ಭವಿಷ್ಯದಲ್ಲಿ ಬೃಹತ್ ಯುದ್ಧವೇನಾದರೂ ಸಂಭವಿಸಿದರೆ ಅದು ಕೇವಲ ಭೂಮಿ, ಸಮುದ್ರ ಮತ್ತು ವಾಯುಮಾರ್ಗಕ್ಕೆ ಮಾತ್ರ ಸೀಮಿತವಾಗದೆ ಬಾಹ್ಯಾಕಾಶಕ್ಕೂ ವಿಸ್ತರಿಸಲಿದೆ ಎಂಬುದನ್ನು ಸಾಬೀತುಪಡಿಸುವ ರೀತಿಯಲ್ಲಿ ಅಮೆರಿಕ ಹೇಳಿಕೊಂಡಿದೆ. ಭೂಮಿಯ ಕಕ್ಷೆಯಲ್ಲಿ ತಾನು ಮಿಲಿಟರಿ ಶಸ್ತ್ರಾಸ್ತ್ರಗಳನ್ನು ನಿಯೋಜಿಸಿರುವುದನ್ನು ಅಮೆರಿಕ ಸರ್ಕಾರ ಇದೇ ಮೊದಲ ಬಾರಿಗೆ ಬಹಿರಂಗವಾಗಿ ಒಪ್ಪಿಕೊಂಡಿದ್ದು, ಈ ಬೆಳವಣಿಗೆಯು ಜಾಗತಿಕ ರಕ್ಷಣಾ ವಲಯದಲ್ಲಿ ಹೊಸ ಚರ್ಚೆಗೆ ನಾಂದಿ ಹಾಡಿದೆ.
ವಾಷಿಂಗ್ಟನ್ ಸಮೀಪ ನಡೆದ ವಾಯು, ಬಾಹ್ಯಾಕಾಶ ಮತ್ತು ಸೈಬರ್ ಸಮ್ಮೇಳನದಲ್ಲಿ ಮಾತನಾಡಿದ ಅಮೆರಿಕ ವಾಯುಪಡೆಯ ಕಾರ್ಯದರ್ಶಿ ಟ್ರಾಯ್ ಮೀಂಕ್, ಅಮೆರಿಕದ ಬಳಿ ಕಕ್ಷೆಯಲ್ಲೇ ಕಾರ್ಯನಿರ್ವಹಿಸುವ ‘ಬಾಹ್ಯಾಕಾಶ ನಿಯಂತ್ರಣ ಶಸ್ತ್ರಾಸ್ತ್ರಗಳು’ ಲಭ್ಯವಿವೆ ಎಂದು ಪ್ರಕಟಿಸಿದ್ದಾರೆ. ಆದರೆ, ರಕ್ಷಣಾ ಇಲಾಖೆಯಾದ ಪೆಂಟಗನ್ ಈ ಶಸ್ತ್ರಾಸ್ತ್ರಗಳ ಸ್ವರೂಪ, ಅವುಗಳ ನಿಯೋಜನೆಯ ಕಾಲಘಟ್ಟ ಹಾಗೂ ಕಾರ್ಯಾಚರಣೆಯ ಸಾಮರ್ಥ್ಯದ ಕುರಿತು ಯಾವುದೇ ತಾಂತ್ರಿಕ ವಿವರಗಳನ್ನು ನೀಡಲು ನಿರಾಕರಿಸಿದೆ.
ಪ್ಯಾರಿಸ್‌ನಲ್ಲಿ ನಡೆದ ರಕ್ಷಣಾ ಸಮಾವೇಶದಲ್ಲಿ ಮಾತನಾಡಿದ ಅಮೆರಿಕ ಸ್ಪೇಸ್ ಕಮಾಂಡ್‌ನ ಅಧಿಕಾರಿ ರಿಚರ್ಡ್ ಪಾಮರ್, “ಎದುರಾಳಿ ದೇಶಗಳನ್ನು ತಡೆಯಲು ಮತ್ತು ಅಮೆರಿಕದ ಮಿತ್ರರಾಷ್ಟ್ರಗಳ ಸುರಕ್ಷತೆಗೆ ಬಾಹ್ಯಾಕಾಶದಲ್ಲಿನ ರಕ್ಷಣಾ ಸಾಮರ್ಥ್ಯವನ್ನು ಬಹಿರಂಗಪಡಿಸುವುದು ಅಗತ್ಯವಾಗಿತ್ತು” ಎಂದು ಬಣ್ಣಿಸಿದ್ದಾರೆ.
ಆಧುನಿಕ ಯುದ್ಧತಂತ್ರದಲ್ಲಿ ಜಿಪಿಎಸ್ (GPS), ಕ್ಷಿಪಣಿ ದಾಳಿಯ ಮುನ್ನೆಚ್ಚರಿಕೆ, ಸೈನಿಕರ ಸುರಕ್ಷಿತ ಸಂವಹನ, ಕಣ್ಗಾವಲು ಹಾಗೂ ಗುಪ್ತಚರ ಮಾಹಿತಿ ಸಂಗ್ರಹಣೆಗೆ ಉಪಗ್ರಹಗಳೇ ಬೆನ್ನೆಲುಬು. ಹೀಗಾಗಿ ಎದುರಾಳಿ ದೇಶದ ಉಪಗ್ರಹಗಳ ಕಾರ್ಯನಿರ್ವಹಣೆಯನ್ನು ನಿಷ್ಕ್ರಿಯಗೊಳಿಸಿದರೆ ಆ ದೇಶದ ಸೇನೆಯನ್ನು ಸಂಪೂರ್ಣವಾಗಿ ಕಟ್ಟಿಹಾಕಬಹುದು.
