ಉತ್ತರ ಕನ್ನಡ ಜಿಲ್ಲೆಯ ಮುಂಡಗೋಡಿನಲ್ಲಿ ಡಾ. ಬಿ.ಆರ್. ಅಂಬೇಡ್ಕರ್ ಅವರ ಪ್ರತಿಮೆಗೆ ಮಾಲಾರ್ಪಣೆ ಮಾಡುವ ಮೂಲಕ ‘SIR ವಿರೋಧಿ ಕರ್ನಾಟಕ’, ನಾಗರಿಕ ಮತಕಾವಲು ಸಮಿತಿ, ಜಾತ್ಯತೀತ ಪಕ್ಷಗಳು ಹಾಗೂ ವಿವಿಧ ನಾಗರಿಕ ಸಂಘಟನೆಗಳ ಒಕ್ಕೂಟದ ವತಿಯಿಂದ ‘SIR ಪರಿಶೋಧ ಹಾಗೂ ಪ್ರತಿರೋಧ ಪ್ರವಾಸ’ಕ್ಕೆ ಅಧಿಕೃತವಾಗಿ ಚಾಲನೆ ನೀಡಲಾಗಿದೆ. ಮತದಾರರ ಪಟ್ಟಿಯ ವಿಶೇಷ ಸಮಗ್ರ ಪರಿಷ್ಕರಣೆ (SIR) ಪ್ರಕ್ರಿಯೆಯಿಂದ ಲಕ್ಷಾಂತರ ಬಡವರು ಹಾಗೂ ಮೂಲವಾಸಿಗಳು ಮತದಾನದ ಹಕ್ಕಿನಿಂದ ವಂಚಿತರಾಗುತ್ತಿರುವ ಭೀತಿಯ ಹಿನ್ನೆಲೆಯಲ್ಲಿ ಈ ಜಾಗೃತಿ ಹಾಗೂ ಪ್ರತಿರೋಧ ಜಾಥಾ ಆರಂಭಗೊಂಡಿದೆ.
ಪ್ರವಾಸದ ಮೊದಲ ದಿನವೇ ಮುಖಂಡರು ಮುಂಡಗೋಡು ತಾಲೂಕಿನ ಮೈನಳ್ಳಿಗೆ ಭೇಟಿ ನೀಡಿ, ಆದಿವಾಸಿ ಬುಡಕಟ್ಟು ಸಮುದಾಯಗಳಾದ ಸಿದ್ದಿ ಮತ್ತು ಗೌಳಿ ಜನರನ್ನು ಪ್ರತ್ಯಕ್ಷವಾಗಿ ಭೇಟಿಯಾದರು. ಮೈನಳ್ಳಿಯ ಸಿದ್ದಿ ಮತ್ತು ಗೌಳಿ ಸಮುದಾಯದ ಬಾಂಧವರು ತಮ್ಮದೇ ವಿಶಿಷ್ಟ ಶೈಲಿಯ ಜನಪದ ನೃತ್ಯ ಹಾಗೂ ಹಾಡುಗಳ ಮೂಲಕ ಮುಖಂಡರನ್ನು ಅದ್ದೂರಿಯಾಗಿ ಸ್ವಾಗತಿಸಿದರು. ಈ ಸಂದರ್ಭದಲ್ಲಿ ಗ್ರಾಮಸ್ಥರೊಡನೆ ಸುದೀರ್ಘ ಸಂವಾದ ನಡೆಸಿದ ಪ್ರಮುಖರು, SIR ಪ್ರಕ್ರಿಯೆಯಿಂದ ಸ್ಥಳೀಯರು ಎದುರಿಸುತ್ತಿರುವ ತಾಂತ್ರಿಕ ತೊಡಕುಗಳು, ದಾಖಲಾತಿಗಳ ಕೊರತೆ ಹಾಗೂ ಮತದಾರರ ಪಟ್ಟಿಯಿಂದ ಹೆಸರು ಗಾಯಬ್ ಆಗಿರುವ ಕುರಿತು ಪ್ರತ್ಯಕ್ಷ ಮಾಹಿತಿ ಮತ್ತು ಅಹವಾಲುಗಳನ್ನು ಸ್ವೀಕರಿಸಿದರು.
