ಸಾಂಪ್ರದಾಯಿಕ ಪತ್ರಿಕಾ ಜಾಹೀರಾತುಗಳು, ಬ್ಯಾನರ್‌ಗಳು ಹಾಗೂ ಸರ್ಕಾರಿ ಕಾರ್ಯಕ್ರಮಗಳ ನಡುವೆ ಪ್ರಸಾರವಾಗುತ್ತಿದ್ದ ಜಾಹೀರಾತುಗಳ ಕಾಲವೀಗ ಬದಲಾಗಿದೆ. ಪ್ರಜೆಗಳ ಮನಸ್ಸನ್ನು ತಲುಪಲು ಅಧಿಕಾರದಲ್ಲಿರುವವರು ಆಯ್ದುಕೊಳ್ಳುವ ಮಾರ್ಗಗಳು ದಿನದಿಂದ ದಿನಕ್ಕೆ ರೂಪಾಂತರಗೊಳ್ಳುತ್ತಿವೆ. ಇದಕ್ಕೆ ಜ್ವಲಂತ ನಿದರ್ಶನ – ಕರ್ನಾಟಕದ ನೂತನ ಮುಖ್ಯಮಂತ್ರಿ ಡಿ.ಕೆ. ಶಿವಕುಮಾರ್ ನೇತೃತ್ವದ ಕಾಂಗ್ರೆಸ್ ಸರ್ಕಾರ ತನ್ನ 100 ದಿನಗಳ ಸಾಧನೆಯನ್ನು ಬಿತ್ತರಿಸಲು ಕಂಡುಕೊಂಡಿರುವ ವಿಶಿಷ್ಟ ‘ಕಿರುತೆರೆ’ ಅಸ್ತ್ರ.
ಆಟೋ ಚಾಲಕನಾಗಿ ಕೆಲಸ ಮಾಡುವ ತಂದೆಯೊಬ್ಬರು ಕೈಯಲ್ಲಿ ಸಿಹಿ ತಿಂಡಿಯ ಪೆಟ್ಟಿಗೆಯೊಂದಿಗೆ ಮನೆಗೆ ಹೆಜ್ಜೆ ಹಾಕುತ್ತಾರೆ. ಅದನ್ನು ನೋಡಿದ ಮಗಳು, “ಏನಪ್ಪಾ ವಿಶೇಷ, ಇವತ್ತು ಹುಟ್ಟುಹಬ್ಬನಾ, ಹಬ್ಬನಾ ಅಥವಾ ಕುಟುಂಬದ ಸಂಭ್ರಮನಾ?” ಎಂದು ಪ್ರಶ್ನಿಸುತ್ತಾಳೆ. ಅದಕ್ಕೆ ತಂದೆ, “ಅದೇನೂ ಅಲ್ಲಮ್ಮ, ನಮ್ಮ ಕರ್ನಾಟಕ ಸರ್ಕಾರ ಅಧಿಕಾರಕ್ಕೆ ಬಂದು 100 ದಿನ ಪೂರೈಸಿದೆ. ಆ ಸಂಭ್ರಮಕ್ಕೆ ಆಯೋಜಿಸಿದ್ದ ಕಾರ್ಯಕ್ರಮದಲ್ಲಿ ಸಿಕ್ಕ ಸಿಹಿ ಇದು, ನಮ್ಮ ಸರ್ಕಾರ ಜನರಿಗಾಗಿ ಉತ್ತಮ ಕೆಲಸ ಮಾಡುತ್ತಿದೆ” ಎಂದು ಉತ್ತರಿಸುತ್ತಾರೆ. ಜನಪ್ರಿಯ ಕನ್ನಡ ಕಿರುತೆರೆ ಧಾರಾವಾಹಿ ‘ಶ್ರೀಗಂಧದ ಗುಡಿ’ಯಲ್ಲಿ ಪ್ರಸಾರವಾದ ಸುಮಾರು ಮೂರು ನಿಮಿಷಗಳ ಈ ಸನ್ನಿವೇಶವು, ಮುಖ್ಯಮಂತ್ರಿ ಡಿ.ಕೆ. ಶಿವಕುಮಾರ್ ನೇತೃತ್ವದ ಸರ್ಕಾರದ 100 ದಿನಗಳ ಸಾಧನೆಗಳ ಪಟ್ಟಿಯನ್ನೇ ಪ್ರೇಕ್ಷಕರ ಮುಂದಿಡುತ್ತದೆ.
