ಮಾದಕ ದ್ರವ್ಯ ಸೇವನೆ ಆರೋಪದ ಮೇಲೆ ಮಲಯಾಳಂ ನಟ ಶೈನ್ ಟಾಮ್ ಚಾಕೊ ಅವರನ್ನು ಕೇರಳ ಪೊಲೀಸರು ಶನಿವಾರ ಬಂಧಿಸಿದ್ದಾರೆ.
ಅಧಿಕಾರಿಗಳ ಪ್ರಕಾರ, ಶೈನ್ ಟಾಮ್ ವಿರುದ್ಧ ಮಾದಕ ದ್ರವ್ಯಗಳು ಮತ್ತು ಮನೋವಿಕೃತಿ ಪದಾರ್ಥಗಳ (ಎನ್‌ಡಿಪಿಸ್‌) ಕಾಯ್ದೆಯ ಸೆಕ್ಷನ್ 27 (ಮಾದಕ ದ್ರವ್ಯಗಳು ಅಥವಾ ಮನೋವಿಕೃತಿ ಪದಾರ್ಥಗಳ ಸೇವನೆ) ಮತ್ತು 29 (ಪ್ರೇರಣೆ ಮತ್ತು ಕ್ರಿಮಿನಲ್ ಪಿತೂರಿ) ಅಡಿಯಲ್ಲಿ ಪ್ರಕರಣ ದಾಖಲಿಸಲಾಗಿದೆ.
ಮುಂದಿನ ಕಾನೂನು ಕ್ರಮಗಳ ಜೊತೆಗೆ ಶೀಘ್ರದಲ್ಲೇ ಶೈನ್ ಟಾಮ್ ಅವರನ್ನು ವೈದ್ಯಕೀಯ ಪರೀಕ್ಷೆಗೆ ಒಳಪಡಿಸಲಾಗುವುದು ಎಂದು ಅಧಿಕಾರಿಗಳು ಹೇಳಿದ್ದಾರೆ.
ಎರ್ನಾಕುಲಂ ಉತ್ತರ ಪೊಲೀಸರು ಎನ್‌ಡಿಪಿಎಸ್ ಕಾಯ್ದೆಯಡಿ ನಟನ ಬಂಧನವನ್ನು ಔಪಚಾರಿಕವಾಗಿ ದಾಖಲಿಸಿಕೊಂಡಿದ್ದು, ಜಾಮೀನು ನೀಡಬಹುದಾದ ಆರೋಪಗಳನ್ನು ಹೊರಿಸಲಾಗಿದೆ ಎಂದು ಮೂಲಗಳು ದೃಢಪಡಿಸಿವೆ ಎಂದು ಟೈಮ್ಸ್ ಆಫ್ ಇಂಡಿಯಾ ವರದಿ ಮಾಡಿದೆ.
ಎರ್ನಾಕುಲಂ ಉತ್ತರ ಪೊಲೀಸ್ ಠಾಣೆಯಲ್ಲಿ ತನಿಖಾ ತಂಡದ ಮುಂದೆ ವಿಚಾರಣೆಗೆ ಹಾಜರಾಗುವಂತೆ ಸೂಚಿಸಿ ಶೈನ್ ಟಾಮ್ ಅವರಿಗೆ ಕೊಚ್ಚಿ ನಗರ ಪೊಲೀಸರು ಸಮನ್ಸ್ ಜಾರಿ ಮಾಡಿದ್ದರು. ಶನಿವಾರ ಬೆಳಿಗ್ಗೆ 10 ಗಂಟೆ ಸುಮಾರಿಗೆ ಶೈನ್ ಟಾಮ್ ತಮ್ಮ ವಕೀಲರೊಂದಿಗೆ ಠಾಣೆಗೆ ತೆರಳಿದ್ದರು.
ಕಳೆದ ಬುಧವಾರ ರಾತ್ರಿ ಜಿಲ್ಲಾ ಮಾದಕ ದ್ರವ್ಯ ವಿರೋಧಿ ವಿಶೇಷ ಕಾರ್ಯಪಡೆ (ಡನ್ಸಾಫ್) ನಡೆಸಿದ ದಾಳಿಯ ಸಮಯದಲ್ಲಿ ಹೋಟೆಲ್‌ ಕಟ್ಟಡದ ಮೂರನೇ ಮಹಡಿಯ ಕೋಣೆಯ ಕಿಟಕಿಯಿಂದ ಹಾರಿ ಶೈನ್ ಟಾಮ್ ಚಾಕೊ ಪರಾರಿಯಾಗಿದ್ದರು. ಮೂರನೇ ಮಹಡಿಯಿಂದ ಎರಡನೇ ಮಹಡಿಗೆ ಬಳಿಕ ಈಜುಕೊಳಕ್ಕೆ ಹಾರಿ ಮೆಟ್ಟಿಲುಗಳ ಮೂಲಕ ಪರಾರಿಯಾಗಿದ್ದರು ಎಂಬ ಆರೋಪದ ಮೇಲೆ ಪೊಲೀಸರು ವಿಚಾರಣೆಗೆ ಒಳಪಡಿಸಿದ್ದರು.
ಬಾಗಿಲಲ್ಲಿ ನಿಂತಿರುವುದು ಪೊಲೀಸ್ ಅಧಿಕಾರಿಗಳೆಂದು ತನಗೆ ತಿಳಿದಿರಲಿಲ್ಲ. ಅವರು ತನ್ನ ಮೇಲೆ ಹಲ್ಲೆ ಮಾಡಲು ಪ್ರಯತ್ನಿಸುತ್ತಿರುವ ದುಷ್ಕರ್ಮಿಗಳು ಎಂದು ಭಾವಿಸಿ ಪರಾರಿಯಾದೆ ಎಂದು ವಿಚಾರಣೆಯ ಸಮಯದಲ್ಲಿ ಚಾಕೊ ಹೇಳಿಕೊಂಡಿದ್ದಾರೆ ಎನ್ನಲಾಗಿದೆ.
ತನಿಖೆಯ ಭಾಗವಾಗಿ, ಪೊಲೀಸರು ಚಾಕೊ ಅವರ ಕರೆ ದತ್ತಾಂಶ ದಾಖಲೆಗಳು ಮತ್ತು ಸಂದೇಶಗಳ ಇತಿಹಾಸವನ್ನು ಸಂಗ್ರಹಿಸಿದ್ದಾರೆ. ಎರ್ನಾಕುಲಂ ಕೇಂದ್ರ ಸಹಾಯಕ ಆಯುಕ್ತ ಸಿ ಜಯಕುಮಾರ್ ಮತ್ತು ನಾರ್ಕೋಟಿಕ್ ಸೆಲ್ ಸಹಾಯಕ ಆಯುಕ್ತ ಕೆ.ಎ ಅಬ್ದುಲ್ ಸಲಾಮ್ ನೇತೃತ್ವದ ತಂಡ ಚಾಕೊ ಅವರನ್ನು ವಿಚಾರಣೆಗೆ ನಡೆಸಿದೆ.
ಬ್ರಾಹ್ಮಣರ ಕುರಿತ ಹೇಳಿಕೆ ವಿವಾದ: ಅನುರಾಗ್ ಕಶ್ಯಪ್ ಕುಟುಂಬಕ್ಕೆ ಕೊಲೆ, ಅತ್ಯಾಚಾರ ಬೆದರಿಕೆ
