ದಕ್ಷಿಣ ಆಫ್ರಿಕಾ ವನಿತೆಯರ ವಿರುದ್ಧ ನಡೆದ ಟಿ-20 ಸರಣಿಯನ್ನು ಭಾರತದ ವನಿತೆಯರು ಗೆದ್ದಿದ್ದಾರೆ. ಕೊನೆಯ ಪಂದ್ಯದಲ್ಲಿ ಸೋತ ಭಾರತದ ವನಿತೆಯರು 3-1ರಿಂದ ಸರಣಿಯನ್ನು ಗೆದ್ದರು. ಈ ಮೂಲಕ ಭಾರತ ತಂಡದ ನಾಯಕಿ ಹರ್ಮನ್ ಪ್ರೀತ್ ಕೌರ್ ನೂತನ ದಾಖಲೆ ಬರೆದರು.
ಟಿ-20 ವನಿತೆಯರ ಕ್ರಿಕೆಟ್ ನಲ್ಲಿ 100 ಪಂದ್ಯಗಳನ್ನು ಆಡಿದ ಪ್ರಥಮ ಕ್ರಿಕೆಟರ್ ಎಂಬ ಹೆಗ್ಗಳಿಕೆಗೆ ಹರ್ಮನ್ ಪ್ರೀತ್ ಕೌರ್ ಪಾತ್ರರಾಗಿದ್ದಾರೆ. ದಕ್ಷಿಣ ಆಫ್ರಿಕಾ ವಿರುದ್ಧ ಆಡಿದ ಅಂತಿಮ ಆರನೇ ಪಂದ್ಯದಲ್ಲಿ ಹರ್ಮನ್ ಸಾಧನೆ ಮಾಡಿದರು. ಹರ್ಮನ್ ಹೊರತುಪಡಿಸಿದರೆ ಭಾರತದ ವನಿತೆಯರ ಟೀಂನಲ್ಲಿ ಇತ್ತೀಚೆಗಷ್ಟೇ ಟಿ-20ಗೆ ವಿದಾಯ ಹೇಳಿದ ಮಿಥಾಲಿ ರಾಜ್ 89 ಪಂದ್ಯಗಳನ್ನಾಡಿದ್ದಾರೆ.
ಪುರುಷರ ಕ್ರಿಕೆಟ್ ಟೀಂನಲ್ಲೂ ಕೂಡ ಈ ಸಾಧನೆಯನ್ನು ಯಾರೂ ಮಾಡಿಲ್ಲ. ಮಹೇಂದ್ರ ಸಿಂಗ್ ಧೋನಿ ಹಾಗೂ ರೋಹಿತ್ ಶರ್ಮಾ ಇಲ್ಲಿಯವರೆಗೆ 98 ಟಿ-20 ಪಂದ್ಯಗಳನ್ನು ಆಡಿದ್ದಾರೆ. ಆದರೆ ಭಾರತದ ವನಿತೆಯರ ತಂಡದ ನಾಯಕಿ ಹರ್ಮನ್ ಪ್ರೀತ್ ಕೌರ್ 100 ಟಿ-20 ಪಂದ್ಯಗಳನ್ನು ಆಡುವ ಮೂಲಕ ದಾಖಲೆ ಸೃಷ್ಟಿಸಿದರು. ನಿನ್ನೆ ಸೂರತ್ ನಲ್ಲಿ ನಡೆದ ಅಂತಿಮ ಆರನೇ ಟಿ-20 ಪಂದ್ಯದಲ್ಲಿ ದಕ್ಷಿಣ ಆಫ್ರಿಕಾದ 176 ರನ್ ಗಳ ಟಾರ್ಗೆಟ್ ಬೆನ್ನತ್ತಿದ್ದ ಭಾರತದ ವನಿತೆಯರು ಕೇವಲ 70 ರನ್ ಕಲೆ ಹಾಕಿ ಆಲೌಟ್ ಆದರು.
