇ ಒಂದು ಅರ್ಜಿಯಲ್ಲೂ ಹೆಸರು ಕೈಬಿಡಲು ಕಾರಣವನ್ನು ನಮೂದಿಸಿಲ್ಲ. ಮತದಾರರ ನೋಂದಣಿ ನಿಯಮಗಳು, 1960ರ ಅಡಿಯಲ್ಲಿ ಹೆಸರು ಕೈಬಿಡುವುದಕ್ಕೆ ಕಾರಣವನ್ನು ಕಡ್ಡಾಯವಾಗಿ ನಮೂದಿಸಬೇಕಾಗುತ್ತದೆ ಎಂದು thehindu.com ಸೋಮವಾರ (ಅ.26) ವರದಿ ಮಾಡಿದೆ.
ಈ ಅರ್ಜಿಗಳಲ್ಲಿ ಆಕ್ಷೇಪಣಾದಾರರೆಂದು ಪಟ್ಟಿ ಮಾಡಲಾದ ಚುನಾವಣಾ ನೋಂದಣಾಧಿಕಾರಿಗಳು (EROs) ಮತ್ತು ಸಹಾಯಕ ಚುನಾವಣಾ ನೋಂದಣಾಧಿಕಾರಿಗಳು (AEROs), ಮ್ಯಾಪಿಂಗ್ ಮಾಡದಿರುವುದಕ್ಕೆ ಅಥವಾ ತಾರ್ಕಿಕ ವ್ಯತ್ಯಾಸಗಳಿಗಾಗಿ ನೀಡಲಾದ ನೋಟಿಸ್‌ಗಳ ವಿಚಾರಣೆಯ ಸಮಯದಲ್ಲಿ ಮತದಾರರನ್ನು ಸಂಪರ್ಕಿಸಲು ಸಾಧ್ಯವಾಗದಿದ್ದಾಗ, ವ್ಯವಸ್ಥೆಯು (system) ಅವರ ಡಿಜಿಟಲ್ ಸಹಿಯೊಂದಿಗೆ ಫಾರಂಗಳನ್ನು ‘ಸ್ವಯಂಚಾಲಿತವಾಗಿ ಸೃಷ್ಟಿಸಿದೆ’ (auto-generated). ಆದ್ದರಿಂದ ಆ ಮತದಾರರನ್ನು ‘ಅನರ್ಹರು’ ಎಂದು ಗುರುತಿಸಲಾಗಿದೆ ಎಂಬುವುದಾಗಿ ತಿಳಿಸಿದ್ದಾರೆ ಎಂದು ವರದಿ ಉಲ್ಲೇಖಿಸಿದೆ.
ಇದರರ್ಥ ಮತದಾರರ ಹೆಸರುಗಳ ವಿರುದ್ಧ ಆಕ್ಷೇಪಣೆಗಳನ್ನು ಎತ್ತುವುದು ಮತ್ತು ಆ ಹೆಸರುಗಳು ಮತದಾರರ ಪಟ್ಟಿಯಲ್ಲಿ ಮುಂದುವರಿಯಬೇಕೇ ಅಥವಾ ಬೇಡವೇ ಎಂಬುದನ್ನು ನಿರ್ಧರಿಸುವುದು ಎರಡನ್ನೂ ಒಂದೇ ಚುನಾವಣಾ ವ್ಯವಸ್ಥೆಯು ಮಾಡುತ್ತಿತ್ತು ಎಂದಾಗುತ್ತದೆ. ಮತದಾರರ ನೋಂದಣಿ ನಿಯಮಗಳು, 1960ರ ಅಡಿಯಲ್ಲಿ, ಕಾರಣವನ್ನು ನಮೂದಿಸುವುದು ಸೇರಿದಂತೆ ನಿಗದಿತ ನಮೂನೆಯಲ್ಲಿ ಸಲ್ಲಿಕೆಯಾಗದ ಆಕ್ಷೇಪಣೆಯನ್ನು ತಿರಸ್ಕರಿಸಬೇಕಾಗುತ್ತದೆ.
