ಸಾರ್ವಜನಿಕ ರಸ್ತೆಗಳಲ್ಲಿ ಪಟಾಕಿ ಸಿಡಿಸದಂತೆ ದೀಪಾವಳಿ ಹಬ್ಬದ ಮುನ್ನ ನಾಗರಿಕರಲ್ಲಿ ನಟಿ ದಿಯಾ ಮಿರ್ಜಾ ಮನವಿ ಮಾಡಿಕೊಂಡಿದ್ದ ವಿಡಿಯೋ ವಿರುದ್ಧ ಕೆಲವು ರಾಜಕಾರಣಿಗಳು ಮಾಡಿದ ಟೀಕೆಗಳನ್ನು ಬಾಂಬೆ ಹೈಕೋರ್ಟ್ ತೀವ್ರವಾಗಿ ಖಂಡಿಸಿದೆ.
ನ್ಯಾಯಮೂರ್ತಿ ಗಿರೀಶ್ ಕುಲಕರ್ಣಿ ಮತ್ತು ನ್ಯಾಯಮೂರ್ತಿ ಡಾ. ನೀಲಾ ಗೋಖಲೆ ಅವರನ್ನೊಳಗೊಂಡ ವಿಭಾಗೀಯ ಪೀಠವು, “ಕೆಲವು ರಾಜಕಾರಣಿಗಳು ಮಾಡಿದ ಇಂತಹ ಅಡ್ಡಾದಿಡ್ಡಿ ಟೀಕೆಗಳಿಂದ ನಮಗೆ ತೀವ್ರ ಬೇಸರವಾಗಿದೆ” ಎಂದು ಹೇಳಿದ್ದಲ್ಲದೆ, “ಭಾರತವು ಒಂದು ಜಾತ್ಯತೀತ ದೇಶ” ಎಂಬುದನ್ನು ಅವರಿಗೆ ನೆನಪಿಸಿದೆ.
“ಹಬ್ಬ ಎನ್ನುವುದು ಪ್ರತಿಯೊಬ್ಬರೂ ಆಚರಿಸಲು ಇರುವುದು… ಈ ದೇಶದಲ್ಲಿ ಯಾವುದೇ ವ್ಯಕ್ತಿಯನ್ನು ಯಾವುದೇ ಹಬ್ಬವನ್ನು ಆಚರಿಸದಂತೆ ಪ್ರತ್ಯೇಕಿಸಲು (ದೂರ ಇಡಲು) ಸಾಧ್ಯವಿಲ್ಲ… ಆ ವ್ಯಕ್ತಿ ಬೇರೆ ಧರ್ಮದವನೆಂಬ ಕಾರಣಕ್ಕೆ ಆತನ ಭಾಗವಹಿಸುವಿಕೆಯನ್ನು ನೀವು ಹೇಗೆ ಆಕ್ಷೇಪಿಸಲು ಸಾಧ್ಯ? ನಾವು ಜಾತ್ಯತೀತ ದೇಶವಲ್ಲವೇ” ಎಂದು ವಿಭಾಗೀಯ ಪೀಠವು ಮೌಖಿಕವಾಗಿ ಹೇಳಿದೆ ಎಂದು livelaw.in ವರದಿ ಮಾಡಿದೆ.
ಸಾರ್ವಜನಿಕ ರಸ್ತೆಗಳಲ್ಲಿ ಪಟಾಕಿ ಸಿಡಿಸುವುದರ ವಿರುದ್ಧ ನ್ಯಾಯಾಲಯ ನೀಡಿದ್ದ ನಿರ್ದೇಶನಗಳ ಕುರಿತು ಜಾಗೃತಿ ಮೂಡಿಸಲು ಬೃಹನ್ಮುಂಬೈ ಮಹಾನಗರ ಪಾಲಿಕೆ (ಬಿಎಂಸಿ) ಮಾಡಿದ ವಿನಂತಿಯ ಮೇರೆಗೆ ದಿಯಾ ಮಿರ್ಜಾ ಈ ವಿಡಿಯೋವನ್ನು ಸಿದ್ಧಪಡಿಸಿದ್ದರು. ಆದರೆ, ಆಕೆಯನ್ನು ‘ಹಿಂದೂ ವಿರೋಧಿ’ ಎಂದು ಬಿಂಬಿಸಿದ ಬಿಜೆಪಿ ನಾಯಕರ ಆಕ್ಷೇಪಣೆಗಳ ನಂತರ, ಮಹಾನಗರ ಪಾಲಿಕೆಯು ತನ್ನ ಸಾಮಾಜಿಕ ಮಾಧ್ಯಮ ಖಾತೆಯಿಂದ ಆ ವಿಡಿಯೋವನ್ನು ತೆಗೆದುಹಾಕಿತ್ತು.
