2020 ರಲ್ಲಿ ಎಂಟು ವರ್ಷದ ದಲಿತ ಬಾಲಕಿಯನ್ನು ಅಪಹರಿಸಿ, ಅತ್ಯಾಚಾರ ಮಾಡಿ ಕೊಲೆ ಮಾಡಿದ್ದಕ್ಕಾಗಿ ಮಥುರಾದ ವಿಶೇಷ ಎಸ್‌ಸಿ/ಎಸ್‌ಟಿ ನ್ಯಾಯಾಲಯವು ಮಂಗಳವಾರ 50 ವರ್ಷದ ವ್ಯಕ್ತಿಗೆ ಮರಣದಂಡನೆ ವಿಧಿಸಿದೆ.
ಇದನ್ನು ‘ಅಪರೂಪದಲ್ಲಿ ಅಪರೂಪದ ಪ್ರಕರಣ’ ಎಂದು ಕರೆದಿರುವ ಕೋರ್ಟ್‌, ಶವಪರೀಕ್ಷೆಯ ವರದಿಯು ಬಲಿಪಶುವಿನ ಖಾಸಗಿ ಭಾಗಗಳಲ್ಲಿ ಅನೇಕ ತೀಕ್ಷ್ಣವಾದ ಗಾಯಗಳಾಗಿದ್ದು, ಆಕೆಯ ಗರ್ಭಕೋಶಕ್ಕೆ ತೀವ್ರ ಹಾನಿಯಾಗಿದೆ. ಆಕೆಯ ಮೂತ್ರಪಿಂಡಗಳು ಮತ್ತು ಯಕೃತ್ತಿನಲ್ಲಿ ಆಂತರಿಕ ರಕ್ತಸ್ರಾವವಾಗಿದ್ದು, ಇದು ಆಕೆಯ ಸಾವಿಗೆ ಕಾರಣವಾಯಿತು ಎಂದು ಬಹಿರಂಗಪಡಿಸಿದೆ.
ಹೆಚ್ಚುವರಿ ಜಿಲ್ಲಾ ಸರ್ಕಾರಿ ವಕೀಲ ಸುಭಾಷ್ ಚತುರ್ವೇದಿ, “ಶವಪರೀಕ್ಷೆ ನಡೆಸಿದ ವೈದ್ಯ ಸೋನು ಚತುರ್ವೇದಿ, ಗುದನಾಳ ಮತ್ತು ಕುತ್ತಿಗೆಯ ಮೇಲೆ ಗಾಯಗಳು, ಆಕೆಯ ಭುಜದ ಮೇಲೆ ಆಳವಾದ ಕಡಿತದ ಗುರುತುಗಳು ಮತ್ತು ಆಕೆಯ ದೇಹದ ಹಲವಾರು ಭಾಗಗಳಲ್ಲಿ ಗೀರುಗಳನ್ನು ಸಹ ಕಂಡುಕೊಂಡರು. ತೀವ್ರ ರಕ್ತದ ನಷ್ಟದಿಂದಾಗಿ ಆಕೆ ಸಾವನ್ನಪ್ಪಿರಬಹುದು. ಏಕೆಂದರೆ, ಅಪರಾಧಿ ಆಕೆಯ ಮೇಲೆ ಹಲ್ಲೆ ಮಾಡಿದ ನಂತರ, ಕತ್ತು ಹಿಸುಕಿ ಕೊಂದು ರಾತ್ರಿ ಕಾಡಿನಲ್ಲಿ ಸಾಯಲು ಬಿಟ್ಟಿದ್ದ” ಎಂದು ವಿವರಿಸಿದ್ದಾರೆ.
ನವೆಂಬರ್ 26, 2020 ರಂದು, ಮಥುರಾ ಜಿಲ್ಲೆಯ ತನ್ನ ಹಳ್ಳಿಯ ಮಹಿಳೆಯೊಂದಿಗೆ ಉರುವಲು ಸಂಗ್ರಹಿಸುತ್ತಿದ್ದಾಗ ಎರಡನೇ ತರಗತಿಯ ವಿದ್ಯಾರ್ಥಿನಿಯನ್ನು ಅಪಹರಿಸಲಾಯಿತು. ಆ ಸಂಜೆ ಆಕೆ ಮನೆಗೆ ಹಿಂತಿರುಗದಿದ್ದಾಗ ಬಾಲಕಿಯ ತಂದೆ ನಾಪತ್ತೆ ದೂರು ದಾಖಲಿಸಿದರು. ನಂತರ ಪೊಲೀಸರು ವೃಂದಾವನದ ಅರಣ್ಯ ಪ್ರದೇಶದಲ್ಲಿ ಆಕೆಯ ಶವವನ್ನು ಪತ್ತೆಹಚ್ಚಿದ್ದರು. ಅಲ್ಲಿ, ಆಕೆಯದ್ದೇ ಬಟ್ಟೆಗಳಿಂದಲೇ ಕತ್ತು ಹಿಸುಕಿ ಕೊಲ್ಲಲಾಗಿತ್ತು.