ಮತದಾರರು ಬೇರೆಡೆಗೆ ವಲಸೆ ಹೋಗಿದ್ದರೆ, ಅವರ ಹೆಸರು ಮತ್ತೊಂದು ಕಡೆ ನಕಲಾಗಿ ನಮೂದಾಗಿದ್ದರೆ, ಅಪ್ರಾಪ್ತ ವಯಸ್ಕರಾಗಿದ್ದರೆ, ಮರಣ ಹೊಂದಿದ್ದರೆ ಅಥವಾ ಭಾರತದ ನಾಗರಿಕರಲ್ಲದಿದ್ದರೆ ಫಾರಂ-7 ಅರ್ಜಿಗಳನ್ನು ಸಲ್ಲಿಸುವಂತೆ ತಮಗೆ ಸೂಚನೆ ನೀಡಲಾಗಿತ್ತು ಎಂದು ಅಧಿಕಾರಿಗಳು ತಿಳಿಸಿದ್ದಾರೆ. ಆದರೆ, ಈ ಫಾರಂಗಳು ಸ್ವಯಂಚಾಲಿತವಾಗಿ ಸೃಷ್ಟಿಯಾಗಿದ್ದರಿಂದ (auto-generated), ಹೆಸರು ಕೈಬಿಡಲು ಕೋರುವ ಕಾರಣದ ಕಾಲಂ ಅನ್ನು ಖಾಲಿ ಬಿಡಲಾಗಿತ್ತು ಎಂದು ಹೇಳಿದ್ದಾರೆ.
ಯಾವುದೇ ಕಾರಣವನ್ನು ದಾಖಲಿಸದ ಕಾರಣ, ಒಬ್ಬ ನಿರ್ದಿಷ್ಟ ಮತದಾರನ ಹೆಸರನ್ನು ಏಕೆ ಕೈಬಿಡಲು ಗುರುತಿಸಲಾಗಿದೆ ಎಂಬುದನ್ನು ಪತ್ತೆಹಚ್ಚಲು ಅಥವಾ ಆ ಹೆಸರನ್ನು ತೆಗೆದುಹಾಕಿರುವುದು ಸಮರ್ಥನೀಯವೇ ಎಂಬುದನ್ನು ಪರಿಶೀಲಿಸಲು ಮತದಾರನಿಗಾಗಲಿ ಅಥವಾ ಮತದಾರರ ಪಟ್ಟಿಯನ್ನು ಪರಿಶೀಲಿಸುವ ಇತರ ಯಾರಿಗೇ ಆಗಲಿ ಸಾಧ್ಯವಾಗುವುದಿಲ್ಲ.
ಇದಲ್ಲದೆ, ಈ ವರ್ಗದ ಮತದಾರರನ್ನು (ಎಎಸ್‌ಡಿಡಿಒ-ಗೈರುಹಾಜರು, ಸ್ಥಳಾಂತರಗೊಂಡವರು, ನಕಲಿ, ಮೃತಪಟ್ಟವರು ಮತ್ತು ಇತರರು) ಈಗಾಗಲೇ ವಿಶೇಷ ತೀವ್ರ ಪರಿಷ್ಕರಣೆಯ (ಎಸ್ಐಆರ್) ಗಣತಿಯ ಹಂತದಲ್ಲಿ ಪರಿಶೀಲಿಸಲಾಗಿತ್ತು. ಇದು ಕರ್ನಾಟಕದ ಕರಡು ಮತದಾರರ ಪಟ್ಟಿಯಿಂದ 1.07 ಕೋಟಿಗೂ ಹೆಚ್ಚು ಹೆಸರುಗಳನ್ನು ಕೈಬಿಡಲು ಕಾರಣವಾಗಿತ್ತು. ಇವುಗಳಲ್ಲಿ ಹೆಚ್ಚಿನ ಹೆಸರುಗಳನ್ನು ಮತದಾರರು ಕಾಯಂ ಆಗಿ ಸ್ಥಳಾಂತರಗೊಂಡಿದ್ದಾರೆ ಎಂಬ ಆಧಾರದ ಮೇಲೆ ತೆಗೆದುಹಾಕಲಾಗಿದ್ದರೆ, ಆ ನಂತರದ ಸ್ಥಾನದಲ್ಲಿ ಗೈರುಹಾಜರಾಗಿದ್ದಾರೆ ಎಂದು ಗುರುತಿಸಲಾದವರ ಹೆಸರುಗಳಿದ್ದವು ಎಂದು ವರದಿ ವಿವರಿಸಿದೆ.