“ಪ್ರತಿಯೊಬ್ಬರೂ ಈ ಜಾಗೃತಿ ಅಭಿಯಾನದಲ್ಲಿ ಭಾಗವಹಿಸಲು ಅನುಮತಿ ನೀಡಿದ್ದ ನ್ಯಾಯಾಲಯದ ಹಿಂದಿನ ಆದೇಶವನ್ನು ಗಮನಿಸದೆಯೇ ರಾಜಕಾರಣಿಗಳು ಇಂತಹ ಹೇಳಿಕೆಗಳನ್ನು ನೀಡಿದ್ದಾರೆ ಎಂದು ನ್ಯಾಯಮೂರ್ತಿ ಕುಲಕರ್ಣಿ ಹೇಳಿದ್ದಾರೆ. ನ್ಯಾಯಾಲಯದ ಆದೇಶಕ್ಕೆ ಅನುಗುಣವಾಗಿ ವಾಯು ಮಾಲಿನ್ಯದ ಕುರಿತು ದಿಯಾ ಮಿರ್ಜಾ ಅವರು ‘ಬಹಳ ಉತ್ತಮವಾದ ಸಂದೇಶ’ವನ್ನು ನೀಡಿದ್ದರು, ಆದರೆ ಅದರ ಬೆನ್ನಲ್ಲೇ ವ್ಯಕ್ತವಾದ ಆಕ್ಷೇಪಣೆಗಳು ‘ನಿಜಕ್ಕೂ ದುರದೃಷ್ಟಕರ” ಎಂದು ನ್ಯಾಯಾಧೀಶರು ತಿಳಿಸಿದ್ದಾರೆ ಎಂದು livelaw.in ವರದಿ ಉಲ್ಲೇಖಿಸಿದೆ.
ಜಾತಿ ಅಥವಾ ಧರ್ಮದ ಭೇದವಿಲ್ಲದೆ ದೀಪಾವಳಿಯನ್ನು ಪ್ರತಿಯೊಬ್ಬರೂ ಆಚರಿಸುತ್ತಾರೆ ಎಂಬ ಸುಪ್ರೀಂ ಕೋರ್ಟ್‌ನ ಅವಲೋಕನವನ್ನು ಸಹ ಉಲ್ಲೇಖಿಸಿದ ನ್ಯಾಯಾಧೀಶರು, ಧರ್ಮದ ಆಧಾರದ ಮೇಲೆ ದಿಯಾ ಮಿರ್ಜಾ ಅವರ ಭಾಗವಹಿಸುವಿಕೆಗೆ ಆಕ್ಷೇಪ ವ್ಯಕ್ತಪಡಿಸಿರುವುದನ್ನು ಪ್ರಶ್ನಿಸಿದ್ದಾರೆ.
ಅವರು (ದಿಯಾ ಮಿರ್ಜಾ) ನ್ಯಾಯಾಲಯದ ನಿರ್ದೇಶನಗಳಂತೆಯೇ ನಡೆದುಕೊಂಡಿದ್ದಾರೆ ಎಂದು ಹೇಳಿದ ನ್ಯಾಯಾಧೀಶರು, ಕೆಲವು ಕಾರ್ಪೊರೇಟರ್‌ಗಳು ಮತ್ತು ರಾಜಕಾರಣಿಗಳ ಧೋರಣೆ ಸರಿಯಾದುದಲ್ಲ ಮತ್ತು ಅವರು ಈ ವಿಷಯಕ್ಕೆ ‘ಬೇರೆ ಯಾವುದೇ ಆಯಾಮ’ವನ್ನು ನೀಡಬಾರದು ಎಂದಿದ್ದಾರೆ.
