ಸೆಪ್ಟೆಂಬರ್ ಅಂತ್ಯದೊಳಗೆ ಒಂಟಿ ಮತ್ತು ವಿಚ್ಛೇದಿತ ಉದ್ಯೋಗಿಗಳು ಒಂಟಿಯಾಗಿ ಉಳಿದರೆ ಅವರನ್ನು ಕೆಲಸದಿಂದ ತೆಗೆದುಹಾಕುವುದಾಗಿ ಚೀನಾದ ಕಂಪನಿಯೊಂದು ಇತ್ತೀಚೆಗೆ ಬೆದರಿಕೆ ಹಾಕುವ ನೋಟಿಸ್ ನೀಡಿದೆ ಎಂದು ಸೌತ್ ಚೀನಾ ಮಾರ್ನಿಂಗ್ ಪೋಸ್ಟ್ ವರದಿ ತಿಳಿಸಿದೆ. ಈ ಕ್ರಮವನ್ನು ಅಧಿಕಾರಿಗಳು ಖಂಡಿಸಿದ್ದಾರೆ ಎಂದು ವರದಿ ತಿಳಿಸಿದೆ.
1,200 ಕ್ಕೂ ಹೆಚ್ಚು ಉದ್ಯೋಗಿಗಳನ್ನು ಹೊಂದಿರುವ ಶುಂಟಿಯನ್ ಕೆಮಿಕಲ್ ಗ್ರೂಪ್, ಜನವರಿಯಲ್ಲಿ ಸಂಸ್ಥೆಯ ವಿವಾಹ ದರವನ್ನು ಹೆಚ್ಚಿಸುವ ಉದ್ದೇಶದಿಂದ ಈ ನೀತಿಯನ್ನು ಘೋಷಿಸಿತು ಎಂದು ತಿಳಿದುಬಂದಿದೆ.
28 ರಿಂದ 58 ವರ್ಷ ವಯಸ್ಸಿನ ಎಲ್ಲ ಒಂಟಿ ಮತ್ತು ವಿಚ್ಛೇದಿತ ಉದ್ಯೋಗಿಗಳು ಸೆಪ್ಟೆಂಬರ್, 2025 ರ ಅಂತ್ಯದ ವೇಳೆಗೆ ಮದುವೆಯಾಗಬೇಕೆಂದು ಕಂಪನಿ ಬಯಸಿದೆ ಎಂದು ವರದಿಯಲ್ಲಿ ಉಲ್ಲೇಖಿಸಲಾಗಿದೆ. ಮಾರ್ಚ್ ಅಂತ್ಯದೊಳಗೆ ಸೆಟಲ್ ಆಗದವರು ಸ್ವಯಂ ನಿವೃತ್ತಿ ಪತ್ರ ಬರೆಯಬೇಕು ಎಂದು ಕಂಪನಿ ಹೇಳಿದೆ ಎಂದು ವರದಿ ಹೇಳಿದೆ.
ಜೂನ್ ಅಂತ್ಯದ ವೇಳೆಗೆ ಅವರು ವಿವಾಹವಾಗಲು ವಿಫಲವಾದರೆ ಕಂಪನಿಯು ಆ ಉದ್ಯೋಗಿಗಳ ಮೌಲ್ಯಮಾಪನವನ್ನು ನಡೆಸುತ್ತದೆ, ಅಂತಿಮವಾಗಿ ಅವರು ಸೆಪ್ಟೆಂಬರ್ ಅಂತ್ಯದವರೆಗೆ ಇನ್ನೂ ಒಂಟಿಯಾಗಿ ಉಳಿದರೆ, ಅವರನ್ನು ಕೆಲಸದಿಂದ ತೆಗೆದುಹಾಕಲಾಗುತ್ತದೆ.