ಆಕ್ಷೇಪಣೆಗಳ ಅವಧಿ ಮುಗಿದ ನಂತರ ಏರಿಕೆ
ಸೆಪ್ಟೆಂಬರ್ 23, 2026ರಂದು ಹಕ್ಕುಗಳು ಮತ್ತು ಆಕ್ಷೇಪಣೆಗಳ ಸಲ್ಲಿಕೆಯ ಅವಧಿ ಮುಗಿದ ನಂತರ, ಚುನಾವಣಾ ಅಧಿಕಾರಿಗಳು ಸಲ್ಲಿಸಿದ ಫಾರಂ-7 ಅರ್ಜಿಗಳ ಸಂಖ್ಯೆಯು ತೀವ್ರವಾಗಿ ಏರಿಕೆಯಾಗಿದೆ. ಆಗಸ್ಟ್ 24 ರಿಂದ ಸೆಪ್ಟೆಂಬರ್ 23ರ ನಡುವೆ ಇಂತಹ ಕೇವಲ 192 ಅರ್ಜಿಗಳು ಮಾತ್ರ ಸ್ವೀಕೃತವಾಗಿದ್ದವು. ಆದರೆ ಹಕ್ಕುಗಳು ಮತ್ತು ಆಕ್ಷೇಪಣೆಗಳ ಅವಧಿಯ ನಂತರ, ಅಂದರೆ ಸೆಪ್ಟೆಂಬರ್ 24 ರಿಂದ ಅಕ್ಟೋಬರ್ 22ರ ನಡುವೆ 60,800ಕ್ಕೂ ಹೆಚ್ಚು ಅರ್ಜಿಗಳನ್ನು ಸಲ್ಲಿಸಲಾಗಿದೆ.
ಹಕ್ಕುಗಳು ಮತ್ತು ಆಕ್ಷೇಪಣೆಗಳ ವಿಲೇವಾರಿ ಗಡುವು ಹತ್ತಿರ ಬರುತ್ತಿದ್ದಂತೆ ಅರ್ಜಿಗಳ ಸಲ್ಲಿಕೆಯು ಅತಿ ಹೆಚ್ಚಿನ ಸಂಖ್ಯೆಯಲ್ಲಿ ಮುಂದುವರಿದಿದೆ. ಹಕ್ಕುಗಳು ಮತ್ತು ಆಕ್ಷೇಪಣೆಗಳ ವಿಲೇವಾರಿಗೆ ಕೊನೆಯ ದಿನವಾಗಿದ್ದ ಅಕ್ಟೋಬರ್ 22ರಂದು, ಚುನಾವಣಾ ಅಧಿಕಾರಿಗಳು 10,105 ಫಾರಂ-7 ಅರ್ಜಿಗಳನ್ನು ಸಲ್ಲಿಸಿದ್ದರು. ಅದರ ಹಿಂದಿನ ದಿನವಾದ ಅಕ್ಟೋಬರ್ 21ರಂದು ಮತ್ತೊಂದು 10,314 ಅರ್ಜಿಗಳು ಸಲ್ಲಿಕೆಯಾಗಿದೆ. ಇನ್ನು ಅಕ್ಟೋಬರ್ 17 ಮತ್ತು 19 ರಂದು ಅಧಿಕಾರಿಗಳು ಕ್ರಮವಾಗಿ 11,132 ಮತ್ತು 11,760 ಅರ್ಜಿಗಳನ್ನು ಸಲ್ಲಿಸಿದ್ದಾರೆ ಎಂದು ವರದಿ ವಿವರಿಸಿದೆ.