ಈ ವಿಷಯವು ಸಂಪೂರ್ಣವಾಗಿ ಪರಿಸರಕ್ಕೆ ಸಂಬಂಧಿಸಿದ್ದಾಗಿದೆ ಎಂದು ನ್ಯಾಯಮೂರ್ತಿ ಗೋಖಲೆ ಹೇಳಿದ್ದು, ‘ಯಾರೇ ಆಗಿರಲಿ, ಪ್ರತಿಯೊಬ್ಬರೂ ಉಸಿರಾಡುವುದು ಅದೇ ಗಾಳಿಯನ್ನು’ ಎಂದಿದ್ದಾರೆ. ಮುಂದುವರಿದು ಮಾತನಾಡಿದ ನ್ಯಾಯಾಧೀಶರು, ‘ಪಟಾಕಿಗಳನ್ನು ನಿಷೇಧಿಸುವುದು ಎಂದರೆ ನಿಮ್ಮ ಹಬ್ಬದ ಆಚರಣೆಯ ಹಕ್ಕನ್ನು ಕಸಿದುಕೊಳ್ಳುವುದು ಎಂದಲ್ಲ’ ಎಂದು ತಿಳಿಸಿದ್ದಾರೆ.
ನ್ಯಾಯಾಧೀಶರು ಅಂತಿಮವಾಗಿ ದಿಯಾ ಮಿರ್ಜಾ ಅವರ ವಿಡಿಯೋವನ್ನು ಮರು-ಅಪ್‌ಲೋಡ್ ಮಾಡಲು ಮತ್ತು ‘ಸಾರ್ವಜನಿಕರ ವಿಶ್ವಾಸವನ್ನು ಮರುಸ್ಥಾಪಿಸಲು’ ಬಿಎಂಸಿಗೆ ನಿರ್ದೇಶನ ನೀಡಿದ್ದಾರೆ. ಜೊತೆಗೆ ಇಂತಹ ವಿಷಯಗಳಿಗೆ ‘ತಕ್ಷಣದ ಆತುರದ ಪ್ರತಿಕ್ರಿಯೆ’ ನೀಡುವ ಅಗತ್ಯವಿಲ್ಲ ಎಂದು ಹೇಳಿದ್ದಾರೆ.
ವ್ಯಕ್ತವಾಗಿರುವ ಆಕ್ಷೇಪಣೆಗಳು ಕೇವಲ ಕೆಲವೇ ಜನರ ವೈಯಕ್ತಿಕ ಅಭಿಪ್ರಾಯಗಳನ್ನು ಬಿಂಬಿಸುತ್ತವೆ ಮತ್ತು ಇವುಗಳನ್ನು ತಡೆಗಟ್ಟಬೇಕು ಎಂದು ನ್ಯಾಯಾಲಯ ಹೇಳಿದೆ. ‘ನಾವು ಆರೋಗ್ಯ, ಮಾಲಿನ್ಯ ಮತ್ತು ಪರಿಸರದ ಬಗ್ಗೆ ಮಾತನಾಡುವಾಗ… ಅಲ್ಲಿ ಯಾವುದೇ ಬಣ ರಾಜಕೀಯ ಅಥವಾ ಭಿನ್ನಾಭಿಪ್ರಾಯಗಳಿಗೆ ಆಸ್ಪದವಿಲ್ಲ’ ಎಂದು ಪೀಠವು ಸ್ಪಷ್ಟಪಡಿಸಿದೆ.
ವಿಶೇಷವಾಗಿ ಮುಂಬೈ ನಗರದಲ್ಲಿ ಈ ವಿಷಯವು ‘ಸಂತೋಷದಿಂದ ಮತ್ತು ಒಗ್ಗಟ್ಟಿನ ಭಾವನೆಯೊಂದಿಗೆ’ ಕೊನೆಗೊಳ್ಳಬೇಕು ಎಂದು ನ್ಯಾಯಾಲಯ ಹೇಳಿದೆ. ಏಕೆಂದರೆ ಮುಂಬೈ ನಗರವು ‘ಒಟ್ಟಾಗಿ ಬಾಳುವಿಕೆ ಮತ್ತು ಬಲವಾದ ಒಡನಾಟದ ಭಾವನೆಯಿಂದಲೇ’ ಉಳಿದುಕೊಂಡಿದೆ ಎಂದು ಪೀಠವು ಅಭಿಪ್ರಾಯಪಟ್ಟಿದೆ.
