ಹಂಗೇರಿಯ ಸಾರ್ವತ್ರಿಕ ಚುನಾವಣೆಯಲ್ಲಿ, ಕಳೆದ 16 ವರ್ಷಗಳಿಂದ ದೇಶವನ್ನು ಆಳಿದ ತೀವ್ರ ಬಲಪಂಥೀಯ ಮತ್ತು ಅಮೆರಿಕ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್ ಆಪ್ತ ವಿಕ್ಟರ್ ಒರ್ಬಾನ್ ಸೋಲಾಗಿದೆ.
ಆರ್ಥಿಕ ಸ್ಥಗಿತ ಮತ್ತು ಹೆಚ್ಚುತ್ತಿರುವ ಜೀವನ ವೆಚ್ಚದ ವಿರುದ್ಧ ಹಂಗೇರಿಯ ಜನರು ನೀಡಿದ ತೀರ್ಪಿನಿಂದಾಗಿ ಒರ್ಬಾನ್ ಯುಗಾಂತ್ಯವಾಗಿದೆ ಎಂದು ವರದಿಗಳು ಹೇಳಿವೆ.
ಒರ್ಬಾನ್ ಅವರ ಎದುರಾಳಿ, ತಿಸಾ ಪಕ್ಷದ ನಾಯಕ ಪೀಟರ್ ಮೆಗ್ಯಾರ್ ಭರ್ಜರಿ ಜಯ ಸಾಧಿಸುವ ಮೂಲಕ ಹೊಸ ನಾಯಕರಾಗಿ ಹೊರಹೊಮ್ಮಿದ್ದಾರೆ.
ಅಧಿಕೃತ ಚುನಾವಣಾ ಫಲಿತಾಂಶಗಳ ಪ್ರಕಾರ, ಸುಮಾರು ಶೇಕಡ 67ರಷ್ಟು ಮತಗಳನ್ನು ಪಡೆಯುವ ಮೂಲಕ ಮೆಗ್ಯಾರ್ ಪಕ್ಷವು 137 ಸ್ಥಾನಗಳನ್ನು ಗಳಿಸಿದೆ, ಅಥವಾ ಒಟ್ಟು 199 ಸಂಸದೀಯ ಸ್ಥಾನಗಳಲ್ಲಿ ಮೂರನೇ ಎರಡಕ್ಕಿಂತ ಹೆಚ್ಚು ಸ್ಥಾನಗಳನ್ನು ಪಡೆದುಕೊಂಡಿದೆ.
ಭಾನುವಾರ (ಏ.12) ನಡೆದ ಚುನಾವಣೆಯನ್ನು ಯುರೋಪ್ ಮತ್ತು ಅಮೆರಿಕಾದ್ಯಂತ ಕುತೂಹಲದಿಂದ ಗಮನಿಸಲಾಗಿತ್ತು. ಓರ್ಬನ್ ತಮ್ಮನ್ನು ತಾವು ಯುರೋಪಿಯನ್ ಯೂನಿಯನ್ ಪಾಲಿನ ‘ಮುಳ್ಳು’ ಎಂದು ಹೇಳಿಕೊಂಡಿದ್ದರು.
ಒರ್ಬಾನ್ ಅವರನ್ನು ಡೊನಾಲ್ಡ್ ಟ್ರಂಪ್ ಮತ್ತು ಅವರ ತಂಡ (ವಿಶೇಷವಾಗಿ ಜೆಡಿ ವ್ಯಾನ್ಸ್) ಬೆಂಬಲಿಸಿತ್ತು. ಒರ್ಬಾನ್ ಸೋಲು ಯುರೋಪಿಯನ್ ಒಕ್ಕೂಟದಲ್ಲಿ ಹಂಗೇರಿಯ ಹಾದಿಯನ್ನು ಬದಲಿಸುವ ಸಾಧ್ಯತೆಯಿದೆ ಮತ್ತು ಉಕ್ರೇನ್ಗೆ ನೀಡುವ ಬೆಂಬಲಕ್ಕೆ ಇದ್ದ ಅಡೆತಡೆಗಳು ನಿವಾರಣೆಯಾಗಬಹುದು ಎಂದು ವಿಶ್ಲೇಷಿಸಲಾಗಿದೆ.