ಧಾರಾವಾಹಿಯ ನಾಯಕಿ ವೈಭವಿ, ಸಿಎಂ ಉದ್ಯೋಗ ಮಿಷನ್, ಯುವಕರಿಗೆ ಉದ್ಯೋಗಾವಕಾಶ, ರೈತರ ಬೆಳೆಗೆ ಅಂತರರಾಷ್ಟ್ರೀಯ ಮಾರುಕಟ್ಟೆ ಕಲ್ಪಿಸುವ ಪ್ರಯತ್ನ, ರಾಜ್ಯದ ಮೊದಲ ಎಐ ವಿಶ್ವವಿದ್ಯಾಲಯ (AI University), ಗ್ರಾಮೀಣ ಆರೋಗ್ಯ ಸೇವೆಯ ಸಬಲೀಕರಣ ಹಾಗೂ ಆಂಟಿ-ನಾರ್ಕೋಟಿಕ್ಸ್ ಮಿಷನ್ ಕುರಿತು ವಿವರವಾಗಿ ಮಾತನಾಡುತ್ತಾಳೆ. ‘ಬಿಯಾಂಡ್ ಬೆಂಗಳೂರು’ ಯೋಜನೆಯಡಿ ರಾಜಧಾನಿಯ ಆಚೆಗೂ ಹೊಸ ಉದ್ಯೋಗ ಸೃಷ್ಟಿಯಾಗುತ್ತಿರುವುದು, ಕೈಗೆಟುಕುವ ದರದಲ್ಲಿ ವಸತಿ ಯೋಜನೆ ಮತ್ತು ಮೊಬೈಲ್ ಮೂಲಕವೇ ಸರ್ಕಾರಿ ಸೇವೆಗಳನ್ನು ತಲುಪಿಸುವ ಪ್ರಯತ್ನಗಳನ್ನು ಪಾತ್ರಗಳು ಚರ್ಚಿಸುತ್ತವೆ. ಕೊನೆಯಲ್ಲಿ, “ನಮ್ಮ ಕರ್ನಾಟಕ ಹೀಗೆಯೇ ಪ್ರಗತಿ ಹೊಂದಲಿ, ಜನರು ನೆಮ್ಮದಿಯಿಂದ ಬಾಳಲಿ” ಎಂದು ತಂದೆ ಹಾರೈಸುವ ಮೂಲಕ ಈ ದೃಶ್ಯ ಮುಕ್ತಾಯಗೊಳ್ಳುತ್ತದೆ.