ಈ ಕಾರಣಕ್ಕಾಗಿ ಪ್ರಮುಖ ಜಾಗತಿಕ ಶಕ್ತಿಗಳು ಉಪಗ್ರಹಗಳ ಸಂಕೇತ ತಡೆಯುವುದು (Jamming), ಲೇಸರ್ ಮೂಲಕ ಸೆನ್ಸಾರ್‌ಗಳನ್ನು ಬಂದ್ ಮಾಡುವುದು ಮತ್ತು ನಿಯಂತ್ರಣ ಕೇಂದ್ರಗಳ ಮೇಲೆ ದಾಳಿ ನಡೆಸುವ ತಂತ್ರಜ್ಞಾನಗಳನ್ನು ವೃದ್ಧಿಸಿಕೊಳ್ಳುತ್ತಿವೆ. ಚೀನಾ ಮತ್ತು ರಷ್ಯಾ ದೇಶಗಳು ಅಮೆರಿಕದ ಬಾಹ್ಯಾಕಾಶ ಸಂಪನ್ಮೂಲಗಳನ್ನು ಗುರಿಯಾಗಿಸುವ ತಂತ್ರಜ್ಞಾನ ಅಭಿವೃದ್ಧಿಪಡಿಸುತ್ತಿವೆ ಎಂಬ ಆತಂಕದ ನಡುವೆ, 2019ರಲ್ಲಿ ಸ್ಥಾಪನೆಯಾದ ಅಮೆರಿಕದ ‘ಸ್ಪೇಸ್ ಫೋರ್ಸ್’ ಈಗ ಹೆಜ್ಜೆಯಿಟ್ಟು ತನ್ನ ಕಕ್ಷೀಯ ಶಸ್ತ್ರಾಸ್ತ್ರಗಳನ್ನು ರಕ್ಷಣೆಗೆ ಸಜ್ಜುಗೊಳಿಸಿದೆ.
1967ರ ಬಾಹ್ಯಾಕಾಶ ಒಪ್ಪಂದವು (Outer Space Treaty) ಕಕ್ಷೆಯಲ್ಲಿ ಸಾಮೂಹಿಕ ವಿನಾಶದ ಅಣ್ವಸ್ತ್ರಗಳನ್ನು ಇರಿಸುವುದನ್ನು ನಿಷೇಧಿಸುತ್ತದೆಯಾದರೂ, ಸಾಂಪ್ರದಾಯಿಕ ಶಸ್ತ್ರಾಸ್ತ್ರಗಳನ್ನು ನಿಯೋಜಿಸುವುದಕ್ಕೆ ಸಂಪೂರ್ಣ ನಿಷೇಧ ಹೇರಿಲ್ಲ. ಈ ಕಾನೂನಿನ ಸೂಕ್ಷ್ಮತೆಯನ್ನು ಬಳಸಿಕೊಂಡು ಅಮೆರಿಕ ಮಾತ್ರವಲ್ಲದೆ ಜರ್ಮನಿಯಂತಹ ದೇಶಗಳೂ ಸಹ 40 ಬಿಲಿಯನ್ ಡಾಲರ್ ವೆಚ್ಚದ ಮಿಲಿಟರಿ ಬಾಹ್ಯಾಕಾಶ ಯೋಜನೆಗಳನ್ನು ಸಿದ್ಧಪಡಿಸುತ್ತಿವೆ.
ಇತ್ತೀಚೆಗೆ ಅಮೆರಿಕ ಕೈಗೊಂಡ ‘ಅಪೊಲೊ ಮ್ಯಾನುವರ್ಸ್’ ಕಕ್ಷೀಯ ಅಭ್ಯಾಸವು ಬಾಹ್ಯಾಕಾಶ ಸನ್ನದ್ಧತೆಗೆ ಸಾಕ್ಷಿಯಾಗಿದೆ. ಒಟ್ಟಿನಲ್ಲಿ, ಅಮೆರಿಕದ ಈ ಒಪ್ಪಿಗೆಯಿಂದಾಗಿ ಬಾಹ್ಯಾಕಾಶವು ಕೇವಲ ಸಂಶೋಧನೆಯ ತಾಣವಾಗುಳಿಯದೆ, ಜಾಗತಿಕ ಸೂಪರ್ ಪವರ್‌ಗಳ ಸಂಭಾವ್ಯ ಯುದ್ಧಭೂಮಿಯಾಗಿ ಬದಲಾಗುತ್ತಿರುವುದು ಸ್ಪಷ್ಟವಾಗಿದೆ.