ಕರ್ನಾಟಕದಲ್ಲಿ ಜಾರಿಯಾಗಿರುವ SIR ಪ್ರಕ್ರಿಯೆಯು ಬೃಹತ್ ಅವಾಂತರಗಳನ್ನು ಸೃಷ್ಟಿಸಿದ್ದು, ರಾಜ್ಯದಲ್ಲಿ ಸುಮಾರು 1.8 ಕೋಟಿ ಜನರು ASDDO ಪಟ್ಟಿಯಲ್ಲಿದ್ದರೆ, ಇನ್ನು ಸುಮಾರು 43 ಲಕ್ಷಕ್ಕೂ ಹೆಚ್ಚು ಜನರಿಗೆ ಆಯೋಗದಿಂದ ನೋಟಿಸ್ ಜಾರಿಯಾಗಿದೆ. ಈ ಎರಡು ಪಟ್ಟಿಗಳಿಂದಾಗಿ ಲಕ್ಷಾಂತರ ಬಡ, ದಲಿತ ಮತ್ತು ಶೋಷಿತ ನಾಗರಿಕರು ತಮ್ಮ ಮೂಲಭೂತ ಮತದಾನದ ಹಕ್ಕನ್ನು ಉಳಿಸಿಕೊಳ್ಳಲು ದಾಖಲೆಗಳ ಹುಡುಕಾಟದಲ್ಲಿ ಪರದಾಡುವಂತಾಗಿದೆ. ಈ ದೋಷಪೂರಿತ ಪ್ರಕ್ರಿಯೆಯ ವಿರುದ್ಧ ಜನಪರ ಸಂಘಟನೆಗಳ ಜೊತೆಗೆ ಖ್ಯಾತ ನಟ, ಪ್ರಗತಿಪರ ಚಿಂತಕ ಪ್ರಕಾಶ್ ರಾಜ್, ನಟ ಕಿಶೋರ್ ಸೇರಿದಂತೆ ನಾಡಿನ ಸಾಹಿತಿ ಹಾಗೂ ಕಲಾವಿದರು ಹೋರಾಟದ ಭಾಗವಾಗಿದ್ದಾರೆ.
ಸಿಪಿಐ(ಎಂ) ನಿಂದ ಬೆಂಬಲ:
ಸಿಪಿಐ(ಎಂ) (CPIM) ರಾಜ್ಯ ಸಮಿತಿಯು ಈ ಹೋರಾಟಕ್ಕೆ ಸಂಪೂರ್ಣ ಬೆಂಬಲ ವ್ಯಕ್ತಪಡಿಸಿದ್ದು, ಸೆಪ್ಟೆಂಬರ್ 22 ರಿಂದ 30 ರವರೆಗೆ ರಾಜ್ಯದ ಸುಮಾರು 14 ಜಿಲ್ಲಾ ಕೇಂದ್ರಗಳು ಹಾಗೂ ವಿವಿಧ ತಾಲೂಕುಗಳಲ್ಲಿ ನಡೆಯಲಿರುವ ಪ್ರಕಾಶ್ ರಾಜ್ ನೇತೃತ್ವದ ಈ ಜಾಗೃತಿ ಪ್ರವಾಸಕ್ಕೆ ಅಗತ್ಯ ನೆರವು ಮತ್ತು ಸಹಕಾರ ನೀಡುವಂತೆ ತಮ್ಮ ಎಲ್ಲಾ ಜಿಲ್ಲಾ ಮತ್ತು ತಾಲೂಕು ಘಟಕಗಳಿಗೆ ನಿರ್ದೇಶನ ನೀಡಿದೆ. ವಿಶೇಷವಾಗಿ ಕಲಬುರಗಿ, ತುಮಕೂರು ಹಾಗೂ ಚಿಕ್ಕಬಳ್ಳಾಪುರ ಜಿಲ್ಲೆಗಳಲ್ಲಿ ಈ ತಂಡದೊಂದಿಗೆ ಸಮನ್ವಯ ಸಾಧಿಸಿ ಕಾರ್ಯಕ್ರಮಗಳನ್ನು ಯಶಸ್ವಿಗೊಳಿಸಲು ಪಕ್ಷದ ಕಾರ್ಯಕರ್ತರಿಗೆ ಕರೆ ನೀಡಲಾಗಿದೆ. ಸಂವಿಧಾನದ ಅಡಿಪಾಯವಾದ ‘ಒಬ್ಬ ವ್ಯಕ್ತಿ – ಒಂದು ಮತ’ ಎಂಬ ಹಕ್ಕನ್ನು ರಕ್ಷಿಸಲು ಈ ‘ಪರಿಶೋಧ ಮತ್ತು ಪ್ರತಿರೋಧ ಪ್ರವಾಸ’ ರಾಜ್ಯಾದ್ಯಂತ ಕಾವು ಪಡೆದುಕೊಳ್ಳುತ್ತಿದೆ.