ಸರ್ಕಾರದ ಸಾಧನೆಗಳನ್ನು ಸಾರ್ವಜನಿಕರಿಗೆ ತಲುಪಿಸಲು ಕೇವಲ ಧಾರಾವಾಹಿಯನ್ನಷ್ಟೇ ಅಲ್ಲದೆ, ಕಿರುತೆರೆಯ ಬೃಹತ್ ರಿಯಾಲಿಟಿ ಶೋ ‘ಬಿಗ್ ಬಾಸ್’ ವೇದಿಕೆಯನ್ನೂ ಬಳಸಿಕೊಳ್ಳಲಾಗಿದೆ. ಸೆಪ್ಟೆಂಬರ್ 10ರಂದು ನಡೆದ ಸಂಚಿಕೆಯಲ್ಲಿ ನಿರೂಪಕ ಹಾಗೂ ನಟ ಸುದೀಪ್, “ಬಿಗ್ ಬಾಸ್ ಮನೆಯಲ್ಲಿ 100 ದಿನಗಳ ಕಾಲ ಉಳಿದು ಗೆಲ್ಲುವುದು ಸುಲಭವಲ್ಲ. ಅದೇ ರೀತಿ ಮುಖ್ಯಮಂತ್ರಿ ಡಿ.ಕೆ. ಶಿವಕುಮಾರ್ ಅವರ ನೇತೃತ್ವದ ನಮ್ಮ ಕರ್ನಾಟಕ ಸರ್ಕಾರವು ರಾಜ್ಯವನ್ನು ಇನ್ನಷ್ಟು ಉತ್ತಮಗೊಳಿಸಲು ಶ್ರಮಿಸುತ್ತಿದೆ. ಒಬ್ಬ ಪ್ರಬಲ ಮತ್ತು ಬದ್ಧತೆಯುಳ್ಳ ನಾಯಕ ಮಾತ್ರ ನೂರು ದಿನಗಳನ್ನು ಪೂರೈಸಿ ಸಂಪೂರ್ಣ ತಂಡವನ್ನು ಮುನ್ನಡೆಸಲು ಸಾಧ್ಯ” ಎಂದು ಅಭಿನಂದಿಸಿದರು.
ಮುಂದುವರಿದು ಮಾತನಾಡುವ ಸುದೀಪ್, ಗ್ರಾಮೀಣ ಹಾಗೂ ನಗರ ಪ್ರದೇಶದ 10 ಲಕ್ಷ ಯುವಜನತೆಗೆ ಕ್ರೀಡೆ, ನಾಯಕತ್ವ ಮತ್ತು ಸಾಮಾಜಿಕ ಸೌಹಾರ್ದತೆಗೆ ವೇದಿಕೆ ಕಲ್ಪಿಸುವ ‘ಭಾರತ್ ಜೋಡೋ ಯೂತ್ ಕ್ಲಬ್’ ಸ್ಥಾಪನೆ ಹಾಗೂ ಸಾರ್ವಜನಿಕರ ಕುಂದುಕೊರತೆ ಪರಿಹರಿಸುವ ‘ಪ್ರಜಾಸೇವೆ’ ಇಲಾಖೆಯ ಪ್ರಾರಂಭವನ್ನು ಉಲ್ಲೇಖಿಸಿದರು. “ಡಿ.ಕೆ. ಶಿವಕುಮಾರ್ ಅವರ ನೇತೃತ್ವವು ಶಕ್ತಿಯುತ ಮತ್ತು ಪ್ರಗತಿಪರ ಕರ್ನಾಟಕವನ್ನು ಕಟ್ಟುವ ದೂರದೃಷ್ಟಿ ಹೊಂದಿದೆ” ಎಂದು ಸರ್ಕಾರದ ವರದಿಯನ್ನು ಬಿಗ್ ಬಾಸ್ ವೇದಿಕೆಯಿಂದ ಪ್ರಸ್ತುತಪಡಿಸುತ್ತಾರೆ.