ಹೆಸರುಗಳು ಈಗಾಗಲೇ ಡಿಲೀಟ್ ಆಗಿವೆ
ಚುನಾವಣಾ ಅಧಿಕಾರಿಗಳು ಫಾರಂ-7 ಅರ್ಜಿಗಳನ್ನು ಸಲ್ಲಿಸಿದ್ದ ಹಲವಾರು ಮತದಾರರ ಎಪಿಕ್ ಸಂಖ್ಯೆಗಳನ್ನು ‘ದಿ ಹಿಂದೂ’ ಪತ್ರಿಕೆಯು ಭಾರತೀಯ ಚುನಾವಣಾ ಆಯೋಗದ ಪೋರ್ಟಲ್‌ನಲ್ಲಿ ಪರಿಶೀಲಿಸಿದೆ. ಪರಿಶೀಲಿಸಿದ ಎಲ್ಲಾ ಪ್ರಕರಣಗಳಲ್ಲಿ, ಸೆಪ್ಟೆಂಬರ್ 23ರ ನಂತರ ಅರ್ಜಿ ಸಲ್ಲಿಸಿದವರ ಹೆಸರುಗಳು ಸೇರಿದಂತೆ ಎಲ್ಲರ ಹೆಸರುಗಳನ್ನು ಈಗಾಗಲೇ ಮತದಾರರ ಪಟ್ಟಿಯಿಂದ ಕೈಬಿಡಲಾಗಿದೆ ಎಂದು ವರದಿ ಹೇಳಿದೆ.
ಇದರರ್ಥ, ಇದು ನಿಗದಿತ ಅವಧಿಯೊಳಗೆ ಅಥವಾ ನಿಗದಿತ ನಮೂನೆ ಮತ್ತು ವಿಧಾನದಲ್ಲಿ ಸಲ್ಲಿಕೆಯಾಗದ ಯಾವುದೇ ಹಕ್ಕು ಅಥವಾ ಆಕ್ಷೇಪಣೆಯನ್ನು “ನೋಂದಣಾಧಿಕಾರಿಯು ತಿರಸ್ಕರಿಸತಕ್ಕದ್ದು” ಎಂದು ತಿಳಿಸುವ ಮತದಾರರ ನೋಂದಣಿ ನಿಯಮಗಳು, 1960 ರ ನಿಯಮ 17ಕ್ಕೆ ಇದು ತದ್ವಿರುದ್ಧವಾಗಿದೆ. ಅಷ್ಟೇ ಅಲ್ಲದೆ, ಹೆಸರುಗಳನ್ನು ಕೈಬಿಡುವ ಮುನ್ನ ಕಡ್ಡಾಯವಾಗಿ ನೀಡಬೇಕಾದ ವಿಚಾರಣಾ ನೋಟಿಸ್‌ಗಳು ಅಥವಾ ಆದೇಶಗಳನ್ನು ಈ ಪ್ರಕರಣಗಳಲ್ಲಿ ನೀಡಲಾಗಿದೆಯೇ ಅಥವಾ ಯಾವ ಆಧಾರದ ಮೇಲೆ ಹೆಸರುಗಳನ್ನು ಕೈಬಿಡಲಾಗಿದೆ ಎಂಬುದು ಸಹ ಅಸ್ಪಷ್ಟವಾಗಿಯೇ ಉಳಿದಿದೆ, ಏಕೆಂದರೆ ಸಂಬಂಧಿತ ವಿವರಗಳ ಕಾಲಂ ಅನ್ನು ಖಾಲಿ ಬಿಡಲಾಗಿತ್ತು.