‘ನಿಷ್ಠೆ ಮತ್ತು ಪುತ್ರಭಕ್ತಿ’ಯಂತಹ ಸಾಂಪ್ರದಾಯಿಕ ಚೀನೀ ಮೌಲ್ಯಗಳ ಮೇಲೆ ಒತ್ತು ನೀಡುತ್ತಾ, ಕಂಪನಿಯು ಮತ್ತೊಂದು ನೀತಿಯನ್ನು ಘೋಷಿಸಿದೆ. ಅದು “ಮದುವೆ ದರವನ್ನು ಸುಧಾರಿಸುವ ಸರ್ಕಾರದ ಕರೆಗೆ ಪ್ರತಿಕ್ರಿಯಿಸದಿರುವುದು ವಿಶ್ವಾಸದ್ರೋಹ; ನಿಮ್ಮ ಹೆತ್ತವರ ಮಾತನ್ನು ಕೇಳದಿರುವುದು ಪುತ್ರಭಕ್ತಿಯಲ್ಲ. ನಿಮ್ಮನ್ನು ಒಂಟಿಯಾಗಿರಲು ಬಿಡುವುದು ಪರೋಪಕಾರಿಯಲ್ಲ” ಎಂದು ಹೇಳುತ್ತದೆ.
ಲಿನಿ ನಗರದಲ್ಲಿ ನೆಲೆಗೊಂಡಿರುವ ಈ ಸಂಸ್ಥೆಯು 2001 ರಲ್ಲಿ ಸ್ಥಾಪನೆಯಾಯಿತು, ಇದು ಅಲ್ಲಿನ ಟಾಪ್ 50 ಉದ್ಯಮಗಳಲ್ಲಿ ಒಂದಾಗಿದೆ.
ಸ್ಥಳೀಯ ಮಾನವ ಸಂಪನ್ಮೂಲ ಮತ್ತು ಸಾಮಾಜಿಕ ಭದ್ರತಾ ಬ್ಯೂರೋ ಮತ್ತೊಂದು ಚೀನೀ ಮಾಧ್ಯಮಕ್ಕೆ ತಿಳಿಸಿದ್ದು, ಫೆಬ್ರವರಿ 13 ರಂದು ಸಂಸ್ಥೆಯನ್ನು ಪರಿಶೀಲಿಸಲಾಯಿತು. ಒಂದು ದಿನಕ್ಕಿಂತ ಕಡಿಮೆ ಅವಧಿಯಲ್ಲಿ ನೀತಿಯನ್ನು ಹಿಂತೆಗೆದುಕೊಳ್ಳಲಾಗಿದೆ ಎಂದು ಪ್ರಕಟಣೆಯು ಮತ್ತಷ್ಟು ಹೇಳಿದೆ. ಅಲ್ಲದೆ, ಯಾವುದೇ ಉದ್ಯೋಗಿಯನ್ನು ಅವರ ವೈವಾಹಿಕ ಸ್ಥಿತಿಯ ಆಧಾರದ ಮೇಲೆ ವಜಾಗೊಳಿಸಲಾಗಿಲ್ಲ ಎಂದು ಪ್ರಕಟಣೆಯು ಸ್ಪಷ್ಟಪಡಿಸಿದೆ.
ಈ ನೀತಿಯು ಆನ್ಲೈನ್ನಲ್ಲಿ ಹೆಚ್ಚಿನ ಟೀಕೆಗಳನ್ನು ಪಡೆಯಿತು, ಇದರಲ್ಲಿ ಒಬ್ಬ ಬಳಕೆದಾರರು ಕಂಪನಿಯು ತನ್ನ ಸ್ವಂತ ವ್ಯವಹಾರವನ್ನು ನೋಡಿಕೊಳ್ಳಬೇಕು, ಅದರ ಉದ್ಯೋಗಿಗಳ ವೈಯಕ್ತಿಕ ಜೀವನದಿಂದ ದೂರವಿರಬೇಕು ಎಂದು ಹೇಳಿದರು.
2019ಕ್ಕೆ ಹೋಲಿಸಿದರೆ 2024ರಲ್ಲಿ ಮಹಿಳೆಯರಿಂದ ವೇತನ ರಹಿತ ಮನೆಕೆಲಸಕ್ಕೆ ಕಡಿಮೆ ಸಮಯ ವ್ಯಯ