ಮೇ 2023ರಲ್ಲಿ ಕಾಂಗ್ರೆಸ್ ಅಧಿಕಾರಕ್ಕೆ ಬಂದಾಗ ಸಿದ್ದರಾಮಯ್ಯ ಮುಖ್ಯಮಂತ್ರಿಯಾಗಿ ಹಾಗೂ ಡಿ.ಕೆ. ಶಿವಕುಮಾರ್ ಉಪಮುಖ್ಯಮಂತ್ರಿಯಾಗಿ ಅಧಿಕಾರ ಸ್ವೀಕರಿಸಿದ್ದರು. ಆ ಬಳಿಕ ಅಧಿಕಾರ ಹಂಚಿಕೆ ಕುರಿತು ಸತತ ಚರ್ಚೆಗಳು ನಡೆದು, ಅಂತಿಮವಾಗಿ ಮೇ 2026ರಲ್ಲಿ ಕಾಂಗ್ರೆಸ್ ಹೈಕಮಾಂಡ್ ನಾಯಕತ್ವ ಬದಲಾವಣೆಗೆ ಹಸಿರು ನಿಶಾನೆ ತೋರಿತು. ಮೇ 28ರಂದು ಸಿದ್ದರಾಮಯ್ಯ ರಾಜೀನಾಮೆ ನೀಡಿದ ನಂತರ, ಜೂನ್ 3ರಂದು ಡಿ.ಕೆ. ಶಿವಕುಮಾರ್ ರಾಜ್ಯದ 25ನೇ ಮುಖ್ಯಮಂತ್ರಿಯಾಗಿ ಪ್ರಮಾಣವಚನ ಸ್ವೀಕರಿಸಿದ್ದರು. ಜೂನ್‌ನಲ್ಲಿ ಅಧಿಕಾರ ವಹಿಸಿಕೊಂಡ ಶಿವಕುಮಾರ್, ಸೆಪ್ಟೆಂಬರ್ 10ರಂದು ತಮ್ಮ ಆಡಳಿತದ 100 ದಿನಗಳನ್ನು ಪೂರೈಸಿದರು.
ಸಿದ್ದರಾಮಯ್ಯ ಕಿವಿ ಮಾತು:
ಈ ಮೈಲಿಗಲ್ಲಿನ ನೆನಪಿಗಾಗಿ ವಿಧಾನಸೌಧದಲ್ಲಿ ‘ದೃಢ ಕರ್ನಾಟಕ ಸಂಕಲ್ಪ – ಶತಕದ ಪಥ, ಪ್ರಗತಿಯ ರಥ’ ಎಂಬ ಶೀರ್ಷಿಕೆಯಡಿ ಸರ್ಕಾರದ ಯೋಜನೆಗಳ ಪ್ರದರ್ಶನ ಹಾಗೂ ಸಂಭ್ರಮಾಚರಣೆ ನಡೆಯಿತು. ಕಾರ್ಯಕ್ರಮವನ್ನು ಉದ್ಘಾಟಿಸಿ ಮಾತನಾಡಿದ ಮಾಜಿ ಸಿಎಂ ಸಿದ್ದರಾಮಯ್ಯ, ಸರ್ಕಾರಕ್ಕೆ ತಮ್ಮ ಸಂಪೂರ್ಣ ಬೆಂಬಲ ಘೋಷಿಸುತ್ತಲೇ, ಕಾಂಗ್ರೆಸ್‌ನ ಐದು ಗ್ಯಾರಂಟಿಗಳನ್ನು ಮುಂದುವರಿಸಿಕೊಂಡು ಉಳಿದ ಚುನಾವಣಾ ಭರವಸೆಗಳನ್ನು ಈಡೇರಿಸುವಂತೆ ಕಿವಿಮಾತು ಹೇಳಿದರು. ಮನರಂಜನಾ ಮಾಧ್ಯಮಗಳ ಮೂಲಕ ಸರ್ಕಾರದ ಸಾಧನೆಯನ್ನು ಜನರ ಮನೆಬಾಗಿಲಿಗೆ ತಲುಪಿಸುವ ಈ ವಿಶಿಷ್ಟ ಪ್ರಚಾರ ತಂತ್ರವೀಗ ರಾಜ್ಯ ರಾಜಕೀಯ ಹಾಗೂ ಮಾಧ್ಯಮ ವಲಯದಲ್ಲಿ ವ್ಯಾಪಕ ಚರ್ಚೆಗೆ ಗ್ರಾಸವಾಗಿದೆ.
ಪತ್ರಿಕೆಗಳಿಂದ ಸೀರಿಯಲ್‌ನತ್ತ..