ಚುನಾವಣಾ ಅಧಿಕಾರಿಗಳು ಅತಿ ಹೆಚ್ಚು ಸಂಖ್ಯೆಯಲ್ಲಿ ಫಾರಂ-7 ಅರ್ಜಿಗಳನ್ನು ಸಲ್ಲಿಸಿರುವ ಬೃಹತ್ ಬೆಂಗಳೂರು ಮಹಾನಗರ ಪಾಲಿಕೆ (ಬಿಬಿಎಂಪಿ) ದಕ್ಷಿಣ ಜಿಲ್ಲೆಯಲ್ಲಿ, ಅಧಿಕಾರಿಗಳು ಸಲ್ಲಿಸಿದ ಅರ್ಜಿಗಳ ಸಂಖ್ಯೆಯು ಮತದಾರರು ಅಥವಾ ಮೂರನೇ ವ್ಯಕ್ತಿಗಳು ಸಲ್ಲಿಸಿದ ಅರ್ಜಿಗಳಿಗಿಂತ ಹೆಚ್ಚಾಗಿತ್ತು. ಈ ಜಿಲ್ಲೆಯಲ್ಲಿ ಸಲ್ಲಿಕೆಯಾದ ಒಟ್ಟು 17,491 ಅರ್ಜಿಗಳಲ್ಲಿ 10,374 ಅರ್ಜಿಗಳನ್ನು ಸ್ವತಃ ಅಧಿಕಾರಿಗಳೇ ಸಲ್ಲಿಸಿದ್ದರು. ಬೊಮ್ಮನಹಳ್ಳಿ ವಿಧಾನಸಭಾ ಕ್ಷೇತ್ರದಲ್ಲಿಯೂ ಸಹ ಸಲ್ಲಿಕೆಯಾದ 5,757 ಅರ್ಜಿಗಳ ಪೈಕಿ 4,095 ಅರ್ಜಿಗಳನ್ನು ಅಧಿಕಾರಿಗಳೇ ಸಲ್ಲಿಸಿದ್ದಾರೆ.
ಮತದಾರರು ಅಥವಾ ಮೂರನೇ ವ್ಯಕ್ತಿಗಳಿಗಿಂತ ಚುನಾವಣಾ ನೋಂದಣಾಧಿಕಾರಿಗಳು (EROs) ಮತ್ತು ಸಹಾಯಕ ಚುನಾವಣಾ ನೋಂದಣಾಧಿಕಾರಿಗಳು (AEROs) ಹೆಚ್ಚಿನ ಸಂಖ್ಯೆಯಲ್ಲಿ ಫಾರಂ-7 ಅರ್ಜಿಗಳನ್ನು ಸಲ್ಲಿಸಿರುವ ಈ ಪ್ರವೃತ್ತಿಯು ಕನಿಷ್ಠ 26 ವಿಧಾನಸಭಾ ಕ್ಷೇತ್ರಗಳಲ್ಲಿ ಕಂಡುಬಂದಿದೆ ಎಂದು ವರದಿ ಹೇಳಿದೆ.
ಕರ್ನಾಟಕದ ಅಂತಿಮ ಮತದಾರರ ಪಟ್ಟಿಯು ಅಕ್ಟೋಬರ್ 27ರಂದು ಪ್ರಕಟಗೊಳ್ಳಲು ನಿಗದಿಯಾಗಿದೆ. ಸೆಪ್ಟೆಂಬರ್ 23ರೊಳಗೆ ಸ್ವೀಕೃತವಾದ ಹಕ್ಕುಗಳು ಮತ್ತು ಆಕ್ಷೇಪಣೆಗಳನ್ನು ಮಾತ್ರ ಅಂತಿಮ ಪಟ್ಟಿಗೆ ಪರಿಗಣಿಸಬೇಕಾಗಿತ್ತು. ಗಡುವಿನ ನಂತರ ಸಲ್ಲಿಕೆಯಾದ ಅರ್ಜಿಗಳನ್ನು ವಿಶೇಷ ತೀವ್ರ ಪರಿಷ್ಕರಣೆಯ (ಎಸ್ಐಆರ್) ಬಳಿಕ ಬರುವ ಪೂರಕ ಪಟ್ಟಿಗೆ (supplementary roll) ಮಾತ್ರ ಪರಿಗಣಿಸಬೇಕಾಗಿತ್ತು. ಆದಾಗ್ಯೂ, ‘ದಿ ಹಿಂದೂ’ ನಡೆಸಿದ ಮಾದರಿ ಪರಿಶೀಲನೆಗಳಲ್ಲಿ, ಗಡುವು ಮುಗಿದ ನಂತರ ಸಲ್ಲಿಕೆಯಾಗಿದ್ದ ಅರ್ಜಿಗಳಲ್ಲಿನ ಮತದಾರರ ಹೆಸರುಗಳನ್ನು ಸಹ ಈಗಾಗಲೇ ಪಟ್ಟಿಯಿಂದ ಕೈಬಿಟ್ಟಿರುವುದು ಪತ್ತೆಯಾಗಿದೆ ಎಂದಿದೆ.