ಯಾವುದೇ ಬೇಜವಾಬ್ದಾರಿಯುತ ಹೇಳಿಕೆಯಿಂದ ಈ ಸಮತೋಲನಕ್ಕೆ ಧಕ್ಕೆ ಬರಬಾರದು ಎಂದು ಪೀಠವು ಹೇಳಿದೆ.
ಮುಂಬೈ ಬಿಜೆಪಿ ಅಧ್ಯಕ್ಷ ಹಾಗೂ ಶಾಸಕ ಅಮಿತ್ ಸತಾಮ್ ಅವರು ದೀಪಾವಳಿ ಜಾಗೃತಿ ಅಭಿಯಾನದಲ್ಲಿ ನಟಿ ದಿಯಾ ಮಿರ್ಜಾ ಅವರನ್ನು ಬಿಎಂಸಿ ಬಳಸಿಕೊಂಡಿದ್ದಕ್ಕೆ ಆಕ್ಷೇಪ ವ್ಯಕ್ತಪಡಿಸಿದ ನಂತರ ಈ ವಿವಾದ ಉಂಟಾಗಿತ್ತು. ಇದರ ಬೆನ್ನಲ್ಲೇ ಮುಂಬೈ ಮೇಯರ್ ರಿತು ತಾವ್ಡೆ ಅವರು, ದಿಯಾ ಮಿರ್ಜಾ ಸದಾ ‘ಹಿಂದೂ ವಿರೋಧಿ’ ಮತ್ತು ‘ಹಿಂದೂತ್ವ ವಿರೋಧಿ’ ನಿಲುವು ತಳೆಯುತ್ತಾರೆ ಎಂದು ಆರೋಪಿಸಿದರಲ್ಲದೆ, ಹಿಂದೂಗಳಿಗೆ ದೀಪಾವಳಿ ಹೇಗೆ ಆಚರಿಸಬೇಕೆಂದು ಕಲಿಸಲು ಈ ನಟಿಯ ಅಗತ್ಯವಿಲ್ಲ ಎಂದಿದ್ದರು. ಮಹಾರಾಷ್ಟ್ರ ಸಚಿವ ನಿತೇಶ್ ರಾಣೆ ಕೂಡ ಮಿರ್ಜಾ ಅವರನ್ನು ಟೀಕಿಸಿ, ಪರಿಸರ ಸ್ನೇಹಿ ದೀಪಾವಳಿಗಾಗಿ ಕರೆ ನೀಡುವ ಅವರು ಈದ್, ಮೊಹರಂ ಅಥವಾ ಬಕ್ರೀದ್ ಹಬ್ಬಗಳ ಸಮಯದಲ್ಲಿ ಇಂತಹ ಮನವಿಗಳನ್ನು ಏಕೆ ಮಾಡುವುದಿಲ್ಲ ಎಂದು ಪ್ರಶ್ನಿಸಿದ್ದರು ಮತ್ತು ಆಕೆಯಂತಹ ಜನರು ‘ಸನಾತನ ಹಿಂದೂ ಧರ್ಮದ ವಿರೋಧಿಗಳು’ ಎಂದು ಆರೋಪಿಸಿದ್ದರು. ಶಿವಸೇನೆ ವಕ್ತಾರೆ ಶೈನಾ ಎನ್‌ಸಿ ಕೂಡ ಮಿರ್ಜಾ ಅವರ ಭಾಗವಹಿಸುವಿಕೆಯನ್ನು ಪ್ರಶ್ನಿಸಿ, ದೀಪಾವಳಿ ಆಚರಣೆಯ ಬಗ್ಗೆ ಮುಂಬೈ ನಗರಕ್ಕೆ ಈ ನಟಿಯಿಂದ ಪಾಠ ಕಲಿಯುವ ಅಗತ್ಯವಿಲ್ಲ ಎಂದು ಹೇಳಿದ್ದರು. ಈ ಎಲ್ಲಾ ಆಕ್ಷೇಪಣೆಗಳ ನಂತರ, ಬಿಎಂಸಿ ತನ್ನ ಸಾಮಾಜಿಕ ಮಾಧ್ಯಮ ಖಾತೆಗಳಿಂದ ದಿಯಾ ಮಿರ್ಜಾ ಅವರ ವಿಡಿಯೋವನ್ನು ತೆಗೆದುಹಾಕಿತ್ತು.