ಸಾಂಪ್ರದಾಯಿಕ ಪತ್ರಿಕಾ ಜಾಹೀರಾತುಗಳು, ಬ್ಯಾನರ್‌ಗಳು ಹಾಗೂ ಸರ್ಕಾರಿ ಕಾರ್ಯಕ್ರಮಗಳ ನಡುವೆ ಪ್ರಸಾರವಾಗುತ್ತಿದ್ದ ಜಾಹೀರಾತುಗಳ ಕಾಲವೀಗ ಬದಲಾಗಿದೆ. ಪ್ರಜೆಗಳ ಮನಸ್ಸನ್ನು ತಲುಪಲು ಅಧಿಕಾರದಲ್ಲಿರುವವರು ಆಯ್ದುಕೊಳ್ಳುವ ಮಾರ್ಗಗಳು ದಿನದಿಂದ ದಿನಕ್ಕೆ ರೂಪಾಂತರಗೊಳ್ಳುತ್ತಿವೆ. ಇದಕ್ಕೆ ಜ್ವಲಂತ ನಿದರ್ಶನ – ಕರ್ನಾಟಕದ ನೂತನ ಮುಖ್ಯಮಂತ್ರಿ ಡಿ.ಕೆ. ಶಿವಕುಮಾರ್ ನೇತೃತ್ವದ ಕಾಂಗ್ರೆಸ್ ಸರ್ಕಾರ ತನ್ನ 100 ದಿನಗಳ ಸಾಧನೆಯನ್ನು ಬಿತ್ತರಿಸಲು ಕಂಡುಕೊಂಡಿರುವ ವಿಶಿಷ್ಟ ‘ಕಿರುತೆರೆ’ ಅಸ್ತ್ರ.
ಹಿಂದೆಂದೂ ಕಾಣದ ರೀತಿಯಲ್ಲಿ ಪ್ರೈಮ್ ಟೈಮ್ ಕನ್ನಡ ಧಾರಾವಾಹಿಗಳ ಪಾತ್ರಗಳ ಬಾಯಲ್ಲೇ ಸರ್ಕಾರದ ‘ಎಐ ಯೂನಿವರ್ಸಿಟಿ’, ‘ಸಿಎಂ ಉದ್ಯೋಗ ಮಿಷನ್’ ನಂತಹ ಯೋಜನೆಗಳನ್ನು ಹೊಗಳಿಸುವುದು, ಬಿಗ್ ಬಾಸ್‌ನಂತಹ ಬೃಹತ್ ರಿಯಾಲಿಟಿ ಶೋಗಳ ನಿರೂಪಕರ ಮೂಲಕವೇ ಸಿಎಂ ನಾಯಕತ್ವಕ್ಕೆ ‘ಶತಕದ ಸಂಭ್ರಮ’ದ ಸರ್ಟಿಫಿಕೇಟ್ ಕೊಡಿಸುವ ಮೂಲಕ, ಸಾರ್ವಜನಿಕರ ದೈನಂದಿನ ಮನರಂಜನಾ ಜಾಗವನ್ನೇ ರಾಜಕೀಯ ಇಮೇಜ್ ಬಿಲ್ಡಿಂಗ್‌ಗಾಗಿ ಬಳಸಿಕೊಳ್ಳುವ ಅತ್ಯಂತ ಪರಿಣಾಮಕಾರಿ ‘ಪಿಆರ್ ಗೇಮ್ ಪ್ಲಾನ್’ ಎಂಬ ಮಾತುಗಳು ಕೇಳಿಬರುತ್ತಿದೆ.