ಭಾರತೀಯ ಚುನಾವಣಾ ಆಯೋಗದ ವೆಬ್‌ಸೈಟ್‌ನಲ್ಲಿ ತೋರಿಸುವ ಅರ್ಜಿಗಳ ಸಂಖ್ಯೆಗೂ, ಕರ್ನಾಟಕದ ಮುಖ್ಯ ಚುನಾವಣಾಧಿಕಾರಿಗಳು ನೀಡುವ ಲೆಕ್ಕಕ್ಕೂ ಹೊಂದಾಣಿಕೆಯಾಗುತ್ತಿಲ್ಲ. ವೆಬ್‌ಸೈಟ್‌ಗಿಂತ ಅಧಿಕಾರಿಗಳ ಹೇಳಿಕೆಯಲ್ಲಿ ಹೆಚ್ಚಿನ ಸಂಖ್ಯೆಯಿದೆ. ಹಾಗಾಗಿ, ನಿಯಮ ಮೀರಿ ತೆಗೆದುಹಾಕಲಾದ ಮತದಾರರ ಹೆಸರುಗಳ ನಿಜವಾದ ಸಂಖ್ಯೆ ವರದಿಯಲ್ಲಿ ಹೇಳಿರುವುದಕ್ಕಿಂತಲೂ ಇನ್ನೂ ಹೆಚ್ಚಿರಬಹುದು. ಈ ಗೊಂದಲವನ್ನು ‘ದಿ ಹಿಂದೂ’ ಪತ್ರಿಕೆ ಈಗಾಗಲೇ ಬಯಲಿಗೆಳೆದಿದೆ.
ಸೆಪ್ಟೆಂಬರ್ 24ರಿಂದ ಅಕ್ಟೋಬರ್ 22ರ ನಡುವೆ, ಕರ್ನಾಟಕದ ಮುಖ್ಯ ಚುನಾವಣಾಧಿಕಾರಿಗಳ (ಸಿಇಒ) ಕಚೇರಿಯು 1,70,442 ಫಾರಂ-7 ಅರ್ಜಿಗಳು ಬಂದಿರುವುದಾಗಿ ವರದಿ ಮಾಡಿದೆ. ಆದರೆ, ಭಾರತೀಯ ಚುನಾವಣಾ ಆಯೋಗದ (ಇಸಿಐ) ವೆಬ್‌ಸೈಟ್‌ನಲ್ಲಿರುವ ಕ್ರೋಡೀಕೃತ ಫಾರಂ-10 ದಾಖಲೆಗಳಲ್ಲಿ ಕೇವಲ 1,56,634 ಅರ್ಜಿಗಳು ಮಾತ್ರ ಲಭ್ಯವಿದ್ದವು. ಇದರಿಂದಾಗಿ ಎರಡು ದಾಖಲೆಗಳ ನಡುವೆ 13,808 ಅರ್ಜಿಗಳ ವ್ಯತ್ಯಾಸ ಕಂಡುಬಂದಿದೆ ಎಂದು ವರದಿ ಹೇಳಿದೆ.
Courtesy : thehindu.com