ಬಾಲಕಿಯ ಗ್ರಾಮಸ್ಥನೇ ಆದ ಆರೋಪಿಯನ್ನು ಎರಡು ದಿನಗಳ ನಂತರ ನವೆಂಬರ್ 28 ರಂದು ಬಂಧಿಸಲಾಯಿತು.
ಐಪಿಸಿ ಸೆಕ್ಷನ್ 363 (ಅಪಹರಣ), 376 (ಅತ್ಯಾಚಾರ), 377 (ಪ್ರಕೃತಿಯ ಆದೇಶದ ವಿರುದ್ಧ ಸಂಭೋಗ), 302 (ಕೊಲೆ) ಮತ್ತು 201 (ಸಾಕ್ಷ್ಯ ನಾಶ) ಜೊತೆಗೆ ಪೋಕ್ಸೊ ಕಾಯ್ದೆ ಮತ್ತು ಎಸ್‌ಸಿ/ಎಸ್‌ಟಿ ಕಾಯ್ದೆಯ ಸೆಕ್ಷನ್‌ಗಳ ಅಡಿಯಲ್ಲಿ ಎಫ್‌ಐಆರ್ ದಾಖಲಿಸಲಾಗಿದೆ. ಜನವರಿ 25, 2021 ರಂದು ಆರೋಪಪಟ್ಟಿ ಸಲ್ಲಿಸಲಾಯಿತು, ಮುಂದಿನ ತಿಂಗಳು ವಿಚಾರಣೆ ಪ್ರಾರಂಭವಾಯಿತು.
ವಿಚಾರಣೆಯ ಸಮಯದಲ್ಲಿ, ಪೊಲೀಸರು ಒಂಬತ್ತು ವ್ಯಕ್ತಿಗಳ ಸಾಕ್ಷ್ಯಗಳು, ವೈಜ್ಞಾನಿಕ ಪುರಾವೆಗಳು ಮತ್ತು ಶವಪರೀಕ್ಷೆಯ ಸಂಶೋಧನೆಗಳನ್ನು ಪ್ರಸ್ತುತಪಡಿಸಿದರು. ತನಿಖಾಧಿಕಾರಿಗಳು ಬಲಿಪಶುವಿನ ಉಗುರುಗಳಲ್ಲಿ ಅಪರಾಧಿಯ ಚರ್ಮದ ಅಂಗಾಂಶಗಳನ್ನು ಕಂಡುಕೊಂಡರು. ಗ್ರಾಮದ ಮಹಿಳೆಯೊಬ್ಬರು ಆ ವ್ಯಕ್ತಿ ಹುಡುಗಿಯರೊಂದಿಗೆ ಆಗಾಗ್ಗೆ ಅನುಚಿತವಾಗಿ ವರ್ತಿಸುತ್ತಿದ್ದ ಎಂದು ಸಾಕ್ಷ್ಯ ನೀಡಿದರು.
ಹೆಚ್ಚುವರಿ ಸೆಷನ್ಸ್ ನ್ಯಾಯಾಲಯದ ನ್ಯಾಯಾಧೀಶ ಬ್ರಿಜೇಶ್ ಕುಮಾರ್ ಅವರು ಅಪರಾಧಿಯ ಕ್ಷಮಾದಾನ ಅರ್ಜಿಯನ್ನು ತಿರಸ್ಕರಿಸಿದರು. ಇದು ಅವನ ಮೊದಲ ಅಪರಾಧ ಎಂದು ಚತುರ್ವೇದಿ ಹೇಳಿದರು. ಕೃತ್ಯದ ಅನಾಗರಿಕತೆಯನ್ನು ಪರಿಗಣಿಸಿ, ನ್ಯಾಯಾಲಯವು ಅವನನ್ನು ತಪ್ಪಿತಸ್ಥನೆಂದು ಪರಿಗಣಿಸಿ “ಅಪರಾಧಿಯನ್ನು ಸಾಯುವವರೆಗೂ ನೇತುಹಾಕಬೇಕು” ಎಂದು ತೀರ್ಪು ನೀಡಿತು. ಅಪರಾಧಿಗೆ 3,20,000 ರೂ. ದಂಡವನ್ನೂ ವಿಧಿಸಿದೆ.
ರಾಜಸ್ಥಾನ| 8 ವರ್ಷದ ದಲಿತ ಬಾಲಕನನ್ನು ಥಳಿಸಿ ತಲೆಕೆಳಗಾಗಿ ನೇತುಹಾಕಿದ ಪ್ರಬಲಜಾತಿ ವ್ಯಕ್ತಿ