ರಾಷ್ಟ್ರ ಮಟ್ಟದಲ್ಲಿ ಪ್ರಧಾನಿ ನರೇಂದ್ರ ಮೋದಿ ಅವರ ವ್ಯಕ್ತಿತ್ವ ಹಾಗೂ ಸರ್ಕಾರದ ಯೋಜನೆಗಳನ್ನು ತಲುಪಿಸಲು ಅವರ ಪಿಆರ್ ತಂಡಗಳು ಮತ್ತು ಸೋಶಿಯಲ್ ಮೀಡಿಯಾ ವಿಂಗ್‌ಗಳು ಹೆಣೆದ ಬಿಗಿಯಾದ ‘ಬ್ರಾಂಡಿಂಗ್’ ಮಾದರಿಯನ್ನೇ ಈಗ ಕರ್ನಾಟಕದಲ್ಲಿ ಡಿ.ಕೆ. ಶಿವಕುಮಾರ್ ಅವರ ಸೋಷಿಯಲ್ ಮೀಡಿಯಾ, ಪಿಆರ್ ಟೀಮ್ ಹಾಗೂ ಡಿಜಿಟಲ್ ವಿಂಗ್‌ಗಳಲ್ಲಿ ಕಾಣಬಹುದು ಎಂಬ ಮಾತುಗಳು ಕೇಳಿಬರುತ್ತಿವೆ. ರಾಜಕೀಯ ನಾಯಕನೊಬ್ಬನನ್ನು ಕೇವಲ ನಾಯಕನನ್ನಾಗಿ ನೋಡದೆ, ಪ್ರತಿಯೊಬ್ಬ ಕನ್ನಡಿಗನ ಮನೆಯ ಭಾಗವಾಗಿಸುವ ನಿಟ್ಟಿನಲ್ಲಿ ಈ ತಂತ್ರಗಾರಿಕೆ ಸಾಗಿದೆ.
ಪತ್ರಿಕೆಗಳ ಮುಖಪುಟಗಳಲ್ಲಿ ಜಾಹೀರಾತು ನೀಡಿದರೆ ಅದನ್ನು ‘ರಾಜಕೀಯ ಪ್ರಚಾರ’ ಎಂದು ಪರಿಗಣಿಸಿ ಓದುಗರು ದಾಟಿಹೋಗುವ ಸಾಧ್ಯತೆ ಇರುತ್ತದೆ. ಆದರೆ, ಜನ ಇಷ್ಟಪಟ್ಟು ನೋಡುವ ಧಾರಾವಾಹಿಯ ಕಥೆಯೊಳಗೆ, ನೆಚ್ಚಿನ ನಟನ ಮಾತುಗಳ ನಡುವೆ ಸರ್ಕಾರದ ಸಾಧನೆಯನ್ನು ‘ಕಥೆಯ ಭಾಗ’ವಾಗಿಸಿ, ನೈಜ ಪ್ರಗತಿಯಂತೆ ತಲುಪುವ ತಂತ್ರವನ್ನೇ ಡಿ.ಕೆ.ಶಿವಕುಮರ್ ಅವರ ಪಿಆರ್ ತಂಡ ಅತ್ಯಂತ ಯಶಸ್ವಿಯಾಗಿ ಪ್ರಯೋಗಿಸಿದೆ. ಏನೇ ಇರಲಿ, ಸಾಂಪ್ರದಾಯಿಕ ಪ್ರಚಾರದ ಮಜಲನ್ನು ದಾಟಿ, ‘ಪ್ಯಾಕೇಜ್ಡ್ ಬಿಲ್ಡಪ್’ ಮೂಲಕ ಜನಸಾಮಾನ್ಯರನ್ನು ಆಕರ್ಷಿಸುವ ಡಿ.ಕೆ. ಶಿವಕುಮಾರ್ ಅವರ ಈ ಹೊಸ ಅಸ್ತ್ರವು, ಮುಂಬರುವ ದಿನಗಳಲ್ಲಿ ಕರ್ನಾಟಕ ರಾಜಕೀಯದ ತಂತ್ರಗಾರಿಕೆಯ ಹೊಸ ಮಾನದಂಡವಾಗುವುದಂತೂ ನಿಶ್ಚಿತ.
