ಅಲಿಗಢ ಮುಸ್ಲಿಂ ವಿಶ್ವವಿದ್ಯಾಲಯದಲ್ಲಿ (AMU) ನಡೆದ ವಿದ್ಯಾರ್ಥಿ ಪ್ರತಿಭಟನೆಯ ವೇಳೆ ಪ್ಯಾಲೆಸ್ತೀನ್ ಪರ ಘೋಷಣೆಗಳನ್ನು ಕೂಗಿದ ಘಟನೆಯನ್ನು ವರದಿ ಮಾಡುವಾಗ ಪ್ರಸಾರ ನೀತಿ ಸಂಹಿತೆಯನ್ನು ಉಲ್ಲಂಘಿಸಿದೆ ಎಂದು ಪರಿಗಣಿಸಿ, ‘ಝೀ ನ್ಯೂಸ್’ (Zee News) ವಾಹಿನಿಗೆ ‘ನ್ಯೂಸ್ ಬ್ರಾಡ್ಕಾಸ್ಟಿಂಗ್ ಅಂಡ್ ಡಿಜಿಟಲ್ ಸ್ಟ್ಯಾಂಡರ್ಡ್ಸ್ ಅಥಾರಿಟಿ’ (NBDSA) 2 ಲಕ್ಷ ರೂಪಾಯಿ ದಂಡ ವಿಧಿಸಿದೆ.
ಸುಪ್ರೀಂ ಕೋರ್ಟ್ನ ನಿವೃತ್ತ ನ್ಯಾಯಮೂರ್ತಿ ಎ.ಕೆ. ಸಿಕ್ರಿ ಅವರ ಅಧ್ಯಕ್ಷತೆಯ ಪ್ರಾಧಿಕಾರವು ಈ ಕುರಿತು ಆದೇಶ ಹೊರಡಿಸಿದೆ ಎಂದು livelaw.in ವರದಿ ಮಾಡಿದೆ.
ವಿವಾದಿತ ದೃಶ್ಯಾವಳಿಗಳನ್ನು (ಪ್ರಸಾರಗಳಿಗೆ ಪ್ರವೇಶ ಕಲ್ಪಿಸುವ ಹೈಪರ್ಲಿಂಕ್ಗಳು ಸೇರಿದಂತೆ) ತನ್ನ ವೆಬ್ಸೈಟ್, ಯೂಟ್ಯೂಬ್ ಮತ್ತು ಇತರ ಚಾನೆಲ್ ವೇದಿಕೆಗಳಿಂದ ತೆಗೆದುಹಾಕುವಂತೆಯೂ ಪ್ರಾಧಿಕಾರವು ‘ಝೀ ನ್ಯೂಸ್’ಗೆ ನಿರ್ದೇಶನ ನೀಡಿದೆ.
2025ರ ಆಗಸ್ಟ್ 16ರಂದು ಪ್ರಸಾರವಾದ “ದೇಶ್ಹಿತ್ : ಎಎಂಯು ಮೇ ‘ಫಿಲಿಸ್ತೀನ್ ಪ್ರೇಮಿ ಗ್ಯಾಂಗ್’.. ‘ಯೋಗಿ ಸ್ಟೈಲ್’ ಮೇ ಹೋಗಾ ಇಲಾಜ್!” ಮತ್ತು “ಡಿಎನ್ಎ: ಫೀಸ್ ಮಾಫಿ ವಾಲೆ ಆಂದೋಲನ್ ಮೇ ಫಿಲಿಸ್ತೀನ್ ಜಿಂದಾಬಾದ್ ಕಹಾ ಸೆ ಆ ಗಯಾ? ಅಲಿಗಢ್ ಮುಸ್ಲಿಂ ಯೂನಿವರ್ಸಿಟಿ” ಸೇರಿದಂತೆ ಹಲವು ಕಾರ್ಯಕ್ರಮಗಳ ವಿರುದ್ಧ ತಲ್ಹಾ ಮನ್ನನ್ ಎಂಬುವವರು ಸಲ್ಲಿಸಿದ್ದ ದೂರಿನ ಮೇರೆಗೆ ಈ ಆದೇಶವನ್ನು ಹೊರಡಿಸಲಾಗಿದೆ ಎಂದು ವರದಿ ತಿಳಿಸಿದೆ.
ಮೌಲಾನಾ ಆಝಾದ್ ರಾಷ್ಟ್ರೀಯ ಉರ್ದು ವಿಶ್ವವಿದ್ಯಾಲಯದ (MANU) ಪಿಎಚ್ಡಿ ಸಂಶೋಧನಾ ವಿದ್ಯಾರ್ಥಿ ಹಾಗೂ ಎಎಂಯುನ ಹಳೆ ವಿದ್ಯಾರ್ಥಿಯಾಗಿರುವ ಮನ್ನನ್, ಶುಲ್ಕ ಏರಿಕೆಯ ವಿರುದ್ಧ ಮತ್ತು ವಿದ್ಯಾರ್ಥಿ ಸಂಘವನ್ನು ಮರುಸ್ಥಾಪಿಸುವಂತೆ ಆಗ್ರಹಿಸಿ 2025ರ ಆಗಸ್ಟ್ 12ರಂದು ನಡೆದ ಶಾಂತಿಯುತ ವಿದ್ಯಾರ್ಥಿ ಪ್ರತಿಭಟನೆಯಲ್ಲಿ ಸುಮಾರು 18 ನಿಮಿಷಗಳ ಕಾಲ ಭಾಷಣ ಮಾಡಿದ್ದರು.
ನಂತರ ‘ಝೀ ನ್ಯೂಸ್’ (Zee News) ಪ್ರತಿಭಟನೆಯ ವೇಳೆ ಕೂಗಲಾದ ಘೋಷಣೆಗಳ ಆಯ್ದ 10-15 ಸೆಕೆಂಡುಗಳ ದೃಶ್ಯಾವಳಿಗಳನ್ನು ಪ್ರಸಾರ ಮಾಡಿತ್ತು. ಆ ಮೂಲಕ ಪ್ಯಾಲೆಸ್ತೀನ್ ಪರವಾಗಿ ವ್ಯಕ್ತಪಡಿಸಿದ ಕಾನೂನುಬದ್ಧ ಬೆಂಬಲವನ್ನು ಅಪರಾಧ ಅಥವಾ ದೇಶವಿರೋಧಿ ಕೃತ್ಯವೆಂಬಂತೆ ಬಿಂಬಿಸಿತ್ತು ಎಂದು ಅವರು ಆರೋಪಿಸಿದ್ದರು.
“ಝೀ ನ್ಯೂಸ್ ಪ್ರತಿಭಟನೆಯ ಮುಖ್ಯ ಉದ್ದೇಶವಾದ ‘ಶುಲ್ಕ ಹೆಚ್ಚಳ’ವನ್ನು ಕೈಬಿಟ್ಟು, ಪ್ಯಾಲೆಸ್ತೀನ್ ಪರ ಘೋಷಣೆಗಳ ಮೇಲೆ ಗಮನಹರಿಸುವ ಮೂಲಕ, ಆ ಪ್ರತಿಭಟನೆಯು ಪ್ಯಾಲೆಸ್ತೀನ್ ಯುದ್ಧಕ್ಕೆ ಸಂಬಂಧಿಸಿದ್ದಾಗಿದೆ ಎಂಬ ಭಾವನೆಯನ್ನು ಮೂಡಿಸಿದೆ” ಎಂದು NBDSA ಹೇಳಿದೆ.
“ಎಎಂಯುನಲ್ಲಿ ಪ್ಯಾಲೆಸ್ತೀನ್ ಪರ ಗುಂಪು” ಮತ್ತು “ಯೋಗಿ ಶೈಲಿಯಲ್ಲಿ ಚಿಕಿತ್ಸೆ ನೀಡಲಾಗುವುದು” ಮುಂತಾದ ಪರದೆಯ ಮೇಲಿನ ಬರಹಗಳನ್ನೂ (tickers) ಪ್ರಾಧಿಕಾರವು ಪರಿಶೀಲಿಸಿದ್ದು, ಈ ರೀತಿಯ ಪ್ರಸಾರವು ಘಟನೆಗೆ ಪ್ರಚೋದನಾಕಾರಿ ಸ್ವರೂಪವನ್ನು ನೀಡಿದ್ದಲ್ಲದೆ, ನಿಷ್ಪಕ್ಷಪಾತ ವರದಿಯ ಬದಲಿಗೆ ಅಪರಾಧ ಕೃತ್ಯದಂತಹ ಕ್ರಮವನ್ನು ಸಮರ್ಥಿಸುವಂತಿದೆ” ಎಂದು ಅದು ಅಭಿಪ್ರಾಯಪಟ್ಟಿದೆ.
“ಪರಿಣಾಮವಾಗಿ, ಪ್ರಸಾರಕರಿಗೆ (ಝೀ ನ್ಯೂಸ್) 2 ಲಕ್ಷ ರೂಪಾಯಿ ದಂಡ ವಿಧಿಸಲು NBDSA ನಿರ್ಧರಿಸಿದೆ” ಎಂದು ಆದೇಶದಲ್ಲಿ ತಿಳಿಸಲಾಗಿದೆ.
ದೂರುದಾರರು ಜವಾಬ್ದಾರಿಯುತವಾಗಿ ವರ್ತಿಸಿದ್ದಾರೆ ಹಾಗೂ ಪರಿಹಾರ ಪಡೆಯುವ ಎರಡೂ ಹಂತಗಳಲ್ಲಿ ದೂರು ಸಲ್ಲಿಸುವಾಗ ಉಂಟಾದ ವಿಳಂಬಕ್ಕೆ ಅವರು ನೇರ ಕಾರಣರಲ್ಲ ಎಂದು ಗಮನಿಸಿದ ಪ್ರಾಧಿಕಾರವು, ಆ ವಿಳಂಬವನ್ನು ಮನ್ನಿಸಿದೆ.
Cortesy : livelaw.in
